အိုမီခရွန်

April 14, 2022

ကမ္ဘာတဝန်း ကိုဗစ်-၁၉ ကူးစက်မှု သန်း ၅၀၀ နီးပါး၊ သေဆုံးသူ ၆ သန်းကျော်ရှိဟု WHO ထုတ်ပြန်

ကမ္ဘာတဝန်းမှာ ဧပြီ ၁၃ ရက်ထိ ကိုဗစ်-၁၉ ကပ်ရောဂါ ကူးစက်ခံဦးရေ စုစုပေါင်း သန်း ၅၀၀ နား နီးလာပြီး သေဆုံးသူဦးရေက ၆ ဒသမ ၁၈ သန်း ကျော်လာပြီလို့ ကမ္ဘာ့ကျန်းမာရေးအဖွဲ့ကြီး (WHO) က ထုတ်ပြန်တဲ့ နောက်ဆုံးရ သတင်းအချက်အလက်တွေက ဆိုပါတယ်။

WHO က ဧပြီ ၁၂ ရက်မှာ ထုတ်ပြန်တဲ့ နောက်ဆုံးရ ကူးစက်မှု အစီရင်ခံစာထဲမှာ ကိုဗစ်-၁၉ ကူးစက်ခံ အတည်ပြုလူနာ စုစုပေါင်း ၄၉၇ သန်း ကျော်လာပြီး သေဆုံးသူ စုစုပေါင်းဦးရေက ၆ ဒသမ ၁၈ သန်း ကျော်နေပါပြီ။

အဲဒီထဲမှာ ဧပြီ ၄ ရက်ကနေ ၁၀ ရက်အတွင်း ကမ္ဘာတလွှား ကူးစက်ခံ ၇ ဒသမ ၂၂ သန်း ရှိခဲ့လို့ အရင်သီတင်းပတ်ကထက် ၂၄ ရာခိုင်နှုန်း တိုးလာတာပါ။ သေဆုံးသူအသစ် ဦးရေကတော့ အရင်အပတ်ကထက် ၁၈ ရာခိုင်နှုန်း ကျဆင်းခဲ့ပါတယ်။

နိုင်ငံအများအပြားက ကိုဗစ်-၁၉ ကူးစက်ခံ ဟုတ်မဟုတ် စစ်ဆေးတဲ့ အရေအတွက် လျှော့ချခဲ့ပေမဲ့ ကမ္ဘာတလွှား ကူးစက်နှုန်းက ဆက်မြင့်နေတယ်လို့လည်း အစီရင်ခံစာက ပြောပါတယ်။

ကာကွယ်ဆေး မထိုးရသေးတဲ့ လူတွေကြားမှာ ကူးစက်ခံရမယ့်ဘေးက မြင့်နေသလို သေဆုံးနှုန်းလည်း ဆက်မြင့်နေတုန်းပဲလို့ အစီရင်ခံစာက ပြောပါတယ်။

ပိုကူးစက်မြန်တဲ့ အိုမီခရွန် ဗီဇမျိုးကွဲဟာ တခြားမျိုးကွဲတွေရဲ့ ကူးစက်နှုန်းကို အမြန်ကျော်ဖြတ်ပြီး ခုတော့ ကမ္ဘာတလွှား ကူးစက်လွှမ်းမိုးတဲ့ ဗီဇမျိုးကွဲ ဖြစ်လာခဲ့တယ်လို့လည်း အစီရင်ခံထားပါတယ်။

2 months Ago

April 8, 2022

အိန္ဒိယတွင် အိုမီခရွန် XE ဗီဇမျိုးကွဲ ကူးစက်ခံရသည့် ပထမဆုံးလူနာတွေ့

အိန္ဒိယနိုင်ငံမှာ ကိုဗစ်-၁၉  ကပ်ရောဂါ အိုမီခရွန် XE ဗီဇမျိုးကွဲ ပထမဆုံး ကူးစက်ခံရတဲ့လူနာ တွေ့ရှိခဲ့ပြီး ရောဂါအသည်းအသန် အခြေအနေမရှိဘူးလို့ ဒေသခံ ကျန်းမာရေး အရာရှိတယောက်ကို ကိုးကားပြီး စီစီတီဗွီ သတင်းဌာနက ဧပြီ ၇ ရက်မှာ ထုတ်ပြန်ပါတယ်။

တောင်အာဖရိကကနေ ဖေဖော်ဝါရီ ၁၀ ရက်က ပြန်လာတဲ့ မွမ်ဘိုင်းမြို့က အသက် ၅၀ အရွယ် အမျိုးသမီးလူနာဟာ ကာကွယ်ဆေးအားလုံး ထိုးပြီးသားလို့လည်း ဆိုပါတယ်။

မွမ်ဘိုင်းမြို့မှာ စမ်းသပ်ခံ အယောက် ၂၃၀ ထဲမှာ ၂၂၈ ယောက်က အိုမီခရွန် ဗီဇမျိုးကွဲ ကူးစက်ခံထားရပြီး တယောက်က ကပ်ပါ ဗီဇမျိုးကွဲနဲ့ နောက်တယောက်က အိုမီခရွန် XE ဗီဇမျိုးကွဲ ကူးစက်ခံထားရတာလို့ ကျန်းမာရေးအရာရှိက ပြောပါတယ်။

ဗီဇမျိုးကွဲသစ် အိုမီခရွန် XE ကူးစက်ခံလူနာရဲ့ အခြေအနေက အသည်းအသန်တော့ မဟုတ်ဘူးလို့ အရာရှိက ပြောပါတယ်။ ဒါပေမဲ့  XE ဗီဇမျိုးကွဲသစ်ဟာ အိုမီခရွန်ရဲ့ BA.2 ဗီဇမျိုးကွဲထက် ၁၀ ရာခိုင်နှုန်း ပိုကူးစက်လွယ်ပါတယ်။

XE ဗီဇမျိုးကွဲသစ် မတွေ့ခင်က BA.2 ဟာ ကိုဗစ်-၁၉ ကပ်ရောဂါရဲ့ ဗီဇမျိုးကွဲ အားလုံးထဲမှာ ကူးစက်နိုင်ဆုံးလို့ အစက မှတ်သားထားခဲ့ကြတာလို့ အရာရှိက ပြောပါတယ်။

XE ဗီဇမျိုးကွဲကို ဗြိတိန်မှာ ဒီနှစ်စပိုင်းက ပထမဆုံး ထောက်လှမ်းတွေ့ရှိခဲ့တာပါ။ XE ဗီဇမျိုးကွဲဟာ ပိုကူးစက်နိုင်တယ်ဆိုတဲ့ ကနဦး သတင်းအချက်အလက်တွေကို မတ် ၂၉ ရက် အစီရင်ခံစာမှာ ထည့်သွင်းထားပေမယ့် အတည်ပြုဖို့ ပိုများတဲ့ အချက်အလက်တွေ လိုနေသေးတယ်လို့ ကမ္ဘာ့ကျန်းမာရေးအဖွဲ့ကြီး (WHO) က ပြောထားပါတယ်။

3 months Ago
More News
Up