အိုနာနာ

June 30, 2020

ကစားသမား ၃ ဦး ရောင်းချမည်ဟု အေဂျက်ဇ်နည်းပြ ပြော

အေဂျက်ဇ်ကစားသမား ၃ ဦးကို မှန်ကန်တဲ့ ဈေးနှုန်းရရှိရင် ရောင်းချသွားဖို့ရှိတယ်လို့ အသင်းနည်းပြ တမ်ဟက်ချ်က ဝန်ခံလိုက်ပါတယ်။  ကွင်းလယ်လူ ဗန်ဒါဘိခ်၊ ဂိုးသမား အိုနာနာနဲ့ နောက်ခံလူ တက်ဂ်လီယာဖီကိုတို့ ဖြစ်ပြီး ကစားသမားတွေနဲ့လည်း သဘောတူညီမှုတခု ရရှိထားတယ်လို့ သိရပါတယ်။  ဟော်လန်ကွင်းလယ်လူ ဗန်ဒါဘိခ်ကို ရီးရဲလ်မက်ဒရစ်နဲ့ မန်ယူအသင်းတို့က ခေါ်ယူဖို့ စိတ်ဝင်စားနေကြောင်း အသင်းစီအီးအို ဗန်ဒါးဆာက အတည်ပြုထားပါတယ်။  ကင်မရွန်းဂိုးသမား အိုနာနာကိုလည်း ချဲလ်ဆီးအသင်းကခေါ်ယူလိုနေတာပါ။ အာဂျင်တီးနား ဘယ်နောက်ခံလူ နီကိုလပ် တက်ဂ်လီယာဖီကို ချဲလ်ဆီးနဲ့ အာဆင်နယ်တို့က ခေါ်ယူဖို့ စိတ်ဝင်စားနေတယ်လို့ သိရပါတယ်။  အဲဒီ ကစားသမား ၃ ဦးဟာ သူတို့ရဲ့ စွမ်းဆောင်ရည်နဲ့ ရည်မှန်းချက်အလိုက် တခြားလိဂ်မှာ ပြောင်းရွှေ့ကစားလိုကြတယ်လို့ အေဂျက်ဇ်နည်းပြက ပြောပါတယ်။  အေဂျက်ဇ်အသင်းဟာ ပြီးခဲ့တဲ့နှစ်က ချန်ပီယံလိဂ် ဆီမီးဖိုင်နယ် တက်ရောက်ခဲ့ပြီး ခြေစွမ်းပြသနိုင်ခဲ့တဲ့ ဖရန့်ကီဒီယွန်း၊ ဒီလစ်တို့ကို ရောင်းချခဲ့ပါတယ်။ အခုနှစ်မှာလည်း တိုက်စစ်မှူး ဇီယက်ချ်ကို ချဲလ်ဆီးအသင်းဆီ ရောင်းချထားပြီး ဖြစ်ပါတယ်။
12 months Ago

April 19, 2020

ဂိုးသမား အိုနာနာအတွက် ပြောင်းရွှေ့ကြေး ပေါင် ၃၅ သန်း  အေဂျက်ဇ်သတ်မှတ်

ဟော်လန်ကလပ် အေဂျက်ဇ်အသင်းဟာ ဂိုးသမား အန်ဒရီအိုနာနာအတွက် ပြောင်းရွှေ့ကြေး ပေါင် ၃၅ သန်း ဈေးနှုန်း သတ်မှတ်ထားလိုက်ပါတယ်။  အသက် ၂၄ နှစ်ရှိ အေဂျက်ဇ် ဂိုးသမား အိုနာနာဟာ  အသင်းမှာ လက်စွမ်းပြနေတာကြောင့် ဥရောပထိပ်တန်းကလပ်တွေက ခေါ်ယူလိုနေတာပါ။ ကင်းမရွန်းဂိုးသမား အိုနာနာကို ဘာစီလိုနာ၊ ပီအက်စ်ဂျီနဲ့ ချဲလ်ဆီးအသင်းတွေက ခေါ်ယူဖို့ စိတ်ဝင်စားနေပါတယ်။ ချဲလ်ဆီးအသင်းကတော့ ပေါင် ၇၁ သန်းပေးပြီး ခေါ်ယူခဲ့တဲ့ ဂိုးသမားကတ်ပါရဲ့ နေရာမှာ အစားထိုးဖို့အတွက် အိုနာနာကို ခေါ်ယူလိုတာပါ။  ဘာစီလိုနာ အကယ်ဒမီထွက် ဂိုးသမားတဦးဖြစ်တဲ့ အိုနာနာဟာ ဥရောပပြိုင်ပွဲတွေမှာ ပြသခဲ့တဲ့ သူ့ရဲ့လက်စွမ်းကြောင့် အနာဂတ်မှာ ထွန်းတောက်လာမယ့် ဂိုးသမားတဦးအဖြစ် သတ်မှတ်ခံထားရသူ ဖြစ်ပါတယ်။
1 year Ago
Up