အိန္ဒိယစစ်သည်

A d v e r t i s e m e n t With Us

August 16, 2020

အိန္ဒိယစစ်သည်များ နယ်စပ်တွင် လွတ်လပ်ရေးနေ့အခမ်းအနားကျင်းပ

တရုတ်နဲ့ပိုင်နက်အငြင်းပွားနေတဲ့ အိန္ဒိယနယ်စပ်မှာ အိန္ဒိယစစ်သည်တွေ လွတ်လပ်ရေးနေ့ အခမ်းအနားကို  သြဂုတ်လ ၁၅ ရက်က ကျင်းပပါတယ်။ တရုတ်နဲ့ အိန္ဒိယ နှစ်နိုင်ငံအကြား ဆယ်စုနှစ်တွေအတွင်း အဆိုးဆုံးပဋိပက္ခဖြစ်ခဲ့တဲ့ ပိုင်နက်အငြင်းပွားရာ လာဒက်ခ်နယ်စပ်မှာ အိန္ဒိယစစ်သည်တွေက နိုင်ငံတော်အလံကို လွှင့်ထူပြီး ကြွေးကြော်သံတွေ ဟစ်ကြွေးခဲ့တာပါ။ ပြီးခဲ့တဲ့ ဇွန်လက လာဒက်ခ်ဒေသ ဂယ်လ်ဝမ်တောင်ကြားမှာ သေနတ်မသုံးတဲ့ ရိုက်ပွဲအတွင်း အိန္ဒိယစစ်သည် အယောက်၂၀ သေဆုံးအပြီး တရုတ်-အိန္ဒိယ နှစ်နိုင်ငံ ဆက်ဆံရေး ထိခိုက်ကျဆင်း သွားခဲ့ပါတယ်။ အဲဒီနောက် နှစ်နိုင်ငံ အစိုးရတွေဟာ တည်ငြိမ်မှု ပြန်ရရေး တောင်ကြားက စစ်သည် အင်အား ကို လျှော့ချခဲ့တဲ့အပြင် ဆွေးနွေးပွဲတွေ အကြိမ်ရေအတော်များများ ကျင်းပခဲ့ကြပါတယ်။ တရုတ်ကို မရည်ညွှန်းပေမယ့် အိန္ဒိယဝန်ကြီးချုပ် နရင်ဒြာမိုဒီက နိုင်ငံရဲ့အချုပ်အခြာဟာ အထွဋ်အထိပ်ပဲလို့ ပြောခဲ့ပါတယ်။ ကျနော်တို့ရဲ့ စစ်သည်တွေဟာ တိုင်းပြည်ရဲ့အချုပ်အခြာအပေါ် ရန်လိုမှုကို သူတို့ရဲ့ ဘာသာစကားနဲ့ တုံ့ပြန်ခဲ့ကြတယ်လို့ မိုဒီက လွတ်လပ်ရေးနေ့မိန့်ခွန်းအတွင်း စနေနေ့က ပြောပါတယ်။ ၁၉၆၂ တရုတ်-အိန္ဒိယစစ်ပွဲအပြီး နယ်စပ်ထိန်းချုပ်ရေးမျဉ်းကို ရေးဆွဲခဲ့ပေမယ့် အဓိပ္ပာယ် ဖွင့်ဆိုချက်က ညံ့ဖျင်းလို့ ဆယ်စုနှစ်ချီ အငြင်းပွားမှုတွေ ထူပြောခဲ့ပါတယ်။ 
6 months Ago

June 18, 2020

တရုတ်နှင့်တိုက်ပွဲအတွင်း သေဆုံးခဲ့သည့် အိန္ဒိယစစ်သည်အလောင်း ဘီဟာပြည်နယ်သို့ ပြန်သယ်

တရုတ်စစ်တပ်နဲ့ တိုက်ပွဲအတွင်း သေဆုံးခဲ့တဲ့ အိန္ဒိယစစ်သည် ဆူနေးလ်ကူးမားရဲ့ အလောင်းကို နိုင်ငံအရှေ့ပိုင်း ဘီဟာပြည်နယ်က သူ့အိမ်ဆီ ဇွန်လ ၁၇ ရက်က ပြန်သယ်လာပါတယ်။  ပြည်နယ်ရဲ့ မြို့တော်ပတ္တနာက လေဆိပ်ကို သူ့အလောင်းရောက်ချိန်မှာ ပန်းခွေချ အလေးပြု အခမ်းအနားကို ဆင်နွှဲပါတယ်။  ဘီဟာပြည်နယ် ဒုဝန်ကြီးချုပ်၊ ဒေသန္တရ ခေါင်းဆောင်တွေနဲ့ ကျဆုံးစစ်သည် ကူးမားရဲ့သား တို့က ပန်းခွေချ အလေးပြုပါတယ်။ သူဟာ ဇွန်လ ၁၅ရက်က ပိုင်နယ်အငြင်းပွား ဟိမဝန္တာနယ်စပ်မှာ တရုတ်စစ်တပ်နဲ့ လက်နက်ကိုင်ပဋိပက္ခအတွင်း ကျဆုံးတဲ့ စစ်သည် အယောက်၂၀ထဲက တယောက်ပါ။  ၁၉၆၂ခုနှစ် စစ်ပွဲအတွင်း တရုတ်အစိုးရက သိမ်းပိုက်ခဲ့တဲ့ အက်ခ်စိုင်းချင်းဒေသနဲ့ နယ်စပ် အိန္ဒိယပိုင်နက် လာဒက်ခ်ဒေသတွင်းက ဝေးလံသီခေါင်တဲ့ ဂယ်ဝမ်တောင်ကြားမှာ ရန်ပွဲ ဖြစ်အပြီး အိန္ဒိယ စစ်သည်တွေဟာ သံချောင်းတွေ ရိုက်ထားတဲ့ တင်းပုတ်တွေနဲ့ အရိုက်ခံခဲ့ကြရတယ်လို့ အိန္ဒိယအရာရှိတွေက ပြောပါတယ်။  နျူကလီးယားလက်နက်ပိုင်ရှင် ပြိုင်ဘက် အိမ်နီးချင်း ၂နိုင်ငံကြား သဘောတူညီချက် အဟောင်းအရ နယ်စပ်မှာ သေနတ်နဲ့ မပစ်ခဲ့ကြပါဘူး။  ဒါပေမယ့် လတ်တလော နှစ်တွေအတွင်း နယ်စပ်ကင်းလှည့်မှုတွေကြား ထိုးကြိတ်သတ်ပုတ်မှုတွေ ရှိခဲ့ပါတယ်။  တရုတ်အစိုးရဘက်က အသေအပျောက် စာရင်းကို မကြေညာပေမယ့် ရန်ပွဲအတွင်း တရုတ်ဘက်က လူ ၄၅ ယောက်ထက် မနည်း သေဆုံးဒဏ်ရာရတယ်လို့ အရာရှိတွေကို ကိုးကားပြီး အိန္ဒိယမီဒီယာတွေက အစီရင် ခံပါတယ်။  ဟိမဝန္တာနယ်စပ်တလျှောက်က ပိုင်နက်ကို တရုတ်နဲ့ အိန္ဒိယတို့ သူပိုင် ငါပိုင် ငြင်းနေခဲ့တာပါ။ ဗြိတိသျှကိုလိုနီခေတ် အိန္ဒိယကို အုပ်ချုပ်သူတွေ လက်ထက် နယ်မြေစည်း သတ်မှတ်ချက်ချ မှတ်ခဲ့ ချိန်တည်းက သဘောမတူနိုင်မှုတချို့ အမြစ်တွယ် နေပါတယ်။  
8 months Ago
Up