အိန္ဒိယ

December 1, 2022

အိန္ဒိယတွင် ဆိပ်ကမ်းစီမံကိန်းရပ်ရန် ကြိုးစားသည့် ကက်သလစ်ဘုရားကျောင်းကို ဆန္ဒပြ

အိန္ဒိယနိုင်ငံတောင်ပိုင်းမှာ ဒေါ်လာသန်း ၉၀၀ တန် ဆိပ်ကမ်းတည်ဆောက်ရေးအတွက် ထောက်ခံတဲ့ ဟိန္ဒူအုပ်စုထဲက ရာချီတဲ့လူတွေဟာ စီမံကိန်းကို ရပ်ဖို့ကြိုးစားနေတဲ့ ဒေသခံ ကက်သလစ်ဘုရားကျောင်းကို ဆန့်ကျင်တဲ့အနေနဲ့ နိုဝင်ဘာ ၃၀ ရက်က ကြွေးကြော်ချီတက် ဆန္ဒပြကြပါတယ်။

ခရစ်ယာန်ငါးဖမ်းအသိုက်အဝန်း အများစုရဲ့ ကန့်ကွက်မှုကြောင့် လေးလနီးပါးကြာအောင် ရပ်ထားရတဲ့ အဒါနီအုပ်စုရဲ့ ဆိပ်ကမ်းအဝင်ဝကို မရောက်မီ အဓိကရုဏ်းနှိမ်နင်းရေး ရဲတွေက အရံအတားတွေကို တပ်ဆင်ထားပြီး ထောက်ခံသူတွေကို ပိတ်ဆို့ထားပါတယ်။

ဗစ်ဂျစ်ဂျမ်မြို့က ဆိပ်ကမ်းစီမံကိန်းဟာ သူတို့ရဲ့ စားဝတ်နေရေးကို ထိခိုက်ပျက်ပြားစေတယ်လို့ ခရစ်ယာန် ငါးဖမ်းသမားအများစုက ပြောပါတယ်။

ဘီလျံနာသူဌေး ဂေါ့တမ် အဒါနီရဲ့ လုပ်ငန်းစုနဲ့ ကဲရာလာ ပြည်နယ်အစိုးရတို့ကတော့ ဆိပ်ကမ်းက သဘာဝပတ်ဝန်းကျင်ကို ပျက်စီးစေတယ်ဆိုတဲ့ စွဲချက်တွေကို ငြင်းဆိုထားပါတယ်။

“ကဲရာလာပြည်နယ်မှာ နေထိုင်လုပ်ကိုင် စားသောက်နိုင်ဖို့ အလုပ်အကိုင်တွေ အာမခံချက်ပေးနိုင်တဲ့ ပတ်ဝန်းကျင်တခု ရှိသင့်တယ်။ ဒါကြောင့် ဆိပ်ကမ်းကို ဖွံ့ဖြိုးတိုးတက်အောင် လုပ်သင့်တယ်” လို့ ထောက်ခံတဲ့အဖွဲ့ရဲ့ စည်းရုံးရေးမှူး ကေပီ စာစီကာလာက ရွှေဝါရောင်အလံတွေ လွှင့်ထူထားတဲ့ စုဝေးပွဲမှာ ပြောပါတယ်။

ဟိန္ဒူအုပ်စုရဲ့ လုပ်ရပ်အတွက် ခွင့်ပြုချက်မပေးခဲ့ဘူးလို့ ဒေသခံရဲတွေက ပြောပါတယ်။ ရဲတပ်ဖွဲ့ဟာ ဟိန္ဒူနဲ့ ခရစ်ယာန် နှစ်ဖက်စလုံးကို ပိုပြင်းပြင်းထန်ထန် အရေးယူဖို့ ဆန္ဒမရှိပေမဲ့ ဒီလိုလုပ်ရပ်ကြောင့် လူမှုရေးနဲ့ ဘာသာရေး တင်းမာမှုတွေ အစပျိုးလာမှာကို စိုးရိမ်နေကြပါတယ်။

6 days Ago

November 23, 2022

အာဆီယံလက်မခံသည့် မြန်မာစစ်ခေါင်းဆောင်ကို အိန္ဒိယက သွားရောက်တွေ့ဆုံဆွေးနွေး

မြန်မာနိုင်ငံကို သူ့ကိုယ်ပိုင်လမ်းစဉ်နဲ့ ဆက်ဆံသွားမယ်ဆိုတဲ့ အိန္ဒိယရဲ့ မူဝါဒအတိုင်း အိန္ဒိယ ပြည်ပဆက်ဆံရေးဝန်ကြီးဌာန နိုင်ငံခြားရေးအတွင်းဝန် ဗီနေးမိုဟန် ကွာထရာဟာ မြန်မာနိုင်ငံကို ပြီးခဲ့တဲ့နှစ်ရက်က လာရောက်ကာ နေပြည်တော်မှာ မြန်မာစစ်ခေါင်းဆောင်နဲ့ရော  ဝန်ကြီးတချို့နဲ့ပါ တွေ့ဆုံခဲ့ပါတယ်။

အိန္ဒိယနိုင်ငံခြားရေးအတွင်းဝန်  မြန်မာနိုင်ငံကို မလာခင်ရက်ပိုင်းမှာပဲ မြန်မာစစ်ကောင်စီက ဆက်လက်ကျူးလွန်နေတဲ့ အကြမ်းဖက်မှုတွေကို လက်မခံကြောင်းပြသဖို့အတွက် ကမ္ဘောဒီးယားမှာကျင်းပခဲ့တဲ့ အာဆီယံ ညီလာခံမှာ မြန်မာစစ်ခေါင်းဆောင်ကို တက်ရောက်ခွင့်မပေးဘဲ အာဆီယံက ပိတ်ပင်ခဲ့ပါတယ်။ 

အိန္ဒိယအတွင်းဝန်ရဲ့ မြန်မာနိုင်ငံခရီးစဉ်မှာ အိန္ဒိယ-မြန်မာနယ်စပ်တစ်လျှောက် လုံခြုံရေးနဲ့ တည်ငြိမ်အေးချမ်းရေး၊ မြဝတီမြို့နယ်မှာ အိန္ဒိယနိုင်ငံသားတွေ အများအပြား  ဖမ်းဆီးခံထားရတဲ့ အလုပ်အကိုင်အတုတွေနဲ့မျှားပြီး လူကုန်ကူးနေကြတဲ့ နိုင်ငံတကာ ဒုစရိုက်ဂိုဏ်းတွေရဲ့ ပြဿနာတွေကို ဆွေးနွေးခဲ့ကြပြီး နှစ်နိုင်ငံပူးပေါင်းဆောင်ရွက်နေတဲ့ ဖွံ့ဖြိုးတိုးတက်ရေး စီမံကိန်းတွေကို ပြန်လည်သုံးသပ်ခဲ့ကြတယ်လို့ အိန္ဒိယနိုင်ငံခြားရေးဝန်ကြီးဌာနရဲ့ ထုတ်ပြန်ချက်မှာ ဖော်ပြထားပါတယ်။

အိန္ဒိယအတွင်းဝန် ကွာထရာဟာ အိန္ဒိယ-မြန်မာနယ်စပ်က လုပ်ငန်းတွေအပါအဝင် ပြည်သူ့အခြေပြု လူမှုရေးနဲ့ စီးပွားရေးဖွံ့ဖြိုးတိုးတက်မှု စီမံကိန်းတွေနဲ့အတူ အိန္ဒိယဘက်က တာဝန်ခံထားတဲ့ ကုလားတန်စီမံကိန်းနဲ့ အိန္ဒိယ-မြန်မာ-ထိုင်း သုံးနိုင်ငံအဝေးပြေးလမ်းမ စီမံကိန်းတွေမှာလည်း မြန်မြန်မှန်မှန်ပြီးစီးရေးတို့ကို အိန္ဒိယက ကူညီအားပေးနေကြောင်း ပြောခဲ့ပါတယ်။  ရခိုင်ပြည်နယ်ဖွံ့ဖြိုးတိုးတက်ရေးနဲ့ နယ်စပ်ဒေသဖွံ့ဖြိုးတိုးတက်ရေးစီမံကိန်းတွေမှာ အိန္ဒိယက ကူညီဆောင်ရွက်ပေးမယ့် ကိစ္စတွေကိုလည်းထပ်မံ ကတိပေးပြောကြားခဲ့တယ်လို့ ဆိုပါတယ်။ 

အိန္ဒိယအတွင်းဝန် ကွာထရာရဲ့  နှစ်ရက်ကြာမြန်မာနိုင်ငံခရီးစဉ်နဲ့ ပတ်သက်လို့ စစ်ကောင်စီ နိုင်ငံခြားရေးဝန်ကြီးဌာနရဲ့ ထုတ်ပြန်ချက်မှာတော့ ကုန်သွယ်ရေး၊ ရင်းနှီးမြှုပ်နှံမှုနဲ့ ဆောင်ရွက်နေဆဲ ဖွံ့ဖြိုးတိုးတက်ရေး စီမံကိန်းတွေနဲ့အတူ ရှန်ဟိုင်းပူးပေါင်းဆောင်ရွက်ရေးအဖွဲ့အစည်းနဲ့ ကုလသမဂ္ဂအရေးတို့အပါအဝင် ဒေသတွင်းနဲ့ နိုင်ငံတကာအရေးကိစ္စတွေ၊ နှစ်နိုင်ငံပိုမိုချစ်ကြည်စွာ ပူးပေါင်းဆောင်ရွက်ရေးတို့ကို ဆွေးနွေးခဲ့ကြတယ်လို့ ဖော်ပြထားပါတယ်။

မြန်မာနိုင်ငံမှာ ဒီမိုကရေစီပြန်လည်ထွန်းကားရေးနဲ့ နိုင်ငံရေးအကျဉ်းသားတွေ ပြန်လွှတ်ပေးဖို့ ဆွေးနွေးခဲ့ပေမဲ့ စစ်ကောင်စီနိုင်ငံခြားရေးဝန်ကြီးဌာနရဲ့ ထုတ်ပြန်ချက်မှာတော့ အဲဒီအချက်ကို ချန်လှပ်ထားခဲ့ကြောင်း အိန္ဒိယအခြေစိုက် တယ်လီဂရပ်သတင်းက ရေးပါတယ်။ 

မြန်မာနိုင်ငံမှာ ဒီမိုကရေစီပြန်လည်ထွန်းကားလာရေးအတွက် အိန္ဒိယရဲ့ ထောက်ခံအားပေးမှုကို နိုင်ငံခြားရေးဝန်ကြီးက မြန်မာနိုင်ငံမှာ ဆွေးနွေးခဲ့ကြောင်း အိန္ဒိယနိုင်ငံခြားရေးဝန်ကြီးဌာနရဲ့ ပြောရေးဆိုခွင့်ရှိသူကလည်း သူ့ရဲ့ တွစ်တာမှာ  ရေးသားထားပါတယ်။ 

အာဏာသိမ်းပြီးနောက်ပိုင်းမှာ မြန်မာနိုင်ငံကို သူ့ကိုယ်ပိုင်လမ်းစဉ်မူဝါဒနဲ့ ဆက်ဆံခဲ့တဲ့ အိန္ဒိယဟာ စီးပွားရေးပိတ်ဆို့မှုတွေချမှတ်ခဲ့ခြင်းလည်း မရှိသလို မြန်မာနိုင်ငံနဲ့ ပူးပေါင်းဆောင်ရွက်လျက်ရှိနေတဲ့ စီမံကိန်းတွေကိုလည်း ဆက်လက်လုပ်ကိုင်နေဆဲဖြစ်ပါတယ်။

နယ်မြေချင်းထိစပ်နေတဲ့ အိမ်နီးချင်းနိုင်ငံဖြစ်လို့ မြန်မာနိုင်ငံနဲ့ပတ်သက်ရင် အိန္ဒိယမှာ သီးခြားအမြင်တွေရှိပြီး အဲဒီအမြင်တွေပါ်မှာ အခြေခံကာသုံးသပ်ရကြောင်း မြန်မာနိုင်ငံနဲ့ဆက်ဆံရေးအပေါ် အိန္ဒိယက အကြောင်းပြချက်ပေးတယ်လို့ တယ်လီဂရပ်အိန္ဒိယရဲ့ သတင်းမှာ ဖော်ပြထားပါတယ်။ 

Photo-MOI

2 weeks Ago
More News
Up