အာဖရိကသမဂ္ဂ

July 8, 2019

အာဖရိကတိုက် လွတ်လပ်စွာ ကုန်သွယ်ရေးဇုန် စီမံကိန်း စတင်မိတ်ဆက်

အာဖရိက ခေါင်းဆောင်တွေက အာဖရိကတိုက် လွတ်လပ်စွာ ကုန်သွယ်ရေးဇုန် စီမံကိန်းကို ဇူလိုင် ၇ ရက်နေ့မှာ စတင်မိတ်ဆက်လိုက်ပါတယ်။ အဲဒီကုန်သွယ်ရေးစီမံကိန်း အောင်မြင်ခဲ့မယ်ဆိုရင် အာဖရိကတိုက်မှာရှိတဲ့ လူပေါင်း ၁ ဒသမ ၃ ဘီလျံ စည်းလုံးညီညွတ်မယ့်အပြင် အမေရိကန်ဒေါ်လာ ၃ ဒသမ ၄ ထရီလီယံ တန်ဖိုးရှိတဲ့ စီးပွားရေးရပ်ဝန်းတခု ဖော်ဆောင်နိုင်ပြီး ဖွံ့ဖြိုးတိုးတက်မှု ခေတ်သစ်တခုကိုလည်း ဖိတ်ခေါ်နိုင်လိမ့်မယ်လို့ ရိုက်တာသတင်းဌာနက ဖော်ပြပါတယ်။ တနင်္ဂနွေနေ့က နိုင်ဂျာနိုင်ငံမှာ ကျင်းပတဲ့ ထိပ်သီးတွေ့ဆုံပွဲမှာ အာဖရိကသမဂ္ဂ ခေါင်းဆောင်တွေက African Continental Free Trade Area (AfCFTA) အာဖရိကတိုက် လွတ်လပ်စွာ ကုန်သွယ်ရေးဇုန်အကြောင်းကို ပြောခဲ့ကြတာပါ။ AfCFTA လွတ်လပ်စွာ ကုန်သွယ်ရေးဇုန်ဟာ ကမ္ဘာ့ကုန်သွယ်ရေးအဖွဲ့ စတင်တည်ထောင်တဲ့ ၁၉၉၄ ခုနှစ် နောက်ပိုင်းမှာ အကြီးဆုံးကုန်သွယ်ရေးအဖွဲ့ ဖြစ်လာဖို့ မျှော်လင့်တယ်လို့ ရိုက်တာသတင်းဌာနက ဖော်ပြပါတယ်။ ၂၀၁၇ ခုနှစ်မှာ အာဖရိကတိုက်ရဲ့ ကုန်သွယ်ရေးပမာဏဟာ ဒေသတွင်း ပို့ကုန်တန်ဖိုး ၁၇ ရာခိုင်နှုန်း၊ အာရှပို့ကုန်တန်ဖိုး ၅၉ ရာခိုင်နှုန်းနဲ့ ဥရောပပို့ကုန်တန်ဖိုး ၆၉ ရာခိုင်နှုန်း ရှိခဲ့ပါတယ်။ အာဖရိကတိုက်မှာ လက်ရှိရင်ဆိုင်နေရဆဲ ကြီးကြီးမားမား စိန်ခေါ်မှုတွေဟာ ကားလမ်း၊ မီးရထားလမ်း ဆက်သွယ်ရေး အားနည်းတာ၊ ဒေသတော်တော်များများမှာ ပဋိပက္ခတွေကြောင့် မတည်ငြိမ်တာနဲ့ နယ်စပ်စည်းမျဉ်း တင်းကျပ်တာအပြင် အကျင့်ပျက်ခြစားမှုတွေ မြင့်တက်နေတာပါ။ အဲဒီပြဿနာတွေဟာ ဒေသတိုးတက်ရေးနဲ့ စည်းလုံးရေးကို နောက်ပြန်ဆွဲနေတယ်လို့ စီပွားရေး ကျွမ်းကျင်သူတွေက သုံးသပ်ကြပါတယ်။
2 years Ago

June 14, 2019

ဆူဒန်အရေး ဖြေရှင်းရန် ကုလ၊ အီးယူနှင့် အာဖရိကသမဂ္ဂတို့ ပူးပေါင်း

ဆူဒန်နိုင်ငံရေး အကျပ်အတည်း ကြားဝင်စေ့စပ်ဖို့ ကုလသမဂ္ဂ လုံခြုံရေးကောင်စီနဲ့ အီးယူတို့က ကိုယ်စားလှယ်တွေဟာ အာဖရိကသမဂ္ဂနဲ့ ပူးပေါင်းခဲ့ကြပါတယ်။ ဆူဒန်နိုင်ငံမှာ သမ္မတ အိုမာအယ်လ်ဘာရှားကို ဖြုတ်ချပြီး နှစ်လအကြာ ဆန္ဒပြသူတွေနဲ့ လုံခြုံရေးတပ်ဖွဲ့ဝင်တွေအကြား အကြမ်းဖက်မှုဖြစ်ပြီး ၆၁ ယောက် သေဆုံးတယ်လို့ အစိုးရက ပြောပါတယ်။ ဒါပေမယ့် အတိုက်အခံနဲ့ ဆက်နွှယ်တဲ့ ဆေးဘက်ဝန်ထမ်းတွေကတော့ ၁၁၈ ယောက်ထက်မနည်း သေဆုံးတယ်လို့ ဆိုပါတယ်။ အဲဒီလို ဆန္ဒပြသူတွေကို အကြမ်းဖက်နှိမ်နင်းပြီးနောက်မှာ အာဏာရ စစ်ဘက်အသွင်ကူးပြောင်းရေး ကောင်စီ (TMC) နဲ့ အတိုက်အခံ မဟာမိတ်တို့ရဲ့ ဆွေးနွေးပွဲ ပျက်ခဲ့ပါတယ်။ အဲဒီလို သွေးထွက်သံယို ဖြိုခွင်းမှုကို အမေရိကန် အပါအဝင် ကမ္ဘာ့အင်အားကြီးနိုင်ငံတွေက စိုးရိမ်ပူပန်ခဲ့ပါတယ်။ ဆူဒန်အကျပ်အတည်း ကြားဝင်ဆွေးနွေးနေတဲ့ အာဖရိကသမဂ္ဂ အထူးသံတမန်က အဲဒီဖြိုခွင်းမှုကို စုံစမ်းဖို့ မျှော်လင့်တယ်လို့ ပြောပါတယ်။
2 years Ago
Up