အာဏာသိမ်း စစ်ခေါင်းဆောင်

October 26, 2021

တနိုင်ငံလုံး လျှပ်စစ်ရထားနှင့် မြို့ပေါ်တွင် လျှပ်စစ်ကားများဖြစ်ရမည်ဟု အာဏာသိမ်း စစ်ခေါင်းဆောင် ပြော

မြန်မာတနိုင်ငံလုံးလျှပ်စစ်ရထားလမ်းနဲ့   လျှပ်စစ်ရထားတွေ ပြေးဆွဲဖို့၊ မြို့ပေါ်တွေမှာသုံးတဲ့ကားတွေဟာလည်း လျှပ်စစ်ကားတွေဖြစ်ရမယ်လို့ အာဏာသိမ်း စစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင်က ပြောကြားလိုက်ပါတယ်။ 

အောက်တိုဘာ  ၂၅ ရက်က နေပြည်တော်မှာ ကျင်းပတဲ့  စစ်ကောင်စီခန့် ပြည်ထောင်စုအစိုးရအဖွဲ့ အစည်းအဝေးမှာ တက်ရောက် အမှာစကား ပြောကြားစဉ် ထည့်သွင်းပြောဆိုခဲ့တာပါ။

အာဏာသိမ်းစစ်ခေါင်းဆောင်က “Public Transportation ကိုကျနော်တို့ကအားပေးဖို့လိုတယ်။ အဲ့ဒီ Public Transportation မှာ လျှပ်စစ်ကိုရအောင်ပြောင်းနိုင်လို့ရှိရင် ဒီထက်ပိုအကျိုးရှိမယ်။ ဒါ့ကြောင့်ကျနော်က လျှပ်စစ်ဓာတ်အားထုတ်လုပ်ရေးအတွက် တွန်းအားပေးနေ ခြင်းဖြစ်ပါတယ်။ တနိုင်ငံလုံးလျှပ်စစ်ရထားလမ်းနဲ့ဆွဲရပါလိမ့်မယ်။ တနိုင်ငံလုံး လျှပ်စစ်ရထားနဲ့ ပြေးရပါလိမ့်မယ်။ တနိုင်ငံလုံးမြို့ပတ်ရထားလမ်းဆို မြို့ပတ်လမ်း အတိုင်းသွားမယ်။ မြို့ပေါ်တွေမှာသုံးတဲ့ ကားတွေက လျှပ်စစ်ကားတွေဖြစ်ရမယ်။ ဒီမူဝါဒကိုတွက်နေပါတယ်။ အချိန်လေးတစ်ခု တွက်ချက်ပြီးလို့ရှိရင် ကျနော်တို့ ကြေညာပါ့မယ်။ ဘယ်နှစ်မှာတော့ လျှပ်စစ်ကားသုံးတဲ့စနစ်ကို ဘယ်အဆင့်မှာပြောင်း ပြီးသားဖြစ်ရမယ်။ Private Use တွေပေါ့ဗျာ။ ကိုယ်ပိုင်ကားတွေ၊ ကားငယ်လေးတွ ဆိုလို့ရှိရင်။ လုပ်ငန်းခွင်သုံးတဲ့ ကားကြီးတွေကတော့ ဖြစ်ကောင်းဖြစ်နိုင်မှာပေါ့လေ။ နည်းပညာအရ အခြားနိုင်ငံတွေမှာ ဖြစ်နေတဲ့အခြေအနေတွေ ကျနော်တို့ ကြည့်ရဦးမယ်။ အခုနကပြောတဲ့ လူစီးကားကတော့ဖြစ်တယ်။ ဘတ်စ်ကားတွေဖြစ်နိုင်တယ်။ ဒီဟာတွေဟာ ဘယ်နှစ်မှာ လျှပ်စစ်စနစ်ကိုပြောင်းရမယ်ဆိုပြီး ကျနော်တို့ လုပ်ရမယ်။ ဒါမှမလုပ်ရင်လည်း ကျနော်တို့ ကျန်ခဲ့လိမ့်မယ်။ ဆီဖိုးနဲ့မွဲလိမ့်မယ်။” 

မြန်မာနိုင်ငံမှာ ကမ်းလွန်နဲ့ ကုန်းတွင်းသဘာဝဓာတ်ငွေ့တွေထုတ်လုပ်နေပြီး ပြည်ပနိုင်ငံတွေကို တင်ပို့ရောင်းချလျက်ရှိသကဲ့သို့ ပြည်တွင်းမှာလည်း  သဘာဝ ဓာတ်ငွေ့တွေအသုံးပြု  လျှပ်စစ်ဓာတ်အားထုတ်လုပ်မှုတွေရှိကြောင်းနဲ့ ကမ်းရိုးတန်းဒေသတွေမှာ လေအားလျှပ်စစ်ဓာတ်အားတွေ ထုတ်ယူလို့ရတယ်လို့လည်း စစ်ခေါင်းဆောင်က ပြောပါတယ်။

ဒါအပြင် ဓာတ်မြေဩဇာစက်ရုံတွေ ဆောက်ဖို့နဲ့  ဘိလပ်မြေနဲ့ သံချောင်းတွေ လုံလောက်စွာထုတ်လုပ် ကြဖို့လည်း  စစ်ကောင်စီခန့် ဝန်ကြီးတွေကို တိုက်တွန်းပြောကြားခဲ့ ပါတယ်။

အာဏာသိမ်း စစ်ခေါင်းဆောင်ဟာ ဒီကနေ့စတင်ကျင်းပနေတဲ့ အာဆီယံထိပ်သီးအစည်းအဝေးကို တော့ ဖိတ်ကြား မခံရတဲ့အတွက် တက်ရောက်နိုင်ခြင်း မရှိပါဘူး။

Photo-DSINFO

1 month Ago

April 21, 2021

အကြမ်းဖက်စစ်ခေါင်းဆောင်ကို အာဆီယံအစည်းအဝေးတက်ရန် ဖိတ်ကြားမှု အင်ဒို အဖွဲ့အစည်းများ ကန့်ကွက်

မြန်မာ့နိုင်ငံရေးပြဿနာ ဖြေရှင်းဖို့ အင်ဒိုနီးရှားနိုင်ငံမှာကျင်းပဖို့ရှိတဲ့ အာဆီယံထိပ်သီးအစည်းအဝေးမှာ အာဿာသိမ်း စစ်ကောင်စီခေါင်းဆောင် ဗိုလ်ချုပ်မှူးကြီးမင်းအောင်လှိုင် တက်ရောက်ဖို့ ဖိတ်ကြားခဲ့တဲ့ အာဆီယံရဲ့ ဆုံးဖြတ်ချက်ကို ဂျကာတာအခြေစိုက် အရပ်ဘက်အဖွဲ့အစည်းပေါင်းစုံ မဟာမိတ်အဖွဲ့က ဝေဖန်ကန့်ကွက်လိုက်ပါတယ်။ 

အာဏာသိမ်းစစ်ကောင်စီကို ဖိတ်ကြားမယ့်အစား မကြာခင်ကပဲ ရွေးချယ်ခံခေါင်းဆောင်တွေ ဖွဲ့စည်းခဲ့တဲ့ NUG အမျိုးသားညီညွတ်ရေးအစိုးရကိုသာ ဖိတ်ကြားဖို့ တိုက်တွန်းလိုက်ပါတယ်။ 

အာဆီယံထိပ်သီးအစည်းအဝေးကို မြန်မာနိုင်ငံရဲ့တရားဝင်အစိုးရသာတက်ရောက်ဖို့ ဖိတ်ကြားခြင်းအားဖြင့် စစ်အာဏာသိမ်းအစိုးရကို အသိအမှတ်ပြုရာရောက်စေမယ့် အပြုအမူတွေကို တားဆီးရာရောက်တယ်လို့ အင်ဒိုနီးရှား အရပ်ဘက်အဖွဲ့အစည်းပေါင်းစုံ ပူးတွဲထုတ်ပြန်ချက်မှာ ရေးထားပါတယ်။ 

မြန်မာပြည်သူလူထုကို အကြမ်းဖက်သတ်ဖြတ်ရာမှာ တာဝန်ရှိတဲ့ စစ်ခေါင်းဆောင်တွေကို ဖေါ်ထုတ်အရေးယူနိုင်ဖို့ အာဆီယံအဖွဲ့အစည်းဟာ ခိုင်ခိုင်မာမာရပ်တည် အရေးယူသင့်တယ်လို့လည်း တိုက်တွန်းထားပါတယ်။

အာဏာသိမ်း စစ်ခေါင်းဆောင်ကို အာဆီယံက အစည်းအဝေးတက်ဖို့ ဖိတ်တာကို ပြည်ထောင်စုလွှတ်တော် ကိုယ်စားပြုကော်မတီ CRPH ကလည်း ကန့်ကွက်ထားသလို ၈၈ မျိုးဆက် ငြိမ်းချမ်းရေးနဲ့ ပွင့်လင်းလူ့အဖွဲ့အစည်းလည်း အာဆီယံဟာ အကြမ်းဖက်အာဏာလုစစ်ကောင်စီကို လူရာသွင်းဖို့  ကြိုးပမ်းနေတယ်ဆိုပြီး ပြင်းထန်စွာ ကန့်ကွက်ရှုတ်ချထားပါတယ်။

ကျင်းပတော့မယ့် မြန်မာ့အရေး အာဆီယံထိပ်သီးဆွေးနွေးပွဲဟာ မြန်မာနိုင်ငံကို ကျဆုံးနိုင်ငံတခုမဖြစ်လာစေဖို့ အာဆီယံအဖွဲ့အစည်းရင်ဆိုင်ရမယ့် အကြီးမားဆုံးစမ်းသပ်ချက်ပဲလို့ မြန်မာ သမိုင်းပညာရှင်  ဒေါက်တာသန့်မြင့်ဦးက သူ့ရဲ့ တွစ်တာလူမှုကွန်ရက်မှာ ရေးပါတယ်။ 

ဒီနည်းလမ်းကသာ ဒီမိုကရေစီ ပြန်လည်တည်ဆောက်ဖို့ ဦးတည်နိုင်လိမ့်မယ်ဆိုပေမယ့် အကြမ်းဖက်ဖမ်းဆီးသတ်ဖြတ်ခံနေရတဲ့ မြန်မာနိုင်ငံသားတွေကို အကာအကွယ်ပေးဖို့နဲ့ လူသားချင်းစာနာထောက်ထားမှု အဖွဲ့အစည်းတွေ လုပ်ငန်းဆောင်ရွက်ခွင့်ရဖို့ကို အမြန်ဆုံး ရည်ရွယ်ဆောင်ရွက်သင့်တယ်လို့လည်းဆိုပါတယ်။

အာဆီယံအထူးအစည်းအဝေးကို လာမယ့် ဧပြီ ၂၄ နေ့ အင်ဒိုနီးရှားနိုင်ငံ ဂျကာတာမြို့မှာ ကျင်းပမယ်လို့ တရားဝင်ကြေညာထားပါတယ်။

ဒီအစည်းအဝေးကို မလေးရှား ဝန်ကြီးချုပ်တက်ရောက်မှာ ဖြစ်သလို အာဏာသိမ်း စစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင်တက်မယ်လို့လည်း မလေးရှားနိုင်ငံခြားရေး ဝန်ကြီးကပြောတယ်။

ဒါ့အပြင် စစ်ကောင်စီ ပြန်ကြားရေးဒုဝန်ကြီး ဗိုလ်မှူးချုပ်ဇော်မင်းထွန်းကလည်း ဗိုလ်ချုပ်မှူးကြီးမင်းအောင်လှိုင် အစည်းအဝေးတက်မှာ ဖြစ်တယ်လို့ Nikkei Asia ဂျပန်သတင်းဌာနကို အတည်ပြုပြောထားပါတယ်။ 

ဒါပေမဲ့ လူကိုယ်တိုင်သွားတက်မှာလား အွန်လိုင်းကနေတက်ရောက်မှာလားဆိုတာကိုတော့ ရှင်းရှင်းလင်းလင်း မသိရသေးပါဘူး။ ပြီးခဲ့တဲ့ ရက်ပိုင်းကတော့ ဗိုလ်ချုပ်မှူးကြီး မင်းအောင်လှိုင်က အွန်လိုင်းကနေပဲ Video Conferencing နဲ့ တက်ရောက်တော့မယ်လို့ အင်ဒိုနီးရှား သံရုံးကတဆင့်စာပို့ ထားကြောင်းသိရပါတယ်။ 

တကယ်လို့ သူသာ မြန်မာနိုင်ငံအပြင်ဘက် ထွက်ခွာလာခဲ့ရင် အာဏာသိမ်းကာလအတွင်း လူပေါင်း ၇၀၀ ကျော်ကို သတ်ဖြတ်ခဲ့တဲ့ ရာဇဝတ်မှုတွေအတွက် လက်ထိတ်ခတ်သင့်တယ်လို့ Globle R2P ဒါရိုက်တာပြောဆိုထားပါ။ 

ထိုင်းဝန်ကြီးချုပ် ပရာယုသ် ချန်အိုချာကတော့ အာဆီယံရဲ့အထူးအစည်းအဝေးကို တက်ရောက်မှာ မဟုတ်ဘဲ ကိုယ်စား ဒုဝန်ကြီးချုပ်နဲ့ နိုင်ငံခြားရေးဝန်ကြီး ပူးတွဲ တာဝန် ထမ်းဆောင်သူ ဒွန် ပရာမဒ်ဝီနိုင်းကို စေလွှတ်ဖို့ ဆုံးဖြတ်ထားတယ်လို့ ဘန်ကောက်ပို့စ် သတင်းစာမှာ ရေးပါတယ်။ 

မြန်မာ့အရေး အာဆီယံထိပ်သီးဆွေးနွေးပွဲကို အမျိုးသားညီညွတ်ရေးအစိုးရ (NUG) ကလည်း တက်ရောက်နိုင်ဖို့ ကမ်းလှမ်းထားတယ်လို့လည်း သိရပါတယ်။

အဖွဲ့ဝင်နိုင်ငံတခုရဲ့ ပြည်တွင်းရေးကို လူသိရှင်ကြားဝေဖန်ပြောဆိုလေ့မရှိခဲ့တဲ့ အာဆီယံအဖွဲအနေနဲ့ မြန်မာနိုင်ငံက အာဏာသိမ်းစစ်ကောင်စီရဲ့ အကြမ်းဖက်သတ်ဖြတ်မှု တွေနဲ့ပတ်သက်လို့ နိုင်ငံခေါင်းဆောင်တွေ အရေးပေါ်တွေ့ဆုံ ဆွေးနွေးကြဖို့ စီစဉ်တာဟာ စတင်ဖွဲ့စည်းခဲ့တဲ့ နှစ်ပေါင်း ၅၀ ကျော်အတွင်း ပထမဆုံးအကြိမ်ဖြစ်ပါတယ်။

8 months Ago
Up