အာဇာနည်နေ့

July 19, 2020

အာဇာနည်နေ့ အထိမ်းအမှတ် သောက်ရေသန့် နှင့် ပျိုးပင်များ စိုက်ပျိုး လှူဒါန်း (ဓာတ်ပုံ)

ဒီနေ့ကျရောက်တဲ့ ၇၃ နှစ်မြောက်အာဇာနည်နေ့ အထိမ်းအမှတ် စစ်ကိုင်းတိုင်းအတွင်းရှိ ကျေးရွာအချို့မှာ သဘာ၀စိမ်းအဖွဲ့က သောက်ရေသန့် နဲ့ အပင်တွေ စိုက်ပျိုး လှူဒါန်းခဲ့ကြပါတယ်။ စစ်ကိုင်းတိုင်းရှိ ၀က်သားပုပ် နဲ့ ရုန်းပင်ကန်ရွာတွေကို သောက်ရေသန့် ဂါလန် ၇၂၀၀‌ နဲ့ ပျိုးပင် ၁၅၀ တို့ကို စိုက်ပျိုး လှူဒါန်းခဲ့ကြတာပါ။ Photo - Kaung Zaw Hein / MPA
11 months Ago

၇၃ နှစ်မြောက်အာဇာနည်နေ့တွင် ဗိုလ်ချုပ်ကြေးရုပ်ကို ပြည်သူများ လာရောက်ဂါရဝပြု (ဓာတ်ပုံ)

၇၃ နှစ်မြောက်အာဇာနည်နေ့မှာ ရန်ကုန်မြို့ ကန်တော်ကြီးပတ်လမ်းရှိ ဗိုလ်ချုပ်ကြေးရုပ်ကို ပြည်သူတွေ လာရောက်အလေးပြု ဂါရဝပြုခဲ့ကြပါတယ်။ ကိုဗစ် ၁၉ ရောဂါဖြစ်ပွားနေတဲ့ ကာလဖြစ်တာကြောင့် ရန်ကုန်မြို့ရှိ ဗိုလ်ချုပ်ပြတိုက်၊ ဝန်ကြီးများရုံးတို့ကို ပြည်သူတွေ လာရောက်လည်ပတ်ခွင့်ပိတ်ထားပြီး အာဇာနည်ကုန်းနဲ့ ဗိုလ်ချုပ်ကြေးရုပ်သာ လာရောက်လည်ပတ်အလေးပြုခွင့်ပေးထားတယ်လို့သိရပါတယ်။ Photo - Jpaing  / MPA
11 months Ago

အာဇာနည်နေ့အခမ်းအနား သမ္မတ၊ ဒေါ်အောင်ဆန်းစုကြည်နှင့်ကာချုပ်တို့ တက်ရောက် (ဓာတ်ပုံ)

အာဇာနည်ဗိမာန်မှာ ဒီနေ့မနက်ကျင်းပတဲ့ ၇၃ နှစ်မြောက်အာဇာနည်နေ့ အခမ်းအနားကို နိုင်ငံတော်၏အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်နဲ့ အာဇာနည်ခေါင်းဆောင်ကြီးတွေရဲ့ မိသားစုဝင်တွေ တက်ရောက်ခဲ့ကြပြီး လွမ်းသူပန်ခွေချ ဂါရဝပြုခဲ့ကြပါတယ်။ ဒီနေ့အခမ်းအနားကို နိုင်ငံတော်သမ္မတ ဦးဝင်းမြင့်၊ တပ်မတော်ကာကွယ်ရေးဦးစီးချုပ်ဗိုလ်ချုပ်မှူးကြီး မင်းအောင်လှိုင်နဲ့ အစိုးရအဖွဲ့ဝင်ဝန်ကြီးတွေ တက်ရောက်ကြပြီး နိုင်ငံတော်အခမ်းအနားနဲ့ လွမ်းသူ့ပန်းခွေချ ဂါရဝပြုခဲ့ကြပါတယ်။ Photo - Loca Pool / MPA
11 months Ago

အာဇာနည်နေ့အခမ်းအနား ကယားပြည်နယ်အစိုးရနှင့်ပါတီအချို့ တက်ရောက်ဂါရဝပြု

ဒီကနေ့ ဇူလိုင် ၁၉ ရက်နေ့ ကျရောက်တဲ့  ၇၃ နှစ်မြောက် အာဇာနည်နေ့အထိမ်း အမှတ် အဖြစ် ကယားပြည်နယ်အစိုးရအဖွဲ့က  အာဇာနည်ကျောက်တိုင်ကွင်းမှာ ကျဆုံးလေပြီးသော အာဇာနည်ခေါင်းဆောင်ကြီးတွေကို လွမ်းသူ့ပန်းခွေချ ဂါရဝပြုခဲ့ကြပါတယ်။ ဒါ့အပြင် လွိုင်ကော်မြို့ ကန္တဟေဝန်ပန်းခြံမှာရှိတဲ့ ဗိုလ်ချုပ်ကြေးရုပ်ကိုလည်း သွားရောက်အလေးပြုခဲ့ကြသလို ရွှေတောင်ပရိယတ္တိ စာသင်တိုက် ဆရာတော်နဲ့ သံဃာတော်အရှင်သူမြတ်တွေကို အရုဏ်ဆွမ်း ဆက်ကပ် လှူဒါန်းခဲ့ပါတယ်။ ကိုဗစ်-၁၉ ထုတ်ပြန်ထားတဲ့ စည်းကမ်းချက်အရ လူစုလူဝေးမဖြစ်စေရေး အစိုးရအဖွဲ့ဝင်တွေနဲ့ ပါတီတချို့သာ အာဇာနည်တွေကို ဂါရဝပြုခဲ့ကြပါတယ်။ ဓာတ်ပုံ- နော်နိုရင်း
11 months Ago

စစ်ကိုင်းတိုင်း အာဇာနည်နေ့အခမ်းအနား လုံခြုံရေးအင်အား ၂၃၀ ကျော် အသုံးပြု

စစ်ကိုင်းတိုင်း၊ မုံရွာမြို့မှာ ကျင်းပတဲ့ ၇၃ နှစ်မြောက် အာဇာနည်နေ့အခမ်းအနားမှာ ရဲတပ်ဖွဲ့ကနေ လုံခြုံရေးအင်အားကို မနှစ်ကထက် တိုးကာ အသုံးပြုထားပါတယ်။  မနှစ်က လုံခြုံရေး အင်အား ၁၀၀ ကျော်သာရှိခဲ့ပေမယ့် ဒီနှစ်မှာတော့ ရဲတပ်ဖွဲ့ လုံခြုံရေးတင် ၂၃၀ ကျော်အသုံးပြုကာ အရင်နှစ်ထက် ၁၀၀ ကျော်ပိုခဲ့ပါတယ်။ မုံရွာခရိုင်ရဲတပ်ဖွဲ့မှူး ဒုတိယရဲမှူးကြီး သောင်းညွန့်က "အဓိကကတော့ ကိုဗစ်ကာလဖြစ်တဲ့အတွက် လူစုလူဝေးမဖြစ်ဖို့ ထိန်းသိမ်းနိုင်ရေး အသုံးပြုတာပါ။ Social Distancing အတွက်ပါပဲ" လို့ ပြောပါတယ်။  ရဲတပ်ဖွဲ့အပြင် မီးသတ်တပ်ဖွဲ့၊ ထွေအုပ်၊ တပ်မတော်တို့က လုံခြုံရေးတွေကိုလည်း အသုံးပြုထားပါတယ်။ ကိုဗစ်ကာလဖြစ်နေတဲ့အတွက် ပြည်သူတွေအနေနဲ့လည်း တဦးတယောက်ချင်းလာရောက်တာကနည်းပြီး အစုအဖွဲ့အလိုက် လာရောက်ပန်းခွေချ အလေးပြုတာတွေ ရှိပါတယ်။  မုံရွာမြို့နယ် ဒုအုပ်ချုပ်ရေးမှူး ဦးအာကာမြင့်က "ဒီနှစ်က ကိုဗစ်ကြောင့် ကြိုတင်ပြီးတော့ ဖိတ်ကြားတယ်။ အဖွဲ့အစည်းအသီးသီးကိုလည်း လူ ၅ ဦးသာ လာရောက်ဖို့ ကြိုတင်အသိပေးထားတယ်။ ဌာနဆိုင်ရာတွေကိုလည်း အရင်နှစ်တွေလို အားလုံးစုပေါင်း ချီတက်တာမျိုးတွေ မလုပ်ဖို့ ကော်မတီကနေ ညွှန်ကြားချက်တွေ ထုတ်ထားပါတယ်" လို့ ပြောပါတယ်။  လာကောက်ဂါရဝပြုတဲ့ ပြည်သူတဦးက "ရောဂါကြောင့်ပြောရမလား၊ လုံခြုံရေးကြောင့်ပြောရမလား မနှစ်ကလောက်တော့ မစည်ကားဘူး" လို့ ပြောပါတယ်။  ကိုဗစ်ကြောင့် အာဇာနည်နေ့အခမ်းအနားကို လာရောက်အလေးပြုသူတွေအနေနဲ့ ဖိတ်ကြားထားသူတွေကလွဲလို့ အလေးပြုပြီး ပြန်လည်ထွက်ခွာပေးကြဖို့ အသိပေးတာတွေလည်း ပြုလုပ်နေပါတယ်။
11 months Ago

ဘားအံတွင် အာဇာနည်နေ့အခမ်းအနား လူစုလူဝေးဖြင့်တက်ရောက်ခွင့်မပြု 

ကရင်ပြည်နယ်၊ ဘားအံမြို့မှာ ပြုလုပ်တဲ့ ၇၃ နှစ်မြောက် အာဇာနည်နေ့အခမ်းအနားကို ကိုဗစ်-၁၉ ကြောင့် လူစုလူဝေးနဲ့ တက်ရောက်တာ ခွင့်မပြုသလို ပြည်နယ်အဆင့်အကြီးအကဲ ၁၈ ဦးသာ အားကစားနှင့်ကျန်းမာရေးဝန်ကြီးဌာနက သတ်မှတ်စည်းကမ်းအတိုင်း တက်ရောက် ဂါရဝပြုခဲ့ပါတယ်။  ပြည်နယ်အစိုးရအဖွဲ့ စီမံကိန်း၊ ဘဏ္ဍာရေးနှင့် စည်ပင်သာယာရေးဝန်ကြီး ဦးသန်းနိုင်က "ကိုဗစ်ကာလဖြစ်တဲ့အတွက်ကြောင့် လူစုလူဝေးနဲ့တော့ ကျနော်တို့ လုပ်ခွင့်တော့မရပါဘူး။ ဗဟိုအဆင့်မှာ ကျင်းပတဲ့ ပုံစံအတိုင်းပဲ ပြုလုပ်တယ်" လို့ ပြောပါတယ်။ အခမ်းအနားမှာ ကျဆုံးလေပြီးသော ဗိုလ်ချုပ်အောင်ဆန်းနဲ့တကွ အာဇာနည်ခေါင်းဆောင်ကြီးတွေကို အလေးပြုတာ၊ အာဇာနည်ခေါင်းဆောင်ကြီးတွေကို လွမ်းဆွတ်သတိရအောက်မေ့ သတိရတဲ့အနေနဲ့ ၂ မိနစ်ခန့် ငြိမ်သက်တာ၊ လွမ်းသူ့ ပန်းခွေချဂါရဝပြုတာတွေကို ပြုလုပ်ခဲ့ကြပါတယ်။ ပြည်နယ်ဝန်ကြီးချုပ်နဲ့ အစိုးရအဖွဲ့ဝင်ဝန်ကြီးတွေနဲ့ တာဝန်ရှိသူတွေက ကျောင်းထိုင်ဘုန်းကြီးသင်ကျောင်းမှာ သံဃာ ၅ ပါးကို နေ့ဆွမ်းဆက်ကပ်လှူဒါန်းခဲ့ကြပါတယ်။ ကရင်ပြည်နယ်အတွင်းက မြို့နယ် ၇ မြို့နယ်မှာလည်း အာဇာနည်ခေါင်းဆောင်ကြီးတွေ ကျဆုံးခဲ့တဲ့ မနက် ၁၀ နာရီ ၃၇ မိနစ်အချိန် လူစည်းကားတဲ့နေရာတွေမှာ ​ဥသြဆွဲတာတွေ ပြုလုပ်သွားမှာပါ။ အခမ်းအနားကို တက်ရောက်ပြီး ဂါရဝပြုကြတဲ့ နိုင်ငံရေးပါတီတွေ၊ ပြည်သူ့တွေအနေနဲ့ သတ်မှတ်နေရာကနေ လူ ၃ ဦးထက်မပိုဘဲ မော်တော်ယာဉ်တွေနဲ့ လာရောက်ပြီး ဂါရဝ ပြုခဲ့ကြပါတယ်။ နှစ်စဉ် ကရင်ပြည်နယ် ကျောက်တိုင်ကွင်းမှာ ပြုလုပ်တဲ့ အာဇာနည်နေ့အခမ်းအနားကို ​ လူဦးရေ  ထောင်ချီ တက်ရောက်တယ်လို့ သိရပါတယ်။ ရဲမင်းခေါင်
11 months Ago

လူငယ်ဒါရိုက်တာ အာဂသူရ ရိုက်ကူးသည့် အာဇာနည်နေ့ ဂုဏ်ပြုဇာတ်လမ်းတို(ရုပ်သံ) (ဖေ့စ်ဘွတ်ခ်ရွာ… ဖေ့စ်ဘွတ်ခ်ကမ္ဘာ) 

လူငယ် ဒါရိုက်တာတယောက်ဖြစ်တဲ့ ဒါရိုက်တာ အာဂသူရ ရိုက်ကူးပုံဖော်ထားတဲ့ “သို့…ဖေဖေ”အမည်ရတဲ့ ဇာတ်လမ်းတိုရုပ်သံကို The Motivation Gallery ရဲ့ ဖေ့စ် ဘွတ်ခ် အင်တာနက်လူမှုကွန်ရက်ပေါ်မှတဆင့် မျှဝေထားခဲ့ပါတယ်။ ဒီဇာတ်လမ်းတိုကတော့ လာမယ့် ဇူလိုင်လ ၁၉ ရက်နေ့မှာ ကျရောက်မယ့် အာဇာ နည်နေ့အကြို ဂုဏ်ပြုဇာတ်လမ်းအနေနဲ့ ရိုက်ကူးထားတာဖြစ်တယ်လို့ ဆိုပါတယ်။ “၁၉.၀၇.၂၀၂၀ တွင်ကျရောက်သော (၇၃) နှစ်မြောက် အာဇာနည်နေ့ အထိမ်းအမှတ်အား ရည်ညွှန်း၍ COVID-19 ကပ်ဘေးကာလအတွင်း နိုင်ငံ့အကျိုး အများပြည်သူအကျိုးအတွက် အနစ်နာခံပေးဆပ်ခဲ့ကြသော တာဝန်သိဝန်ထမ်းများနှင့် ပရဟိတ သူရဲကောင်းများစွာအား Motivation Gallery မှ “သို့/ ဖေဖေ” ဇာတ်လမ်းတိုလေးဖြင့် ကြိုဆို ဂုဏ်ပြုတင်ဆက်လိုက်ပါတယ်။ ခေတ်အဆက်ဆက် နိုင်ငံတဝန်းမှ ကိုယ်ကျိုးမဖက်ဘဲ တိုင်းပြည်အတွက် ကြိုးပမ်းဆောင်ရွက်ခဲ့ကြသော အာဇာနည်သူရဲကောင်းများစွာအား လေးစားဂုဏ်ပြုအောက်မေ့လျက်” ဒါရိုက်တာ အာဂသူရဟာ မနှစ်က ရုံတင်ပြသခဲ့တဲ့ ယူရီ ရုပ်ရှင်ကားတကားတည်းနဲ့ ပရိသတ်တွေ အသိအမှတ်ပြုခဲ့ကြရတဲ့ လူငယ်တယောက် ဖြစ်ပါတယ်။ မျက်နှာသစ်လူငယ် ဒါရိုက်တာ၊ သရုပ်ဆောင်တွေနဲ့ ရိုက်ကူးပုံဖော်ထားတဲ့ ယူရီ ရုပ်ရှင်ကို ပြီးခဲ့တဲ့နှစ် ဒီဇင်ဘာလတုန်းက ရုံတင်ပြသခဲ့တာ ဖြစ်ပါတယ်။ အာဂသူရက ကိုယ်တိုင်ဇာတ်ညွှန်းခွဲပြီး ကိုယ်တိုင်ပဲ ရိုက်ကူးပုံဖော်ပေးထားခဲ့တဲ့ အဲဒီရုပ်ရှင်ထဲမှာတော့ မတူညီကြတဲ့ ဘဝနှစ်ခုကြား သံယောဇဉ်နဲ့ ချစ်ခြင်းမေတ္တာကို ပေါင်းစပ်ပြီး ဆယ်ကျော်သက်လူငယ်သဘာဝ အခြေခံရိုက်ကူးတင်ဆက်ထားခဲ့တာ ဖြစ်ပါတယ်။ ကျိန်စာမိနေတဲ့ ဝိညာဉ်မလေး ယူရီနဲ့  ကြောင်တောင်တောင်ကောင်လေး ဟန့်ခ်တို့ ၂ ယောက်ကြားက ဆက်နွှယ်နေတဲ့ ချစ်ခြင်းမေတ္တာ၊ သေခြင်းတရား၊ ခွဲခွာခြင်း စတဲ့ ခံစားမှုရသစုံနဲ့ ပုံဖော်ဖန်တီးထာတဲ့ ဒီရုပ်ရှင်ကားဟာ ပရိသတ်တွေ ရင်ထဲ အထိုက်အလျောက်တော့ နေရာယူနိုင်ခဲ့ပါတယ်။ ခုတခါ အချိန် ၁၀ မိနစ်ကျော်ကျော်သာ ရှိတဲ့ “သို့…ဖေဖေ”ဂုဏ်ပြုဇာတ်လမ်းတို ထဲမှာရော ဘယ်လိုမတူညီတဲ့ ရိုက်ချက်တွေ၊ ဇာတ်လမ်းဇာတ်ကွက်တွေနဲ့ ဖန်တီးတင် ဆက်ထားမလဲဆိုတာကိုတော့ ဒီရုပ်သံထဲမှာ ခံစားကြည့်ရှုနိုင်မှာ ဖြစ်ပါတယ်။
11 months Ago
More News
Up