အာင်ဆင်နယ်

November 30, 2020

အာဆင်နယ်ကစားသမားများ ပျော့လွန်းပြီး အရည်အသွေးမပြည့်မီဟု ရွိုင်ကိန်း မှတ်ချက်ပြု

အာဆင်နယ်အသင်းဟာ ပျော့လွန်းပြီး အရည်အသွေးမပြည့်မီတဲ့ ကစားသမားတွေကြောင့် ဒုက္ခရောက် နေရတယ်လို့ ရွိုင်ကိန်းက ဝေဖန်ခဲ့ပါတယ်။  ဝုဗ်အသင်းကို ၂ ဂိုး ၁ ဂိုးနဲ့ ရှုံးနိမ့်ခဲ့ပြီးနောက် အခုလိုဝေဖန်ခဲ့တာပါ။ ဒီပွဲမှာ ဝုဗ်အသင်းအတွက် နီတိုက အဖွင့်ဂိုးသွင်းယူပေးခဲ့ပြီး မကြာခင်မှာတင် အာဆင်နယ်နောက်ခံ လူဂါဘရီရယ်က ချေပဂိုးပြန်သွင်းပေးခဲ့ပါတယ်။ ဒါပေမဲ့ ပထမပိုင်းမပြီးခင်မှာ နီတိုက ဝုဗ်အသင်းအတွက် အနိုင်ဂိုးကို သွင်းယူပေးခဲ့ပြီး အာတီတာရဲ့အသင်းသားတွေဟာ ပွဲပြီးတဲ့အထိ ဒီဂိုးကို ပြန်လည်မချေပနိုင်ခဲ့ပါဘူး။ ဒီရလဒ်ဟာ တကယ်ကို ဆိုးရွားတဲ့ရလဒ်ဖြစ်တယ်လို့ အာဆင်နယ်နည်းပြ မီခေးလ်အာတီတာက ပွဲအပြီးမှာပြောဆိုသွားခဲ့ပါတယ်။  ဒါဟာ အာဆင်နယ်အသင်းအတွက် ဒီရာသီပရီးမီးယားလိဂ် ၁၀ ပွဲမှာ ၅ ပွဲ မြောက်အရှုံးလည်း ဖြစ်ပါတယ်။  အာတီတာက သူ့ကစားသမားတွေဟာ ဒုတိယပိုင်းမှာ အကောင်းဆုံးတုံ့ပြန်နိုင်ခဲ့ပြီး ပြသခဲ့တဲ့ စိတ်အားထက်သန်မှုအတွက် ဝမ်းမြောက်မိတယ်လို့ ဆိုပါတယ်။  ဒါပေမဲ့ ယူနိုက်တက် ဂန္တဝင်ကစားသမားဟောင်း ရွိုင်ကိန်းကတော့ အာဆင်နယ်အသင်းရဲ့ခြေစွမ်းမှာ အပေါင်းလက္ခဏာပြတဲ့ အနေအထား မတွေ့ခဲ့ရကြောင်း၊ အာတီတာဟာ သူ့အသင်းနဲ့ပတ်သက်ပြီး စိုးရိမ်စိတ်ဖြစ်သင့်တယ်လို့  ထောက်ပြခဲ့ပါတယ်။ “ကျနော့်အထင်တော့ အာဆင်နယ်ကစားသမားအများစုက လုံလောက်တဲ့ ကောင်းမွန်မှုမျိုးမရှိခဲ့ပါဘူး။ သူတို့ဟာအရမ်းကို ပျော့လွန်းနေခဲ့ပါတယ်။ ပြီးခဲ့တဲ့ သီတင်းပတ်အနည်းငယ် ယူနိုက်တက်အသင်းနဲ့ပွဲပြီးတော့ သူတို့အသင်းရဲ့ ခြေစွမ်းကိုချီးကျူးခဲ့ကြ ပါတယ်။ ဒါပေမဲ့ အဲ့ဒီပွဲပြီးကတည်းက သူတို့တစ်မှတ်ပဲရရှိခဲ့ပြီး တခြား ၂ ပွဲကိုတော့ ရှုံးနိမ့်ခဲ့ပါတယ်။ ကျနော့်အထင်သူတို့ဟာ ပျော့တဲ့ပုံစံမျိုးဖြစ်နေပါတယ်။ သူတို့မှာ ယုံကြည်မှု နည်းပါးနေပြီးတော့ အသင်းမန်နေဂျာ  ကိုယ်တိုင်ကလည်း အမှန်ကတယ်တိုက်ပွဲဝင်စိတ်ဓာတ်ဖြစ်စေမယ့် စကားတွေကို ပြောတာမျိုးမတွေ့ရပါဘူး။ သူတို့မှာ ရလဒ်ကောင်းရရှိဖို့ စိတ်အားထက်သန်မှု၊ စိတ်ပိုင်းဖြတ်မှုမျိုးလည်း မတွေ့ရပါဘူး။ ဒီအချက်ကို အာဆင်နယ်ကစားသမားတော်တော်များများမှာတွေ့နေရပါတယ်။ သူတို့ဟာ တော်တော်လေး ပျော့လွန်းနေပါတယ်” လို့  ရွိုင်ကိန်းက Sky Sports သတင်းမှာ ပြောခဲ့ပါတယ်။ အာဆင်နယ်အသင်းဟာ လာမယ့်ပွဲစဉ်အဖြစ် ရက်ပစ်ဝီယန်အသင်းနဲ့ ယူရိုပါလိဂ်ပွဲကစားရမှာဖြစ်ကာ အဲ့ဒီပွဲအပြီးမှာတော့ ပြိုင်ဘက် စပါးအသင်းနဲ့ ပရီးမီးယားလိဂ်ပွဲကစားရမှာ ဖြစ်ပါတယ်။  စပါးအသင်းဟာ လက်ရှိအမှတ်ပေးဇယားထိပ်ဆုံးကို ရောက်ရှိနေတဲ့အသင်းဖြစ်ပြီး ကိန်းကတော့ အာဆင်နယ်အသင်းအနေနဲ့ စပါးအသင်းနဲ့ပွဲမှာ ရလဒ်ဆိုးတွေကနေ ရုန်းထွက်ဖို့ အချိန်ကောင်းပဲလို့ ယုံကြည်နေပါတယ်။
5 months Ago
Up