အာဂျင်တီးနား

November 26, 2022

မက္ကဆီကိုနှင့်ကန်မည့်ပွဲက ဗိုလ်လုပွဲတစ်ပွဲကဲ့သို့ဖြစ်လာမည်ဟု အာဂျင်တီးနားတိုက်စစ်မှူး မာတီနက်ဇ်သုံးသပ်

မက္ကဆီကိုနဲ့ အုပ်စုဒုတိယပွဲစဉ်ဟာ ဗိုလ်လုပွဲတစ်ပွဲလို ဖြစ်လာလိမ့်မယ်လို့ အာဂျင်တီးနား တိုက်စစ်မှူး မာတီနက်ဇ်က ပြောပါတယ်။

အာဂျင်တီးနားဟာ အုပ်စုအဖွင့်ပွဲစဉ်မှာ ဆော်ဒီကို ၂ ဂိုး ၁ ဂိုးနဲ့ ရှုံးနိမ့်ခဲ့တာကြောင့် မက္ကဆီကိုအသင်းကို အနိုင်ရမှ နောက်တစ်ဆင့်တက်ဖို့ မျှော်လင့်ခွင့်ရှိမှာပါ။

တိုက်စစ်မှူး မာတီနက်ဇ်ကတော့ မက္ကဆီကိုနဲ့ပွဲဟာ အခုနှစ်ကမ္ဘာ့ဖလားမျှော်လင့်ချက်ကို သတ်မှတ်ပေးမယ့်ပွဲဖြစ်ပြီး ဗိုလ်လုပွဲတပွဲလို ဖြစ်လာနိုင်ကြောင်း၊ တည်ငြိမ်မှုရှိရှိနဲ့ အာရုံစိုက်ကစားနိုင်ဖို့လိုအပ်ကြောင်း မာတီနက်ဇ်က ပြောပါတယ်။

နည်းပြ စကယ်လိုနီကတော့ မက္ကဆီကိုနဲ့ပွဲစဉ်မှာ ပွဲထွက်လူစာရင်း တစ်နေရာ၊ နှစ်နေရာလောက် အပြောင်းအလဲလုပ်နိုင်တာကလွဲရင် ကစားပုံကို ပြုပြင်ပြောင်းလဲစရာ မလိုအပ်ကြောင်း ပြောပါတယ်။ မက္ကဆီကိုအသင်းကတော့ အုပ်စုအဖွင့်ပွဲစဉ်မှာ ပိုလန်နဲ့ ဂိုးမရှိ သရေ ကျခဲ့ပါတယ်။

3 days Ago

November 23, 2022

ဆော်ဒီနှင့်ပွဲတွင် အာဂျင်တီးနားအသင်း လူကျွံဘောအရေအတွက် စံချိန်သစ်တင်

ဆော်ဒီနဲ့ ကမ္ဘာ့ဖလားအုပ်စုအဖွင့်ပွဲစဉ်မှာ အာဂျင်တီးနားအသင်းက သူတို့အသင်းသမိုင်းတလျှောက် လူကျွံဘောအများဆုံးပွဲစဉ်ဖြစ်ခဲ့ပါတယ်။

အာဂျင်တီးနားဟာ ပထမပိုင်းမှာကတည်းက လူကျွံဘော ၇ ကြိမ် အထိရှိခဲ့ပြီး သွင်းဂိုး ၃ ဂိုးဟာလည်း ပယ်ဖျက်ခံခဲ့ရတာပါ။

ဆော်ဒီခံစစ်ဟာ အာဂျင်တီးနားကို High Line Deffence ပုံစံနဲ့ ကစားခဲ့ပြီး ပင်နယ်တီပေးခဲ့ရပေမယ့် ဒုတိယပိုင်းမှာ ချေပဂိုးနဲ့ အနိုင်ဂိုးတွေ သွင်းပြီး ၂ ဂိုး ၁ ဂိုးနဲ့ အနိုင်ရခဲ့တာပါ။

ဆော်ဒီနဲ့ ပထမပိုင်းမှာပဲ လူကျွံဘော ၇ ကြိမ်ဖြစ်ခဲ့တဲ့ အာဂျင်တီးနားဟာ ၂၀၁၈ ကမ္ဘာ့ဖလားပြိုင်ပွဲက သူတို့ရဲ့ လူကျွံဘောအရေအတွက်ထက်တောင် များပြားခဲ့တာပါ။

ကမ္ဘာ့ဖလားသမိုင်းမှာ ပွဲစဉ်တစ်ပွဲတည်းမှာ လူကျွံဘောအများဆုံးဖြစ်ခဲ့တဲ့အသင်းက အင်္ဂလန်အသင်းဖြစ်ပြီး ၁၉၈၂ ခုနှစ် ကမ္ဘာ့ဖလားက ကူဝိတ်နဲ့ပွဲစဉ်မှာ လူကျွံဘောအကြိမ် ၂၀ အထိ ဖြစ်ခဲ့တာပါ။

ဒါ့အပြင် အဲဒီကမ္ဘာ့ဖလားမှာပဲ ချက်ကိုစလိုဗက်ကီးယားက ကူဝိတ်နဲ့ပွဲမှာပဲ လူကျွံဘော ၁၈ ကြိမ်အထိ ရှိခဲ့ပါသေးတယ်။

6 days Ago

ကမ္ဘာ့ဖလားပြိုင်ပွဲတွင် လက်ရှိချန်ပီယံ ပြင်သစ်က ဩစီကို အနိုင်ရ

၂၀၂၂ ကမ္ဘာ့ဖလားဘောလုံးပြိုင်ပွဲရဲ့ နိုဝင်ဘာ ၂၂ ရက်ညပွဲစဉ်တွေ ယှဉ်ပြိုင်ကစားကြရာမှာ လက်ရှိချန်ပီယံ ပြင်သစ်အသင်းကအနိုင်ရပြီး  မက္ကစီကိုနဲ့ ပိုလန်၊ ဒိန်းမိတ်နဲ့ တူနီးရှားတို့ သရေကျကာ နာမည်ကြီး  အာဂျင်တီးနားကတော့ ရှုံးပွဲနဲ့ကြုံတွေ့ခဲ့ရပါတယ်။ 

မနေ့ညနေ အစောပိုင်း အုပ်စု (C ) ပွဲစဉ်မှာတော့ ကိုပါအမေရိကဖလား ချန်ပီယံ နာမည်ကြီးအာဂျင်တီးနားနဲ့ အာရှကိုယ်စားပြု အာရပ်ကမ္ဘာက ဆော်ဒီအာရေဗျအသင်းတို့ ယှဉ်ပြိုင်ကစားကြရာမှာ ဆော်ဒီက   ၂ ဂိုး ၁ဂိုးနဲ့ အနိုင်ရသွားပါတယ်။

ပထမပိုင်း ၁၀ မိနစ်ကတည်းက အာဂျင်တီးနားတို့ အငြင်းပွားဖွယ်ပင်နယ်တီရရှိခဲ့လို့ မက်ဆီက ဦးဆောင်ဂိုးသွင်းပါတယ်။ အာဂျင်တီးနားကပဲ ပထမပိုင်း တစ်ပိုင်းလုံး စိုးမိုးကစားခဲ့ပေမဲ့ ဆော်ဒီအသင်းရဲ့ ခံစစ်ကလည်း လူကျွံဘောတွေ စောင့်ဖမ်းပြီး အာဂျင်တီးနားတိုက်စစ်ကို ထိန်းချုပ်ခဲ့တာပါ။

ပထမပိုင်း အာဂျင်တီးနားက ၄ ဂိုးသွင်းခဲ့ပေမယ့် ၃ ဂိုးက လူကျွံဘောတွေဖြစ်လို့ ပယ်ဖျက်ခံခဲ့ရပါတယ်။ ဒုတိယပိုင်းမှာတော့ ပွဲအခြေအနေကပြောင်းလဲသွားခဲ့ပြီး ပွဲစလို့ ၃ မိနစ်အကြာမှာပဲ ဆော်ဒီတိုက်စစ်မှူး အယ်ရှက်ရီက ချေပဂိုးသွင်းသွားခဲ့ပါတယ်။ အာဂျင်တီးနားကွင်းလယ်က ပါရီဒက်စ်၊ ဂိုမက်ဇ်နဲ့ ဒီပေါလ်တို့ဟာ ထိရောက်တဲ့ဖန်တီးမှုတွေ မလုပ် ဆောင်နိုင်ခဲ့တာကြောင့်လည်း အာဂျင်တီးနားရဲ့ကစားပုံကလေးလံပြီး တိုက်စစ်ကစားပုံအား နည်း ခဲ့ပါတယ်။

ဆက်တိုက်ဆိုသလို နောက်ထပ် ၅ မိနစ်အကြာမှာ ဆော်ဒီတို့ဦးဆောင်ဂိုးရခဲ့ပြီး အယ်ဒါဆာရီက ဧရိယာအပြင်ဘက်ကနေ သေသေသပ်သပ်ကန်သွင်းယူခဲ့တာပါ။

အာဂျင်တီး နည်းပြ စကယ်လိုနီဟာ ခြေစွမ်းမပြနိုင်ခဲ့တဲ့ လူတွေအစား အယ်လ်ဗာရက်ဇ်၊ မာတီနက်ဇ်၊ ဖာနန်ဒက်ဇ်တို့ကိုထည့်ပြီး တိုက်စစ်ကစားပုံပြောင်းလဲခဲ့ပေမယ့် အလုပ်မဖြစ်ခဲ့သလို မက်ဆီဟာလည်း ခြေစွမ်းပျောက်ဆုံးနေခဲ့တာပါ။

ဒုတိယပိုင်းမှာ ဆော်ဒီအသင်းရဲ့ စုဖွဲ့ကစားပုံဟာ အဆင့်တစ် ခုမှာရှိခဲ့ပြီး သူတို့ရဲ့အာရပ်မြေမှာ တောင်အမေရိကသားတွေကို အနိုင်ယူနိုင်ခဲ့ပါတယ်။ ဒီရလဒ်ကြောင့် အာဂျင်တီးနားဟာ  လက်ကျန်နှစ်ပွဲဖြစ်တဲ့ မက္ကဆီကို၊ ပိုလန်ပွဲတွေမှာ မဖြစ်မနေနိုင်ပွဲတွေ ရယူနိုင်မှ အုပ်စုအဆင့်ကနေ ကျော်လွန်ဖို့မျှော်လင့်ချက်ရှိတော့မှာ ဖြစ်ပါတယ်။

အုပ်စု (C ) တခြားပွဲစဉ်တခုမှာတော့  မက္ကစီကိုနဲ့ ပိုလန်အသင်းတို့ ဂိုးမရှိ သရေကျပြီး တမှတ်စီခွဲယူခဲ့ကြပါတယ်။

အုပ်စု (D) ပွဲစဉ်မှာတော့ လက်ရှိချန်ပီယံ ပြင်သစ်က ဩစတြေးလျကို ( ၄- ၁) ဂိုးနဲ့ ခြေစွမ်းပြ အနိုင်ယူပြီး ၃ မှတ်ရယူနိုင်ခဲ့ပါတယ်။ 

ဒီပွဲမှာ ပြင်သစ်အသင်းဟာ ဩစတြေးလျအသင်းထက် ဘောလုံးပိုင်ဆိုင်မှုရော ဂိုးပေါက်ကန်သွင်းခွင့်တွေပါပိုမိုရခဲ့ပြီး ပွဲကို ထိန်းချုပ်ကစားသွားခဲ့တာ ဖြစ်ပါတယ်။ 

ပြင်သစ်အတွက် အနိုင်ဂိုးတွေကိုတော့ ပွဲချိန် ပထမပိုင်း ၂၇ မိနစ်မှာ ရာဘီယူက တဂိုး၊ ဂျရူးက ပွဲချိန် ၃၂ မိနစ်နဲ့ ၇၁ မိနစ်တွေမှာ နှစ်ဂိုး၊ အမ်ဘာပေးက  ဒုတိယပိုင်းပွဲချိန် ၆၈ မိနစ်မှာ တဂိုး သွင်းယူပေးခဲ့ပါတယ်။ ဩစတြေးလျအတွက် တလုံးတည်းသောဂိုးကို ဂွတ်ဒ်ဝင်းက ပွဲချိန် ၉ မိနစ်မှာ သွင်းယူခဲ့တာဖြစ်ပါတယ်။ 

အုပ်စု (D) တခြားပွဲစဉ်မှာတော့  ဒိန်းမတ်နဲ့ တူနီးရှားအသင်းတို့ ဂိုးမရှိ သရေကျပြီး ၁ မှတ်စီ ရယူနိုင်ခဲ့ပါတယ်။ 

ဒီညပွဲစဉ်တွေအပြီးအမှတ်ပေးဇယား  အုပ်စု (C) မှာ  ဆော်ဒီကအုပ်စုပထမ ၊ ပိုလန်နဲ့ မက္ကစီကို အုပ်စု ဒုတိယနဲ့ တတိယ နေရာမှာရပ်တည်နေပြီး အာဂျင်တီးနားက အုပ်စုအောက်ဆုံးမှာ ရှိနေပါတယ်။  အုပ်စု (D) မှာတော့  ပြင်သစ် အုပ်စု ပထမ၊ တူနီးရှားနဲ့ ဒိန်းမတ်က အုပ်စု ဒုတိယနဲ့ တတိယနေရာအသီးသီးမှာ ရပ်တည်နေပြီး  ဩစတြေးလျကတော့ အုပ်စု နောက်ဆုံးမှာ ရှိနေပါတယ်။ 

6 days Ago
More News
Up