အအေးဒဏ်

January 15, 2022

လောင်တလိုင်စခန်းကို စစ်ရှောင်လာသည့် အသက် ၁၀၀ ဝန်းကျင် အဘွားအို အအေးဒဏ်ကြောင့် သေဆုံး

ချင်းပြည်နယ် မတူပီမြို့နယ်က စစ်ကောင်စီနဲ့ ချင်းဒေသကာကွယ်ရေးတပ်ဖွဲ့ (CDF) တို့ တိုက်ပွဲကြောင့်  မီဇိုရမ်ဘက် စစ်ဘေးရှောင်နေရတဲ့ ကစဲကျေးရွာက အသက် ၁၀၀ ဝန်းကျင်ရှိတဲ့ အဘွားနုတွယ်ဟာ  အအေးဒဏ်နဲ့ ပင်ပန်းတဲ့ဒဏ်ကြောင့် သေဆုံးခဲ့တယ်လို့ စစ်ဘေးရှောင် တွေဆီက သိရပါတယ်။

ဇန်နဝါရီ ၇  ရက်နေ့ကတည်းက  မီဇိုရမ်စစ်ဘေးရှောင်စခန်းကနေ လောင်တလိုင် စစ်ဘေးရှောင်စခန်းကို ဇန်နဝါရီ ၁၄ ရက်နေ့  ပြောင်းရွှေ့စစ်ဘေးရှောင်စဉ်မှာ  လောင်တလိုင်  အရောက်မှာ သေဆုံးသွားခဲ့တာလို့ သိရပါတယ်။

“ဒီနေ့ လောင်တလိုင် စစ်လေးရှောင်စခန်းကို ရောက်ရောက်ချင်း အသက်ရှုံးဆုံးသွားပြီ၊ ဘုရားရဲ့ ရင်ခွင်တော်မှာ အေးချမ်းစွာ အနားယူသွားပြီ၊ အအေးဒဏ်နဲ့ ပင်ပန်းဒါဏ်တွေကို မခံနိုင်လို့ အသက်ရှုံးဆုံးခဲ့ရတာပါ၊ တခြားရောဂါ မရှိပါဘူး” လို့ စစ်ဘေးရှောင်တစ်ဦးကပြောပါတယ်။

CDF မတူပီ နဲ့ စစ်ကောင်စီတပ်တို့ မကြာခဏ တိုက်ပွဲဖြစ်ပွားလေ့ရှိပြီး  ဇန်နဝါရီ ၁၃ ရက်နေ့ကလည်း  မတူပီ-မင်းတပ်လမ်းက လည်မျိုချောင်းဆုံမှာ ထိတွေ့တိုက်ပွဲဖြစ်ပွားခဲ့ကြတာကြောင့် စစ်ကောင်စီတပ်ဖွဲ်ဝင် ၁ ဦးသေဆုံးခဲ့ပြီး ၃ ဦး ဒဏ်ရာရရှိခဲ့တယ်လို့ CDF မတူပီက သိရပါတယ်။

ဇန်နဝါရီ ၁၁ ရက်နဲ့ ၁၂ ရက်နေ့တွေမှာလည်း မင်းတပ်ကနေ မတူပီကို ထွက်ခွာလာတဲ့ စစ်ကောင်စီ တပ်ရဲ့ သံချပ်ကာ ၂ စီးနဲ့ စစ်ကာင်စီယာဉ်တန်း ၈၃ စီးကို CDF မတူပီက အကြိမ်ကြိမ် ကြားဖြတ်တိုက်ခိုက်ခဲ့တယ်လို့ CDF မတူပီက သိရပါတယ်။ 

မတူပီ-ဟားခါး လမ်းမကြီးပေါ်မှာလည်း ဇန်နဝါရီ ၅ ရက် နဲ့  ဇန်နဝါရီ ၆ ရက်နေ့ မနက်ပိုင်းကလည်း စစ်ကောင်စီတပ်ဖွဲ့နဲ့ CDFတို့ တိုက်ပွဲဖြစ်ပွားခဲ့ကြပါသေးတယ်။

မတူပီမြို့နယ်မှာ ဇန်နဝါရီ ၆ ရက်နေ့က စတင်တဲ့ စစ်ကောင်စီတပ်နဲ့ CDF တို့ကြား တိုက်ပွဲတွေကြောင့် စစ်ဘေးရှောင်လူဦးရေ ၆၀၀၀ ကျော်ရှိလာပြီလို့ သိရပါတယ်။ 

ဒါ့အပြင် စစ်ကောင်စီတပ်က အရပ်သားပြည်သူ ၁၀ ဦးကို ဖမ်းဆီးပြီး လူသားဒိုင်းအဖြစ် အသုံးပြု သတ်ဖြတ်ခဲ့ပါသေးတယ်။

တိုက်ပွဲဖြစ်ပွားရာ အနီးနားကျေးရွာတွေဖြစ်တဲ့ ကစဲ၊ ဖနိုင်၊ ငလိုင်၊ တီဘော၊ လုံလှော်၊ ကီလှုန်း၊ ဘွေထီယား ကျေးရွာတွေက ပြည်သူတွေဟာ တောတောင်တွေထဲမှာ ထွက်ပြေးတိမ်းရှောင်နေကြရတယ်လို့ သိရပါတယ်။ 

11 months Ago

December 24, 2021

နှမ်းခါးစစ်ရှောင် သက်ကြီးရွယ်အိုနှစ်ဦး အအေးဒဏ်ကြောင့် ဆုံးပါး၊ အရေးပေါ်အကူအညီလိုအပ်

မကွေးတိုင်းဒေသကြီး၊ ဂန့်ဂေါမြို့နယ် နှမ်းခါးရွာကို စစ်ကောင်စီတပ်က ဒီဇင်ဘာ ၁၇ ရက် နေ့လယ် ၁ နာရီခွဲလောက်က  တိုက်ခိုက်ရေးသုံး ရဟတ်ယာဥ်သုံးစီးနဲ့ ပစ်ခတ်ခဲ့တာကြောင့် ဒေသခံ ၄၀၀၀ ကျော် စစ်ဘေးရှောင်နေရတယ်လို့ သိရပါတယ်။

အဲလိုစစ်ဘေးရှောင်ရင်း ဒီနေ့ ဒီဇင်ဘာ ၂၄ မှာ အအေးဒဏ်ကြောင့် အသက်ကြီးသူ နှစ်ဦး သေဆုံးသွားတယ်လို့ ဒေသခံတွေက ပြောပါတယ်။

“စစ်ဘေးရှောင်နေရတာ ၁၇ ရက်နေ့ကတည်းကဗျ။ အကူညီတွေကတော့ ဆေးဝါးတွေ၊ အစား အသောက်တွေ ‌အရေးပေါ် လိုအပ်နေတယ်ဗျ။ တောင်ပေါ်ဒေသဆိုတော့ အခက်အခဲအမျိုးမျိုး ရှိတယ်။ ဆောင်းရာသီလည်းဖြစ်တော့ အနွေးထည်နဲ့ခြုံဆောင်တွေလည်း လိုအပ်နေတယ်ဗျ။ ဒီနေ့မှာ အအေးပက်ပြီး အသက်ကြီးရွယ်အိုနှစ်ဦးဆုံးပါးသွားတယ်။ ပြောရရင်တော့ အကူအညီတွေ အရေးပေါ်လိုအပ်နေတယ်” လို့ စစ်ဘေးရှောင်ကူညီပေးနေတဲ့ ကိုနွေဦးက ပြောပါတယ်။

စစ်ကောင်စီတပ်ဟာ ဂန့်ဂေါမြို့နယ်နဲ့ ပုလဲမြို့နယ်တို့ကို ထိန်းချုပ်ဖို့ အင်းအားအလုံးအရင်းနဲ့ ထိုးစစ်ဆင်နေသလို ကျေးရွာတွေကို မီးရှို့နေတယ်လို့ ဒေသခံရွာသားတွေက ပြောဆိုနေ ကြပါတယ်။

နှမ်းခါးစစ်ဘေးရှောင်သူ အမျိုးသမီးတစ်ဦးက “ကျမတို အားကိုးစရာ မရှိတော့ပါဘူး။ စားစရာလည်း မရှိသလို၊ ခြုံစရာစောင်လည်း မရှိဘူး။ ကျမ ကလေးနှစ်ယောက်ဆို အအေးပတ်ဖျားနေတာ ၃ ရက်ရှိနေပြီ။ ဘာဆေးဝါးမှ မတိုက်ရဘူး။ ဘယ်က အကူအညီမှ ရောက်မလားသေပါဘူး” လို့ ပြောပါတယ်။

စစ်ကောင်စီတပ်က မကွေးတိုင်းအတွင်းသာမက စစ်ကိုင်းတိုင်းအတွင်းဘာ နယ်မြေရှင်းလင်းရေး ကို အကြောင်ပြပြီး ကျေးရွာတွေကို မီးရှို့နေသလို ရွာသားတွေကို ပစ်သတ်နေတာကြောင့် စစ်ကိုင်းတိုင်းအတွင်းက ဒေသခံရွာသား ထောင်နဲ့ချီဟာလည်း စစ်ဘေးရှောင်နေရတယ်လို့ ဒေသခံတွေဆီက သိရပါတယ်။

ဓာတ်ပုံ-နှမ်းခါးစစ်ဘေးရှောင်ကူညီကယ်ဆယ်ရေးကိုနွေဦးမှပေးပို့ထားပါတယ်

11 months Ago
Up