အသွားအလာကန့်သတ်

January 10, 2022

ကိုဗစ်-၁၉ လူနာသစ် တိုးလာသဖြင့် တရုတ်နိုင်ငံ ယူကျိုးမြို့ကို အသွားအလာကန့်သတ်

တရုတ်နိုင်ငံအလယ်ပိုင်း ဟီနန်ပြည်နယ်၊ ပေကျင်းမြို့တော် အရှေ့တောင်ဘက် ၄၃၄ မိုင်ဝေးတဲ့ ယူကျိုးမြို့က ဒေသခံအားလုံး အခန်းထဲမှာပဲနေကြဖို့နဲ့ မြို့ထဲကနေ မထွက်ကြဖို့ အသွားအလာ ပိတ်ဆို့ ကန့်သတ်မိန့်ထုတ်ထားတာ ၉ ရက်မြောက် ရှိပြီဖြစ်ပါတယ်။  

ဆောင်းရာသီအိုလံပစ်ပွဲတော်မစခင် သီတင်းပတ် လေးပတ်အလိုကတည်းက ကူးစက်မှု အသေးစားကို ထိန်းချုပ်ဖို့ အရာရှိတွေက အဆောတလျင် ကြိုးစားနေချိန်မှာ အသစ်ကူးစက်ခံ လူနာရှိခဲ့တာကြောင့် မြို့နေလူဦးရေ ၁ ဒသမ ၁ သန်းရှိတဲ့ မြို့ကို ဇန်နဝါရီ ၂ ရက်ကစပြီး အသွားအလာ ပိတ်ဆို့ကန့်သတ် လော့ဒေါင်းချထားတာပါ။

တရုတ်နိုင်ငံရဲ့ ကိုဗစ်-၁၉ ကပ်ရောဂါ နောက်ဆုံးလှိုင်း ကူးစက်ရာ အချက်အချာဖြစ်တဲ့ ရှီးအန်းမြို့ စက်မှုဇုန်မှာလည်း သီတင်းပတ် ၂ ပတ်ကြာ အလားတူ ကန့်သတ်ထိန်းချုပ်ထားပါတယ်။

ကပ်ဘေး ဟန့်တားထိန်းချုပ်ရေး မူဝါဒတွေအရ ယူကျိုးမြို့မှာ မြို့ထဲဝင်မယ့် ကုန်ကားမောင်းသူတွေဟာ ကိုဗစ်-၁၉ ကပ်ရောဂါ ကူးစက်ခံ ဟုတ်၊ မဟုတ် လေးခါ စစ်ဆေးခံဖို့ လိုအပ်တယ်လို့ အစိုးရမီဒီယာမှာ ဖော်ပြထားပါတယ်။

ဒါကြောင့် ကုန်ကားမောင်းသူ လီချောင်ဟာ ဇန်နဝါရီ ၉ ရက်နေ့ထိ သူ့ကားပေါ်မှာ ၇ ရက်တိတိ နေခဲ့ရပြီး ဒေသခံဆိုင်ရှင်က အခမဲ့ ပံ့ပိုးတဲ့ စားစရာတွေနဲ့ ရှင်သန်ခဲ့ရတယ်လို့ ပြောပါတယ်။

သူ့ရဲ့ နောက်ဆုံး စမ်းသပ်ချက်အပြီးမှာ အိမ်ပြန်နိုင်ပြီလို့ လီက အစိုးရရုပ်သံ CGTN ကို ပြောခဲ့ပါတယ်။

ဇန်နဝါရီ ၉ ရက်က တရုတ်တနိုင်ငံလုံးမှာ ဒေသတွင်း ကူးစက်ခံရပြီး ရောဂါလက္ခဏာပြသူ ကူးစက်ခံ အသစ် ၉၇ ယောက် ရှိတယ်လို့ ရိုက်တာသတင်းမှာ ဖော်ပြထားပါတယ်။

7 months Ago

January 3, 2022

ကိုဗစ်-၁၉ စံချိန်တင်ကူးစက်မှုကြောင့် တရုတ်နိုင်ငံ ရှီးအန်းမြို့ကို အသွားအလာကန့်သတ်

တရုတ်နိုင်ငံ အနောက်မြောက်ပိုင်းက ကိုရိုနာဗိုင်းရပ်စ် နောက်ဆုံးလှိုင်း ပထမဆုံး ကူးစက်ရာ အချက်အချာဖြစ်တဲ့ ရှီးအန်းမြို့မှာ ဇန်နဝါရီ ၂ ရက်က နောက်ထပ်အသစ်ကူးစက်ခံလူနာ ၁၉၁ ယောက် တွေ့ရှိခဲ့ပြီးနောက် မြို့ကို အသွားအလာပိတ်ဆို့ ကန့်သတ်လိုက်ပါတယ်။

ကူးစက်ခံ ၁၃၁ ယောက်ကတော့ ဒေသတွင်းကူးစက်ခံရတာလို့ တရုတ် အမျိုးသားကျန်းမာရေးကော်မရှင်က ကြေညာချက် ထုတ်ပြန်ပါတယ်။’

ဇန်နဝါရီ ၁ ရက်ကတော့ အသစ်ကူးစက်ခံ ၂၃၁ ယောက်အထိ စံချိန်တင်ကူးစက်ခဲ့ပြီး အဲဒီထဲက ၁၇၅ ယောက်က ဒေသတွင်းမှာတင် ကူးစက်ခံရတာပါ။ ကျဲ့ကျန်းနဲ့ ဟီနန်ပြည်နယ်တွေမှာလည်း အသစ်ကူးစက်ခံလူနာတွေ ရှိတယ်လို့ ဆိုပါတယ်။ 

တရုတ်မြို့တော် ပေကျင်းဟာ ဆောင်းရာသီ အိုလံပစ်ပြိုင်ပွဲကို ဖေဖော်ဝါရီလထဲမှာ လက်ခံ ကျင်းပဖို့ ရှိနေတာပါ။

လက်ရှိအာဏာရ တရုတ်ကွန်မြူနစ်ပါတီဟာလည်း ငါးနှစ်တကြိမ် ညီလာခံကို ဆောင်းရာသီအတွင်း ကျင်းပဖို့ မျှော်လင့်ထားပါတယ်။

တရုတ်သမ္မတ ရှီကျင့်ဖျင်ဟာ ပါတီရဲ့ အတွင်းရေးမှူးတာဝန်ကို တတိယအကြိမ်မြောက် ဆက်လက်ထမ်းဆောင်မယ့် အလားအလာရှိတယ်လို့ မီဒီယာတွေက သုံးသပ်ထားပါတယ်။

အင်မတန် ကူးစက်မြန်တဲ့ အိုမီခရွန် ဗိုင်းရပ်စ် ဗီဇမျိုးကွဲရဲ့ အရေးပေါ် အခြေအနေကလည်း ကူးစက်မှုအတွက် ပိုတပ်လှန့်အောင် တရုတ်အစိုးရကို တွန်းအားပေးနေပါတယ်။

တရုတ်နိုင်ငံအတွင်း ပြည်ပကနေ ပြန်လာတဲ့သူတွေဆီကတဆင့် အိုမီခရွန် ကူးစက်ခံရသူ ရှိနေပြီး ပြည်တွင်းနေသူ အချင်းချင်းကြား ကူးစက်ခံတယောက်ထက်မက ရှိနေတယ်လို့ သတိပေးထားပါတယ်။

7 months Ago
More News
Up