အသက်အကြီးဆုံး ဂျိမ်းစ်ဘွန်းမင်းသမီးကြီး

April 7, 2020

အသက်အကြီးဆုံး ဂျိမ်းစ်ဘွန်းမင်းသမီးကြီး Honor Blackman ကွယ်လွန်

နာမည်ကျော် ဂျိမ်းစ်ဘွန်းရုပ်ရှင်မင်းသမီးကြီး Honor Blackman ဟာ ဧပြီလ ၅ ရက်နေ့က နေအိမ်မှာ ကွယ်လွန်သွားပါတယ်။ ကွယ်လွန်ချိန်မှာ အသက် ၉၄ နှစ်အရွယ် ရှိနေပြီဖြစ်တဲ့ မင်းသမီးကြီးဟာ သက်ရှိထင်ရှား ဘွန်းမင်းသမီးတွေထဲက အသက်အကြီးဆုံး မင်းသမီးတလက်ဖြစ်ကာ ဗြိတိန်နိုင်ငံ Sussex ပြည်နယ်အရှေ့ပိုင်း၊ Lewes နေအိမ်မှာ သဘာဝအတိုင်းပဲ ကွယ်လွန်သွားတာလို့ မိသားစုဝင်တွေက ဆိုပါတယ်။ Blackman ကို ၁၉၂၅ ခုနှစ်က လန်ဒန်အရှေ့ပိုင်း Plaistow မှာ မွေးဖွားခဲ့ပြီး အနုပညာကျောင်းတကျောင်းဖြစ်တဲ့ Guildhall School of Music and Drama မှာ လေ့ကျင့် သင်ကြားခဲ့တာပါ။ ၁၉၄၇ ခုနှစ်ကတည်းက ၂၀၁၅ ခုနှစ်အထိ ဂီတနဲ့ ရုပ်ရှင်ကားပေါင်းများစွာမှာ သီဆို ရိုက်ကူးခဲ့တဲ့ Blackman ဟာ ၁၉၆၀ ပြည့်လွန်နှစ်တွေက နာမည်ကြီးရုပ်သံစီးရီးတခု ဖြစ်တဲ့ The Avengers မှာ ဗြိတိန်-အမေရိကန် မင်းသားတလက်ဖြစ်တဲ့ Patrick Macnee နဲ့ သရုပ်ဆောင်ခဲ့ပြီး ပရိသတ်တွေ လက်ခံအားပေးမှု ရရှိခဲ့သူ ဖြစ်ပါတယ်။ အဲဒီနောက် ၁၉၆၄ ခုနှစ်မှာ တတိယမြောက် ဂျိမ်းစ်ဘွန်း ရုပ်ရှင်ကားတကားအနေနဲ့ ထွက်ရှိခဲ့တဲ့ Goldfinger ရုပ်ရှင်ထဲမှာတော့ မင်းသားကြီး Sean Connery နဲ့ တွဲဖက်ပြီး ဇာတ်ကောင်မိန်းကလေး Pussy Galore နေရာက သရုပ်ဆောင်ရာမှ ဘွန်းမင်းသမီးတလက်အဖြစ် နာမည်ကြီးလာခဲ့သူ ဖြစ်ပါတယ်။

အဲဒီအချိန်မှာတော့ Blackman ဟာ အသက် ၃၉ နှစ်အရွယ်ရှိနေပြီဖြစ်ကာ မင်းသားထက် ၅ နှစ်ကြီးတဲ့အတွက် ဘွန်းမင်းသမီးတွေထဲ အသက်အကြီးဆုံး ဘွန်းမင်းသမီးတယောက်အဖြစ် မှတ်တမ်းဝင်ခဲ့တာပါ။ လတ်တလောမှာတော့ သူ့ရဲ့ နာရေးသတင်းနဲ့ပတ်သက်ပြီး မိသားစုက ထုတ်ပြန်တဲ့ ထုတ်ပြန်ချက်မှာတော့ မိသားစုရဲ့ ချစ်ခင်ရတဲ့ မိခင်တယောက်၊ အဘွားတယောက်အနေနဲ့ ရှိနေပေးခဲ့တာအပြင် Honor ဟာ ပြောင်မြောက်တဲ့ အရည်အသွေးတွေနဲ့ သရုပ်ဆောင်တယောက် ဖြစ်ကြောင်း ဖော်ပြခဲ့ပြီး ကြေကွဲဝမ်းနည်းရကြောင်း၊ ခက်ခဲတဲ့အချိန်မှာ မိသားစုနဲ့ ကိုယ်ရေးကိုယ်တာနဲ့ပတ်သက်ပြီး လေးစားကြဖို့ အားလုံးကို ပန်ကြားထားပါတယ်။

11 months Ago