အလှမယ် ထားထက်ထက်

August 5, 2021

တော်လှန်ရေးရဲဘော်များ ငွေပဒေသာပင်ရန်ပုံငွေ ကျပ်သိန်း ၂၅၀၀ လိုအပ်နေဟု အလှမယ် ထားထက်ထက် ပြော

တော်လှန်ရေးနယ်မြေတခုထဲမှာ ရောက်ရှိနေတဲ့ အလှမယ် ထားထက်ထက်က စစ် အာဏာရှင်ဆန့်ကျင်တော်လှန်ရေးမှာ ပါဝင်လှုပ်ရှားနေကြတဲ့ တော်လှန်ရေးရဲဘော်တွေအတွက် တဖက်တလမ်းက အလှူငွေ ကောက်ခံပေးနေပြီး လက်ရှိမှာတော့ ငွေပဒေသာပင်ရန်ပုံငွေ ကျပ်သိန်း ၂၅၀၀ လိုအပ်နေတယ်လို့ ဆိုပါတယ်။

“လိုရင်းပဲ ပြောပါရစေ… မကြာခင်အရေးကြီး အခြေအနေတခုကို ဖြတ်သန်းရတော့မယ်လို့ ကျမတို့ ညီအကို မောင်နှမ ရဲဘော်တွေ သိရှိပြင်ဆင်လျက်ရှိပါတယ်။  ကလေးတွေ အတွက် အမြဲတမ်းရှင်သန်နေမယ့် အလှူငွေပဒေသာပင် တည်ဖို့ အလှူခံလိုပါတယ်။  ကျပ်သိန်း ၁၀၀၀ လက်ထဲ ရှိပါတယ်။  ကျပ်သိန်း ၂၅၀၀ လိုအပ်နေပါတယ်။”

တော်လှန်ရေးရဲဘော်တွေအတွက် လူသားချင်း အထောက်အကူပြု ပစ္စည်းတွေ ကူ ညီထောက်ပံ့ပေးဖို့ ဇွန်လနဲ့ ဇူလိုင်လတွေမှာ အလှူခံခဲ့တာ ပြီးခဲ့တဲ့ရက်ပိုင်းအထိ ဆက် လက်လှူဒါန်းပေးခဲ့ကြတဲ့ အလှူငွေတွေအရ  စုစုပေါင်းငွေကျပ်သိန်း ၂၁၀၀ ကျော် ရရှိခဲ့တယ်လို့ ဆိုပါတယ်။

အဲဒီထဲက ကျပ် သိန်း ၁၁၀၀ ကျော်ကို ဇွန်လအတွက် လိုအပ်တဲ့ ပစ္စည်းတွေ ဝယ်ယူနိုင်ဖို့ လွှဲပြောင်းပေးခဲ့ပြီး ကျန်ငွေကျပ်သိန်း ၁၀၀၀ ကို အမြဲတမ်းရှင်သန်နေမယ့် ရန်ပုံငွေ ပဒေသာပင်လုပ်ဖို့ ကျွမ်းကျင်သူတွေနဲ့ တိုင်ပင်ခဲ့ပြီးဖြစ်တယ်လို့ ထားထက်ထက်က ဆိုပါတယ်။

“ပုဂ္ဂိုလ်ရေး တိုက်ခိုက်ခံရမှုတွေကြောင့် အလှူမခံတော့ဖို့ ဆုံးဖြတ်ထားပေမယ့် ငွေ ပဒေသာပင်ဖြစ်တာမို့ အမြန်ဆုံး လှူပေးကြပါလို့ တောင်းဆိုပါတယ်… ရရှိတဲ့ အလှူငွေ တွေကို နေ့စဉ်ကြေညာပြီး အမြန်စာရင်းပိတ်နိုင်ဖို့ ကူညီပေးကြဖို့ မျှော်လင့်ပါတယ်ရှင်”

အလှမယ် ထားထက်ထက်ဟာ စစ်အုပ်စုရဲ့ မတရားအာဏာသိမ်းကာလ စတင် ချိန်တည်းက ပြည်သူတွေနဲ့ တသားတည်းရပ်တည်ကာ စစ်ကာဏာရှင်ဆန့်ကျင်ရေး လူထုလှုပ်ရှားမှုတွေမှာ တက်တက်ကြွကြွ ပါဝင်လှုပ်ရှားခဲ့တဲ့ အနုပညာရှင်တယောက်ဖြစ်ပြီး ပုဒ်မ ၅၀၅(က)နဲ့ အမှုဖွင့်ခံထားရသူလည်း ဖြစ်ပါတယ်။

ပြီးခဲ့တဲ့ ရက်ပိုင်းမှာတော့ သူ့ရဲ့ ဖခင်ဖြစ်သူ ကွယ်လွန်သွားခဲ့တာမို့ ဝမ်းနည်းစိတ် မကောင်းဖြစ်ရကြောင်းနဲ့ နောက်ဆုံးအကြိမ်မှာ ဖခင်ကို တွေ့ခွင့်မရဘဲ ကန်တော့ခွင့်မရ တဲ့အတွက် ဘယ်လိုမှ မဖြေနိုင်မခံစားနိုင်ဘူးလို့ ထားထက်ထက်က ဆိုပါတယ်။

“ဆိုးရွားတဲ့ ပုဂ္ဂိုလ်ရေးတိုက်ခိုက်မှုတွေ… သိက္ခာပိုင်းတိုက်ခိုက်မှုတွေအပြင် နှလုံး သားတွေ တစစီ ဖြစ်သွားလောက်တဲ့ စိတ်ပိုင်းဆိုင်ရာ ကြေကွဲစရာ ကိစ္စတွေလည်း ဒီရက်ပိုင်းထဲ ဖြစ်ပျက်ခဲ့ပြီးပါပြီ… နှုတ်ဆက်စရာ ရှိတာတွေ နှုတ်ဆက်ပြီးပြီမို့ ဆက်လျှောက် ရမယ့် လမ်းကို ရင်ကော့ခေါင်းမော့လို့ အဖေ့သွေးအပြည့်ပါတဲ့ သမီးအနေနဲ့ အဖေဖြစ်စေ ချင်တဲ့အတိုင်း ဆက်လျှောက်ပါဦးမယ်။”

သူ့ရဲ့ ဖေ့စ်ဘွတ်ခ်လူမှုကွန်ရက်ပေါ်မှာတော့ အမေရိကန်၊ ဩစတေးလျ၊ ဗြိတိန်၊ ကိုရီးယား၊ ဂျပန်၊ စင်ကာပူ၊ မလေးရှား၊ ထိုင်းစတဲ့ နိုင်ငံတွေအပြင် BitCoin၊ PayPal စတဲ့ အကောင့်တွေကပါ ဆက်သွယ်လှူဒါန်းနိုင်ဖို့ ဖော်ပြထားတဲ့အပြင် မြန်မာပြည်တွင်း အလှူရှင်တွေအနေနဲ့ ချက်ဘောက်စ်ကတဆင့် ဆက်သွယ်နိုင်တယ်လို့ ဆိုပါတယ်။

4 months Ago

May 24, 2021

“တော်လှန်ရေးထဲ ပါဝင်ဖို့လာတဲ့သူတွေကို လေးစားကြိုဆိုပါတယ်”-အလှမယ် ထားထက်ထက်

တော်လှန်ရေးနယ်မြေတခုထဲမှာ ရောက်ရှိနေတဲ့ အလှမယ် ထားထက်ထက်က စစ် အာဏာရှင်ဆန့်ကျင်တော်လှန်ရေးထဲ ပါဝင်ဖို့ လာတဲ့သူတွေကို လေးစားကြိုဆိုကြောင်း သူ့ရဲ့ ဖေ့စ်ဘွတ်ခ်အင်တာနက်လူမှုကွန်ရက်ပေါ်ကတဆင့် ရေးသားထားပါတယ်။

“ဒီစခန်းမှာ ကျမရှိတယ်ဆိုပြီးပြောလို့ တော်လှန်ရေးထဲ ပါဝင်ဖို့လာတဲ့ သူတွေကို လေးစားကြိုဆိုပါတယ်။ နောက်ပြီး ဒီစခန်းမှာ ကျမရှိနေတယ်ဆိုလို့ လှူဒါန်းပေးကြတဲ့ အလှူရှင်များ အားလုံးကိုလဲ တကယ်လေးစားကျေးဇူးတင်ပါတယ်”

ဒါ့အပြင် သူ့အနေနဲ့ အဆုံးသတ်တိုက်ပွဲအတွက် ပြင်ဆင်လေ့ကျင့်နေကြသူတွေကို လည်း အလွန်လေးစားကျေးဇူးတင်သလို အောင်ပွဲရတဲ့အထိ တော်လှန်ရေးထဲ ပါဝင်ပေး ကြဖို့ တိုက်တွန်းထားပြီး စေတနာနဲ့ ပေးလှူတဲ့ အလှူရှင်တွေကိုလည်း အရင်အတိုင်း ဆက်လက်ထောက်ပံ့ပေးကြဖို့လည်း မေတ္တာရပ်ခံထားပါတယ်။

“ဘာလို့လဲဆိုတော့ စစ်သင်ခန်းစာ လေ့ကျင့်နေတဲ့ စခန်းတိုင်းက အရာရာ လိုအပ်နေကြလို့ပဲ ဖြစ်ပါတယ်။ အလှူရှင်၊ စေတနာရှင်တို့ရဲ့ အလှူတွေက လေ့ကျင့်ကြိုးစားနေ သူတွေအတွက် တကယ်လိုအပ်တဲ့ အာဟာရနဲ့ စိတ်ခွန်အားကို ရရှိစေတဲ့အတွက် အကျိုး ရှိစေလို့ပဲ ဖြစ်ပါတယ်။ ထားထက်ကို စခန်းတိုင်းမှာရှိနေတယ်လို့ သဘောထားစေချင်ပါ တယ်”

ဒါ့အပြင် ထားထက်ထက်က တော်လှန်ရေးကို အကြောင်းပြပြီး လူသစ်စုဆောင်း အမြတ်ထုတ်တာတွေနဲ့ အလှူငွေ၊ အလှူပစ္စည်းအပေါ်တခြားသော ပုဂ္ဂိုလ်ရေး အသုံးချမှု တွေရှိလာခဲ့ရင်လည်း သေချာစိစစ်ပြီး တော်လှန်ရေးသန့်စင်မှုလုပ်ကြဖို့လည်း အကြံပြုထားပါတယ်။

အလှမယ် ထားထက်ထက်ဟာ စစ်အုပ်စုရဲ့ မတရားအာဏာသိမ်းကာလ စတင် ချိန်တည်းက ပြည်သူတွေနဲ့ တသားတည်းရပ်တည်ကာ စစ်ကာဏာရှင်ဆန့်ကျင်ရေး လူထုလှုပ်ရှားမှုတွေမှာ တက်တက်ကြွကြွ ပါဝင်လှုပ်ရှားခဲ့တဲ့ အနုပညာရှင်တယောက် ဖြစ်ပြီး ပုဒ်မ ၅၀၅(က)နဲ့ အမှုဖွင့်ခံထားရသူလည်း ဖြစ်ပါတယ်။

6 months Ago
Up