အလံဖြူထောင်

April 5, 2022

စစ်ကောင်စီတပ်တွင် အလံဖြူထောင်သည့်ကိစ္စ အင်တာဗျူးဖြေကြားခဲ့သူကို ထောင်ဒဏ် ၃ နှစ်ချ

ချင်းပြည်နယ်၊ ပလက်ဝမြို့အခြေစိုက် ၂၈၉ တပ်ရင်းမှာ အလံဖြူထောင်ထားတဲ့ကိစ္စအား ရခိုင်အခြေစိုက် မီဒီယာတခုကို အင်တာဗျူးဖြေကြားမှု​ကြောင့် နိုင်ငံတော် အကြည်ညိုပျက်စေမှု ၅၀၅ (က) နဲ့ တရားစွဲခံထားရတဲ့ ပလက်ဝဒေသခံ ကိုတင်ထွန်းအောင်ကို ဧပြီ ၅ ရက်နေ့က မြို့နယ် တရားရုံးက အလုပ်နဲ့ ထောင်ဒဏ် ၃ နှစ်ချမှတ်လိုက်တယ်လို့ မိသားစုဝင်တဦးက ပြောပါတယ်။

“ဒီနေ့ရုံးချိန်းမှာ ကိုတင်ထွန်းအောင်ကို အလုပ်နဲ့ ထောင်ဒဏ် ၃ နှစ်ချမှတ်လိုက်တယ်။ ချုပ်ရက်ကိုတော့ တပေါင်းတည်း ခံစားခွင့်ရှိတယ်။ ကျနော်တို့ကတော့ အယူခံ တက်သွားမှာဖြစ်တယ်” လို့ ပြောပါတယ်။

ကိုတင်ထွန်းအောင်နဲ့ ဦးတင်ဦးတို့ကို ၂၀၂၁ ခုနှစ် ဒီဇင်ဘာ ၂၇ ရက်နေ့က ရခိုင်ပြည်နယ် အခြေစိုက် Western News သတင်းဌာနအား ပလက်ဝအခြေစိုက် ၂၈၉ တပ်ရင်းမှာ အလံဖြူ ထောင်ထားသည့် ကိစ္စကို အင်တာဗျူးဖြေကြားမှုကြောင့် ရဲနဲ့စစ်တပ်က ဖမ်းဆီးခဲ့တာပါ။

ဦးတင်ဦးကို ဝန်ခံနဲ့ ပြန်လွှတ်ပေးခဲ့ပြီး ကိုတင်ထွန်းအောင်ကို ၂၈၉ တပ်ရင်းမှ ဗိုလ်ကြီး ထွန်းထွန်းနိုင်က တရားလိုလုပ်ကာ နိုင်ငံတော် အကြည်ညိုပျက်စေမှု ၅၀၅(က)နဲ့ ပလက်ဝမြို့နယ် တရားရုံးမှာ တရားစွဲဆိုခဲ့ပါတယ်။

အဆိုပါ အလံဖြူထောင်တဲ့ သတင်းကို ဖော်ပြမှုကြောင့် Western News သတင်းဌာနကို နိုင်ငံတော် အကြည်ညိုပျက်စေမှု ၁၂၄ နဲ့ စစ်ကောင်စီက စစ်တွေမြို့နယ် တရားရုံးမှာ ဦးတိုက်လျှောက် တရားစွဲထားရပါတယ်။

8 months Ago

December 29, 2021

ပလက်ဝအခြေစိုက် ခလရ ၂၈၉ တပ်ရင်းနယ်မြေတွင် အလံဖြူထောင်

ချင်းပြည်နယ်၊ ပလက်ဝမြို့နယ်အခြေစိုက် စစ်ကောင်စီတပ်  ခလရ ၂၈၉ တပ်ရင်းရဲ့ တပ်နယ်မြေအတွင်းက တောင်ကုန်းတခုပေါ်မှာ အလံဖြူထောင်ထားတာ တွေ့ရတယ်လို့ ဒေသခံတွေဆီက သိရပါတယ်။

ဒေသခံ ကိုအောင်မိုးဝင်းက “ခလရ ၂၈၉ တပ်ထဲမှာ အလံဖြူထောင်ထားတာကို မြင်နေရတာ တပတ်လောက်ရှိပြီဗျ။ အခုလ ၂၃ ရက်နေ့ကတည်းက သတိထားကြည့်မိတာ။ ၂၈ ရက်နေ့ညနေအထိ ထောင်ထားတုန်းပဲ။ ဘာကြောင့်ထောင်တာလည်းဆိုတာတော့ မသိဘူးလေဗျာ” လို့ ပြောပါတယ်။

ခလရ ၂၈၉ တပ်ရင်းမှာ အလံဖြူထောင်ပြီးတဲ့ နောက်ပိုင်းရက်တွေမှာ တပ်ထဲကို ယာဉ်အဝင်အထွက်တွေ အနည်းငယ်ရှင်းလင်းနေတယ်လို့ ဒေသခံတွေက ပြောပါတယ်။

အာဏာဖီဆန် CDM လှုပ်ရှားမှုမှာ ပါဝင်တဲ့ ဗိုလ်ကြီးတဦးက “တပ်ထဲမှာ အလံဖြူထောင်တဲ့အချက်က ၃ ချက်ရှိတယ်။ ယတြာချေတဲ့ သဘောလုပ်တာ၊ စစ်သည်အင်အားမရှိဘဲ သူတို့ရဲ့မိသားစုတွေပဲ ရှိနေကြလို့ ဝင်မတိုက်ပါနဲ့ဆိုတဲ့သဘောနဲ့ တိုက်ပွဲဖြစ်နေတဲ့ နေရာတွေက တပ်တွေမှာ အလံဖြူထောင်ရင်တော့ အသာတကြည် အရှုံးပေးထားတယ်ဆိုတဲ့ သဘောတွေရှိတယ်။ အခုဟာက ဘယ်လိုကြောင့် အလံဖြူထောင်တာလည်း ဆိုတာတော့ အဲ့ဒီတပ်တွင်းထဲက သူတွေပဲ သိမှာပါ” လို့ ရှင်းပြပါတယ်။

ပလက်ဝမြို့နယ်အခြေစိုက် တပ်မ ၁၁ တပ်မမှူးနဲ့ တပ်ရင်း ၂၈၉ တပ်ရင်းမှူးတို့က ပလက်ဝမြို့နယ်မှာရှိတဲ့ ရပ်ကျေးအုပ်ချုပ်ရေးမှူးတွေကို နိုဝင်ဘာ ၂၆ ရက်နေ့ကစတင်ပြီး ရွာတရွာကိုပြည်သူ ၁၅ ယောက်နှုန်း ပြည်သူ့စစ်သင်တန်း မတက်မနေရတက်ရောက်ဖို့ စာရင်းပေးသွင်းခိုင်းထားတယ်လို့ အုပ်ချုပ်ရေးအသိုင်းအဝိုင်းထံက သိရပါတယ်။

11 months Ago
More News
Up