အလုပ်ရှင်

June 27, 2018

အလုပ်ရှင် အလုပ်သမား ပြဿနာအတွက် အလုပ်သမားတရားရုံးများ ထူထောင်မည်

အစိုးရ၊ လွှတ်တော်နဲ့ အလုပ်ရှင် အလုပ်သမားသမဂ္ဂတွေ ပူးပေါင်းပြီး အလုပ်သမား တရားရုံးတွေ ထူထောင်သွားမယ်လို့ အလုပ်သမားဝန်ကြီးဌာန အမြဲတမ်းအတွင်းဝန်က ပြောပါတယ်။ မြန်မာနိုင်ငံ စက်မှုလက်မှုနှင့် ဝန်ဆောင်မှုလုပ်ငန်းပေါင်းစုံ အလုပ်သမားသမဂ္ဂများ အဖွဲ့ချုပ်က ဦးဆောင်ကျင်းပတဲ့ အလုပ်သမားတရားရုံးတွေ ပေါ်ပေါက်လာရေး အလုပ်ရုံဆွေးနွေးပွဲကို ဇွန်လ ၂၇ ရက်က  ရန်ကုန်မြို့ အင်းလျားလိတ်ဟိုတယ်မှာ ကျင်းပခဲ့ပါတယ်။ အစိုးရ၊ လွှတ်တော်နဲ့ အလုပ်ရှင် အလုပ်သမားသမဂ္ဂတွေ အားလုံး ကျေနပ်မယ့် အဖြေတခုကိုရှာပြီး ပြည်ထောင်စုတရားလွှတ်တော်ချုပ်ရဲ့ သဘောတူညီမှုရပြီဆိုရင် အလုပ်သမားတရားရုံးတွေကို ထူထောင်နိုင်တော့မယ်လို့ အလုပ်သမား၊ လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဌာန အမြဲတမ်းအတွင်းဝန် ဦးမျိုးအောင်က ပြောပါတယ်။ အလုပ်သမားတရားရုံးတွေ ထူထောင်နိုင်ဖို့ လိုအပ်တဲ့ ဥပဒေရေးရာ အချက်အလက်တွေ၊ အသစ်ပြင်ဆင်ရေးဆွဲသင့်တဲ့ ဥပဒေတွေကို ပြင်ဆင်ပြီး ပါဝင်သင့်ပါဝင်ထိုက်တဲ့ အချက်အလက်တွေအားလုံး ပြည့်စုံအောင် ပါဝင်ဖို့ လွှတ်တော်က စောင့်ကြည့်နေတယ်လို့ အမျိုးသားလွှတ်တော် ပြည်တွင်း ပြည်ပ အလုပ်သမားရေးရာကော်မတီ ဥက္ကဋ္ဌ ဦးကျော်ထွေးက ပြောပါတယ်။ အလုပ်သမားတရားရုံးတွေ ပေါ်ပေါက်လာရင် လက်ရှိ ရင်ဆိုင်နေရတဲ့ အလုပ်ရှင် အလုပ်သမားပြဿနာတွေကို ပိုပြီး ရှင်းရှင်းလင်းလင်း ဖြေရှင်းလာနိုင်လိမ့်မယ်လို့  အလုပ်သမားသမဂ္ဂ ခေါင်းဆောင်တွေက မျှော်လင့်နေပါတယ်။ အလုပ်သမားတရားရုံးတွေ တည်ထောင်ပြီး ပြဿနာတွေကို ဖြေရှင်းနိုင်ဖို့ ၂၀၁၂ ခုနှစ်က ပြဋ္ဌာန်းခဲ့တဲ့ အလုပ်သမားရေးရာ အငြင်းပွားမှု ဖြေရှင်းရေးဥပဒေကို ကိုးကားပြီး လိုအပ်တဲ့ အချက်အလက်တွေနဲ့ ဥပဒေပြဋ္ဌာန်းချက်တွေကို ဖြည့်စွက်နိုင်ဖို့ အစိုးရနဲ့ လွှတ်တော်ကို အလုပ်သမားသမဂ္ဂ တာဝန်ရှိသူတွေက တိုက်တွန်းထားပါတယ်။
3 years Ago

May 1, 2018

မေဒေးနေ့ အလုပ်မပိတ်သည့် အလုပ်ရှင်ကို အရေးယူရန် အလုပ်သမားများ ချီတက်တောင်းဆို

စစ်ကိုင်းတိုင်း၊ ထီးချိုင့်မြို့ရှိ တကောင်းနီကယ်စက်ရုံစီမံကိန်းက အလုပ်သမားတွေက  မေ ၁ ရက်မှာ ကျရောက်တဲ့ ၁၂၈ ကြိမ်မြောက် ကမ္ဘာ့အလုပ်သမားနေ့ ချီတက်ပွဲကို ဒီကနေ့မနက်က ကျင်းပပြီး အလုပ်သမား အခွင့်အရေးတွေအတွက် တောင်းဆိုပါတယ်။ ချီတက်ပွဲဦးဆောင်သူ ဦးထွန်းထွန်းဝင်း  “ကျနော်တို့ အလုပ်သမားတွေရဲ့ ရပိုင်ခွင့်တွေဟာ ခေတ်အဆက်ဆက်ကနေ အခုအချိန်အထိ လုပ်ခလစာတွေ၊ အာမခံချက်ရှိတဲ့ ဘဝလုံခြုံမှုတွေေ၊ လူနေမှုဘဝမြှင့်တင်ဖို့တွေ ဒါတွေဟာ အခုအချိန်အထိ နိမ့်ကျနေတုန်းပါ။ လုပ်ငန်းရှင်တွေဟာ ခေတ်အဆက်ဆက်ကနေ အခုအချိန် အထိ အလုပ်သမားတွေအပေါ်မှာ ဖိနှိပ်ချုပ်ချယ်နေဆဲပဲ ဆိုတာ ဒါတွေကို အလုပ်သမားတွေ သိအောင် ကျနော်တို့ တောင်းဆိုချက်တွေ အောင်မြင်အောင် ဆက်လက်လုပ်ဆောင်သွားမှာပါ”လို့ ပြောပါတယ်။ အလုပ်သမားတချို့က မေဒေးနေ့ ချီတက်ပွဲကို လာချင်တဲ့စိတ်ရှိပေမယ့် အကြောက်တရားတွေကြောင့် လုပ်ငန်းခွင်ထဲကနေ မလာနိုင်တာတွေ ရှိတယ်။ မေဒေးနေ့မှာ အလုပ်မပိတ်တဲ့ လုပ်ငန်းရှင်ကို အရေးယူသွားဖို့ ဆက်လက်တောင်းဆိုမယ်လို့လည်း ဦးထွန်းထွန်းဝင်းက ပြောပါတယ်။ အလုပ်သမားတွေဟာ ထီးချိုင့်မြို့၊ ဧရာဝတီတံတားထိပ်မှာ ဒီကနေ့မနက်က စုစည်းပြီး ဆိုင်ကယ်တွေနဲ့ ထီးချိုင့်မြို့ရှိ ဗိုလ်ချုပ်ကြေးရုပ်တုရှိရာ လာရောက်ပြီး ဗိုလ်ချုပ်အောင်ဆန်း၊ သခင်ဖိုးလှကြီးနဲ့ ခေတ်အဆက်ဆက်က အလုပ်သမား ခေါင်းဆောင်တွေကို အလေးပြုတာနဲ့ မေဒေးနေ့ဖြစ်ပေါ်လာပုံအကြောင်း စာတမ်းတွေဖတ်ခဲ့ကြပါတယ်။ သတင်း - ကိုကိုလင်း(အင်းတော်)
3 years Ago
Up