အလိုမရှိ

March 2, 2021

ကမာရွတ်မြို့နယ်ထဲက လူငယ်တွေရဲ့ လမ်းပေါ်က တော်လှန်ရေး တီးဝိုင်းလေး

စစ်အာဏာရှင်စနစ်ကို ဆန့်ကျင်တဲ့ ဒီမိုကရေစီနဲ့ လွတ်လပ်မှုကိုလိုလားတဲ့ လူငယ်တချို့ဟာ ကမာရွတ်မြို့နယ်ထဲက ဆန္ဒပြသူတွေနဲ့အတူ တော်လှန်ရေး သီချင်းတွေ သီဆိုနေကြတာကို မြင်တွေ့ရပါတယ်။

ပလတ်စတစ်ပုံးတွေကို တီးခတ်ပြီး မြူးကြွတဲ့ အလိုမရှိ ဆိုတဲ့ သီချင်းကိုတော့ ထိုင်သပိတ်လုပ်နေသူအားလုံးကလည်း ဝိုင်းဆိုခဲ့ကြတဲ့ မြင်ကွင်းဟာ  မြင်ရကြားရသူတွေကို စိတ်ကြည်နူးခွန်အားဖြစ်စေပါတယ်။ 

အာဏာရှင်ကို မောင်းထုတ်တဲ့ သံပုံးတီးလှုပ်ရှားမှုကို ရေးစပ်ထားတဲ့ အလိုမရှိ သီချင်းက စစ်ချီတီးလုံးနဲ့ ဆင်တူတဲ့အတွက်လည်း   စိတ်ဓာတ်တက်ကြွစေပါတယ်။

“တယောက်တည်း ခံစားနေရမယ် အမေ့သားတွေ သမီးတွေလက်တွေပြ၊ ပုခုံးပေါ်ထမ်းတင်ထားတဲ့ အမေ့စကားတွေ နားထဲကြားနေရ၊ ဘယ်လိုပဲအခက်အခဲတွေရှိပါစေ အကုန်ဖြတ်ကျော်သွားမယ့် စိတ်ကိုထား၊ တယောက်ချင်းအကုန်ဝိုင်းတွန်းကြရင် ပိတ်ထားတဲ့ တံခါးများပွင့်မှာပါ။ သစ်တပင်ကောင်းမှ ငှက်တသောင်းလုံးနားလို့ရမှာပါ၊  ဟေ့ အမှန်တရားကို ရရင်ရ ပြန်မရင် အဆုံးထိသွားမှာပါ ၊ သံပုံးတွေရှေ့မှာချ တစ္ဆေတယောက်လို မောင်းထုတ်သွားမှာပါ  ၊ အနိုင်ရရင် က ချင်ကမယ် အနိုင်မရခင် သွေးတွေရဲနေမှ  ပိတ်ထားတဲ့နားတွေက အကုန်လုံးအော်ပြောမှကြားမှာပါ”။ 

“အာဏာရှင်မောင်းထုတ်ကြမယ် အလိုမရှိ အလိုမရှိ ၊ ပြည်သူတွေကန့်ကွက်ကြမယ် အလိုမရှိ မလိုမရှိ ၊ သံပုံးတွေ တို့အတူတီး အမှန်တရားအတွက် ရဲရင့်ဖို့လိုပြီ ၊ အာဏာရှင်မောင်းထုတ်ကြမယ် အလိုမရှိ အလိုမရှိ၊ ပြည်သူတွေကန့်ကွက်ကြမယ် အလိုမရှိ မလိုမရှိ၊ သံပုံးတွေတို့ အတူတီး အမှန်တရားအတွက် ရဲ့ရင့်ဖို့လိုပြီ  ဆန္ဒဖော်ထုတ်ကြမယ် အမှန်တရားဘက်မှာ ငါတို့ရပ်တည်ပြီ” 

ဒီသီချင်းဟာ ၂၀၂၁ စစ်အာဏာရှင်စနစ်ဆန့်ကျင်ရေးလူထုလှုပ်ရှားမှုအတွင်း လူငယ်တွေအကြားမှာ ဝိုင်းဖွဲ့သီဆိုမှုအများဆုံး တေးသီချင်းတပုဒ်ဖြစ်ပြီး ၈၈၈၈ လူထုအရေးတော်ပုံကာလက ထွက်ရှိခဲ့တဲ့  ကမ္ဘာမကြေဘူးသီချင်းနဲ့ အရေးကြီးပြီ တော်လှန်ရေး သီချင်းတွေဟာလည်း  သပိတ်စစ်ကြောင်းတွေနဲ့အတူ နေ့စဉ်လွင့်ပျံ့နေဆဲဖြစ်ပါတယ်။

2 years Ago

January 24, 2021

တပ်စခန်းတည်ဆောက်မှု အလိုမရှိကြောင်း ဘီးလင်းဒေသခံ  ၁၀၀၀ နီးပါး ဆန္ဒပြ

မွန်ပြည်နယ်၊ဘီးလင်းမြို့နယ်၊ လေးကေကျေးရွာမှာ တပ်မတော်က ကျေးရွာအနီးနဲ့ ကျေးရွာအတွင်း တပ်စခန်းတည်ဆောက်တာ​တွေကို အလိုမရှိကြောင်း ဒေသခံ အင်းအား ၁၀၀၀ နီးပါး ဇန်နဝါရီ ၂၄  ရက်နေ့က ပထမဆုံးအကြိမ် ဆန္ဒထုတ်ဖော်ခဲ့ကြတာပါ။ ဇန်နဝါရီ ၂ ရက်နေ့က ဝင်းတာန်ပန်စခန်းနဲ့ ကြသောက်ဆိပ် စခန်းအနီးမှာ ပစ်ခတ်မှုတွေ ဖြစ်ပွားခဲ့တဲ့အပြင် ​လေးကေကျေးရွာအတွင်းက တပ်စခန်းမှာ  ပေါက်ကွဲမှုဖြစ်ပွားခဲ့တဲ့အတွက် ဒေသခံတွေ စစ်ဘေးလွတ်ရာထွက်ပြေး တိမ်းရှောင်ခဲ့ရတယ်လို့ ဒေသခံတွေက ပြောပါတယ်။ ဘီးလင်းမြို့နယ်၊ မြစ်ကျိုးကျေးရွာ၊ ဦးစောမြအေးက "တိုက်ပွဲဖြစ်တော့ ဒေသခံတွေကြောက်လန့်ပြီး ထွက်ပြေးရတယ်။ စစ်ပွဲနဲ့ပတ်သက်ပြီး စစ်ဘေးစစ်ဒဏ်ကို ဒေသခံတွေ ခံစားလာရတာ ကြာပြီ။ ဒီလိုမျိုးထပ်မဖြစ်ဖို့ ဆန္ဒထုတ်ဖော်ရတာ” လို့ ပြောပါတယ်။ ပစ်ခတ်မှုဖြစ်ပွားပြီးနောက် တပ်မတော်က ကျေးရွာအတွင်း ညအချိန်ဖြတ်သန်းသွားလာတာတွေကို အချိန်ကန့်တာတွေရှိတယ်လို့ ဒေသခံတွေက ဆိုပါတယ်။  တစ်နိုင်ငံလုံး ပစ်ခတ်တိုက်ခိုက်မှုရပ်စဲရေး သဘောတူစာချုပ် (NCA) စာချုပ်ကို အကောင်အထည်ဖော်ဆောင်ရွက်ရေး၊ နှစ်ဖက်လေးစားလိုက်နာရမယ့် ပစ်ခတ်တိုက်ခိုက်မှုရပ်စဲရေးဆိုင်ရာ ကျင့်ဝတ်တွေကို လိုက်နာကျင့်သုံးဆောင်ရွက်ရေး၊ ဒေသအတွင်း လက်နက်ကိုင်ပဋိပက္ခတွေ၊ ကျေးရွာအတွင်း တပ်စွဲထားတဲ့ တပ်စခန်းတွေ အလိုမရှိ၊ အောက်ခြေမှာ ဖြစ်ပေါ်နေတဲ့ ပဋိပက္ခတွေကို အစိုးရက ဖြေရှင်းပေးရေး၊ နိုင်ငံရေးပြဿနာတွေကို နိုင်ငံရေးနည်းနဲ့ ဖြေရှင်းပေးရေး  စတဲ့ ကြွေးကြော်သံ​တွေနဲ့ ဆန္ဒထုတ်ဖော်ခဲ့ကြပါတယ်။ ကျေးရွာပေါင်း ၁၄ ရွာက ဒေသခံပြည်သူ ၁၀၀၀ နီးပါးက မြစ်ကျိုးကျေးရွာကနေ လေးကေကျေးရွာအထိ လမ်းလျှောက်ဆန္ဒ ထုတ်ဖော်ခဲ့ကြတာပါ။ ရဲမင်းခေါင်
2 years Ago
Up