အရှိန်မြှင့်

January 12, 2023

မြန်မာ့အရေး အရှိန်မြှင့်အရေးယူဆောင်ရွက်ရန် အာဆီယံဥက္ကဋ္ဌ အင်ဒိုနီးရှားကို HRW တိုက်တွန်း

၂၀၂၃ ခုနှစ်မှာ အရှေ့တောင်အာရှနိုင်ငံများအသင်း (အာဆီယံ) အလှည့်ကျဥက္ကဋ္ဌဖြစ်တဲ့ အင်ဒိုနီးရှားနိုင်ငံအနေနဲ့ မြန်မာ့အရေးနဲ့ပတ်သက်ပြီး အရှိန်မြှင့် အရေးယူလုပ်ဆောင်ဖို့ လူ့အခွင့်အရေးစောင့်ကြည့်အဖွဲ့ (HRW)က တိုက်တွန်းလိုက်ပါတယ်။

HRWအဖွဲ့ရဲ့ အာရှဒေသဆိုင်ရာ ဒါရိုက်တာ အလိန်း ပီယာဆန်က “ဒါဟာ အင်ဒိုနီးရှားနိုင်ငံအတွက် နောက်တဆင့်ထပ်လှမ်းဖို့ အခွင့်အရေးပါပဲ။ ကမ္ဘာ့အရေးတွေမှာ အင်ဒိုနီးရှားနိုင်ငံက အရေးပါတဲ့ အခန်းကဏ္ဍကနေ ပါဝင်နိုင်ဖို့ ဆန္ဒပြင်းပြတာကို တွေ့ရပါတယ်။ ပြီးခဲ့တဲ့နှစ်တုန်းကလည်း G20 အစည်းအဝေးကို အောင်မြင်အောင် လက်ခံကျင်းပနိုင်ခဲ့ပါတယ်။ ဒီနှစ်မှာတော့ အင်ဒိုနီးရှားနိုင်ငံအနေနဲ့ အာဆီယံဥက္ကဋ္ဌနေရာကို အကျိုးရှိ ထိရောက်အောင် အသုံးချပြီး မြန်မာနိုင်ငံက အကျပ်အတည်း ပြဿနာတွေကို ဖြေရှင်းပေးနိုင်ဖို့ တိုက်တွန်းပါတယ်” လို့ ဒီနေ့ သတင်းစာရှင်းလင်းပွဲမှာ ပြောကြားခဲ့တာပါ။

လူ့အခွင့်အရေးစောင့်ကြည့်ရေးအဖွဲ့ (HRW) က နှစ်စဉ်ထုတ်ပြန်တဲ့ ကမ္ဘာ့ရေးရာ အစီရင်ခံစာထဲမှာ “ရခိုင်ပြည်နယ်အတွင်း မြန်မာစစ်တပ်နဲ့ ရခိုင်တိုင်းရင်းသား လက်နက်ကိုင် တပ်ဖွဲ့တို့အကြား တိုက်ပွဲတွေ ပိုမိုဖြစ်ပွားလာပြီး” နယ်စပ်ဒေသတလျှောက်ကိုပါ ပျံ့နှံ့လာတာကြောင့် ရိုဟင်ဂျာဒုက္ခသည်တွေနဲ့ ဘင်္ဂလားဒေ့ရှ်ပြည်သူတွေအတွက် အန္တရာယ် ဖြစ်လာစေနိုင်မယ့်အပေါ်မှာ စိုးရိမ်မှုရှိတယ်လို့ ထုတ်ဖော်ပြောဆိုခဲ့ပါတယ်။

ရိုဟင်ဂျာဒုက္ခသည် အများအပြားဟာ ထိုင်းနဲ့ ဘင်္ဂလားဒေ့ရှိနိုင်ငံတို့လို အိမ်နီးချင်းနိုင်ငံတွေအပြင် မွတ်ဆလင်အများစုနေထိုင်တဲ့ မလေးရှားနဲ့ အင်ဒိုနီးရှားနိုင်ငံ တွေကိုပါ နှစ်ပေါင်းများစွာ ထွက်ပြေးခဲ့ကြရပါတယ်။

ဘင်္ဂလားဒေ့ရှိနိုင်ငံမှာလည်း ရိုဟင်ဂျာ ၁ သန်းနီးပါးဟာ လူတွေ ပြွတ်သိပ်ကျပ်နေတဲ့ အခြေအနေတွေမှာ နေထိုင်နေရပြီး အဲ့ဒီထဲက ရိုဟင်ဂျာ ရာပေါင်း၊ ထောင်ပေါင်းများစွာက ၂၀၁၇ ခုနှစ်အတွင်း မြန်မာစစ်တပ်ရဲ့ အကြမ်းဖက်ဖြိုခွင်းမှုတွေကနေ ထွက်ပြေးလာခဲ့ကြတာ ဖြစ်ပါတယ်။

ဒီလို လူသားမျိုးနွယ်အပေါ် ကျူးလွန်တဲ့ ရာဇဝတ်မှုတွေနဲ့ပတ်သက်ပြီး မြန်မာစစ်တပ်က ကျူးလွန်ခဲ့ခြင်း မရှိကြောင်း ငြင်းဆန်ထားပါတယ်။

3 weeks Ago

April 26, 2022

နျူကလီးယားလက်နက်များ တိုးတက်စေရန် အရှိန်မြှင့်မည်ဟု ကင်ဂျုံအန်း ပြော

မြောက်ကိုရီးယားဟာ သူ့ရဲ့ နျူကလီးယား လက်နက်တွေကို တိုးတက်အောင် အရှိန်မြှင့်သွားမယ်လို့ မြောက်ကိုရီးယား ခေါင်းဆောင် ကင်ဂျုံအန်းက ပြောကြောင်း အစိုးရ မီဒီယာ KCNA က ဧပြီ ၂၆ရက်မှာ ထုတ်လွှင့်သွားပါတယ်။

ပဲ့ထိန်းဒုံးကျည် (ICBMs) တွေနဲ့ တခြားလက်နက်တွေကို ခင်းကျင်းပြသတဲ့ အကြီးစား စစ်ရေးပြပွဲအတွင်း ခုလို ပြောခဲ့တာပါ။

စစ်ရေးပြပွဲအတွင်း မြောက်ကိုရီးယားရဲ့ အကြီးဆုံး (ICBMs) လို့ သိကြတဲ့ ဟွာဆောင် ၁၇ ဒုံးကျည်လည်း ပါတာကို KCNA က ထုတ်လွှင့်ပြသပါတယ်။

မြောက်ကိုရီးယား စစ်တပ်တည်ထောင်တဲ့ နှစ်ပတ်လည်နေ့ အခမ်းအနားကို ဧပြီ ၂၅ ရက်ညက ကျင်းပချိန်မှာ စစ်ရေးပြပွဲ လုပ်ခဲ့တာလို့ KCNA ကပြောပါတယ်။

အခမ်းအနားမှာ အမြောက်၊ ဒုံးလောင်ချာ၊ တင့်ကားတွေနဲ့အတူ စစ်ရေးပြ စစ်သည်အင်အား ထောင်သောင်းချီလည်း ပါဝင်ခဲ့ပါတယ်။

တောင်ကိုရီးယားမှာ အစိုးရအဖွဲ့သစ် တက်ခါနီးအချိန် ဖြစ်သလို အမေရိကန်နဲ့ နျူကလီးယား လက်နက် ဖြုတ်သိမ်းရေးဆွေးနွေးပွဲတွေ ရပ်နေတဲ့ အချိန်မှာ မြောက်ကိုရီးယားအစိုးရက လက်နက်စမ်းသပ်တာတွေနဲ့ စစ်အင်အားပြတာတွေ ပိုတိုးလုပ်လာနေတာပါ။

အမေရိကန်နဲ့​ တောင်ကိုရီးယားအရာရှိတွေကတော့ မြောက်ကိုရီးယားရဲ့ တခုတည်းသော လူသိတဲ့ နျူကလီးယား လက်နက် စမ်းသပ်ရာနေရာမှာ ဆောက်လုပ်ရေး လုပ်ငန်းသစ် တွေ လုပ်နေတဲ့ လက္ခဏာတွေ ရှိနေတယ်လို့ ပြောပါတယ်။

အဲဒီ စမ်းသပ်ကွင်းကို ၂၀၁၈ တည်းက တရားဝင် ပိတ်ထားတာပါ။

ခုလို လုပ်ငန်းသစ် စနေတာဟာ နျူကလီးယား လက်နက်တွေ စမ်းသပ်တာ ပြန်စဖို့ ပြင်ဆင်နေ တာ ဖြစ်နိုင်တယ်လို့လည်း မီဒီယာတွေက သုံးသပ်နေကြပါတယ်။ 

9 months Ago
More News
Up