အရေးမယူ

June 27, 2020

အွန်လိုင်း ဆန္ဒဖော်ထုတ်ပွဲများကို အရေးမယူဟု ရဲမှူးကြီးကျော်သီဟ ပြော

အွန်လိုင်း ဆန္ဒဖော်ထုတ်တာတွေဟာ ငြိမ်းစုစီဥပဒေနဲ့ ငြိစွန်းမှုမရှိတာကြောင့် အရေးယူဖို့ မရှိဘူးလို့ မြန်မာနိုင်ငံရဲတပ်ဖွဲ့ဌာနချုပ် ရဲမှူးကြီးကျော်သီဟက ဒီဗွီဘီကို အတည်ပြုပြောဆိုပါတယ်။ ကိုဗစ် ၁၉ ကပ်ရောဂါကို ထိန်းချုပ်ဖို့ လူစုလူဝေးမလုပ်ဖို့နဲ့ လူစုလူဝေးရှိတဲ့နေရာတွေကို မသွားဖို့ ကျန်းမာရေးနဲ့အားကစားဝန်ကြီးဌာနက လမ်းညွှန်တိုက်တွန်းထားတာကြောင့် အခုနောက်ပိုင်း ဆန္ဒဖော်ထုတ်ပွဲတွေကို အွန်လိုင်းကနေတဆင့် လုပ်လာကြတာပါ။ ရဲမှူးကြီးကျော်သီဟက “အွန်လိုင်းကနေ ဆန္ဒဖော်ထုတ်ခြင်းကတော့ ငြိမ်းချမ်းစွာစုဝေးခွင့်နဲ့ ငြိမ်းချမ်းစွာ စီတန်းလှည့်လည်ခွင့်ဆိုင်ရာဥပဒေ (ငြိမ်းစုစီ)ဥပဒေနဲ့ ငြိစွန်းမှုမရှိပါဘူး၊ လတ်တလောပေါ့လေ။ ဒါပေမဲ့ အွန်လိုင်းဆန္ဒဖော်ထုတ်ပွဲမှာ သူတို့ရဲ့ ဖော်ပြချက်လေးတွေဟာ ဆက်သွယ်ရေးဥပဒေနဲ့ ဒါမှမဟုတ် တခြားတည်ဆဲဥပဒေတစ်ခုခုနဲ့ ငြိစွန်းတယ်ဆိုရင်တော့ သက်ဆိုင်ရာဥပဒေနဲ့ အရေးယူခံရနိုင်တယ်လို့ ကျတော့်အနေနဲ့ ပြောလိုပါတယ်ဗျ” လို့ ပြောပါတယ်။ ဒါပေမဲ့ ရခိုင်နဲ့ချင်းက မြို့နယ်တချို့ အင်တာနက်ဖြတ်တောက်မှု ၁ နှစ်ပြည့်တဲ့ ဇွန်လ ၂၁ ရက်နေ့က ရန်ကုန်မြို့က ဆူးလေဘုရားအနီး တော်ဝင်ခုံးတံတားပေါ်မှာ အင်တာနက် ဖြတ်တောက်ထားမှုကို ဆန့်ကျင်တဲ့ ဗီနိုင်းတွေ ချိတ်ဆွဲခဲ့ကြလို့ဆိုပြီး အသံအဖွဲ့က ကဗျာဆရာ မောင်ဆောင်းခ အပါအဝင် ၅ ဦးကို ကျောက်တံတားရဲစခန်းက ငြိမ်းစုစီပုဒ်မ ၁၉ နဲ့ အမှုဖွင့်ခဲ့ပါတယ်။ ဒီမိုကရေစီဖွံ့ဖြိုးတိုးတက်ရေးလှုပ်ရှားဆောင်ရွက်မှုကော်မတီ စည်းရုံးလှုံ့ဆော်ရေးမှူး ဒေါ်သဉ္ဇာရွှန်းလဲ့ရည်က “ခုလက်ရှိ တရားစွဲတဲ့သူတွေကိုကြည့်ရင် ဆန္ဒပြတာကို အကြောင်းမကြားလို့ဆိုတဲ့ တုံ့ပြန်ချက်တွေ တွေ့ရတယ်ပေါ့နော်။ ရခိုင်ကသူတွေ ၃ ယောက် ရှိတယ်။ တခြားအမည်မဖော်ရသေးသောသူတွေ တရားစွဲခံရပြီ။ အကြောင်းမကြားလို့ ပုဒ်မ ၁၉ နဲ့တပ်ပြီး တရားစွဲပြန်တယ်ဆိုတော့ ဒီဥပဒကြီးတစ်ခုလုံးက လိုသလိုကြီးပုံဖော်ပြီး ကိုယ့်ဘာသာ ဘာသာပြန်ပြီးတော့ သုံးနေကြတယ်လို့ ကျမတို့ မြင်နေရတယ်။ ဒီ ကပ်ရောဂါဖြစ်နေတဲ့အချိန်မှာ ၅ ယောက်ထက်ပိုလို့ မရဘူးဆိုတာမျိုး ပြောလာတဲ့အခါကျတော့ ကျမတို့ ဆန္ဒပြတာတွေကို အွန်လိုင်းပေါ်ရွှေ့ပေမဲ့ အဲဒါကို အရေးယူလို့မရတော့ အရေးယူလို့ရတဲ့ လက်တွေ့မြေပြင်မှာ လုပ်နေတဲ့ တစ်ယောက် နှစ်ယောက် ဆိုင်းဘုတ်ထောင်ပြီး တီရှပ်ဝတ်တယ်။ ဓာတ်ပုံရိုက်တင်တာတွေကို ဆန္ဒပြတယ်ဆိုပြီး ဒါမဖြစ်မနေကို ဖိနှိပ်ချင်တဲ့ သဘောသဘာဝလို့တော့ မြင်ရတယ်ပေါ့နော်” လို့‌ ပြောပါတယ်။ တချိန်တည်းမှာပဲ ရခိုင်ပြည်နယ်မှာ အင်တာနက် ပြန်လည်ဖွင့်ပေးဖို့ အွန်လိုင်းက ဓာတ်ပုံတွေတင်ပြီး တောင်းဆိုခဲ့တဲ့ ရမ်းဗြဲလူငယ်ကွန်ရက် တာဝန်ခံ ကိုမျိုးမင်းထွန်းကို ရမ်းဗြဲမြို့နယ်တရားရုံးက ဇွန်လ ၂၅ရက်နေ့က ထောင်ဒဏ် ၁၅ ရက် သို့မဟုတ် ငွေဒဏ် ကျပ် ၂၀၀၀၀ အမိန့်ချမှတ်ခဲ့သလို အင်တာနက်ဖြတ်တောက်မှုချက်ခြင်းရပ် ကမ်ပိန်းဦးဆောင်သူ လူငယ် ၂ ဦးကိုလည်း ငြိမ်းစုစီ ပုဒ်မ-၁၉ နဲ့ ကျောက်ဖြူမြို့မရဲစခန်းမှာ အမှုဖွင့်ထားပါတယ်။ ဒီအပေါ်မှာ တရားလွှတ်တော်ရှေ့နေ ဦးကြီးမြင့်က “မြန်မာပြည်မှာ စစ်ဘက်ကော အရပ်ဘက်ကော သူတို့ရဲ့စိတ်ထဲမှာက ဒါအရေးယူသင့်တယ်လို့ ထင်လာရင် အရေးယူလိုက်တာပဲ အဲလိုဖြစ်နေတယ်။ အဲဒီဟာကတော့ ဥပဒေနဲ့မညီဘူးလေ။ တချို့ဆို ၈ လလောက်ကြာမှ အရေးယူတယ်။ စစ်ပွဲတွေရပ်ဆိုလည်း ဒီလိုပဲ ဘာမှမလုပ်ရသေးဘူး၊ ဘာမှလည်း မအော်ရသေးဘူး။ ကျနော်ကတော့ အုပ်ချုပ်သူအာဏာပိုင်တွေက လိုသလို ဥပဒေကို အဓိပ္ပာယ်ဖွင့်ပြီးသွားရင် သူတို့စိတ်ထဲမှာ ဥပဒေဟာ ဖြစ်လာပြီးတော့ ဒါဟာ ဥပဒေနဲ့ မညီဘူး၊ ညီတယ်ဆိုတာ သူတို့ အလိုရှိတယ် မရှိတဲ့အပေါ် မူတည်ပြီး ဆုံးဖြတ်နေတယ်။ ဥပဒေနဲ့အညီ ဆုံးဖြတ်တာ မဟုတ်ဘူးလို့ မှတ်ချက်ပြုချင်ပါတယ်” လို့ ပြောပါတယ်။ အင်တာနက်ပြန်ဖွင့်ပေးဖို့ကို ရခိုင်ပါတီတွေအပါအဝင် အဖွဲ့အစည်း ၇၀ ကျော်ကလည်း နိုင်ငံဆီအစိုးရထံ အိတ်ဖွင့်ပေးစာ ပေးပိုထားသလို တနှစ်ပြည့်တဲ့နေ့မှာပဲ ရခိုင်အပါအဝင် ရန်ကုန် အစရှိတဲ့ဒေသတွေက တက်ကြွလှုပ်ရှားသူတွေက အင်တာနက်ပြန်ဖွင့်ပေးဖို့ အွန်လိုင်းကနေ ဆန္ဒဖော်ထုတ်ခဲ့ကြပါတယ်။ အစိုးရသက်တမ်း ၄ နှစ်တာကာလအတွင်းမှာ အရပ်သားပြည်သူတွေ၊ တက်ကြွလှုပ်ရှားသူတွေ၊ သတင်းသမားတွေအပါအဝင် လူပေါင်း ၁၀၅၁ ဦးဟာ လွတ်လပ်စွာ ထုတ်ဖော်ပြောဆိုခွင့်ကို ချိုးဖောက်ကန့်သတ်တဲ့ ဥပဒေ၊ ပုဒ်မအမျိုးမျိုးနဲ့ တရားစွဲဆိုခံခဲ့ရပြီး အနည်းဆုံး ၅၃၉ မှုရှိခဲ့တယ်လို့ သိရပါတယ်။ လက်ရှိ ကိုဗစ်ကာလ လူမှုဘဝပုံစံသစ်အရ လူစုလူဝေးရှောင်ရှားတဲ့အနေနဲ့ အွန်လိုင်းကနေ ရုံးလုပ်ငန်း၊ အစည်းအဝေးတွေနဲ့ သတင်းစာရှင်းလင်းပွဲတွေ လုပ်လာနေကြတာပါ။
12 months Ago

June 23, 2020

ဘရိုက်တန်တိုက်စစ်မှူးအား လက်ပါခဲ့သည့် ဂွမ်ဒူဇီကို အရေးမယူဟု အက်ဖ်အေပြော

ဘရိုက်တန်အသင်းရဲ့ တိုက်စစ်မှူး နီယယ်မူပေးကို လည်ပင်းညှစ်ခဲ့ပေမဲ့ အာဆင်နယ်ကွင်းလယ် ကစားသမား မတ်တီယို ဂွမ်ဒူဇီဟာ အရေးယူခံရခြင်းကနေ ကင်းလွတ်ခွင့်ရရှိခဲ့ပြီ ဖြစ်ပါတယ်။  ဒီကစားသမား နှစ်ဦးဟာ စနေနေ့မှာ ကစားခဲ့တဲ့ ဘရိုက်တန်နဲ့ အာဆင်နယ်အသင်းတို့ရဲ့ ပွဲစဉ်ပြီးဆုံးချိန်မှာ ငြိခဲ့ကြတာဖြစ်ပါတယ်။  ဒီပွဲစဉ်မှာ အာဆင်နယ်အသင်းဟာ ဘရိုက်တန်အသင်းကို နှစ်ဂိုး-တစ်ဂိုးနဲ့ ရှုံးနိမ့်ခဲ့ပြီး အာဆင်နယ်ဂိုးသမား လီနိုဟာလည်း ပထမပိုင်းမှာ ဒဏ်ရာရရှိခဲ့ပါတယ်။  လီနိုရဲ့ဒဏ်ရာရရှိမှုမှာ မူပေးရဲ့ပယောဂပါဝင်ခဲ့ပြီး ဒီဖြစ်ရပ်ကို မကျေနပ်တာကြောင့် ဂွမ်ဒူဇီဟာ မူပေးကို ပွဲပြီးဆုံးချိန်မှာ သွားရောက်ရင်ဆိုင်ခဲ့တာပဲဖြစ်ပါတယ်။  ပြင်သစ်ကစားသမားနှစ်ဦးဟာ အစပိုင်းမှာစကားလုံးတွေ နဲ့ အပြန်အလှန်ထိုးနှက်ခဲ့ကြပေမဲ့ နောက်ပိုင်းမှာတော့ လက်တွေပါလာခဲ့ကာ ဂွမ်ဒူဇီက မူပေးရဲ့လည်ပင်းကို ညှစ်ခဲ့တာဖြစ်ပါတယ်။  ဒီဖြစ်ရပ်မတိုင်ခင် ဘရိုက်တန်အသင်းအတွက် အနိုင်ဂိုးကို နာကျင်အချိန်ပိုမှာ မူပေးသွင်း ယူသွားပြီးကတည်းက ဒီကစားသမားနှစ်ဦးဟာ ငြိခဲ့တာဖြစ်ပြီးတော့ ပွဲပြီးဆုံးချိန် ဥမင်ထဲကိုအဝင်မှာလည်း သူတို့ နှစ်ဦးကြောင့် နှစ်ဖက်ကစားသမားတွေကြားမှာ ပွဲဆူခဲ့ပါတယ်။  ဒီဖြစ်ရပ်ကြောင့် ဂွမ်ဒူဇီဟာ အနည်းဆုံးသုံးပွဲလောက် ပွဲ ပယ်ပြစ်ဒဏ်ကျခံရနိုင်တယ်လို့ သုံးသပ်ခဲ့ကြပါတယ်။ ဒါပေမဲ့ ဒီဖြစ်ရပ်ကို VAR နဲ့ပြန်လည်စစ်ဆေးခဲ့ပြီး ကွင်းလယ်ဒိုင်အဖြစ်ဆောင်ရွက်ခဲ့တဲ့ မိုက်ကယ်အိုလီဗာက နောက်ထပ်အရေးယူမှုတွေ လုပ်ဆောင်ဖို့ မလိုအပ်ဘူးလို့ ဆုံးဖြတ်ခဲ့ကြောင်း အက်ဖ်အေက ကြေညာပါတယ်။  “ဒီဖြစ်ရပ်ဖြစ်ပွားချိန်မှာ ကွင်းထဲမှာရှိနေတဲ့ တာဝန်ရှိသူတွေက မတွေ့ခဲ့ပေမယ့် ဒါကို VAR နဲ့ပြန်လည်စစ်ဆေးခဲ့ပါတယ်။ ဒါ့ကြောင့် ဂွမ်ဒူဇီဟာ အရေးယူမှုနဲ့ရင်ဆိုင်ရမှာ မဟုတ်ပါဘူး” လို့ အက်ဖ်အေက အတည်ပြုထုတ်ပြန်ပါတယ်။  ပွဲအပြီးမှာ သက်ဆိုင်ရာ ကစားသမားတွေ အချင်းများခဲ့မှုနဲ့ပတ်သက်လို့လည်း နှစ်သင်းလုံးအပေါ် သတိပေးပြောဆိုမှုတွေ ပြုလုပ်ခဲ့တယ်လို့ ဆိုပါတယ်။
12 months Ago
Up