အရေးပေါ်အစည်းအဝေး

A d v e r t i s e m e n t With Us

February 17, 2021

မြန်မာ့အရေး အာဆီယံနိုင်ငံခြားရေးဝန်ကြီးများ အရေးပေါ်ဆွေးနွေးရန် ကြိုးပမ်း

အာဆီယံ နိုင်ငံခြားရေးဝန်ကြီးများ အစည်းအဝေးမှာ မြန်မာနိုင်ငံက စစ်အာဏာသိမ်းမှု အရေးကို ဆွေးနွေးဖို့ ဖြစ်နိုင်ချေကို အင်ဒိုနီးရှားနိုင်ငံက အာဆီယံအဖွဲ့ဝင် နိုင်ငံတွေနဲ့ တိုင်ပင်နေတယ်လို့ ချန်နယ်နယူးစ် အေးရှ သတင်းဌာနမှာ ဖော်ပြပါတယ်။

အင်ဒိုနီးရှား နိုင်ငံခြားရေး ဝန်ကြီး ရဒ်နို မာရ်ဆူဒီဟာ သူ့ရဲ့ ဒေသတွင်း ခရီးစဉ်မှာ ပထမဆုံးအနေနဲ့ လက်ရှိ အာဆီယံ ဥက္ကဋ္ဌ ဖြစ်တဲ့ ဘရူနိုင်းနိုင်ငံက စော်ဘွား ဆူလ်တန် ဟတ်ဆာနယ် ဘိုလ်ကီးယားနဲ့ ဖေဖော်ဝါရီ ၁၇ ရက်မှာ တွေ့ဆုံခဲ့ရာမှာ အာဆီယံ နိုင်ငံခြားရေး ဝန်ကြီးများ ချက်ချင်း အစည်းအဝေးခေါ်ဖို့ အရေးကြီးမှုကို ဘရူနိုင်းစော်ဘွားက အလေးပေး ပြောဆိုခဲ့တယ်လို့ အွန်လိုင်း သတင်းစာရှင်းလင်းပွဲအတွင်း ပြောပါတယ်။

မြန်မာ့အရေး အထူး အစည်းအဝေး ကျင်းပဖို့ ဘရူနိုင်းနိုင်ငံကို ပြောရေး မလေးရှားဝန်ကြီးချုပ် မာယစ်ဒင်ယာဆင်နဲ့ အင်ဒိုနီးရှား သမ္မတ ဂျိုကိုဝီဒိုဒိုတို့က သူတို့ရဲ့ နိုင်ငံခြားရေးဝန်ကြီးတွေကို အသီးသီး ညွှန်ကြားရေး သဘောတူအပြီးမှာ မာရ်ဆူဒီရဲ့ ခရီးစဉ် စတင်ခဲ့တာပါ။

ဖေဖော်ဝါရီ ၁ ရက်က မြန်မာစစ်တပ်ဟာ ရွေးကောက်ခံ အရပ်သားအစိုးရဆီက အာဏာသိမ်းပြီး တနှစ် အရေးပေါ် အခြေအနေ ကြေညာခဲ့ပါတယ်။  ဒါ့ အပြင် သမ္မတဦးဝင်းမြင့်၊  နိုင်ငံတော် အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်နဲ့  အမျိုးသား ဒီမိုကရေစီ အဖွဲ့ချုပ်ပါတီက နိုင်ငံရေး ခေါင်းဆောင်တွေ အပါအဝင် မြန်မာ့ နိုင်ငံရေးမှာ ထင်ရှားသူ အတော်များများကိုပါ ဖမ်းဆီးခဲ့ပါတယ်။

စစ်အာဏာစသိမ်းတည်းက မြန်မာနိုင်ငံတွင်းက အခြေအနေကို စိုးရိမ်ကြောင်း အင်ဒိုနီးရှားနိုင်ငံက ဖော်ပြခဲ့ပြီးပြီ လို့ မဒမ် မာရ်ဆူဒီက ပြောပါတယ်။ ဒါပေမဲ့ မြန်မာကို ကူညီဖို့ အာဆီယံ အဖွဲ့ဝင်နိုင်ငံတွေနဲ့ အင်ဒိုနီးရှားက ဘာလုပ်နိုင်မလဲဆိုတာ မေးခွန်းဖြစ်နေဆဲပဲလို့ သူက ဆက်ပြောပါတယ်။

အာဆီယံ ပဋိညာဉ်စာတမ်းထဲမှာ ဖော်ပြထားတဲ့ အချက်တွေကို လေးစားဖို့က အာဆီယံ အဖွဲ့ဝင် နိုင်ငံတိုင်းရဲ့ တာဝန်ပဲလို့လည်း သူက ပြောပါတယ်။

အာဆီယံ ပဋိညာဉ် စာတမ်း ပုဒ်မ ၁/၇ ထဲမှာ ဒီမိုကရေစီကို အားဖြည့်ဖို့ ကောင်းမွန်တဲ့ အုပ်ချုပ်ရေးနဲ့ တရားဥပဒေ စိုးမိုးရေးကို တိုးမြှင့်ဖို့၊ အခြေခံလွတ်လပ်ရေးနဲ့ လူ့အခွင့်အရေးကို ကာကွယ်မြှင့်တင်ဖို့ ပါရှိတယ်လို့ မာရ်ဆူဒီက ဆက်ပြောပါတယ်။

 အင်ဒိုနီးရှားဟာ   တခြားနိုင်ငံရဲ့ ပြည်တွင်းရေးကို မစွက်ဖက်ရေး စည်းမျဉ်းကို ကိုင်စွဲပြီး မြန်မာပြည်သူတွေရဲ့ ဘေးကင်းရေး နဲ့ လူမှုဖူလုံရေး အပြုသဘောဆောင်တဲ့ ထိတွေ့မှုကို ထိပ်တန်းဦးစားပေးအနေနဲ့ ဆောင်ရွက်မယ်လို့ မာရ်ဆူဒီက ဆက်ပြောပါတယ်။

လက်ရှိအခြေအနေကို ကျော်လွှားဖို့ မြန်မာကို ကူညီရေး အသင့်တော်ဆုံး နည်းလမ်းက အာဆီယံလုပ်ငန်းစဉ်ပဲ ဆိုတာ အင်ဒိုနီးရှားနိုင်ငံက ယုံကြည်တယ်။ တခြား အာဆီယံ နိုင်ငံခြားရေးဝန်ကြီးတွေနဲ့လည်း ဆက်ပြီး ဆက်သွယ်သွားမယ်လို့ မာရ်ဆူဒီက ပြောခဲ့ပါတယ်။ 

သူဟာ စင်ကာပူ နိုင်ငံခြားရေးဝန်ကြီး ဗီဗီယန် ဘာလာခရစ်ရှ်နန်နဲ့လည်း  ကြာသပတေးနေ့မှာ တွေ့ဆုံဖို့ စီစဉ်ထားပါတယ်။

3 weeks Ago

January 10, 2021

လွှတ်တော်အထူးအရေးပေါ်အစည်းအဝေးခေါ်ယူရန် ကြံ့ခိုင်ရေးနှင့်မိတ်ဖက်အဖွဲ့များ စာတင်မည်

ပြည်ထောင်စုလွှတ်တော် အထူးအရေးပေါ်အစည်းအဝေးတရပ် ခေါ်ယူပေးဖို့ ကြံ့ခိုင်ရေးပါတီ၊ တပ်မတော်သား လွှတ်တော်ကိုယ်စားလှယ်တွေနဲ့ တိုင်းရင်းသားပါတီအချို့က ကိုယ်စားလှယ်တွေက ပြည်ထောင်စုလွှတ်တော်နာယကဆီကို အခုရက်ပိုင်းအတွင်း စာတင်တောင်းဆိုသွားမယ်လို့ သိရပါတယ်။

ဒုတိယအကြိမ်လွှတ်တော် အစည်းအဝေးတွေကို ရွေးကောက်ပွဲမတိုင်ခင် တစ်လလောက်ကတည်းက ရပ်နားခဲ့တာဖြစ်ပြီး လွှတ်တော်အသီးသီးရဲ့ ထုတ်ပြန်ကြေညာချက်တွေအရတော့ ဆက်လက်ကျင်းပဖို့ မရှိတော့ဘဲ တတိယအကြိမ်လွှတ်တော် အစည်းအဝေးတွေကိုသာ လာမယ့် ဖေဖော်ဝါရီ ၁ ရက်နေ့ စတင်ကျင်းပသွားတော့မှာပါ။ 

ကြံ့ခိုင်ရေးပါတီနဲ့ မိတ်ဖက်အဖွဲ့ အစည်းတွေကတော့ ဒုတိယအကြိမ်လွှတ်တော်သက်တမ်းရဲ့ လုပ်ငန်းစဥ်တွေ ပြီးစီးခြင်း မရှိသေးတဲ့အတွက် အထူးအရေးပေါ်အစည်းအဝေးတစ်ရပ်ကို ခေါ်ယူပေးဖို့ လက်မှတ်ထိုးတောင်းဆိုသွားမယ်လို့ ဇန်နဝါရီ ၁၀ ရက်က ပြုလုပ်တဲ့ သတင်းစာရှင်းလင်းပွဲမှာ ကြံ့ခိုင်ရေးပါတီပြောရေးဆိုခွင့်ရှိသူ ဒေါက်တာနန္ဒာလှမြင့်က ပြောပါတယ်။ 

“ဒီဒုတိယအကြိမ် လွှတ်တော်သက်တမ်းမှာရှိနေတဲ့ ကိုယ်စားလှယ်တွေသည် သူတို့ကို ကိုယ်စားပြုထားတဲ့ ဒေသခံ မဲဆန္ဒရှင်တွေရဲ့ အခွင့်အရေးကို ဆုံးရှုံးတယ်လို့ ကျနော်တို့မြင်တယ်။ အဲ့ဒီအတွက် ကျနော်တို့ အထူးအစည်းအဝေးခေါ်ပေးဖို့ နိုင်ငံတော်သမ္မတကို တင်ပြထားတာရှိပါတယ်” လို့ ပြောပါတယ်။

ဖွဲ့စည်းပုံအခြေခံဥပဒေပုဒ်မ ၈၄ အရလည်း လွှတ်တော်ကိုယ်စားလှယ်စုစုပေါင်းရဲ့ ၂၅ ရာခိုင်နှုန်းက လက်မှတ်ထိုးတောင်းဆိုပါက ပြည်ထောင်စုလွှတ်တော်နာယကက လွှတ်တော်ကို ခေါ်ယူပေးရမှာ ဖြစ်တယ်လို့လည်း ဆိုပါတယ်။ 

အထူးအရေးပေါ် အစည်းအဝေးခေါ်ပေမယ့်လည်း လက်ရှိ ဒုတိယအကြိမ်လွှတ်တော်မှာ ကိုယ်စားလှယ်ဦးရေ အများဆုံးရှိနေတဲ့ အန်အယ်လ်ဒီကိုယ်စားလှယ်တွေက လွှတ်တော်အစည်းအဝေးတွေကို တက်ရောက်ခြင်းမရှိပါက လွှတ်တော်အစည်းအဝေး အထမမြောက်နိုင်တဲ့ အခြေအနေကလည်း ရှိနေပါတယ်။

ဒါနဲ့ပတ်သက်ပြီး ဒေါက်တာနန္ဒာလှမြင့်က “ဖွဲ့စည်းပုံဥပဒေရဲ့ ပုဒ်မ ၈၄ အရ လွှတ်တော်ခေါ်ဖို့ တောင်းဆိုတာပါ။ ကျနော်ပြောတာ လွှတ်တော်ခေါ်ဖို့ အခွင့်အရေးအရ တောင်းဆိုတာဖြစ်ပြီး ကျန်တာ အဲ့ဒီအခင်းအကျင်းပေါ်မူတည်ပြီး စောင့်ကြည့်သွားရမှာ ဖြစ်ပါတယ် ” လို့ ပြောပါတယ်။

ကြံ့ခိုင်ရေးပါတီအနေနဲ့ အထူးအစည်းအဝေး ခေါ်ယူဖြစ်ခဲ့ပါက ရွေးကောက်ပွဲနဲ့ ပတ်သက်ပြီး မတရားမှုတွေကို ဖြေရှင်းပေးဖို့ အရေးကြီးအဆိုတွေ တင်သွင်းသွားမယ်လို့လည်း ဒေါက်တာနန္ဒာလှမြင့်က ပြောပါတယ်။

2 months Ago
Up