အရေးပေါ်အကူအညီလိုအပ်‌

July 21, 2022

ဆိပ်ဖြူမြို့နယ်က စစ်ရှောင်ပြည်သူ ၁၀,၀၀၀ ခန့် အရေးပေါ်အကူညီလိုအပ်

ဆိပ်ဖြူမြို့နယ်မှာ စစ်ကောင်စီတပ်တွေ အင်အားအလုံးအရင်းနဲ့ စစ်ကြောင်းထိုးနေတာကြောင့် ပြည်သူ ၁၀,၀၀၀ လောက် ဘေးလွတ်ရာ ထွက်ပြေးနေရပြီး အရေးပေါ်အကူညီတွေ လိုအပ်နေတယ်လို့ ဒေသခံတွေက ပြောပါတယ်။

ဆိပ်ဖြူမြို့နယ်ထဲကို ဇူလိုင် ၇ ရက်နေ့ကစလို့ စစ်ကောင်စီတပ်တွေ အင်အားအလုံးရင်းနဲ့ စစ်ကြောင်းထိုးလာတာကြောင့် ကျေးရွာပေါင်း ၂၀ ကျော်လောက်က ဒေသခံပြည်သူ ၁၀၀၀၀ ကျော်လောက် ဘေးလွတ်ရာ ထွက်ပြေးတိမ်းရှောင်နေကြရတယ်လို့  အိုင့်ကြီးကျေးရွာနေသူ တယောက်က ပြောပါတယ်။

“ထွက်ပြေးတိမ်းရှောင်တဲ့ နေရာတွေမှာလည်း ဒုက္ခတော်တော်များပါတယ်။ ပထမ ရှောင်တိမ်းနေတဲ့နေရာကို စစ်ကြောင်းထိုးလာလို့ နောက်ထပ်ထွက်ပြေးရသေးတယ်။ စားနပ်ရိက္ခာတွေလည်း ပါမလာကြဘူး။ ပြည်သူ့ကာကွယ်ရေးတပ်ဖွဲ့ PDF တွေက စားရေးသောက်ရေနဲ့ နေရာထိုင်ခင်းတွေ စီစဥ်ပေးထားတယ်။”

စစ်ကောင်စီတပ်ထိုးစစ်ကြောင့် ထွက်ပြေးတိမ်းရှောင်လာတဲ့ပြည်သူတွေကို ဘေးလွတ်ရာနေရာတွေ ရွှေ့ပြောင်းပေးပြီး နေရာထိုင်ခင်းတွေနဲ့ စားနပ်ရိက္ခာတွေ  စီစဥ်ပေးထားရတယ်လို့ ဆိပ်ဖြူ ဘာမထီပြောက်ကျားတပ်ဖွဲ့ရဲ့ တပ်ခွဲမှူး ကိုပိုင်က ပြောပါတယ်။

သက်ကြီးဘိုးဘွားတွေ၊ ကိုယ်ဝန်ဆောင် အမျိုးသမီးတွေနဲ့ ကလေးသူငယ်တွေကို ကားတွေနဲ့ ရွှေ့ပြောင်းပေးခဲ့ရပြီး ကားသွားလို့မရတဲ့ ကျေးရွာတွေမှာတော့ ကျောပိုးပြီး သယ်ထုတ်ခဲ့ရတယ်လို့ ဆိုပါတယ်။

စစ်ဘေးရှောင်ပြည်သူတွေအတွက် အမိုးအကာ၊ အဝတ်အထည်၊ စားနပ်ရိက္ခာ၊ ဆေးဝါးနဲ့ ကျန်းမာရေးစောင့်ရှောက်မှုတွေ အရေးပေါ်အကူညီလိုအပ်နေလို့ ပြည်သူတွေအနေနဲ့ ပြည်သူ့ကာကွယ်ရေးတပ်ဖွဲ့တွေကနေတဆင့် မိမိတို့တပ်နိုင်သရွေ့ လှူဒါန်းပေးကြဖို့ မေတ္တာရပ်ခံတောင်းဆိုထားပါတယ်။

စစ်တပ်က အာဏာသိမ်းပြီးနောက် ၂၀၂၁ခု နှစ် ဖေဖော်ဝါရီလ ၁ ရက်နေ့ကနေ ၂၀၂၂ ခုနှစ် ဇူလိုင် ၁၁ ရက်နေ့အထိ နိုင်ငံတဝန်းမှာ နေရပ်စွန့်ခွာထွက်ပြေးတိမ်းရှောင်နေရသူ ဦးရေ ၇၈၃,၄၀၀ ရှိတယ်လို့ UN OCHA Myanmar က ဇူလိုင် ၂၀ ရက်နေ့ရက်စွဲနဲ့ ထုတ်ပြန်ထားပါတယ်။

7 months Ago

June 22, 2021

ကယားပြည်နယ်၊ လီဝိုရွာက စစ်ရှောင် ၂၅၀၀ ကျော်အတွက် အရေးပေါ်အကူအညီလိုအပ်‌နေ

ကယားပြည်နယ်၊ ဆင်တောင်ကျေးရွာအုပ်စု၊ လီဝိုရွာက စစ်ဘေးရှောင်ပြည်သူ ၂၅၀၀ ကျော်အတွက် ဆေးဝါး၊ စားနပ်ရိက္ခာ၊ အမိုး၊ အကာနဲ့ အခင်းတွေ လိုအပ်နေတယ်လို့ စစ်ဘေးရှောင်တွေက ဒီဗွီဘီကို ပြောပါတယ်။

"ကျနော်တို့ ရွာလုံးကျွတ်စစ်ဘေးရှောင်နေရတယ်။ မိသားစု ၄၀၀ ကျော် လူဦးရေ ၂၅၀၀ ကျော်ရှိတယ်။ အခုလိုနေတာက ဆေးဝါး၊ တဲဆောက်ဖို့ အမိုးအကာနဲ့ အခင်းတွေလိုတယ်။ ရွာကဆင်းရဲတော့ မိုးကာနဲ့ပဲ တဲဆောက်နေနေရတယ်။ တချို့ဆို တဲဆောက်ဖို့ မိုးကာမရှိကြဘူး။ ဒါ့ကြောင့် အရေးပေါ်လိုအပ်နေတာ" လို့ လီဝိုရွာသားတွေက ပြောပါတယ်။

လီဝိုပြည်သူ‌တွေ  လက်ရှိတိမ်းရှောင်နေတဲ့နေရာဟာ ဒီးမော့ဆိုမြို့နယ်နဲ့ မိုး‌ဗြဲမြို့နယ်ကြားမှာ ရှိနေတာကြောင့် အခြားနေရာစစ်ရှောင်တွေမှာ အကူအညီရပေမယ့် လီဝိုစစ်ရှောင်တွေအတွက် အကူအညီတွေ သိပ်မရောက်ရှိပါဘူး။

လက်ရှိ ကလေးသူငယ်တွေနဲ့ သက်ကြီးရွယ်အိုတွေ နာမကျန်းဖြစ်နေကြလို့ ကျန်းမာရေး စောင့်ရှောက်မှုပေးဖို့ လိုအပ်နေပါတယ်။

"မိုးရာသီလည်းဖြစ်တယ်။ အမိုးအကာကလည်း မလုံတော့ ကလေးတွေနဲ့ အသက်ကြီးတဲ့သူတွေ နှာစေး၊ ချောင်းဆိုး၊ ၀မ်းပျက်၊ ဝမ်းလျောနဲ့ ဖျားနာတာတွေဖြစ်တယ်။" လို့ စစ်ရှောင်တဦးက ပြောပါတယ်။

ရှမ်း- ကယားနယ်စပ်မှာ ပြည်သူ့ကာကွယ်ရေးတပ်(PDF)နဲ့ အကြမ်းဖက်စစ်ကောင်စီတပ်တွေကြား ပြီးခဲ့တဲ့လပိုင်းက တိုက်ပွဲဖြစ်ပွားခဲ့လို့ လီဝိုရွာသားတွေ စစ်ဘေးရှောင်နေရတာပါ။ 

လက်ရှိ အပစ်ရပ်ထားတယ်ဆိုပေမယ့် အကြမ်းဖက်စစ်ကောင်စီရဲ့ စစ်ကြောင်းတွေက စဉ်ဆက်မပျက် လှုပ်ရှားနေပြီး အင်အားဖြည့်တင်းတာတွေ လုပ်နေတာကြောင့် လီဝိုရွာ စစ်ဘေးရှောင်အများစု နေရပ်မပြန်နိုင်ဘဲဖြစ်နေပါတယ်။

ဓါတ်ပုံ- CJ

2 years Ago
Up