အရေးပေါ်အကူအညီ

August 10, 2022

၂၀၂၂ နှစ်ဝက်အတွင်း မြန်မာလူဦးရေ ၃ သန်းကျော်ကို အရေးပေါ်အကူအညီပေးနိုင်ဟု ကုလ ထုတ်ပြန်

သွားလာကူညီခွင့် တင်းကျပ်နေတဲ့ အခြေအနေတွေကြားကနေ လူသားချင်းစာနာမှုဆိုင်ရာ အကူအညီပေးနေကြတဲ့ ပြည်တွင်းနဲ့ နိုင်ငံတကာအဖွဲ့အစည်းအမျိုးမျိုးတို့ဟာ ၂၀၂၂ ခုနှစ် ပထမနှစ်ဝက်အတွင်းမှာ မြန်မာလူဦးရေ ၃ သန်းကျော်အတွက် အရေးပေါ်နဲ့ လူမှုဘဝကယ်ဆယ်ရေး အကူအညီတွေ ပေးနိုင်ခဲ့တယ်လို့ UNOCHA က ပြောပါတယ်။

ပြည်နယ်နဲ့တိုင်းဒေသကြီးအများအပြားမှာတော့ လက်နက်ကိုင်တိုက်ပွဲတွေ ဆက်လက်ဖြစ်ပွားနေပြီး တင်းမာမှုတွေ မြင့်တက်နေတာကြောင့် အိုးအိမ်စွန့်ခွာထွက်ပြေးနေရတာတွေနဲ့ အရပ်သားသေဆုံးမှုတွေ ကျယ်ကျယ်ပြန့်ပြန့် ဆက်လက်ဖြစ်နေပြီး ဩဂုတ် ၁ ရက်အထိ နေရပ်စွန့်ခွာ ထွက်ပြေးတိမ်းရှောင်ရသူ ဦးရေဟာ ၁ ဒသမ ၂ သန်းကျော် ရှိလာခဲ့ပြီ ဖြစ်တယ်လို့ ဆိုပါတယ်။

ဒါ့အပြင် ရခိုင်ပြည်နယ်၊ ရှမ်းပြည်နယ်မြောက်ပိုင်းနဲ့ တနင်္သာရီတိုင်းဒေသကြီးတို့မှာ စစ်တပ်ကဝင်ရောက်စီးနင်းတာ၊ စစ်ဆေးရေးဂိတ်တွေမှာ လုံခြုံရေးပိုမိုတင်းကျပ်တာတွေနဲ့ အရပ်သားတွေကို ဖမ်းဆီးထောင်ချတာတွေ ပြီးခဲ့တဲ့ရက်သတ္တပတ်အတွင်းမှာ ဖြစ်ပွားခဲ့တယ်လို့ မိတ်ဖက်အဖွဲ့အစည်းတွေနဲ့ ဒေသခံမီဒီယာတွေရဲ့အချက်အလက်တွေအရ ကုလသမဂ္ဂ လူသားချင်းစာနာမှုဆိုင်ရာ ညှိနှိုင်းရေးရုံး (UNOCHA) က ဖော်ပြပါတယ်။

ရခိုင်ပြည်နယ်တွင်း အခြေအနေဟာလည်း ရက္ခိုင့်တပ်တော် (အေအေ) နဲ့ တပ်မတော်ကြား တင်းမာမှုတွေ မြင့်တက်နေတာကြောင့် အထူးစိုးရိမ်စရာဖြစ်နေပြီး နိုင်ငံတဝန်း မြေမြှပ်မိုင်းနဲ့ စစ်လက်နက်အကြွင်းအကျန် ပေါက်ကွဲမှုအရေအတွက်ဟာ မြင့်တက်နေပြီး စိုးရိမ်စရာအခြေအနေ ဖြစ်လာနေတယ်လို့ ဆိုပါတယ်။ 

ယူနီဆက်ဖ်ရဲ့ နောက်ဆုံးထုတ်အစီရင်ခံစာအရ ၂၀၂၂ ခုနှစ် ဇန်နဝါရီလကနေ မေလကုန်အထိ မြေမြှုပ်မိုင်း၊ ဒါမှမဟုတ် စစ်လက်နက် အကြွင်းအကျန်ပေါက်ကွဲမှုကြောင့် တနိုင်ငံလုံးအတိုင်းအတာနဲ့ အရပ်သားသေဆုံးမှု စုစုပေါင်း ၁၆၂ ယောက် ရှိခဲ့တယ်လို့ ဆိုပါတယ်။ 

သက်ဆိုင်ရာ မိတ်ဖက်အဖွဲ့အစည်းတွေဟာ ရခိုင်ပြည်နယ်တဝန်း၊ အထူးသဖြင့် ရက္ခိုင့်တပ်တော်နဲ့ တပ်မတော်တို့ကြား အရင်က တိုက်ပွဲတွေကြောင့် အိုးအိမ်စွန့်ခွာထွက်ပြေးနေရသူတွေရဲ့ မူလနေထိုင်ရာ ကျေးလက်ဒေသတွေမှာ မိုင်းအန္တရာယ် အသိပညာပေးလှုပ်ရှားမှုတွေ တိုးချဲ့လုပ်ဆောင်နေတယ်လို့ ဆိုပါတယ်။

4 months Ago

May 22, 2022

စစ်တပ်မီးရှို့ ဖျက်ဆီးခဲ့သည့် မြိုင်မြို့နယ် ရွာ ၆ ရွာအတွက် အရေးပေါ်အကူအညီလိုအပ်နေ

မကွေးတိုင်း မြိုင်မြို့နယ်မှာ မေ ၁ ရက်ကနေ ၂၁ ရက်အထိ စစ်ကောင်စီတပ်တွေ မီးရှို့ ဖျက်ဆီးခံခဲ့ရတဲ့ ကျေးရွာ ၆ ရွာက ဒေသခံပြည်သူတွေနဲ့ CDM ဝန်ထမ်းတွေအတွက် အမိုးအကာ၊ စားနပ်ရိက္ခာနဲ့ ဆေးဝါးတွေ အရေးပေါ်အကူညီ လိုအပ်နေပါတယ်။

စစ်ကောင်စီတပ်ဟာ မေ ၁ ရက်ကစလို့ ရွာသစ်ကြီးရွာက နေအိမ် ၇၅ လုံး၊ နှမ်းစားကျင်းရွာက နေအိမ် ၇ လုံး၊ သံဘိုကြီးရွာက နေအိမ် ၁၀ လုံး၊ ပိတောက်ကန်ရွာက နေအိမ် ၆၅ လုံး၊ ပန်းတိုင်းတောရွာက နေအိမ် ၁၃ လုံးနဲ့ ကြက်ခြံ ၁၅ ခြံ၊ လက်ယက်မ(စံပြ)ကျေးရွာက အိမ်ခြေ ၇၀၀ ကျော်လောက်နဲ့ ကား၊ ဆိုင်ကယ်တွေ မီးရှို့ဖျက်ဆီးခံခဲ့ရတယ်လို့ CDM ကျောင်းဆရာတယောက် ပြောပါတယ်။

ဒါ့အပြင် နဂါးပွက်၊ အိုးဘို၊ ကန်နက်၊ မန်ကျီးလေးပင်၊ တောင်ဘို့၊ တောင်ကိုင်းနဲ့ ဖျသီးရွာတွေကိုလည်း စစ်ကောင်စီတပ်တွေနဲ့ ပျူစောထီးတွေ ဝင်ရောက်မွှေနှောက်ပြီး ပြည်သူတွေရဲ့ ကား၊ဆိုင်ကယ်၊ ရွှေထည်ပစ္စည်းတွေနဲ့ ငွေကြေးတွေကို ခိုးယူသွားကြတယ်လို့ လက်ယက်မရွာ ဒေသခံတယောက်က ပြောပါတယ်။

“စစ်ကောင်စီတပ်တွေဟာ မြိုင်မြို့နယ်ထဲကို စစ်ကြောင်း ၃ ကြောင်းထိုးပြီး ရွာတွေကို ဝင်မွှေတာဗျ။ PDF အားကောင်းတယ်လို့ ထင်တဲ့ရွာတွေကို ဆက်တိုက်မီးရှို့ဖျက်ဆီးကြတာ။ အပြစ်မဲ့ ပြည်သူတွေကိုလည်း မတရားဖမ်းဆီးသတ်ဖြတ်တာတွေလုပ်တယ်ဗျ။ တချို့ပြည်သူတွေကတော့ ဆွေမျိုးသာချင်းတွေရှိတဲ့ ဘေးလွတ်မဲ့ ရွာတွေနဲ့ တချို့ကတော့ တောတောင်တွေထဲက သစ်ပစ်အောက်တွေမှာ ဖြစ်သလိုနေနေကြရတယ်။ ရွာကို ပြန်မယ်ဆိုရင်လည်း နေစရာအိမ်ကမရှိတော့ဘူး။ စစ်(...)တွေနဲ့ ပျူတွေ ပြန်ဝင်လာမှာစိုးလို့ ယနေ့အချိန်ထိ တောထဲမှာပဲ နေနေကြရတယ်။” 

လက်ရှိမှာ မိုးရာသီကာလဖြစ်ပြီး အမိုးအကာတွေ အလုံအလောက်ပါမလာကြတာကြောင့် အခက်အခဲအတော်ကြုံနေကြရတယ်လို့ ဆိုပါတယ်။

“တောထဲဆိုတော့ ခြင်တွေကလည်း အရမ်းကိုက်တယ်။ တချို့ဆိုရင် အအေးမိ၊ ဖျားနာ၊ ချောင်ဆိုးတာတွေ ဖြစ်နေကြတယ်။ ဆေးဝါးလည်း အလုံအလောက်ပါမလာလို့ ဆေးမြီးတိုတွေနဲ့ပဲ ကုနေကြရတယ်။ စားနပ်ရိက္ခာတွေကလည်း ပါလာတဲ့ဟာလေးတွေနဲ့ မျှတစားသောက်နေရပြီး ကုန်ခါနီးနေပြီ။” 

စစ်ကောင်စီတပ်တွေ စစ်ကြောင်းထိုးပြီး ရွာတွေကို မွှေနှောက်မီးရှို့တာကြောင့် ကျေးရွာပေါင်း ၂၀ လောက်က ဒေသခံပြည်သူ ၂၀၀၀၀ ကျော်လောက်ဟာ နေရပ်စွန့်ခွာပြီး ဘေးလွတ်ရာနေရာတွေကို ထွက်ပြေးတိမ်းရှောင်နေကြရတယ်လို့ ဆိုပါတယ်။

ပြည်တွင်း ပြည်ပမှာရှိတဲ့ ပြည်သူတွေအနေနဲ့ မြိုင်မြို့နယ်က နေအိမ်တွေမီးရှို့ဖျက်ဆီးခံရတဲ့ စစ်ဘေးရှောင်ပြည်သူတွအတွက် စားနပ်ရိက္ခာ၊ အမိုးအကာ၊ ခြင်ထောင်နဲ့ ဆေးဝါးတွေ လှူဒါန်းပေးကြဖို့ ဒေသခံတွေက မေတ္တာရပ်ခံထားပါတယ်။

စစ်ကောင်စီပြောခွင့်ရ ဗိုလ်ချုပ်ဇော်မင်းထွန်းကတော့ ကျေးရွာတွေကို မီးရှို့ ဖျက်ဆီးတာဟာ သူတို့ရဲ့ လက်ချက်မဟုတ်ဘူးလို့ အမြဲတမ်းငြင်းဆန်လေ့ရှိပြီး PDF တပ်ဖွဲ့တွေကသာ ပြုလုပ်နေတာလို့ သတင်းစာရှင်းလင်းပွဲတွေမှာ ပြောဆိုလေ့ရှိပါတယ်။

မကွေးတိုင်းဒေသကြီးမှာ စစ်တပ်အာဏာသိမ်းတဲ့ ဖေဖော်ဝါရီ ၁ ရက်နေ့ကနေ အခုနှစ်ဧပြီ ၃၀ ရက်နေ့အထိ စစ်ကောင်စီတပ်ဖွဲ့တွေနဲ့လက်အောက်ခံအဖွဲ့တွေက မီးရှို့ဖျက်ဆီးလို့ အိမ်ခြေ ၂၁၃၁ လုံး မီးလောင် ဆုံးရှုံးခဲ့တယ်လို Data For Myanmar က မေ ၁ ရက်နေ့ရက်စွဲနဲ့ ထုတ်ပြန်ထားပါတယ်။

6 months Ago
More News
Up