အရာတော်မြို့နယ်

November 23, 2021

အရာတော်မြို့နယ်တွင် တိုက်ပွဲဖြစ်၊ နေအိမ်နှစ်လုံးနှင့် ကွမ်းယာဆိုင်ကို စစ်တပ်က မီးရှို့

စစ်ကိုင်းတိုင်း အရာတော်မြို့နယ်၊ နောင်ကြီးအိုင်ကျေးရွာအတွင်း ဒလန်ရှင်းလင်းဖို့သွားတဲ့ ဒေသခံပြောက်ကျားတပ်ဖွဲ့နဲ့ စစ်ကောင်စီတပ်တို့ နိုဝင်ဘာလ ၂၂ ရက် မနက်ပိုင်းက အပြန်အလှန်ပစ်ခတ်မှုဖြစ်ပွားခဲ့ပြီး နေအိမ်နှစ်လုံးနဲ့ ကွမ်းယာဆိုင်တစ်ဆိုင်ကို အကြမ်းဖက်စစ်တပ်က မီးရှို့သွားတယ်လို့ ဒေသခံတွေဆီက သိရပါတယ်။

“မနက် ၁၀ နာရီကျော်လောက်က နောင်ကြီးအိုင်လမ်း‌ပေါ်က ကမ္ဘာ့ရွာကဖေးအနီးမှာ စ ပြီးပစ်ခတ်ကြတာ။ လမ်းတလျှောက်တိုက်ပွဲဖြစ်ပွားခဲ့ပြီး IT Mobile ဆိုင်နားထိပဲ။ ကြောက်လို့ပုန်းနေတဲ့ သားမိနှစ်ယောက်နဲ့ ၅ နှစ်အရွယ်ကလေးတစ်ယောက်ကို စစ်တပ်က ဓားစာခံခေါ်ထားတယ်။ ခဏကြာတော့ ကွမ်းယာဆိုင်တစ်ဆိုင်နဲ့ ရွာခံနေအိမ်နှစ်လုံးကို မီးရှို့လိုက်တယ်” လို့ ဒေသခံတစ်ဦးက ပြောပါတယ်။

အပြန်အလှန်ပစ်ခတ်မှုဖြစ်ပွားပြီး ဒေသခံပြောက်ကျားတပ်ဖွဲ့တွေအနေနဲ့ အောင်မြင်စွာဆုတ်ခွာနိုင်ခဲ့ပေမယ့် အကြမ်းဖက်စစ်တပ်က ကျန်ရစ်ခဲ့တဲ့ ဆိုင်ကယ်တွေထဲက ကောင်းတဲ့ ၃ စီးကိုယူသွားပြီး ၁၀ စီးကျော်ကို မီးရှို့ထားခဲ့ကာ ခရီးသွားပြည်သူတစ်ဦးလည်း ခြေထောက်ကို ကျည်ထိမှန်ခဲ့တယ်လို့ သိရပါတယ်။

အကြမ်းဖက်စစ်တပ်ဟာ မနက် ၁၁ နာရီကျော်လောက် ဓားစာခံ ၃ ဦးကိုပြန်လွှတ်ပေးခဲ့ပြီး စစ်သတင်းပေးလင်မယားကိုခေါ်ကာ နောင်ကြီးအိုင်ရဲစခန်းအတွင်း ပြန်ဝင်သွားတယ်လို့ ဒေသခံတွေဆီက သိရပါတယ်။

5 days Ago

November 17, 2021

အရာတော်မြို့နယ်တွင် စစ်ကောင်စီကားတစ်စီး မိုင်းဆွဲတိုက်ခိုက်ခံရ

စစ်ကိုင်းတိုင်း၊ အရာတော်မြို့နယ်၊ နောင်ကြီးအိုင်ရွာအထွက်မှာ နိုဝင်ဘာ ၁၆ ရက် ညနေပိုင်းက အကြမ်းဖက်စစ်ကောင်စီကားတစ်စီးကို အရာတော်မြို့နယ်တော်လှန်ရေးအင်အားစု (ARA) က မိုင်းဆွဲတိုက်ခိုက်ခဲ့တယ်လို့ ထုတ်ပြန်ကြေညာလိုက်ပါတယ်။

“ထန်းတောကုန်းဘက်ကို သွားတဲ့ကား ဖြစ်ပါတယ်။ နောင်ကြီးအိုင်နဲ့ ထန်းတောကုန်းကြားမှာ တိုက်ခိုက်ခဲ့တာပါ။ ARA မြောက်ပိုင်း၊ (၅၇၇) ပစ်တိုင်းထောင်တပ်ဖွဲ့ရဲ့ လက်သံ‌အမြည်းပါ။ ကားရှေ့ခေါင်းတစ်ခုလုံး ကြေမွစုတ်ပြတ်သွားတာမို့ အသေအပျောက်ကတော့ ရှိဖို့များပါတယ်။ နောင်ကြီးအိုင်စခန်းထဲက ကောင်တွေလည်း ထွက်လာပြီးကြည့်တယ်။ ခဏနေတော့ မြရိပ် စစ်တပ်က ကားတစ်စီးရောက်လာပြီး ကားအပျက်ကို ကြိုးနဲ့လာဆွဲသွားတယ်” လို့ ARA ပြန်ကြားရေးက အတည်ပြု‌ပြောပါတယ်။

အကြမ်းဖက်စစ်တပ်ဟာ အရာတော်မြို့နယ်အတွင်းက အိုင်လျား၊ ကြွေပုဂံ၊ ဒုံဒစ်၊ ငွေတွင်း စတဲ့ ကျေးရွာက တက်ကြွလှုပ်ရှားသူတွေရဲ့နေအိမ်တွေကို မွှေနှောက်လုယက်တာတွေ မီးရှို့ ဖျက်ဆီးတာတွေပြုလုပ်နေတာကြောင့် ဒေသခံတွေ ထွက်ပြေးတိမ်းရှောင်နေကြရပါတယ်။

အရာတော်မြို့နယ်၊ နောင်ကြီးအိုင်ရဲစခန်းအနီးကို နိုဝင်ဘာ ၁၅ ရက်နေ့ကလည်း ခြေလျင်ဝင်လာတဲ့ စစ်ကောင်စီစစ်ကြောင်းတစ်ခုကို ရဲစခန်းရှေ့မှာပဲ ARA က မိုင်းဆွဲတိုက်ခိုက်ခဲ့ပါတယ်။

2 weeks Ago
More News
Up