အရပ်ဘက်အဖွဲ့

A d v e r t i s e m e n t With Us

November 15, 2020

ပြည်ခိုင်ဖြိုးပါတီ၏ အသုံးအနှုန်းအပေါ် မသန်စွမ်းအဖွဲ့များနှင့်အရပ်ဘက်အဖွဲ့များ ကန့်ကွက်

ပြည်ထောင်စု ကြံ့ခိုင်ရေးနဲ့ဖွံ့ဖြိုးရေးပါတီ ထုတ်ပြန်ချက်မှာ မသန်စွမ်းသူတွေအပေါ် ခွဲခြားဆက်ဆံသုံးနှုန်းခဲ့တဲ့ အချက်အလက်တွေကို အပြင်းအထန်ကန့်ကွက်ရှုတ်ချကြောင်းနဲ့ ပါတီဘက်က တရားဝင်တောင်းပန်ဖို့ မြန်မာနိုင်ငံ နားမကြား အဖွဲ့တွေ၊ မသန်စွမ်းအဖွဲ့တွေနဲ့ အရပ်ဘက်အဖွဲ့အစည်းတွေက နိုဝင်ဘာ ၁၄ ရက်နေ့မှာ ထုတ်ပြန်လိုက်ပါတယ်။  ပြည်ထောင်စုကြံခိုင်ရေးနဲ့ဖွံ့ဖြိုးရေးပါတီရဲ့ နိုဝင်ဘာ ၁၁ ရက်က ထုတ်ပြန်တဲ့သတင်းလွှာမှာ “'အစ္စရံကျေးရွာမှာ စာမတတ်သူ၊ စကားမပြောတတ်သူ၊ နားမကြားသူ ဒေါ်ဝင်းစန္ဒာခိုင်အား ဆန္ဒမဲပေးခွင့်ပြုခြင်းကို မဲမသမာမှုအဖြစ် ရေးသားထားခြင်း” ဟာ နားမကြားသူတွေရဲ့ နိုင်ငံသားအခွင့်အရေး မဲပေးခြင်းကို တားဆီးပိတ်ပင်ပြီး ခွဲခြားနှိမ့်ချတဲ့သဘော သက်ရောက်နေတယ်လို့ အဲဒီအဖွဲ့အစည်းတွေက ဖော်ပြထားပါတယ်။  ဒါ့အပြင် နိုဝင်ဘာ ၁၂ ရက်နေ့က ထုတ်ပြန်တဲ့ သတင်းလွှာမှာလည်း မသန်စွမ်းဟု ရေးရမယ့်အစား မသန်မစွမ်းလို့ ရေးသားဖော်ပြတာကိုလည်း ကန့်ကွက်ကြောင်း ထုတ်ပြန်ချက်မှာ ဖော်ပြထားပါတယ်။ လက်ရှိမှာ မြန်မာ့ရှေ့ဆောင်နားမကြားအသင်း ညီမျှခြင်းမြန်မာ၊ ကနောင်အင်စတီကျု စတဲ့ မသန်စွမ်းအဖွဲ့အစည်းတွေနဲ့ အရပ်ဘက်အဖွဲ့အစည်း ၉၅ ခုက လတ်မှတ်ထိုး ကန့်ကွက်ထားတာ ဖြစ်ပြီး ၂၄ နာရီအတွင်း နောက်ထပ် ထောက်ခံလက်မှတ်ထိုးလိုတဲ့အဖွဲ့တွေ တိုးလာဆဲပဲလို့ ညီမျှခြင်းမြန်မာ အဖွဲ့အစည်းက တာဝန်ရှိသူ ဦးအောင်မျိုးမင်းက ပြောပါတယ်။  “ပြည်ထောင်စုကြံ့ခိုင်ရေးနဲ့ဖွံ့ဖြိုးရေးပါတီဘက်က တရားဝင်တောင်းပန်ချက်ကို မရရှိသေးပေမဲ့ သူတို့ထုတ်ပြန်စာရဲ့ နောက်ဆုံးအပိုင်းမှာ မသန်စွမ်းသူများလို့ ပြင်ဖတ်ပါ ဆိုတဲ့ တုံ့ပြန်ချက်တခု ဖြစ်လာပါတယ်။ ဒါပေမဲ့ ရွေးကောက်ခံပါတီကြီးတခုအနေနဲ့ ဂုဏ်သိက္ခာရှိရှိနဲ့ မှားယွင်းကြောင်း တရားဝင်တောင်းပန်ထားတာ မဟုတ်တဲ့အတွက် ဆက်လက်တိုက်တွန်းကြမှာပါ။”  ၂၀၁၉ ကြားဖြတ်သန်းခေါင်စာရင်းအရ မြန်မာနိုင်ငံ လူဦးရေရဲ့ ၁၂ ဒသမ ၈ ရာခိုင်နှုန်းဟာ မသန်စွမ်းသူတွေ ဖြစ်ပြီး ရွေးကောက်ပွဲကော်မရှင်အဖွဲ့ခွဲတွေရဲ့ စာရင်းအရ ၂၀၂၀ အထွေထွေ ရွေးကောက်ပွဲမှာ မဲပေးခွင့်ရှိတဲ့ မသန်စွမ်းဦးရေ ၈၄,၀၃၃ ယောက် ဖြစ်တယ်လို့ သိရပါတယ်။ သတင်း - နွေလှိုင်း(YU)
4 months Ago

April 7, 2020

COVID-19 ထိန်းချုပ်ရေး အကျဉ်းသားများလွှတ်ပေးရန် အရပ်ဘက်အဖွဲ့ ၉၀ ကျော်တောင်းဆို

ကိုရိုနာဗိုင်းရပ်စ်ရောဂါ ကူးစက်ပြန့်ပွားမှုကို ကာကွယ်ထိန်းချုပ်နိုင်ဖို့အတွက် မြန်မာနိုင်ငံ အကျဉ်းထောင်တွေထဲက အကျဉ်းသားဦးရေ လျှော့ချပေးဖို့နဲ့ အကျဉ်းသားတွေပြန်လွှတ်ပေးဖို့ အရပ်ဘက်အဖွဲ့အစည်း ၉၀ ကျော်က ပူးပေါင်း တောင်းဆိုလိုက်ပါတယ်။ မြန်မာနိုင်ငံရှိ အကျဉ်းထောင်တွေဟာ အကျဉ်းသားဦးရေအများဆုံးဝင်ဆန့်နိုင်အားထက် ပျမ်းမျှအားဖြင့် ၁၄၀ ရာခိုင်နှုန်းကျော် လက်ခံထားတဲ့အတွက် အကျဉ်းသားတွေ ပြည့်လျှံ ဆိုးဝါးစွာကြုံတွေ့နေရပြီး အကျဉ်းထောင်မှာ COVID-19 ရောဂါကူးစက်ပြန့်ပွားလာပါက အကျဉ်းထောင်ဝန်ထမ်းနဲ့ သက်ဆိုင်ရာ မိသားစုပေါင်းများစွာကို တိုက်ရိုက် ခြိမ်းခြောက်လာနိုင်တယ်လို့ ထုတ်ပြန်ထားပါတယ်။ ဒါကြောင့်  ပြစ်မှုနည်းသူတွေ၊ သက်ကြီးရွယ်အိုနဲ့ ရောဂါအခံရှိသူတွေကို အကျဉ်းထောင်ကနေ  ပြန်လွှတ်ပေးဖို့ တောင်းဆိုထားပါတယ်။ မူးယစ်ဆေးဝါးမူဝါဒ ပြောင်းလဲရေး စည်းရုံးအရေးဆိုမှုအဖွဲ့ (မြန်မာ)က  ပြောခွင့်ရသူ ဒေါက်တာ နန်းပန်းအိခမ်းက “အကျဉ်းထောင်ထဲမှာ ရှိတဲ့လူဦးရေကို လျှော့ချဖို့ပေါ့လေ။ အဲဒါမှ ရောဂါကူးစက်နှုန်းကို ကာကွယ်နိုင်မှာပေါ့။ အဲတော့ အကျဉ်းသားတွေလွှတ်ပေးဖို့ပေါ့နော်။ ဘယ်လို အကျဉ်းသားတွေလဲဆိုရင် ကျန်းမာရေး နဂို အခံရှိနေတဲ့လူတွေ၊ ကျန်းမာရေးမကောင်းတဲ့လူတွေ၊ အသေးစားပြစ်မှုနဲ့ထောင်ထဲကို ရောက်နေတဲ့သူတွေ၊ မူးယစ်ဆေးဝါးသုံးစွဲသူတို့လိုမျိုး၊ တချို့ ကျတော့ ပြည့်တန်ဆာလုပ်ငန်းနဲ့ အဖမ်းခံရတဲ့သူတွေလိုမျိုးပေါ့နော်။  လွှတ်တဲ့အခါမှာ ထည့်သွင်းပြီးတော့ စဉ်းစားစေခိုင်းတာပေါ့နော်။ ” လို့ပြောပါတယ်။ ဒါ့အပြင် ထောင်တွင်းမှာ ကျန်းမာရေးဝန်ဆောင်မှုရရှိစေဖို့ အကျဉ်းထောင်အတွင်း ကျန်းမာရေးစည်းကမ်းတွေ ထုတ်ပြန်ပြီး ကာကွယ်ကုသရေးလုပ်ဆောင်နိုင်ဖို့လည်း ထုတ်ပြန်တောင်းဆိုထားပါတယ်။ ကမ္ဘာ့ကျန်းမာရေးအဖွဲ့ (WHO)က COVID-19 ကြောင့် အကျဉ်းထောင်နဲ့ အချုပ်စခန်းတွေမှာ ရုတ်တရက်ကပ်ရောဂါပိုး ပြန်ပွားလာနိုင်ခြေရှိပြီး စိုးရိမ်ဖွယ်ကျန်းမာရေး အန္တရယ်တွေ ပေါ်ပေါက်လာနိုင်တယ်လို့ သတိပေးထားပါတယ်။ မြန်မာနိုင်ငံ အနှံ့ အကျဉ်းထောင်တွေနဲ့ အချုပ်ခန်းတွေအသီးသီးမှာ အကျဉ်းဦးစီးဌာန၊ ရဲတပ်ဖွဲ့နဲ့ ကျန်းမာရေးဌာန တာဝန်ရှိသူတွေပူးပေါင်းပြီး လိုက်လံ ပိုးသတ်ဆေးဖျန်းတဲ့ လုပ်ငန်းတွေ ဆောင်ရွက်နေတယ်လို့ ပြည်ထဲရေးဌာနက ထုတ်ပြန်ထားပါတယ်။  ရခိုင်ပြည်နယ်မှာ အင်တာနက်ဖြတ်တောက်ထားတာရပ်တန့်ပေးဖို့အတွက် ဆန္ဒထုတ်ပြလို့ ထောင်ချခံရပြီး ဧပြီ ၃ ရက်ကမှ အင်းစိန်အကျဉ်းထောင်ကနေ ပြန်လွတ်လာတဲ့ ရန်ကုန်ပညာရေးတက္ကသိုလ်ကျောင်းသားများသမဂ္ဂ ဥက္ကဋ္ဌ ကိုအောင်ပြည့်စုံဖြိုးကတော့  လက်ရှိမှာ အကျဉ်းထောင်အတွင်း သတ်မှတ်ထားတဲ့ အကျဉ်းသား ဦးရေ ပိုများပြားနေပြီး အကျဉ်းထောင်အတွင်းမှာ ပိုးသတ်ဆေးဖြန်းတာတွေ လုပ်ဆောင်နေကြောင်း ဒါပေမယ့် COVID- 19 ကြိုတင် ကာကွယ်ရေး ဆောင်ရွက်ထားတဲ့အခြေအနေကတော့ အားရစရာတော့ မရှိဘူးလို့ ဒီဗွီဘီကိုပြောပါတယ်။ ကိုရိုနာဗိုင်းရပ်စ် ကူးစက်ပြန့်ပွားမှုကို ကာကွယ်ထိန်းချုပ်နိုင်ရေး အကျဉ်းထောင်တွေထဲက အကျဉ်းသားဦးရေ လျှော့ချပေးဖို့နဲ့ နိုင်ငံရေးအကျဉ်းသားတွေကို အမြန်ဆုံးလွှတ်ပေးဖို့ လူ့အခွင့်အရေး စောင့်ကြည့်ရေးအဖွဲ့ (HRW) ကလည်း မြန်မာအစိုးရကို တိုက်တွန်းထားပါတယ်။  ဒါ့အပြင်အကျဉ်းထောင်တွေအတွင်း ဖမ်းဆီးခံထားရတဲ့ အချုပ်သားတွေထဲက အာမခံပေးနိုင်သူတွေကို အာမခံပေးဖို့နဲ့ အမိန့်ချပြီးသူတွေထဲက လူ့အဖွဲ့အစည်းကို အန္တရာယ်မပေးနိုင်တဲ့ သူတွေကို လွှတ်ပေးဖို့   နိုင်ငံရေးအကျဉ်းသားများ ကူညီစောင့်ရှောက်ရေးအသင်း AAPP ကလည်း တောင်းဆိုထားပါတယ်။ မြန်မာနို်ငငံတွင်း အကျဉ်းထောင်တွေမှာ   ပြင်ပက လာရောက်သူတွေအတွက် အဖျားတိုင်းတာ စစ်ဆေးတာနဲ့ လက်ဆေးကန်တွေလည်း လုပ်ဆောင်ပေးထားသလို အကျဉ်းထောင်အတွင်း ဧည့်တွေ့ဆုံတာနဲ့ပတ်သက်ပြီး အကျဉ်းသားတစ်ဦးကို မိသားစုဝင် တစ်ဦးနဲ့သာ တွေ့ဆုံခွင့်ပေးထားကာ ထောင်ဝင်စာ ဧည့်တွေခွင့်ကိုလည်း   ဧပြီ ၁၀ ရက်မှ ၁၉ ရက်အထိ ပိတ်ပင်ထားပါတယ်။   ဓာတ်ပုံ- MOH
11 months Ago
Up