အရပ်ဘက်အဖွဲ့များ

September 21, 2018

အိန္ဒိယ-မြန်မာနှစ်နိုင်ငံ အရပ်ဘက်အဖွဲ့များ တမူးမြို့တွင်ပထမဆုံးအကြိမ်တွေ့ဆုံ

အိန္ဒိယ-မြန်မာ နယ်စပ်နေ နှစ်နိုင်ငံ ပြည်သူတွေအတွက် ငြိမ်းချမ်းတဲ့ ဒေသဖြစ်စေဖို့၊ အတူတကွယှဉ်တွဲနေနိုင်ဖို့နဲ့ ချစ်ကြည်ရင်းနှီးမှု ခိုင်မာစေဖို့အတွက် ရည်ရွယ်ပြီး နှစ်နိုင်ငံ အရပ်ဘက်အဖွဲ့အစည်းတွေ တာဝန်ရှိသူတွေ  တမူးမြို့မှာ ဒီကနေ့ တွေ့ဆုံပါတယ်။ ဒီဆွေးနွေးပွဲကို ဦးဆောင်ကျင်းပတဲ့ တမူးလူငယ်ကွန်ရက်က ကိုအောင်သူချမ်းက “နယ်စပ်ဆိုပေမယ့် တမြေထဲမှာ နေတဲ့အတွက် တဖက်နဲ့တဖက် ပူးပေါင်းဆောင်ရွက်ဖို့နဲ့ ချစ်ကြည်ရင်းနှီးစွာ နေထိုင်ကြဖို့က အဓိကရည်ရွယ်ချက်တွေပါ။  တမူးမှာ ပထမဆုံး ကျင်းပပြီး နောက်လည်းဆက်ပြီး သူတို့ဘက်မှာလည်း ကျင်းပမယ်၊ ကျနော်တို့ဘက်ကလည်း ကျင်းပမယ်ဆိုရင် နှစ်နိုင်ငံ ရင်းနှီးမှုတွေရလာမယ်၊ လူငယ်များ မူးယစ်ဆေးဝါးပြဿနာနဲ့ အခြားလူမှုပြဿနာတွေ အဖြေရှာဆောင်ရွက်ကြမယ်” လို့ ပြောပါတယ်။ ဒါ့အပြင် စက်တင်ဘာ ၁၇ ရက်နေ့က အိန္ဒိယ-မြန်​မာနယ်​စပ်​ အမှတ် ၁ ဂိတ်​နဲ့ ၂ ဂိတ်​အကြား ပဲတန်းပေါက်အနီး ခိုက်​ရန်​ဖြစ်​ပွားခဲ့တဲ့ကိစ္စနဲ့ ပတ်သက်ပြီးလည်း ဒီကိစ္စဟာ လူနှစ်ယောက်ရဲ့ ပြဿနာသာ ဖြစ်ပြီး နိုင်ငံနှစ်နိုင်ငံရဲ့ ပြဿနာမဟုတ်ဘူးလို့လည်း ဆွေးနွေးပွဲ တက်ရောက်လာသူတွေက ပြောပါတယ်။ အိန္ဒိယအရပ်ဘက်အဖွဲ့အစည်းဝင် မိုဟန်က “အဲ့ဒီပြဿနာကို နိုင်ငံပြဿနာလို့ ယူဆကြပါနဲ့၊ အဲဒီပြဿနာနဲ့ ပတ်သက်လို့ ကျနော်တို့စိတ်ထဲမှာ ဘာမှမရှိဘူးဆိုတာကို ကျနော်တို့ပြတယ်။ နောက်ထပ်ဘာအကူအညီရှိရင်လည်း ကျနော်တို့ကိုပြောပါ။ ကျနော်တို့ လုပ်ပေးမယ်။ ဒီဘက်ကကြိုဆိုမှုအတွက်လည်း ကျနော်တို့ သိပ်ဝမ်းသာတယ်။ ဒါဟာ သမိုင်းမှာ အဖွဲ့အစည်းနှစ်ခု ပထမဆုံးတွေ့ဆုံပွဲဖြစ်တဲ့အတွက် သိပ်ဝမ်းသာပါတယ်'' လို့ပြောပါတယ်။ ဒီကနေ့ တွေ့ဆုံပွဲကို တမူးအရပ်​ဘက်​အဖွဲ့အစည်း ၃၅ ဖွဲ့နဲ့ မိုရေးအရပ်​ဘက်​အဖွဲ့အစည်း ၅ ဖွဲ့ တက်​​ရောက်​ခဲ့ပြီး ဖိတ်ကြားထားသူ သူဦးရေ ၂၀၀  လောက်တက်​​ရောက်​ခဲ့ကြပါတယ်။
3 years Ago

September 23, 2015

ငြိမ်းချမ်းရေးဖြစ်စဉ်တွင် အရပ်ဘက်အဖွဲ့များ ပါဝင်နိုင်မည့်ကဏ္ဍ ဆွေးနွေး

လက်ရှိ မြန်မာနိုင်ငံ ငြိမ်းချမ်းရေးဖြစ်စဉ်မှာ အရပ်ဘက်အဖွဲ့အစည်းတွေအနေနဲ့ ပူးပေါင်းပါဝင်နိုင်ဖို့ ပြည်နယ် ၃ ခုနဲ့ တိုင်း ၁ ခုက ကိုယ်စားလှယ်တွေ မွန်ပြည်နယ် မော်လမြိုင်မြို့မှာ အကျယ်တ၀ံ့ဆွေးနွေးနေကြပါတယ်။ အဓိက တနိုင်ငံလုံးဆိုင်ရာ အပစ်ခတ်ရပ်လက်မှတ်ရေးထိုးမှုနဲ့ ပတ်သက်ပြီး ကရင်ပြည်နယ်၊ မွန်ပြည်နယ်၊ ကယားပြည်နယ်နဲ့ တနင်္သာရီတိုင်းက အရပ်ဘက် အဖွဲ့အစည်းတွေ ပါဝင်ဆောင်ရွက်နိုင်မယ့် အခန်းကဏ္ဍတွေကို ဆွေးနွေးနေတယ်လို့  ဆွေးနွေးပွဲဖြစ်မြောက်ရေး အဖွဲ့ဝင်လည်းဖြစ် ကုလသမဂ္ဂဖွံ့ဖြိုးမှုစီအစဉ်ရဲ့ ဆက်သွယ်ညှိနှိုင်းရေးမှူးလည်းဖြစ်တဲ့ ကိုကြည်ဇော်လွင်က ဒီဗွီဘီကိုပြောပါတယ်။ “ငြိမ်းချမ်းရေးဖြစ်စဉ်မှာ အရပ်ဘက်လူမှု အဖွဲ့အစည်းတွေရဲ့ အခန်းကဏ္ဍပေါ့လေ၊ တကယ်လို့ အန်စီအေ (တပြည်လုံးအပစ်ခတ်ရပ်စာချုပ်) လက်မှတ်ထိုးပြီးသွားရင် ထိုးပြီးတဲ့နောက်ပိုင်းမှာ ဘာတွေလုပ်ကြမလဲ၊ လက်မှတ်မထိုးဖြစ်ခဲ့ရင် ဘာတွေလုပ်ဖို့လိုမလဲ စတာတွေ ဆွေးနွေးနေတာ ဖြစ်ပါတယ်။ မဆွေးနွေးခင် ပထမနေ့မှာ အစိုးရနဲ့ တိုင်းရင်းသားလက်နက်ကိုင် အဖွဲ့အစည်းတို့ကြား တပြည်လုံးဆိုင်ရာ အပစ်ခတ်ရပ်စဲရေး လက်မှတ်ရေးထိုးနိုင်ဖို့ ဆောင်ရွက်နေတဲ့ နောက်ဆုံးရအခြေအနေ၊ ပြည်နယ်နဲ့တိုင်းတခုလုံးက အရပ်ဘက်အဖွဲ့အစည်းအနေနဲ့ လုပ်ဆောင်နိုင်မယ့်အခြေအနေ၊ နိုင်ငံရေးတွေ့ဆုံဆွေနွေးမှု၊ ယုံကြည်မှု တည်ဆောက်ရေးဆွေးနွေးပွဲ၊ အရပ်သားအနေနဲ့ အပစ်ခတ်ရပ်စောင့်ကြည့်လေ့လာမှု အခြေအနေ၊ တပြည်လုံးအပစ်ခတ်ရပ်စဲရေး သဘောတူစာချုပ်ပါ အချက်အလက်များ စတဲ့ အကြောင်းအရာတွေကို သက်ဆိုင်ရာ ပုဂ္ဂိုလ်တွေ၊ ပြည်တွင်းပြည်ပပညာရှင်တွေက ဆွေးဆွေနွေးပါတယ်ခင်ဗျ။” ဦးဆောင်ဆွေးနွေးသူတွေထဲမှာ တပြည်လုံး အပစ်ခတ်ရပ်ရေးအတွက် တိုင်းရင်းသားလက်နက်ကိုင်အဖွဲ့က တာဝန်ပေးထားတဲ့  အဆင့်မြင့်ကိုယ်စားလှယ် SD အဖွဲ့ဝင် နော်စီဖိုးရာစိန်၊ ပအိုဝ်းအမျိုးသားလွတ်မြောက်ရေးအဖွဲ့ချုပ်ဥက္ကဋ္ဌ ဦးခွန်မြင့်ထွန်း၊  နိုင်ငံရေးတွေ့ဆုံဆွေးနွေးမှု ဆိုင်ရာပညာရှင်  ဒေါ်သီတာသန့်၊  အင်ဒိုနီးရှားနိုင်ငံ နဲ့ ယူအန်ဒီပီက ပညာရှင်တွေပါ ပါဝင်ပြီး မွန်ပြည်နယ် စီမံနဲ့စီးပွားဝန်ကြီး ဒေါက်တာမင်းနွယ်စိုးက အိမ်ရှင်အနေနဲ့ ကြိုဆိုမိန့်ခွန်း ပြောကြားခဲ့တယ်လို့ ဆိုပါတယ်။ အရပ်သားအဖွဲ့အစည်းတွေအနေနဲ့ ဘယ်လိုအခန်းကဏ္ဍမှာ ပါဝင်နိုင်မလဲ ဆိုတဲ့အချက်တွေကိုတော့ ဆွေးနွေးပွဲအပြီးမှာ ထုတ်ပြန်ကြေညာဖို့ ရှိနေပါတယ်။ ဆွေနွေးပွဲကို  မော်လမြိုင်မြို့ ပြည်နယ်ခန်းမမှာ  စက်တင်ဘာ ၂၁ ရက်ကနေ ၂၃ ရက်နေ့ထိ  ၃ ရက်တာ ကျင်းပနေတာဖြစ်ပြီး ပြည်နယ် ၃ ခု တိုင်းဒေသကြီး ၁ ခုက အရပ်ဘက်အဖွဲ့အစည်း ကိုယ်စားလှယ်တွေ၊ မွန်ပြည်နယ်အစိုးရအဖွဲ့ဝင်တွေ၊ နိုင်ငံရေးပါတီက ကိုယ်စားလှယ်တွေနဲ့ စိတ်ပါဝင်စားသူတွေပါ စုစုပေါင်း ၄၀၀ ကျော် တက်ရောက်ခဲ့ပါတယ်။
6 years Ago
Up