ဧရာဝတီတိုင်း ပုသိမ်မြို့နယ်မှာ စက်တင်ဘာ ၁၅ ရက်က အမျိုးသား ၇ ယောက် အရက်အတူတူ သောက်ရာကနေ အဆိပ်သင့် သေဆုံးခဲ့တယ်လို့ ဒေသခံတွေက ပြောပါတယ်။

စပါးထားကျေးရွာမှာ နေထိုင်တဲ့ အသက် ၄၀ အရွယ် အမျိုးသား ၇ ယောက်ဟာ ပိုးသတ်ဆေးဘူး အခွံကို အရက်ခွက်အဖြစ် လုပ်သောက်ရာကနေ သေဆုံးခဲ့တာလို့ ဒေသခံတဦးက ပြောပါတယ်။

“အားလုံးက တဝိုင်းထဲ ထိုင်သောက်တာ။ ဆိုးတာက သူတို့ သောက်တဲ့ခွက်က ပိုးသတ်ဆေးဘူးခွံ ဖြစ်နေတာ။ ဘူးခွံကို ဖြတ်ပြီးသောက်တာမှာ အဆိပ်သောက်သလိုဖြစ်ပြီး သေသွားတာ။” 

အရက်အတူသောက်ရင်း သေဆုံးခဲ့သူတွေဟာ ဦးအုန်းသန်း၊ ဦးခင်စိုး၊ ဦးအောင်မြတ်သူတို့အပါဝင် အမျိုးသား ၇ ယောက်ဖြစ်ပြီး ၁ ယောက်က နေရာမှာ သေဆုံးခဲ့သလို ၆ ယောက်ကတော့ ဆေးရုံရောက်မှ သေဆုံးသွားတာလို့ ဆိုပါတယ်။ 

သေဆုံးခဲ့တဲ့သူတွေရဲ့ ရုပ်အလောင်းကို သလပ်ခွာကျေးရွာကနေ ပုသိမ်ဆေးရုံကြီးကို ပို့ဆောင်ကာ ရင်ခွဲစစ်ဆေးခဲ့ပြီး ဒေသခံလူမှုကူညီရေးကားတွေနဲ့ အလောင်းတွေကို အိမ်ပြန်ပို့ပေးခဲ့ရတယ်လို့ ရဲတပ်ဖွဲ့အသိုင်းဝိုင်းက သိရပါတယ်။  

အရက်အတူသောက်စားရာကနေ အဆိပ်သင့်သေဆုံးခဲ့တာနဲ့ ပတ်သက်ပြီး သလပ်ခွာနယ်မြေရဲ စခန်းက သေမှုသေခင်းဖွင့်ပြီး ဓမ္မတာအတိုင်းသေဆုံးတာ ဟုတ်၊ မဟုတ် စစ်ဆေးနေတယ်လို့ ရဲတပ်ဖွဲ့ နဲ့ နီးစပ်သူတွေက ပြောပါတယ်။

ရုရှားနိုင်ငံအတွင်း ကာဇက်စတန်နိုင်ငံနဲ့ နယ်စပ်နားက ဒေသမှာ ဒီသီတင်းပတ်ထဲ အရက် အဆိပ်သင့်လို့ လူ ၂၉ ဦး သေဆုံးခဲ့တယ်လို့ ရုရှားအာဏာပိုင်တွေက အောက်တိုဘာ ၉ ရက်မှာ ပြောပါတယ်။

မက်သနောတွေပါတဲ့ အရက်ပြန်နဲ့ ဒေသတွင်းမှာ ချက်လုပ်ထားတဲ့ အရက်ကို သောက်အပြီး သေကုန်တာလို့ ပြောပါတယ်။

မြို့တော် မော်စကိုရဲ့ အရှေ့တောင်ဘက် မိုင် ၉၀၀ အဝေးမှာ ရှိတဲ့ အိုရန်ဘာ့ဂ်ဒေသမှာ လူ ၉ ယောက်ကို ဖမ်းဆီးထားပြီးပြီလို့ တရားမဝင် အရက်ပြန်တွေကို ထုတ်လုပ်ရောင်းချမှု စုံစမ်းစစ်ဆေးသူတွေက ပြောပါတယ်။

ဒေသတွင်းက စတိုးဆိုင်တွေနဲ့ ကုန်လှောင်ရုံတွေကနေ အရက်ပါတဲ့ အရည်တွေကို သိမ်းဆည်းပြီး သူတို့ထဲက အများစုမှာ အဆိပ်သင့် မက်သနောတွေ ပါနေတယ်လို့ ပြည်ထဲရေးဝန်ကြီးဌာနက ပြောပါတယ်။

ဒီသီတင်းပတ်ထဲမှာ အရက်အဆိပ်သင့်သူ ၅၄ ယောက်ကို မှတ်တမ်းတင်ထားပြီး သူတို့ထဲက တဝက်လောက် သေဆုံးခဲ့တယ်လို့ ဒေသန္တရကျန်းမာရေးဝန်ကြီးဌာနက အောက်တိုဘာ ၁၀ ရက်မှာ ပြောခဲ့တဲ့အကြောင်း ရုရှားအခြေစိုက် RIA သတင်းမှာ ဖော်ပြပါတယ်။

ဆိုက်ဘေးရီးယားမှာ ၂၀၁၆ တုန်းကလည်း လူတွေ အစုလိုက် အရက်အဆိပ်သင့်ခဲ့ဖူးလို့ အာဏာပိုင်တွေက အရက်၊ ဆေးဝါးနဲ့ ရေမွှေးအပြင် အီသနော ပါဝင်မှု ရာခိုင်နှုန်းများတဲ့ အရည်တွေ ထုတ်လုပ်ရောင်းချမှုကို ပိုတင်းတင်းကျပ်ကျပ် ထိန်းချုပ်ခဲ့ရပါတယ်။