အမှိုက်ကင်းစင်ရေး

A d v e r t i s e m e n t With Us

May 21, 2019

အမှိုက်စစ်ဆင်ရေး မြန်မာပြည်တဝန်း ဆင်နွှဲပေး (အယ်ဒီတာအာဘော်)

သန့်ရှင်းသောရန်ကုန်၊ စိမ်းလန်းသောရန်ကုန် ဖြစ်လာစေရေး “မြို့တော်သန့်ရှင်းလှပဖို့ အားလုံးပူးပေါင်း ပါဝင်စို့” ကြွေးကြော်သံဖြင့် အားသွန်ခွန်စိုက် ကြိုးပမ်းနေသည့် Clean Yangon Campaign လှုပ်ရှားမှု ၂ နှစ်ပြည့် အထိမ်းအမှတ်ပွဲကို မေ ၁၉ ရက်က ရန်ကုန်မြို့တော်ခန်းမရှေ့ မဟာဗန္ဓုလပန်းခြံတွင် အောင်အောင်မြင်မြင် ကျင်းပနိုင်ခဲ့သည်။ Clean Yangon လှုပ်ရှားမှုကို လွန်ခဲ့သည့် ၂၀၁၇ မေလကစတင်ခဲ့ပြီး ရန်ကုန်မြို့ နောက်ဖေးလမ်းကြားများ အပါအဝင် လူစည်ကားရာ နေရာများ၌ တတ်အားသရွေ့ အမှိုက်ကောက် သန့်ရှင်းရေး လှုပ်ရှားမှုများကို နည်းလမ်းပေါင်းစုံဖြင့် စုပေါင်းဆောင်ရွက်ခဲ့ကြသည်။ ထိုလှုပ်ရှားမှုတွင် အားတက်သရော ပါဝင်ဆောင်ရွက်ခဲ့ကြသော တက္ကသိုလ်နှင့် အခြေခံပညာကျောင်း အသီးသီးက ကျောင်းသူကျောင်းသားများ၊ ပရဟိတ အသင်းအဖွဲ့ အသီးသီးက အဖွဲ့ဝင်များ၊ တသီးပုဂ္ဂလ စေတနာရှင် ပြည်သူလူထုများ၊ အနုပညာရှင်များ၊ စည်ပင်ဝန်ထမ်းများ အပါအဝင် တဦးချင်း တယောက်ချင်းတို့၏ နိုင်ငံသားတာဝန် ကျေပြွန်မှုအပေါ် အားပေးဂုဏ်ပြုထိုက်သည်။ အမေရိကန်အခြေစိုက် ပြည်ပရောက်မြန်မာများဖြင့် တည်ထောင်ဖွဲ့စည်းထားသည့် ပြည်သူ့ဂုဏ်ရည်အသင်းက ယခုနှစ် ပေးအပ်ချီးမြှင့်သည့် ၁၀ ကြိမ်မြောက် ပြည်သူ့ဂုဏ်ရည်ဆုကို Clean Yangon Campaign အဖွဲ့က ရရှိခဲ့ခြင်းသည် ဂုဏ်ပြုထိုက်သူကို ဂုဏ်ပြုခြင်းဟု ရှုမြင်သည်။ အမှန်ဆိုရလျှင် အမှိုက်ပြဿနာသည် မြန်မာ့လူ့အဖွဲ့အစည်း၌ အတွင်းကျကျ လှိုက်စားနေသည်မှာ ကာလအတန်ကြာနေပေပြီ။ စည်းကမ်းမဲ့ အမှိုက်ပစ်ခြင်းသည် ဖြစ်ရိုးဖြစ်စဉ်၊ လုပ်ရိုးလုပ်စဉ်၊ မြန်မာ့ယဉ်ကျေးမှု ထုံးတမ်းဓလေ့သဖွယ် ဖြစ်လာသည်အထိ တိုင်းပြည်နှင့် လူမျိုးတို့အတွက် အရုပ်ဆိုး အကျည်းတန် ဖြစ်နေသည့်ကိစ္စ ဖြစ်သည်။ လမ်းတံတားများအပေါ်တွင် မြန်မာတို့ ကြုံသလို အမှိုက်ပစ်သည်။ မိမိနေထိုင်ရာ နေအိမ်တိုက်ခန်း လှေကားများတွင်လည်း အမှိုက်ပစ်သည်။ ဌာနဆိုင်ရာရုံးများ၊ အများပြည်သူနှင့် ဆိုင်သည့် ပန်းခြံများတွင်လည်း ကြုံသလို အမှိုက်ပစ်သည်။ ယုတ်စွအဆုံး ကိုးကွယ်ယုံကြည် အထွတ်အမြတ်ထားရာ ဘုရားစောင်းတန်း၊ ရင်ပြင်ပေါ်မှာပါမကျန် တွေ့ရာကြုံရာ အမှိုက်များ စွန့်ပစ်၊ ဆေးလိပ်တိုများ စွန့်ပစ်၊ ကွမ်းတံတွေးများ ပျော်ပျော်ကြီး ထွေးနေကြသည်။ အမှိုက်ပြဿနာနှင့် ပတ်သက်၍ နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်က ၂၀၁၅ ရွေးကောက်ပွဲတွင် အနိုင်ရပြီးပြီးချင်း သူ၏မဲဆန္ဒနယ် ရန်ကုန်တိုင်း ကော့မှူးမြို့နယ်တွင် ကိုယ်တိုင်သွားရောက် အမှိုက်ကောက်ပြခဲ့သည်။ ယင်းနောက် ရန်ကုန်တွင်ရော တခြားနယ်မြို့များတွင်ပါ အမှိုက်ကောက်သည့် လှုပ်ရှားမှုများ အခါအားလျော်စွာ ပေါ်ပေါက်လာခဲ့သည်။ လက်ရှိ မန္တလေးတိုင်းနှင့် ကရင်ပြည်နယ်တို့တွင်လည်း ဝန်ကြီးချုပ် ဦးဆောင်သည့် အပတ်စဉ် အမှိုက်ရှင်းလင်းရေး လှုပ်ရှားမှုများ ပြုလုပ်နေကြပေသည်။ ဒို့အိမ်အဖွဲ့ကလည်း ရန်ကုန်မြို့တွင်း နောက်ဖေးလမ်းကြားများတွင် ကလေးများအတွက် ကစားကွင်းများနှင့် ဥယာဉ်များ ဆောက်လုပ် အလှဆင်ပေးနေသည်။ လတ်တလော ရန်ကုန်မြို့၊ ကျောက်တံတားမြို့နယ်၊ လမ်း ၄၀ အလယ်ဘလောက်တွင် Black Fire ဟု အမည်ပေးထားသည့် ဆယ်ကျော်သက် ကလေးငယ်များအဖွဲ့က ဦးဆောင်ကာ ကလေးကစားကွင်းတခု ကိုယ်တိုင်ဖန်တီးရန် ကြိုးပမ်းနေကြသည်။ မူလတန်းကျောင်းများ အပါအဝင် အခြေခံပညာ စာသင်ကျောင်းများတွင်လည်း အမှိုက်ပုံးများကို အမျိုးအစား ခွဲချထားပေးကာ “အမှိုက်ကောက်တာ ရှက်စရာမဟုတ်၊ အမှိုက်ပစ်တာ ရှက်စရာ”၊ “အမှိုက်ဟူသမျှ အမှိုက်ပုံးတွင်ချ၊ လမ်းပေါ်ပစ်တာ ရှောင်ကြဉ်ကြ” စသည့် စာတမ်းများ ချိတ်ဆွဲ၍ ပညာပေးမှုများကို အခြေခံကျကျ ပြုလုပ်နေသည်ကို မြင်တွေ့ရသည်။ မကြာသေးခင် လပိုင်းအတွင်း မြန်မာပြည်အနှံ့အပြားတွင် Clean-Up Challenge များ အပြိုင်အဆိုင် ပေါ်ပေါက်လာပြီး အမှိုက်များကို ရှင်းလင်းနေကြသည်မှာ အားတက်စရာ အခြေအနေဖြစ်သည်။ သို့သော် အမှိုက်များကို ရှင်းလင်းသန့်စင်ပြီးသည့် နေရာများတွင် အမှိုက်ဖွသူများက မစာမနာ အမှိုက်များ ပြန်ပစ်ခဲ့ကြသည်ကို မြင်တွေ့ခဲ့ရသဖြင့် စိတ်ပျက် ဒေါသထွက်မိသည်ဟု အမှိုက်ကောက်လှုပ်ရှားမှုတွင် ပါဝင်သူတို့က ရင်ဖွင့်ကြသည်။ အမှိုက်ပြဿနာသည် မြန်မာတနိုင်ငံတည်းသာ ဖြစ်နေသည့်ကိစ္စမဟုတ်၊ ကမ္ဘာ့နိုင်ငံများတွင်လည်း ရင်ဆိုင်နေကြရသလို ရေအောက် ပင်လယ်သမုဒ္ဒရာ ကြမ်းပြင်၌ပါ အမှိုက်များကို မြင်တွေ့ရသဖြင့် အင်မတန် စိတ်ပျက်စရာကောင်းသည်ဟု သိပ္ပံပညာရှင်များက ညည်းတွားကြသည်။ အမေရိကန်ပြည်ထောင်စု တက္ကဆက်ပြည်နယ်က လေ့လာစူးစမ်းသူတဦး လိုက်ပါလာသည့် ရေငုပ်သင်္ဘောတစီးသည် ကမ္ဘာ့အနက်ဆုံး ရေငုပ်လေ့လာမှုအဖြစ် ပစိဖိတ်သမုဒ္ဒရာ၏ မာရီယာနာ ချောက်အတွင်း အနက် ၆ ဒသမ ၈ မိုင်ထိ ဆင်းခဲ့ရာ ပင်လယ်ကြမ်းပြင်တွင် သတ္တုနှင့် ပလတ်စတစ် အမှိုက်များကို တွေ့ရှိခဲ့ခြင်းဖြစ်သည်။ ယနေ့ ကမ္ဘာပေါ်ရှိ သမုဒ္ဒရာများအတွင်း ပလတ်စတစ်အမှိုက် တန်ချိန် သန်း ၁၀၀ အထိ ရှိနေပြီဟု ကုလသမဂ္ဂက ခန့်မှန်းထားပြီး သမုဒ္ဒရာ ရေနက်ပိုင်းတွင်သာ ကျက်စားလေ့ရှိသည့် ဝေလငါးကဲ့သို့ နို့တိုက်သတ္တဝါများ၏ ဝမ်းဗိုက်အတွင်း ပလတ်စတစ်အမှုန်များ ရောက်နေသည်ကို သိပ္ပံပညာရှင်တို့ တွေ့ရှိခဲ့ကြသည်။ ပြီးခဲ့သည့် သီတင်းပတ်ကလည်း ကနေဒါနိုင်ငံက ဖိလစ်ပိုင်နိုင်ငံသို့ အမှိုက်ကွန်တိန်နာ ၁၀၀ လောက် ပို့ခဲ့သည့်ကိစ္စနှင့် ပတ်သက်၍ ကနေဒါနိုင်ငံဆိုင်ရာ သံအမတ်ကြီးကို ဖိလစ်ပိုင်အစိုးရ နေရပ်ကို ပြန်ခေါ်ခဲ့ရသည်အထိ အမှိုက်ကစသည့် ပြဿနာ သံတမန်ဆက်ဆံရေး ထိခိုက်ခဲ့ရသည်။ ချမ်းသာသည့်နိုင်ငံများက ဖွံ့ဖြိုးဆဲနိုင်ငံများထံ အမှိုက်နှင့် စွန့်ပစ်ပစ္စည်းများ အလုံးအရင်းဖြင့် တင်ပို့နေသည့် စိန်ခေါ်မှုပြဿနာကို ဖိလစ်ပိုင်၊ မလေးရှား စသည့် အာဆီယံဒေသတွင်း နိုင်ငံများတွင် ကြုံတွေ့ ရင်ဆိုင်နေကြရသဖြင့် မြန်မာနိုင်ငံအတွက်လည်း သတိချပ်စရာဖြစ်သည်။ လက်ရှိဆောင်ရွက်နေသည့် သန့်ရှင်းသော ရန်ကုန် လှုပ်ရှားမှုမှသည် သန့်ရှင်းသော မြန်မာနိုင်ငံ လှုပ်ရှားမှုအဖြစ်သို့ ပိုမိုကျယ်ကျယ်ပြန့်ပြန့် လုပ်ဆောင်ရန် လိုအပ်နေသည်။ တချိန်တည်း တပြိုင်နက်တည်း စည်းကမ်းပျက် အမှိုက်ပစ်သူများကိုလည်း အာဏာပိုင်တို့က ဥပဒေနှင့်အညီ ထိထိရောက်ရောက် အရေးယူသွားရန်လည်း လိုအပ်သည်။ စည်းကမ်းမဲ့ အမှိုက်ပစ်သည့်ဓလေ့ မြန်မာ့လူ့အဖွဲ့အစည်းအတွင်း လျော့နည်း ပပျောက်သွားစေရန် ပညာပေးမှုများနှင့် အမှိုက်ကင်းစင်ရေး လှုပ်ရှားမှုများကို အစိုးရက ဦးဆောင်ကာ နိုင်ငံတဝန်း အမှိုက်စစ်ဆေးရေး အသွင်ဖြင့် အရှိန်မြှင့် လုပ်ဆောင်သွားရန် လိုအပ်နေပြီဟု တိုက်တွန်းလိုက်ရပေသည်။
2 years Ago
Up