ဖမ်းဆီးထိန်းသိမ်းခံထားရတဲ့ အမျိုးသားဒီမိုကရေစီအဖွဲ့ချုပ် NLD ပါတီရဲ့ မော်လမြိုင်မြို့နယ် ပြည်နယ်လွှတ်တော်ကိုယ်စားလှယ် ဒေါ်နွယ်နွယ်အောင်ကို စစ်ကောင်စီက အကြမ်းဖက်မှု တိုက်ဖျက်ရေး ဥပဒေ ပုဒ်မ ၅၂ နဲ့ အမှုဖွင့်ထားတယ်လို့ နီးစပ်သူတွေက DVB ကို ပြောပါတယ်။
NLD အမတ် ဒေါ်နွယ်နွယ်အောင်ကို စစ်ကောင်စီတပ်ဖွဲ့ဝင်တွေက နိုဝင်ဘာ ၂၇ ရက်နေ့ ညပိုင်းမှာ မော်လမြိုင်ဈေးကြိုရပ်ရှိ နေအိမ်မှာ ဝင်ရောက်ဖမ်းဆီးပြီးနောက် အကြမ်းဖက်မှု တိုက်ဖျက်ရေး ဥပဒေနဲ့ အမှုဖွင့်လိုက်တာပါ။
လက်ရှိမှာတော့ ဒေါ်နွယ်နွယ်အောင်ကို ချုပ်ရမန်ယူပြီး ကျိုက်မရောဗဟို အကျဉ်းထောင်မှာ ဖမ်းဆီးထိန်းသိမ်းထားတာ ဖြစ်ပါတယ်။
အကြမ်းဖက်မှု တိုက်ဖျက်ရေး ဥပဒေ ပုဒ်မ ၅၂ ဟာ အကြမ်းဖက်အဖွဲ့အစည်းမှာ ပူးပေါင်းဆောင်ရွက်တာ၊ ငွေးကြေထောက်ပံ့တာတွေအတွက် စွဲဆိုတဲ့ ပုဒ်မ တစ်ခု ဖြစ်ပါတယ်။
အကြမ်းဖက်မှု တိုက်ဖျက်ရေး ဥပဒေ ပုဒ်မ ၅၂ ဟာ ပြစ်မှုကျူးလွန်ကြောင်း ပြစ်မှုထင်ရှားရင် အနည်းဆုံး ထောင်ဒဏ် ၃ နှစ်ကနေ အမြင့်ဆုံး ထောင်ဒဏ် ၇ နှစ်အပြင် ငွေဒဏ်ပါ အမိန့်ချမှတ်နိုင်ပါတယ်။
ဖမ်းဆီးထိန်းသိမ်းခံထားရတဲ့ ဒေါ်နွယ်နွယ်အောင်ဟာ မော်လမြိုင်မြို့နယ် အမျိုးသားဒီမိုကရေစီအဖွဲ့ NLD ပါတီ ဥက္ကဋ္ဌ လည်း ဖြစ်ပါတယ်။
ကချင်ပြည်နယ်၊ ပူတာအိုမြို့မှာ ဖေဖော်ဝါရီ ၈ ရက်နေ့က စစ်အာဏာရှင်စနစ်ကို ကန့်ကွက်ကြောင်း ငြိမ်းချမ်းစွာဆန္ဒပြတဲ့ပွဲမှာ ပါ၀င်တဲ့ ပူတာအိုက လူငယ် ၄ ဦးကို သဘာ၀ဘေးအန္တရာယ် စီမံခန့်ခွဲမှုဥပဒေနဲ့ အမှုဖွင့်ခံထားရပါတယ်။
အမှုဖွင့်ခံရတဲ့ လူငယ်တွေက အဖမ်းမခံဘဲ ရှောင်နေကြလို့ ခုထိလွတ်နေဆဲဖြစ်တယ်လို့ ပြောပါတယ်။
မြန်မာနိုင်ငံ တစ်ပြည်လုံးမှာ သန်းပေါင်းများစွာသော ပြည်သူတွေက စစ်အစိုးရကို အလိုမရှိကြောင်း ဆန္ဒဖော်ထုတ်ချိန်မှာ ပူတာအိုမြို့မှာ ပထမအဆုံးအနေနဲ့ အခုလို အမှုဖွင့်ခံရတာဖြစ်ပါတယ်။
"ဘယ်မြို့မှာမှ ခုချိန်ထိ ဒီပုဒ်မနဲ့ အမှုဖွင့်ဖမ်းဆီးတယ်ဆိုတာ မရှိဘူး၊ မကြားရသေးဘူး။ ပူတာအိုဒေသက အမှောင်ချခံခဲ့ရတဲ့ ဒေသဆိုတော့ သူတို့လုပ်ချင်ရာ လုပ်တဲ့သဘောပါ" လို့ အမှုဖွင့်ခံရတဲ့ လူငယ်တဦးက ပြောပါတယ်။
အမှုဖွင့်ခံရတဲ့ လူငယ်တွေက ပူတာအိုဒေသအတွက် ဒေသဖွံ့ဖြိုးရေး၊ လူမှုရေးလုပ်ငန်းများမှာ တက်ကြွစွာ ဆောင်ရွက်နေတဲ့ လူငယ်တွေ ဖြစ်ပါတယ်။
