အမြန်ဆုံးပြန်လွှတ်ပေးရန်

August 16, 2021

MICS ခေါင်းဆောင် ဦးသက်နှင်းအောင်ကို အမြန်ဆုံးပြန်လွှတ်ပေးရန် တောင်းဆို

အလုပ်သမားအဖွဲ့ချုပ် MICS ခေါင်းဆောင် ဦးသက်နှင်းအောင် အဖမ်းခံထားရကြောင်း အဖွဲ့ချုပ်တာဝန်ရှိသူတွေက အတည်ပြုလိုက်ပြီး အမြန်ဆုံး ပြန်လွှတ်ပေးဖို့ တောင်းဆိုလိုက်ပါတယ်။

မြန်မာနိုင်ငံစက်မှုလက်မှုနဲ့ ဝန်ဆောင်မှုလုပ်ငန်းပေါင်းစုံ အလုပ်သမားသဂ္ဂများအဖွဲ့ချုပ် MICS - TuSF ရဲ့ အထွေထွေ အတွင်းရေးမှူးချုပ် ဦးသက်နှင်းအောင်ကို စစ်ကောင်စီက ဖမ်းဆီးပြီး အင်းစိန်ထောင်မှာ ထိန်းသိမ်းထားတယ်လို့ အဖွဲ့ချုပ် အတွင်းရေးမှူး(၁)ဦးနေလင်းအောင်က ပြောပါတယ်။ 

ဦးသက်နှင်းအောင်ကို ပြန်လွှတ်ပေးဖို့ အလုပ်သမားအဖွဲ့ချုပ် MICS က ဩဂုတ်လ ၁၅ ရက်နေ့မှာ ကြေညာချက်ထုတ်ပြန်တောင်းဆိုထားတာပါ။

ဦးသက်နှင်းအောင်ဟာ စစ်အာဏာစသိမ်းတဲ့ ဖေဖော်ဝါရီလကတည်းက ထွက်ပြေးတိမ်းရှောင်နေရသူဖြစ်ပြီး အဖမ်းခံရတယ်ဆိုတာကို ဇူလိုင်လကုန်ပိုင်းက အတည်ပြုနိုင်ခဲ့တာဖြစ်ပါတယ်။

အလုပ်သမားသဂ္ဂများအဖွဲ့ချုပ် MICS - TuSF အတွင်းရေးမှူး (၁) ဦးနေလင်းအောင်က “မြဝတီမှာ အဖမ်းခံရပြီး စစ်ကြောရေးကနေ အင်းစိန်ထောင်ပို့ထားတယ်လို့သိရတယ်။ အခုထိတော့ အဆက်အသွယ်မရသေးဘူး” လို့ ပြောပါတယ်။

အဖမ်းမခံရခင် ဇွန်လအတွင်းမှာ ဦးသက်နှင်းအောင်ရဲ့အိမ်ကို ဝင်ရောက်ရှာဖွေခဲ့လို MICS-TuSF မန္တလေးရုံးနဲ့ ရန်ကုန်ရုံးတို့ကို စစ်ကောင်စီတပ်တွေက ဝင်ရောက်စီးနင်းခဲ့ပြီး ရုံးတွင်းစာရွက်၊ စာတမ်းတွေနဲ့ ကွန်ပြူတာပစ္စည်းတွေကို သိမ်းယူကာ ရုံးတွေကို စစ်ကောင်စီကသော့ခတ်သွားတယ်လို့ ဆိုပါတယ်။

ဦးနေလင်းအောင်က "ရှေ့နေကနေတဆင့် ကျနော်တို့တွေ့ခွင့်ရဖို့ကြိုးစားနေပါတယ်။ ဒါပေမယ့်တွေ့ခွင့်မရသေးဘူး။ ကျနော်တို့ကြားထားတာကတော့ ၅၀၅(ခ)၊ ၁၇(၁) တွေနဲ့ စွဲထားတယ်လို့ကြားရပါတယ်။ တိတိကျကျတော့မသိရသေးဘူး။ ကျနော် တို့လည်း မတွေ့ရသေးတဲ့အတွက် စုံစမ်းနေတုန်းပဲခင်ဗျ" လို့ ပြောပါတယ်။

MICS-TuSF ဟာ မြန်မာနိုင်ငံမှာ တရားဝင်ဖွဲ့စည်းခွင့်မှတ်ပုံတင်ရရှိထားတဲ့ အလုပ်သမားအဖွဲ့ချုပ် ၄ ခုထဲက တစ်ခုဖြစ်ပြီး စစ်အာဏာသိမ်းပြီးနောက် စစ်ကောင်စီနဲ့ပူးပေါင်းပြီး အလုပ်ရှင်၊ အလုပ်သမား၊ အစိုးရ သုံးပွင့်ဆိုင် ယန္တရားမှာ မပါဝင်တော့ဘူးလို့ ကြေညာခဲ့ပါတယ်။ 

ဦးသက်နှင်းအောင်ကို ဖမ်းဆီးတာဟာ အလုပ်သမားအဖွဲ့ချုပ် ၄ ခုထဲက ထိပ်တန်းခေါင်းဆောင်တစ်ယောက်ကို စစ်ကောင်စီက ပထမဆုံး ဖမ်းဆီးထိန်းသိမ်းခဲ့တာဖြစ်ပါတယ်။ 

4 months Ago
Up