အမျိုးသမီးဇာတ်ပို့အော်စကာဆု

February 11, 2020

အမျိုးသမီးဇာတ်ပို့အော်စကာဆုရ ဟောလိဝုဒ်ဒရာမာရုပ်ရှင် - Marriage Story (နမူနာ)

အခုနှစ်ရဲ့ အော်စကာဆုပေးပွဲ အခမ်းအနားမှာတော့ အကောင်းဆုံးအမျိုးသမီးဇာတ်ပို့ အော်စကာဆုကို ဟောလိဝုဒ်ရုပ်ရှင်-Marriage Story နဲ့ သရုပ်ဆောင်မင်းသမီး Laura Dern က ရရှိခဲ့ပါတယ်။ Comedy Drama အမျိုးအစား ရုပ်ရှင်ကားတကားဖြစ်တဲ့ ဒီကားကိုတော့ Noah Baumbach က ရိုက်ကူးပုံဖော်ပေးထားတာဖြစ်ပြီး Netflix ကနေ တင်ဆက်လိုက်တဲ့ ရုပ်ရှင်ကားတကား ဖြစ်ပါတယ်။ ဒီရုပ်ရှင်ထဲမှာတော့ သိပ်ချစ်ကြတဲ့ ယောက်ျားနဲ့ မိန်းမ ၂ ယောက်ရဲ့ အိမ်ထောင်ရေး မပြေလည်မှုတွေအကြောင်း၊ အိမ်ထောင်တခုဟာ အချစ်တခုတည်းနဲ့လည်း မပြည့်စုံဘူး ဆိုတာတွေကို မြင်တွေ့ကြရမှာပါ။ အိမ်ထောင်တခုမှာ ဦးဆောင်သူတယောက်အဖြစ် ရှိနေပြီး အရာရာ ကိုယ့်စိတ်တိုင်းကျ ခြယ်လှယ်တတ်တဲ့ ပြဇာတ်ဒါရိုက်တာ Charlie နဲ့ ထူးချွန်တဲ့ သရုပ်ဆောင်တဦးဖြစ်ပြီး အိမ်ထောင်ကျသွားချိန်မှာ ကိုယ့်ရဲ့ အိပ်မက်တွေကို မေ့ဖျောက်ပြီး အိမ်ထောင်ရှင်မတယောက်အဖြစ် မိသားစုအတွက် အချိန်တွေ ပေးနေရတဲ့ Nicole တို့ရဲ့ အားပြိုင်မှုတွေကို အိမ်ထောင်ရေးဒရာမာဇာတ်လမ်း အနေနဲ့ ရိုက်ကူးထားတာ ဖြစ်ပါတယ်။ ဒီကားထဲမှာတော့ ဟောလိဝုဒ်စတား သရုပ်ဆောင်တွေ ဖြစ်ကြတဲ့ Scarlett Johansson၊ Adam Driver တို့နဲ့အတူ Laura Dern ၊ Alan Alda ၊ Ray Liotta တို့ကလည်း ပါဝင်ထားကြပါတယ်။ လတ်တလောမှာတော့ Nicloe ဘက်က ရှေ့နေတယောက်ဖြစ်တဲ့ Nora အဖြစ် ပီပီပြင်ပြင် သရုပ်ဆောင်ခဲ့တဲ့ မင်းသမီး Laura Dern က အကောင်းဆုံးအမျိုးသမီးဇာတ်ပို့ အော်စကာဆုကို ဆွတ်ခူးရရှိခဲ့ပြီ ဖြစ်ပါတယ်။ Laura Dern ဟာ ဒီကားနဲ့ပဲ ရွှေကမ္ဘာလုံးဆုမှာလည်း အကောင်းဆုံးအမျိုးသမီးဇာတ်ပို့ ထူးချွန်ဆုကို ရရှိထားပါတယ်။ ကြာမြင့်ချိန် ၁၃၇ မိနစ်ရှိတဲ့ ဒီရုပ်ရှင်ကားကို ဗင်းနစ်ရုပ်ရှင်ပွဲတော်မှာ ကနဦး ပြသခဲ့ကတည်းက ချီးကျုးမှုတွေလည်း ရရှိထားပြီး နိုင်ငံတကာမှာတော့ ပြီးခဲ့တဲ့ နိုဝင်ဘာလ ကတည်းက ရုံတင်ပြသခဲ့တာ ဖြစ်ပါတယ်။

1 year Ago