အမေရိကန်အစိုးရ

March 21, 2022

မြန်မာစစ်တပ်က ရိုဟင်ဂျာလူမျိုးတုံးသတ်ဖြတ်မှု ကျူးလွန်ခဲ့ဟု အမေရိကန်အစိုးရ သတ်မှတ်

မြန်မာစစ်တပ်က ရိုဟင်ဂျာတွေအပေါ် ကျူးလွန်ခဲ့တဲ့ အကြမ်းဖက်မှုတွေဟာ လူမျိုးတုံးသတ်ဖြတ်မှုနဲ့ လူသားမျိုးနွယ်အပေါ် ကျူးလွန်တဲ့ ရာဇ၀တ်မှုတွေနဲ့ ဆက်စပ်နေတယ်လို့ သမ္မတဘိုင်ဒင်အစိုးရအဖွဲ့က တရားဝင်သတ်မှတ်ဆုံးဖြတ်ထားကြောင်း အမေရိကန်အရာရှိတွေက ရိုက်တာသတင်းဌာနကို ပြောပါတယ်။

လက်ရှိ ရိုဟင်ဂျာဒုက္ခသည်များဆိုင်ရာ ပြပွဲကို ပြသထားတဲ့ ဝါရှင်တန်ရှိ US Holocaust Memorial ပြတိုက်မှာ အမေရိကန်နိုင်ငံခြားရေးဝန်ကြီး အန်တိုနီ ဘလင်ကင်က  တနင်္လာနေ့ကျရင် ဒီဆုံးဖြတ်ချက်ကို   ကြေညာမှာလို့ အမေရိကန် တာဝန်ရှိသူတွေက ပြောပါတယ်။

ရိုဟင်ဂျာတွေပေါ် အကြမ်းဖက်မှုနဲ့ပတ်သက်ပြီး သမ္မတဘိုင်ဒင်က သူတက်လာပြီး ၁၄ လနီးပါးအကြာမှာ ပြန်လည်သုံးသပ်မှုအသစ် ပြုလုပ်မယ်လို့လည်း ကတိပြုခဲ့ပါတယ်။

ရိုဟင်ဂျာတွေအပေါ် ကျူးလွန်ခဲ့တဲ့ ရက်စက်ယုတ်မာမှုရဲ့ ပြင်းထန်မှုကို ခပ်မြန်မြန် အသိအမှတ်ပြုဖို့ ကြိုးပမ်းရာမှာ အမေရိကန်အရာရှိတွေနဲ့ ပြင်ပ ဥပဒေအကျိုးတော်ဆောင်တွေဟာ အထောက်အထားတွေကို စုဆောင်းခဲ့ပေမဲ့ အဲဒီတုန်းက နိုင်ငံခြားရေးဝန်ကြီး မိုက်ခ်ပွမ်ပီရို က ဆုံးဖြတ်ဖို့ ငြင်းဆိုခဲ့ပါတယ်။ 

သမ္မတဘိုင်ဒင်က သူ့ကိုယ်ပိုင် တရားဥပဒေနဲ့ ဖြစ်ရပ်မှန် ခွဲခြမ်းစိပ်ဖြာမှုအဖွဲ့ကို အမိန့်ပေးခဲ့တယ်လို့ အမည်မဖော်လိုတဲ့ အမေရိကန်အရာရှိတွေက Reuters ကို ပြောကြားခဲ့ပါတယ်။ 

သမ္မတဘိုင်ဒင် စေခိုင်းထားတဲ့  တရားဥပဒေနဲ့ ဖြစ်ရပ်မှန် ခွဲခြမ်းစိတ်ဖြာမှုအဖွဲ့ သုံးသပ်ချက်အဖွဲ့ကတော့ မြန်မာစစ်တပ်ဟာ လူမျိုးတုံးသတ်ဖြတ်မှု ကျူးလွန်နေကြောင်း ကောက်ချက်ချခဲ့ပြီး အခုလို တရားဝင်အခိုင်အမာ ဆုံးဖြတ်ခဲ့တဲ့အတွက်  စစ်အုပ်စုကို တာဝန်ခံမှုရှိစေဖို့အရေး နိုင်ငံတကာဖိအားတွေ တိုးမြင့်လာမယ်လို့ အမေရိကန် အစိုးရက ယုံကြည်ထားပါတယ်။

မြန်မာစစ်တပ်အတွက် နောက်ထပ် ချိုးဖောက်မှုတွေ ကျူးလွန်ဖို့ ခက်လိမ့်မယ်လို့ နိုင်ငံခြားရေးဌာန အကြီးတန်း အရာရှိတစ်ဦးက ပြောပါတယ်။

ဒါနဲ့ပတ်သက်ပြီး ဝါရှင်တန်ရှိ မြန်မာသံရုံးမှ တာဝန်ရှိသူတွေနဲ့ စစ်အုပ်စုရဲ့ ပြောရေးဆိုခွင့်ရှိသူတို့က မှတ်ချက်ပေးဖို့ တောင်းဆိုတဲ့ အီးမေးလ်တွေကို ချက်ချင်းတုံ့ပြန်ခြင်း မရှိပါဘူး။ 

မြန်မာနိုင်ငံမှာ နိုင်ငံသားဖြစ်ခွင့် ငြင်းပယ်ခံထားရတဲ့ ရိုဟင်ဂျာများအပေါ် လူမျိုးတုံးသတ်ဖြတ်မှု ကျူးလွန်ခဲ့တယ်ဆိုတဲ့ စွပ်စွဲချက်တွေအပေါ်  မြန်မာစစ်တပ်က ငြင်းဆိုထားပြီး ၂၀၁၇ ခုနှစ်က အကြမ်းဖက်သမားတွေကို နှိမ်နင်းဖို့  နယ်မြေရှင်းလင်းစစ်ဆင်ရေး ပြုလုပ်ခဲ့တာလို့ တုံ့ပြန်ထားပါတယ်။

အနာဂတ် တရားစွဲဆိုမှုတွေအတွက် သက်သေအထောက်အထားတွေ စုဆောင်းနေတဲ့ ဂျီနီဗာ အခြေစိုက် ကုလသမဂ္ဂအဖွဲ့ဖြစ်တဲ့ (IIMM) အတွက် နောက်ထပ် ရန်ပုံငွေ ဒေါ်လာ ၁ သန်းကိုလည်း အမေရိကန်က ကြေညာဖို့ရှိပါတယ်။

နောက်ထပ် ရက်စက်ကြမ်းကြုတ်မှုတွေကို တားဆီးကာကွယ်ဖို့နဲ့ အဲဒီသူတွေကို တာဝန်ခံဖို့ နိုင်ငံတကာရဲ့ ပံ့ပိုးကူညီမှုတွေ တည်ဆောက်ဖို့ ကြိုးစားနေတာကြောင့် ကနော်တို့ ရပ်တည်ချက်ကို မြှင့်တင်သွားမယ်လို့လည်း ပထမ အမေရိကန် အရာရှိက ပြောပါတယ်။

၂၀၁၇ ခုနှစ်က မြန်မာနဲ့ ဘင်္ဂလားဒေ့ရှ်နိုင်ငံကို သွားရောက်ခဲ့တဲ့ အမေရိကန် အထက်လွှတ်တော် နိုင်ငံခြားဆက်ဆံရေး ကော်မတီအဖွဲ့ဝင် အမေရိကန် အထက်လွှတ်တော်အမတ် ဂျက်ဖ်မာကလေက  ဒီလုပ်ရပ်ကို ကြိုဆိုခဲ့ပါတယ်။

ဒီဆုံးဖြတ်ချက်ဟာ ကြာနေပြီဆိုပေမဲ့ ဒီရက်စက်ကြမ်းကြုတ်တဲ့ အုပ်စုကို ထည့်သွင်းစဉ်းစားရာမှာ အားကောင်းပြီး အရေးပါတဲ့ ခြေလှမ်းတစ်ခုပါပဲလို့ Merkley က ထုတ်ပြန်ချက်မှာ ပြောထားပါတယ်။ 

5 months Ago

November 20, 2021

ဒန်နီဖှန်စတာ လွတ်မြောက်ရေး အမေရိကန်အစိုးရက အကူအညီတောင်းခဲ့ဟု ဆာဆာကာဝါပြော

အမေရိကန်အစိုးရဟာ မြန်မာစစ်တရားရုံးကနေ ထောင်ဒဏ် ၁၁ နှစ် ချမှတ်ခံထားရတဲ့ အမေရိကန်ဂျာနယ်လစ် လွတ်မြောက်ရေးကိုကူညီဖို့ အမျိုးသားပြန်လည်သင့်မြတ်ရေးဆိုင်ရာ ဂျပန်အထူးသံတမန် ဆာဆာကာဝါကို အကူအညီ တောင်းခံခဲ့တယ်လို့ အထူးကိုယ်စားလှယ်က ထုတ်ဖော်ပြောလိုက်ပါတယ်။ 

ပရဟိတ နိပွန်ဖောင်ဒေးရှင်း ရဲ့ ဥက္ကဋ္ဌ  ဆာဆာကာဝါက မြန်မာနိုင်ငံကို ပုဂ္ဂိုလ်ရေးအရ လာရောက်တဲ့ခရီးစဉ်နဲ့ပတ်သက်ပြီး ဂျပန်သတင်းစာနဲ့  တွေ့ဆုံမေးမြန်းရာမှာ ခုလိုထည့်သွင်းပြောကြားသွားတာပါ။ 

ရန်ကုန်လေဆိပ်မှာ မေလ ၂၄ ရက်က အဖမ်းခံထားရပြီး သတင်းမှားဖြန့်ဝေမှုအပြင် တခြားပြစ်မှုဆိုင်ရာစွဲချက်တွေနဲ့ ထောင်ဒဏ် ၁၁ နှစ် ချမှတ်ခံထားရတဲ့ Frontier Myanmar မဂ္ဂဇင်းရဲ့ အုပ်ချုပ်မှုအယ်ဒီတာ ဒန်နီဖှန်စတာကိစ္စမှာ စစ်တပ်နဲ့ ကြားဝင်ညှိနှိုင်းပေးဖို့ သူ့ကို အမေရိကန်အစိုးရကနေ တောင်းဆိုခဲ့ကြောင်း ပြောပါတယ်။

မြန်မာနိုင်ငံကို မကြာခဏ လာရောက်လည်ပတ်ခဲ့တဲ့ ဆာဆာကာဝါဟာ ပြီးခဲ့တဲ့ စနေနေ့က တပ်မတော် ကာကွယ်ရေး ဦးစီးချုပ် ဗိုလ်ချုပ်မှူးကြီး မင်းအောင်လှိုင်နဲ့ တွေ့ဆုံခဲ့အပြီး နှစ်ရက်အကြာမှာတော့ ခြောက်လနီးပါးအကျဉ်းကျခံခဲ့ရတဲ့ အမေရိကန်ဂျာနယ်လစ် ဖှန်စတာဟာ ပြန်လည် လွတ်မြောက်လာပြီးနောက် ကုလသမဂ္ဂဆိုင်ရာ သံအမတ်ဟောင်း ဘီလ်ရစ်ချတ်ဆန်နဲ့အတူ နိုင်ငံထဲကနေ လေကြောင်းနဲ့ ပြန်ထွက်ခွာသွားခဲ့ပါတယ်။ 

မြန်မာစစ်တပ်နဲ့ အဆက်အသွယ်ကောင်းတွေရှိပြီး ဆက်ဆံရေး အဆင်ပြေတဲ့ သူ့ကို အမေရိကန် အစိုးရက မတောင်းဆိုရသေးခင်ကတောင် သတင်းထောက်ကို လွှတ်ပေးဖို့ သူက တိုက်တွန်းထားသေးတယ်လို့ လည်း ဆာဆာကာဝါက ပြောပါတယ်။

စစ်ကောင်စီကတော့ နိုင်ငံအချင်းချင်း မိတ်ဝတ်မပျက်သော ဆက်ဆံရေးကို ရှေးရှုသောအားဖြင့်လည်းကောင်း၊ လူသားချင်း စာနာထောက်ထားမှုကို အလေးထားသောအားဖြင့်လည်းကောင်း အမေရိကန် ဂျာနယ်လစ် ဒန်နီဖှန်စတာကို ပြစ်ဒဏ်လွတ်ငြိမ်းသက်သာခွင့်ပြုကာ ပြည်နှင်ဒဏ်ပေးလိုက်တာလို့ သတင်းထုတ်ထားပါတယ်။

ဂျပန်-မြန်မာ ချစ်ကြည်ရေးအသင်း ဥက္ကဋ္ဌ ဝါတာနာဘေး၊ မြန်မာနိုင်ငံအမျိုးသား ပြန်လည်သင့်မြတ်ရေးဆိုင်ရာ အထူးကိုယ်စားလှယ်နှင့် နီပွန်ဖောင်ဒေးရှင်းဥက္ကဋ္ဌ ဆာဆာကာဝါနဲ့  အမေရိကန်နိုင်ငံ၊ နယူးမက္ကဆီကို ပြည်နယ်အုပ်ချုပ်ရေးမှူးဟောင်း ဘီလ်ရစ်ချတ်ဆန်တို့ရဲ့ မေတ္တာရပ်ခံချက်အရ ပြန်လွှတ်ပေးလိုက်တာလို့လည်း စစ်ကောင်စီက ဆိုပါတယ်။

ဆာဆာကာဝါဟာ အခုခရီးစဉ်အတွင်းမှာ အမျိုးသားဒီမိုကရေစီအဖွဲ့ချုပ်မှ အမှုဆောင်တစ်ဦးနဲ့ တွေ့ဆုံခဲ့ကြောင်းလည်း အင်တာဗျူးမှာ ထုတ်ဖော်ပြောကြားခဲ့ပေမဲ့ အမည်ကိုတော့ ပြောဆိုခြင်းမရှိခဲ့ပါဘူး။

9 months Ago
More News
Up