အမေရိကန်နိုင်ငံ

November 23, 2021

နိုင်ငံတကာ ဒုက္ခသည်များ၏ အမေရိကန်နိုင်ငံခရီးစဉ်များ ယာယီဆိုင်းငံ့ထား

အမေရိကန်နိုင်ငံကို ပြောင်းရွှေ့အခြေချမယ့် ဒုက္ခသည်တွေရဲ့ ခရီးသွားလာရေးအစီအစဉ်တွေကို လာမယ့် ၂၀၂၂ ခုနှစ် ဇန်နဝါရီလ ၁၁ ရက်နေ့ထိ ယာယီဆိုင်းငံ့ထားမယ်လို့ အမေရိကန်အခြေစိုက် CBS သတင်းမှာ ဖော်ပြထားပါတယ်။ 

အမေရိကန်နိုင်ငံက မိသားစုနဲ့ပြန်လည်ဆုံစည်းရေးအတွက် ခရီးသွားဖို့ ပြင်ဆင်ပြီးသား ဖြစ်နေသူတွေ၊ ကျန်းမာရေးနဲ့ လုံခြုံရေး စစ်ဆေးချက်တွေအရ အရေးတကြီး ရွှေ့ပြောင်းရမယ့်သူတွေကလွဲရင် နိုင်ငံပေါင်းစုံက ပြောင်းရွှေ့အခြေချမယ့် ဒုက္ခသည်တွေရဲ့ ခရီးစဉ်တွေကို ဆိုင်းငံ့ထားပြီး  အမေရိကန်မြေပေါ် ရောက်နေပြီဖြစ်တဲ့ အာဖဂန် ထွက်ပြေးလွတ်မြောက်လာသူတွေအတွက် ပြန်လည်နေရာချထားရေးကို ဦးစားပေးစီစဉ်မယ်လို့ အမေရိကန် နိုင်ငံခြားရေးဌာနကို ကိုးကားပြီး CBS သတင်းမှာ ဖော်ပြထားပါတယ်။

ပြီးခဲ့တဲ့ သြဂုတ်လအတွင်း အာဖဂန်နစ္စတန်မြို့တော် ကဘူးလ်ကို တာလီဘန်တွေ ထိန်းချုပ်စဉ်ကတည်းက အမေရိကန်စစ်တပ်နဲ့ ပူးပေါင်းဆောင်ရွက်ခဲ့သူတွေကို အရေးပေါ်ကယ်တင်ခဲ့ရပြီး အာဖဂန်နိုင်ငံသား ၇၃,၀၀၀ လောက် အမေရိကန်နိုင်ငံမှာ ရောက်ရှိခဲ့ပြီးဖြစ်ပါတယ်။

အမေရိကန်စစ်တပ်အခြေစိုက်ရာ နေရာ ၈ ခုမှာ ယာယီခိုလှုံဖို့ စီစဉ်ပေးထားရတဲ့ အာဖဂန် ၄၅၀၀၀ လောက်ထဲက  ပြန်လည်နေရာချထားရေး ပရဟိတ အဖွဲ့အစည်းတွေအကူအညီနဲ့ လူဦးရေ ၂၅၀၀၀ လောက်ထိ အမေရိကန်ပြည်နယ်အနှံ့အပြားမှာ အိမ်နေရာနဲ့ အလုပ်အကိုင်တွေ စီစဉ်ပေးခဲ့တယ်လို့ သတင်းမှာ ဖော်ပြထားပါတယ်။ ​

အမေရိကန်နိုင်ငံ အနှံ့အပြားမှာရှိတဲ့ ပြန်လည်နေရာချထားရေး အေဂျင်စီ ၉ ခုဟာ ဒုက္ခသည်အရေးကို ဦးစားမပေးခဲ့တဲ့ သမ္မတ ထရမ့်လက်ထက်ကတည်းက ဝန်ထမ်းအင်အား လျှော့ချရတာတွေ၊ ရုံးခန်းတချို့ ပိတ်သိမ်းခဲ့ရတာတွေကြောင့်လည်း အလုံးအရင်းနဲ့ရောက်ရှိလာတဲ့ အာဖဂန် ထွက်ပြေးလွတ်မြောက်သူတွေအတွက် စီမံခန့်ခွဲမူ အကျပ်အတည်းတွေ ရင်ဆိုင်နေကြရပါတယ်။ 

အခုလို နိုင်ငံပေါင်းစုံကနေ အမေရိကန်နိုင်ငံကို ရွှေ့ပြောင်းအခြေစိုက်မယ့် ဒုက္ခသည်တွေရဲ့ ခရီးသွားလာရေး အစီအစဉ်တွေကို ယာယီဆိုင်းငံ့ထားဖို့ ပြန်လည်နေရာချထားရေး  ပရဟိတအေဂျင်စီတွေက မေတ္တာရပ်ခံမှုတွေရှိတယ်လို့ CBS သတင်းမှာ ဖော်ပြထားပါတယ်။   

ပြီးခဲ့တဲ့ ၂၀၂၁ ဘဏ္ဍာရေးနှစ်အတွင်း အမေရိကန်နိုင်ငံမှာ နိုင်ငံတကာဒုက္ခသည် ၁၁,၄၁၁ ယောက်သာ ပြောင်းရွှေ့အခြေချခွင့်ပြုခဲ့ပြီး သမ္မတဘိုင်ဒန်ကတော့ လာမယ့် ၂၀၂၂ ဘဏ္ဍာရေးနှစ်အတွင်းမှာ နိုင်ငံတကာ ဒုက္ခသည် တစ်သိန်း နှစ်သောင်းခွဲ (၁၂၅,၀၀၀) ထိ တိုးမြှင့်လက်ခံသွားမယ်လို့ ကတိပြုထားပါတယ်။

1 year Ago

December 20, 2020

မိုဒါနာထုတ်ကိုဗစ်ကာကွယ်ဆေးများ အမေရိကန်နိုင်ငံအတွင်း စတင်ဖြန့်ချိ

အမေရိကန် စားနပ်ရိက္ခာနဲ့ ဆေးဝါးစည်းကြပ်ရေးဌာန FDA က အရေးပေါ်သုံးဖို့ ခွင့်ပြုချက် ပေးလိုက်တဲ့ မိုဒါနာ ကိုဗစ်-၁၉ ကပ်ရောဂါ ကာကွယ်ဆေးတွေကို ကုန်ကားတွေနဲ့ ဒီနေ့ စတင် ဖြန့်ဝေနေပြီလို့ သိရပါတယ်။ အမေရိကန် နိုင်ငံအတွင်း နေရာ ၃၇၀၀ ကျော်ကို ဖြန့်ပေးဖို့ မျှော်လင့်ထားတယ်လို့ အမေရိကန် စစ်တပ် ဗိုလ်ချုပ်ကြီး ဂုစတာဗီပါနာက သတင်းစာရှင်းလင်းပွဲမှာ ပြောပါတယ်။  “တနင်္လာအစောပိုင်းမှာ ကျန်းမာရေးစောင့်ရှောက်မှုဌာနတွေဆီ ကာကွယ်ဆေးတွေ ရောက်လိမ့်မယ်၊ မိုဒါနာနဲ့ ဖိုက်ဇာကော်ပိုရေးရှင်းတွေက ထုတ်တဲ့ ကာကွယ်ဆေး ထိုးဆေး သန်း ၂၀ ကို ပို့ရတာ ဇန်နဝါရီ ပထမအပတ်အထိ အချိန်ယူရ နိုင်တယ်” လို့ ပါနာက ဆက်ပြောပါတယ်။  သယ်ယူပို့ဆောင်ရေး ကုမ္ပဏီတွေဖြစ်တဲ့ UPS နဲ့ Fed Ex တို့ဟာ ကာကွယ်ဆေးတွေကို တခြား ပွဲတော်စာ လက်ဆောင်ထုပ်တွေအစား ထိပ်တန်း ဦးစားပေးတွေအနေနဲ့ လေယာဉ်တွေ၊ ကုန်ကားတွေနဲ့ သယ်ပို့ နေကြပါပြီ။  မိုဒါနာကာကွယ်ဆေးဟာ ဖိုက်ဇာနဲ့ မတူဘဲ အမှာစာ ထိုးဆေး အလုံး ၁၀၀ အထိ ပမာဏ နည်းနည်းကို မှာယူနိုင်ပြီး ပုံမှန် ရေခဲသေတ္တာထဲမှာ ရက် ၃၀ ထားနိုင်ပါတယ်။  ဖိုက်ဇာကတော့ ကာကွယ်ဆေး ထိုးဆေး ၉၇၅လုံးကို ရေခဲမှတ် အောက် အနုတ် ၇၀ ဒီဂရီ စဲလ်စီးယပ်စ်မှာထားပြီး သယ်ဖို့ လိုအပ်ပါတယ်။  ပုံမှန်ရေခဲသေတ္တာထဲမှာ ငါးရက်သာ သိမ်းနိုင်ပါတယ်။ ကာကွယ်ဆေးတွေ ပြည်သူ့လက်ထဲ တောင်းဆိုသလောက် ရောက်ဖို့ အချိန် လချီယူရဦးမှာပါ။  ထင်မြင်ချက် စစ်တမ်းတွေအရ အမေရိကန် ပြည်သူအများအပြားက ကာကွယ်ဆေး အထိုးခံဖို့ တွန့်ဆုတ်နေကြတယ်လို့ သိရပါတယ်။  လောလောဆယ် အမေရိကန်မှာ နေ့စဉ် ဗိုင်းရပ်စ် ကူးစက်ခံ သေဆုံးသူ ဦးရေ ပျမ်းမျှ အယောက် ၃ ထောင်လောက် ရှိနေပြီး ကူးစက်ခံ သေဆုံးသူ စုစုပေါင်း ၃ သိန်း ၁ သောင်း ၃ ထောင် ကျော်နေပြီလို့ ရိုက်တာသတင်းမှာ ဖော်ပြထားပါတယ်။  
2 years Ago
More News
Up