အမုန်းစကား

January 23, 2021

အမုန်းစကားများ ရပ်တန့်ရေး လှုပ်ရှားမှု ရခိုင်တပြည်နယ်လုံးတွင် ပြုလုပ်

အမုန်းစကားတွေ ရပ်တန့်ဖို့ လှုပ်ရှားမှုတခုကို ရခိုင်ပြည်နယ် အမျိုးသမီးကွန်ရက်က ဒီနေ့ တပြည်နယ်လုံးမှာ ပြုလုပ်ခဲ့ပါတယ်။

မြို့နယ်အလိုက် ပိုစတာတွေချိတ်ဆွဲတာ၊ လက်ကမ်းစာစောင်တွေ ဝေငှတာတွေကို လုပ်ခဲ့ကြတာပါ။

သံတွဲမြို့နယ်ရဲ့ လှုပ်ရှားမှုမှာပါဝင်သူ မနေနေထွန်းက “ကျမတို့ထဲမှာ လူမျိုး ဘာသာပေါင်းစုံပါတယ်။ တမြို့နယ်လုံးအတွက် လမ်းကြောင်း ၅ ခုခွဲပြီး တကြောင်းမှာ လူ ၈ ယောက်စီ ပါပါတယ်။ လက်ကမ်းစာစောင်တွေ၊ Mask တွေ ဝေတယ်။ ကျမတို့ ထုတ်ထားတဲ့ ဘက်စုံသုံး ဆပ်ပြာဆီတွေလည်းဝေပေးတယ်” လို့ ပြောပါတယ်။

လူမျိုးရေးကို အခြေခံတဲ့ အမုန်းစကားတွေ ချက်ချင်းရပ်၊ ကိုးကွယ်ယုံကြည်မှုကို အခြေခံတဲ့ အမုန်းစကားတွေ ချက်ချင်းရပ်၊ မွေးဖွားရာ၊ နေထိုင်ရာ အရပ်ဒေသခံကို အခြေခံတဲ့ အမုန်းစကားတွေ ချက်ချင်းရပ်၊ လိင်ကွဲပြားမှုကို အခြေခံတဲ့ အမုန်းစကားတွေ ချက်ချင်းရပ်၊ လူအချင်းချင်း ကွဲပြားခြားနားစေတဲ့ အခြေခံတဲ့ အမုန်းစကားတွေ ချက်ချင်းရပ် ဆိုတဲ့ ပိုစတာတွေကို နယ်အနှံလိုက်လံချိတ်ဆွဲပြီး လက်ကမ်းစာစောင်တွေလည်း ဝေငှခဲ့ကြတာပါ။

ဇန်နဝါရီ ၁၆ ရက်မှာကတည်းက ပြုလုပ်ဖို့ စီစဉ်ခဲ့ပေမယ့် ကိုဗစ်ဆိုင်ရာ အကန့်အသတ်တွေကြောင့် တချို့မြို့နယ်တွေမှာပဲ လုပ်ဖြစ်ခဲ့ပြီး ဒီနေ့မှာတော့ အားလုံး တပြိုင်တည်း ပြန်လုပ်ကြတာလို့ သံတွဲမြို့နယ် အမျိုးသမီးကွန်ရက်ဝင် မအေးအေးဝင်းက ပြောပါတယ်။

တောင်ကုတ်မြို့နယ် အမျိုးသမီးကွန်ရက် တာဝန်ခံ ဒေါ်ချိုချိုပြုံးက တောင်ကုတ်မှာ ဇန်နဝါရီ ၁၆ ရက်က မြို့ပေါ်နဲ့ အနီးဝန်းကျင်ကို အဖွဲ့ ၅ ခုနဲ့ လှုပ်ရှားမှု လုပ်ခဲ့ပြီး ဒီနေ့မှာလည်း မြို့နဲ့ ဝေးတဲ့ ရွာတွေဆီကို တဖွဲ့ဆင်းနေတယ်လို့ ပြောပါတယ်။

ရခိုင်ပြည်နယ် အမျိုးသမီးကွန်ရက်ကို မြို့နယ်၊ ခရိုင်တာဝန်ခံတွေနဲ့ ဖွဲ့စည်းချိတ်ဆက်ထားတာ ဖြစ်ပါတယ်။

12 months Ago

November 22, 2020

ဖေ့စ်ဘွတ်ခ်နှင့်အင်စတာဂရမ်ပေါ်က အမုန်းစကားအကြောင်းအရာ သိန်း ၂၈၀ ကျော်ကို ဖယ်ရှားခဲ့

ဖေ့စ်ဘွတ်ခ်နဲ့ အင်စတာဂရမ်ပေါ်က အမုန်းစကားအကြောင်းအရာပေါင်း သိန်း ၂၈၀ ကျော်ကို အခု တတိယ ၃ လပတ်မှာ ဖယ်ရှားခဲ့ပြီး မူဝါဒချိုးဖောက်တာတွေ၊ အမုန်းစကားတွေဟာ အရင်ကာလထက် သိသိသာသာ ပိုများလာတယ်လို့ ဖေ့စ်ဘွတ်ခ်က အစီရင်ခံ ထုတ်ပြန်ပါတယ်။ မနေ့က ထုတ်ပြန်တဲ့ ၂၀၂၀ ပြည့်နှစ် တတိယ ၃ လပတ်ရဲ့ လူမှုစံနှုန်း စည်းကြပ်မှု အစီရင်ခံစာမှာ ဖော်ပြထားတာဖြစ်ပြီး အမုန်းစကားတွေရဲ့ ၉၅ ရာခိုင်နှုန်းကို အသုံးပြုသူတွေ မတိုင်ကြားခင်မှာပဲ ကြိုတင်စစ်ဆေးတွေ့ရှိခဲ့တယ်လို့ ဆိုပါတယ်။ ဒီကာလမှာ အမုန်းစကား အကြောင်းအရာပေါင်း ၂၂၁ သိန်းကျော်ကို ဖယ်ရှား အရေးယူနိုင်ခဲ့ပြီး အကြမ်းဖက်မှုနဲ့ အများပြည်သူ ကြည့်ရှုဖို့ မသင့်တော်တဲ့ ရုပ်ပုံတွေပါဝင်တဲ့ အကြောင်းအရာပေါင်း ၁၉၂ သိန်းကျော်ကို အရေးယူနိုင်ခဲ့ပါတယ်။ ဒုတိယ ၃ လပတ်မှာ ဒီအကြောင်းအရာက သိန်း ၁၅၀ ပဲ ရှိခဲ့ပါတယ်။ ကလေးသူငယ် အဖော်အချွတ်နဲ့ လိင်ပိုင်းဆိုင်ရာ အပြုအမူကို ချိုးဖောက်တဲ့ အကြောင်းအရာပေါင်း ၁၂၄ သိန်းကျော်ကို အရေးယူခဲ့ပြီး ဒါကလည်း  ဒုတိယ ၃ လပတ်တုန်းက ၉၅ သိန်းပဲ ရှိခဲ့တာပါ။ အနိုင်ကျင့်တာနဲ့ ထိပါးနှောင့်ယှက်တဲ့ အကြောင်းအရာပေါင်း ၃၅ သိန်းကို ဖယ်ရှား အရေးယူခဲ့ပြီး ဒါကတော့ ဒုတိယ ၃ လပတ်ထက် ၁၁ သိန်းပိုလာခဲ့ပါတယ်။ အင်စတာဂရမ်မှာလည်း အခုကာလမှာ အမုန်းစကားတွေက ၂ ဆကျော်တိုးလာခဲ့ပါတယ်။ ဒုတိယ ၃  လပတ်မှာ ၃၂ သိန်းရှိရာကနေ အခုတော့ ၆၅ သိန်းဖြစ်လာပြီး အကြမ်းဖက်မှုနဲ့ အများပြည်သူ ကြည့်ရှုဖို့ မသင့်တော်တဲ့ ရုပ်ပုံတွေပါဝင်တဲ့ အကြောင်းအရာပေါင်းကတော့ အရင်က ၃၁ သိန်းကနေ အခု ၄၁ သိန်းကို အရေးယူနိုင်ခဲ့ပါတယ်။ ကလေးသူငယ် အဖော်အချွတ်နဲ့ လိင်ပိုင်းဆိုင်ရာ အပြုအမူကို ချိုးဖောက်တဲ့ အကြောင်းအရာ ပေါင်းကလည်း ၂ ဆကျော်တိုးလာပြီး အရင်က ၄ သိန်း ၈ သောင်းကျော်ကနေ အခု ၁၀ သိန်း ဖြစ်လာပါတယ်။ အနိုင်ကျင့်တာနဲ့ ထိပါးနှောင့်ယှက်တဲ့ အကြောင်းအရာပေါင်း ၂၆ သိန်းကို ဖယ်ရှား အရေးယူခဲ့ပြီး ဒါကတော့ ဒုတိယ ၃ လပတ်ထက် ၃ သိန်းပိုလာခဲ့ပါတယ်။ သေကြောင်းကြံစည်တာနဲ့ မိမိကိုယ်ကို အနာတရဖြစ်စေတာနဲ့ပတ်သက်တဲ့ အကြောင်းအရာပေါင်း ၁၃ ဒါက အရင်ထက် ၁၀ သိန်းတိုးလာတာပါ။ အင်စတာဂရမ်ရဲ့ အမုန်းစကားတွေကို ကြိုတင်ရှာဖွေနိုင်မှုနှုန်း တိုးတက်လာရတဲ့ အချက်ကတော့ အင်္ဂလိပ်၊ အာရဗစ်၊ စပိန် ဘာသာစကားတွေနဲ့ ကြိုတင်စစ်ဆေးတာမှာ ပိုပြီး ကောင်းမွန် လာတာကြောင့်နဲ့ အလိုအလျောက် စစ်ဆေးနိုင်တဲ့ နည်းပညာကို အဆင့်မြှင့်တင် ပေးနိုင်တာကြောင့် ဖြစ်တယ်လို့ ဆိုပါတယ်။ ဒီအချက်အလက်တွေဟာ ၂၀၂၀ ပြည့်နှစ် ဇွန်လကနေ စက်တင်ဘာလအတွင်း ရလဒ်တွေဖြစ်ပြီး ဖေ့စ်ဘွတ်ခ်ရဲ့ မူဝါဒ ၁၂ ခု၊ အင်စတာဂရမ်ရဲ့ မူဝါဒ ၁၀ ခု နဲ့ တိုင်းတာခဲ့တာပါ။ နိုင်ငံတကာ ကျွမ်းကျင်သူတွေ အပါအဝင် သက်ဆိုင်ရာ နယ်ပယ်အသီးသီးမှာရှိတဲ့ လူတွေ အများကြီးဆီကနေရတဲ့ မှတ်ချက်တွေအရ လူမျိုး၊ လူမျိုးစု၊ ဇာတိမွေးရပ်၊ ဘာသာရေးနှီးနွှယ်မှု၊ လိင်စိတ်တိမ်းညွတ်မှု၊ ဇာတ်ခွဲခြားမှု၊ လိင်၊ ကျား/မ၊ ကျား/မ ခံယူမှု၊ ပြင်းထန်တဲ့ရောဂါ ဒါမှမဟုတ် မသန်စွမ်းဖြစ်မှု ဆိုပြီး ကာကွယ်ပေးဖို့ သတ်မှတ်ထားတဲ့ ဝိသေသလက္ခဏာတွေကို အခြေခံပြီး တိုက်ရိုက် တိုက်ခိုက်တာမှန်သမျှကို အမုန်းစကားအနေနဲ့ သတ်မှတ်တယ်လို့ ဖေ့စ်ဘွတ်ခ်က ဆိုပါတယ်။
1 year Ago
Up