အမိုးအကာ

August 14, 2021

ကြူကုတ်မြို့က စစ်ရှောင်များ အမိုးအကာ မလုံခြုံ၊ ရေဘေးအန္တရာယ် စိုးရိမ်ရ

ရှမ်းပြည်နယ်မြောက်ပိုင်း၊ မူဆယ်ခရိုင်၊ ကြူကုတ် (ပန်ဆိုင်း)မြို့ အနီးတဝိုက်ရှိရွာတွေက စစ်ရှောင် ပြည်သူတွေ အမိုးအကာ မလုံခြုံဖြစ်နေကြပြီး ရေဘေးအန္တရာယ်လည်း စိုးရိမ်နေကြရတယ်လို့ သိရပါတယ်။

စစ်ကောင်စီနဲ့ မြန်မာအမျိုးသား ဒီမိုကရက်တစ် မဟာမိတ်တပ်မတော် (MNDAA) တို့ တိုက်ပွဲဖြစ်ပွားခဲ့တာကြောင့် တရုတ်နယ်စပ်တလျှောက် ဖြစ်သလို တိမ်းရှောင်နေရတဲ့ ပြည်သူတွေဟာ ဖြစ်သလိုတဲထိုး နေထိုင်နေကြရတယ်လို့ စစ်ရှောင်ပြည်သူတစ်ဦးက ပြောပါတယ်။

"ခိုလှုံဖို့ မိုးလုံတဲ့နေရာ အရမ်းလိုနေတယ်။ အစားအသောက်တွေလည်း လိုအပ်နေတယ်။ ကျန်းမာရေးလည်း လိုတော့ လိုအပ်တယ်။ ဒါပေမယ့် တဲက ပိုလိုတယ်။ ခုချိန်က ရေချောင်းနားမှာဆိုတော့ ရေပြန်ကြီးလာတယ်။ တဲထိုးနေသူတွေက ဝမ်တိန်ချောင်း ဘေးနား၊ Camp အဟောင်း အပေါ်နားလေးမှာ။ ခါ့လျန်က Camp အောက်နားမှာ။ ရေက တဲထိုးပြီးနေရတဲ့ နေရာမှာ ပိုစိုးရိမ်ရတယ်။"

ဝမ်တိန် ချောင်းစပ်နား မိုးကာပဲမိုးထားပြီး တဲထိုး နေထိုင်ရသူတွေဟာ အရင် Camp အဟောင်းမှာ နာမည်စာရင်း မရှိသူတွေ ဖြစ်ပါတယ်။

အခက်အခဲကြုံနေကြတဲ့ စစ်ဘေးရှောင်တွေဟာ ကောင်းစထီးရွာနဲ့ အခြားရွာတွေအပါအဝင် စုစုပေါင်း လူဦးရေ ၅၀ ကျော်ရှိတယ်လို့ သိရပါတယ်။

စစ်ဘေးရှောင်လာတာ ဩဂုတ်လ ၁၃ ရက်နေ့အထိ ၁၀ ရက် ကြာပြီဖြစ်ပေမယ့် လက်ရှိ အခြေအနေက ရွာနားမှာ MNDAA တွေနဲ့ ပန်ဆိုင်း လမ်းဘက်မှာတော့ စစ်ကောင်စီတပ်တွေ နေတာကြောင့် အချိန်မရွေး တိုက်ပွဲထပ်ဖြစ်လာနိုင်တာကြောင့် မပြန်ရဲကြဘူးလို့ စစ်ဘေးရှောင်တဦးက ပြောပါတယ်။

"သူတို့ နှစ်ဘက်စလုံးက ချောင်းမြောင်းတိုက်ခိုက်ဖို့ ပြင်နေတယ်။ ခုလည်း သိမ်မသေချာသေးဘူး။ ပုန်းပြီး ချောင်းမြောင်း စောင့်ဆိုင်းနေကြလို့။ တိုက်ပွဲက ၈ ရက်နေ့ ပန်ဆိုင်းနားမှာ နောက်ဆုံးဖြစ်သွားတယ်။ လက်ရှိ နှစ်ဖက် အခြေအနေတင်းမာနေတယ်။"

ဩဂုတ် ၄ ရက်နေ့ကစ စစ်ကောင်စီတပ်နဲ့ MNDAA တို့ တိုက်ပွဲပြင်းထန်လာခဲ့တာကြောင့် ပန်ဆိုင်းမြို့နဲ့ အနီးတဝိုက်မှာရှိတဲ့ ကောင်စထီး၊ ဖိုင်ကောင်း၊ ကောင်ရာ၊ ခါ့လျန်၊ မန်ဂျေ၊ နမ့်ဟူး၊ ကောင်းဝိုင်၊ ရေပူစမ်း စတဲ့ရွာတွေထဲက အိမ်ခြေ ၂၆၇၊ လူဦးရေ ၁၃၃၆ ဦး ဘေးလွတ်ရာ တိမ်း ရှောင်နေကြရတယ်လို့ သိရပါတယ်။

4 months Ago
Up