အမည်ပျက်စာရင်းသွင်း

November 4, 2021

စစ်ကောင်စီခန့် တက္ကသိုလ်ပါချုပ်၊ ဒုပါချုပ်များအပါအဝင် ၁၇၈ ဦးကို အမည်ပျက်စာရင်းသွင်း

ပညာရေးဝန်ကြီးဌာနမှ တက္ကသိုလ် ပါမောက္ခချုပ်၊ ဒုတိယ ပါမောက္ခချုပ်တွေအပါအဝင် ဝန်ထမ်းအကြီးအကဲ ၁၇၈ ယောက်ကို နိုင်ငံ့သစ္စာဖောက်အဖြစ် အမည်ပျက်စာရင်းသွင်းပြီး ဝန်ထမ်းအဖြစ်မှ ထုတ်ပယ်လိုက်ကြောင်း  အမျိုးသားညီညွတ်ရေးအစိုးရ (NUG) က နိုဝင်ဘာ ၄ ရက် ရက်စွဲနဲ့  ကြေညာပါတယ်။

အဆိုပါထုတ်ပြန်ချက်ကိုတော့ ပညာရေးဝန်ကြီးဌာန၊ ပြည်ထောင်စုဝန်ကြီး ဒေါက်တာ ဇော်ဝေစိုးက လက်မှတ်ရေးထိုး ထုတ်ပြန်လိုက်တာဖြစ်ပါတယ်။

အကြမ်းဖက်စစ်ကောင်စီနဲ့ ပူးပေါင်းပြီး ဆရာ၊ ဆရာမတွေ၊ ဝန်ထမ်းတွေကို နေအိမ်တွေကနေ ဖယ်ရှားတာ၊ ပြန်လည်ပေးဆပ်ဖို့ မလိုတော့တဲ့ ချေးငွေတွေကို ပေးဆပ်ဖို့ စစ်အာဏာရှင်အလိုကျ ဖိနှိပ် ခြိမ်းခြောက်နေတဲ့ ဖော်ပြပါ ပညာရေးဝန်ထမ်းတွေကို နိုင်ငံ့ဝန်ထမ်းဉပ‌ဒေပုဒ်မ ၄၁ အရ မူလရာထူးတာဝန်တွေကနေ ထုတ်ပယ်ပြီး နိုင်ငံ့သစ္စာဖောက်အဖြစ် အမည်ပျက်စာရင်း သွင်းလိုက်တယ်လို့ ကြေညာထားတာပါ။

ဒါ့အပြင် လက်ရှိဖော်ပြထားတဲ့ ရာထူးနေရာတွေဟာ အမျိုးသားညီညွတ်ရေးအစိုးရ၊  ပညာရေးဝန်ကြီးဌာနက အသိအမှတ်မပြုထားပဲ စစ်ကောင်စီကပေးတဲ့ ရာထူးတွေသာ ဖြစ် ကြောင်းနဲ့ မတရားအာဏာသိမ်းမှုနောက်ပိုင်း ထုတ်ယူထားတဲ့ ပြည်သူ့ဘဏ္ဍာ၊ လစာ၊ အာဏာအလွဲသုံးစားပြုမှုတွေကို တာဝန်ယူ၊ တာဝန်ခံရမှာဖြစ်ကာ ဉပဒေအရ ပေးအပ်တဲ့ ပြစ်ဒဏ်တွေလည်း ကျခံရမှာဖြစ်တယ်လို့ ဖော်ပြပါတယ်။

အမည်ပျက်စာရင်းသွင်းလိုက်တဲ့ ဝန်ထမ်းတွေထဲမှာတော့ အဆင့်မြင့်ပညာဦးစီးဌာန၊ ဆေးတက္ကသိုလ်၊ သွားဘက်ဆိုင်ရာ ဆေးတက္ကသိုလ်၊ နည်းပညာတက္ကသိုလ်၊ ကွန်ပြူတာ တက္ကသိုလ်၊ နိုင်ငံခြားဘာသာတက္ကသိုလ်စတဲ့ နိုင်ငံတဝန်း တက္ကသိုလ်တွေ၊ ကျောင်းတွေ၊ ဌာနတွေ အသီးသီးက ဒုညွှန်ကြားရေးမှူးချုပ်၊ တက္ကသိုလ် ပါမောက္ခချုပ်၊ ဒုပါမောက္ခချုပ်၊ ကျောင်းအုပ်ကြီးတွေအပါအဝင် ဝန်ထမ်းအကြီးအကဲတွေ ပါဝင်နေတာ ဖြစ်ပါတယ်။

မြန်မာနိုင်ငံမှာ ဖေဖော်ဝါရီ ၁ ရက်က စတင်ကာ အကြမ်းဖက်စစ်ကောင်စီက နိုင်ငံတော် အာဏာကို သိမ်းယူခဲ့တဲ့ ကာလဟာ ၉ လကျော် ကြာမြင့်ခဲ့ပြီ ဖြစ်ပါတယ်။

ဒီကာလတွေအတွင်း နိုင်ငံတဝန်း စစ်အာဏာရှင်ဆန့်ကျင်ရေး ဆန္ဒပြပွဲတွေမှာ ပြည်သူတွေ မြို့ရွာအနှံ့ ပါဝင်နေခဲ့ကြပြီး စစ်တပ်နဲ့ ရဲတပ်ဖွဲ့ဝင်တွေက အကြမ်းဖက် ပစ်ခတ်နှိမ် နင်းမှုတွေနဲ့ ကျဆုံးမှုတွေ၊ ဖမ်းဆီးထိန်းသိမ်း တရားစွဲဆိုခံရတာတွေနဲ့အတူ အခြေအနေတွေ ပိုမိုတင်းမာလာနေခဲ့တာ ဖြစ်ပါတယ်။

နိုင်ငံရေးအကျဉ်းသားများ ကူညီစောင့်ရှောက်ရေးအသင်း(အေအေပီပီ)ရဲ့ ထုတ်ပြန်ချက်အ ရ လက်ရှိအချိန်ထိ အကြမ်းဖက်စစ်တပ်က ပစ်ခတ်သတ်ဖြတ်မှုကြောင့် အပြစ်မဲ့ ကျဆုံး ပြည်သူ ၁,၂၃၀ ကျော်နဲ့ မတရားဖမ်းဆီးထိန်းသိမ်းခံရသူပေါင်း ၉,၆၀၀ ကျော်ထိ ရှိခဲ့ပြီလို့ သိရပါတယ်။

3 months Ago

October 26, 2021

စီးပွားကူးသန်း ဒုညွှန်ချုပ်၊ ညွှန်မှူးအယောက် ၃၀ ကို NUG အမည်ပျက်စာရင်းသွင်း ထုတ်ပယ်

အမျိုးသားညီညွတ်ရေးအစိုးရ(NUG)က စီးပွား‌ရေးနှင့် ကူးသန်းရောင်းဝယ်ရေးဝန်ကြီး ဌာ နမှ ဒုတိယညွှန်ကြားရေးမှူးချုပ်၊ ညွှန်ကြားရေးမှူးတွေအပါအဝင် ဝန်ထမ်းအကြီးအကဲ အယောက် ၃၀ ယောက်ကို အမည်ပျက်စာရင်းသွင်းပြီး ဝန်ထမ်းအဖြစ်မှ ထုတ်ပယ်လိုက်ကြောင်း ကြေညာလိုက်ပါတယ်။

အောက်တိုဘာ ၂၅ ရက် ရက်စွဲနဲ့ အဆိုပါထုတ်ပြန်ချက်ကိုတော့ စီးပွား‌ရေးနှင့်ကူးသန်း ရောင်းဝယ်ရေးဝန်ကြီးဌာန၊ ပြည်ထောင်စုဝန်ကြီး ဒေါ်ခင်မမမျိုးက လက်မှတ်ရေးထိုး ထုတ်ပြန်လိုက်တာဖြစ်ပြီး ဝန်ကြီးဌာနအနေနဲ့ မတရားတဲ့ အမိန့်အာဏာဖီဆန်ရေး လှုပ် ရှားမှု(CDM)ပြုလုပ်နေကြတဲ့ နိုင်ငံ့ဝန်ထမ်း သူရဲကောင်းတွေရဲ့ လူမှုဖူလုံရေး၊ လုံခြုံဘေး ကင်းရေးနဲ့ ဖိအားကင်းစင်စေရေးတို့အတွက် အလေးထားဆောင်ရွက်နေတယ်လို့ ဖော်ပြ ထားပါတယ်။

ဒါကြောင့်မို့ တရားမဝင်အာဏာသိမ်းစစ်ကောင်စီလက်အောက်မှာ ဆက်လက်တာဝန် ထမ်းဆောင်နေပြီး CDM ဝန်ထမ်းတွေကို ဖိအားပေးတာ၊ ခြိမ်းခြောက်တာ၊ ရာထူးမှ ထုတ် ပယ်တာ၊ ဝန်ထမ်းအဖြစ်မှ ထုတ်ပစ်တာ၊ တရားစွဲဆိုတာတွေနဲ့ အမျိုးမျိုးသော ဖိနှိပ်မှုတွေကို ကျူးလွန်နေတဲ့ ဖော်ပြပါဝန်ထမ်းတွေကို အမည်ပျက်စာရင်းသွင်းလိုက်ပြီး ဝန်ထမ်းအဖြစ်မှ ထုတ်ပစ်လိုက်တယ်လို့ ကြေညာထားတာပါ။

အဆိုပါ ဝန်ထမ်းတွေထဲမှာတော့ မြန်မာကုန်သွယ်မှု မြှင့်တင်ရေးအဖွဲ့နဲ့ မူပိုင်ခွင့်ဦးစီး ဌာ နတွေက ဒုတိယညွှန်ကြားရေးမှူးချုပ်တွေ၊ ကုန်သွယ်ရေးဦးစီးဌာနနဲ့ စားသုံးသူရေးရာ ဦးစီးဌာနတွေက ညွှန်ကြားရေးမှူးတွေ၊ ဒုတိယညွှန်ကြားရေးမှူး တွေ အယောက် ၃၀ ပါဝင်နေတာ ဖြစ်ပါတယ်။

မြန်မာနိုင်ငံမှာ ဖေဖော်ဝါရီ ၁ ရက်က စတင်ကာ အကြမ်းဖက်စစ်ကောင်စီက နိုင်ငံတော် အာဏာကို သိမ်းယူခဲ့တဲ့ ကာလဟာ ၉ လနီးပါး ကြာမြင့်ခဲ့ပြီ ဖြစ်ပါတယ်။

ဒီကာလတွေအတွင်း နိုင်ငံတဝန်း စစ်အာဏာရှင်ဆန့်ကျင်ရေး ဆန္ဒပြပွဲတွေမှာ ပြည်သူ တွေ မြို့ရွာအနှံ့ ပါဝင်နေခဲ့ကြပြီး စစ်တပ်နဲ့ ရဲတပ်ဖွဲ့ဝင်တွေက အကြမ်းဖက် ပစ်ခတ်နှိမ်နင်းမှုတွေနဲ့ ကျဆုံးမှုတွေ၊ ဖမ်းဆီးထိန်းသိမ်း တရားစွဲဆိုခံရတာတွေနဲ့အတူ အခြေအနေတွေ ပိုမိုတင်းမာလာနေခဲ့တာ ဖြစ်ပါတယ်။

နိုင်ငံရေးအကျဉ်းသားများ ကူညီစောင့်ရှောက်ရေးအသင်း(အေအေပီပီ)ရဲ့ ထုတ်ပြန်ချက်အရ လက်ရှိအချိန်ထိ အကြမ်းဖက်စစ်တပ်က ပစ်ခတ်သတ်ဖြတ်မှုကြောင့် အပြစ်မဲ့ ကျဆုံးပြည်သူ ၁,၂၀၀ နီးပါးနဲ့ မတရားဖမ်းဆီးထိန်းသိမ်းခံရသူပေါင်း ၉,၀၀၀ ကျော်ထိ ရှိခဲ့ပြီလို့ သိရပါတယ်။

3 months Ago
Up