အပြည်ပြည်ဆိုင်ရာတရားရုံး

February 28, 2022

မြန်မာဘက်ကတင်သွင်းသည့် ကနဦးကန့်ကွက်ချက်အားလုံးကို ပယ်ချပေးရန် ဂမ်ဘီယာတောင်းဆို

မြန်မာဘက်က တင်သွင်းထားခဲ့တဲ့ ကနဦးကန့်ကွက်ချက်တွေ အားလုံးကို ပယ်ချပေးဖို့နဲ့   မူလပင်မအမှုအဖြစ်တဲ့  ဂျီနိုဆိုက်စာချုပ်ဖောက်ဖျက်မှုကို  ဆက်လက်ကြားနာစစ်ဆေးဖို့ ဂမ်ဘီယာ ကိုယ်စားလှယ် ရှေ့နေချုပ် တရားရေးဝန်ကြီး  ဒေါဒါဂျဲလိုးက ICJ တရားရုံးကို တိုက်တွန်း တောင်းဆို လိုက်ပါတယ်။

ရိုဟင်ဂျာလူမျိုးတုံးသတ်ဖြတ်မှုနဲ့ မြန်မာနိုင်ငံအပေါ်တရားစွဲထားတဲ့အမှုနဲ့ ပတ်သက်ပြီး ဂမ်ဘီယာနိုင်ငံရဲ့ ကိုယ်စားလှယ်တွေက  နယ်သာလန်နိုင်ငံ၊ သည်ဟိဂ်မြို့ရှိ အပြည်ပြည်ဆိုင်ရာတရားရုံး (ICJ)မှာ ဖေဖော်ဝါရီ ၂၈ ရက် ဒီကနေ့   ဒုတိယအကျော့ တင်ပြ လျှောက်လဲရာမှာ တောင်းဆိုလိုက်တာဖြစ်ခဲ့ပါတယ်။

ဂမ်ဘီယာဘက်က လိုက်ပါဆောင်ရွက်ပေးနေတဲ့ နိုင်ငံတကာရှေ့နေ ပေါလ်ရီချလာက လျှောက်လဲရာမှာတော့ ဒီအမှုကို ICJ မှာ ဂမ်ဘီယာကတရားစွဲဖို့  အိုအိုင်စီက ထောက်ပံ့ပေးတယ်ဆိုတာ လုံးဝမဟုတ်ကြောင်း၊ ဒီလို တရားစွဲဖို့ ဆုံးဖြတ်ချက်ဟာ ဘယ်သူက အကြံပြုတယ်ဆိုတာ အဓိကမကျဘူးတဲ့အကြောင်း၊ မြန်မာဘက်က အချိန် ၄ နာရီခွဲလောက် တရားရုံးမှာလျှောက်လဲခဲ့ရာမှာ ရိုဟင်ဂျာဆိုတဲ့ စကားကို တကြိမ်တခါတောင် မပြောနိုင်ခဲ့ကြောင်း လျှောက်လဲပြောကြားသွားပါတယ်။

ဂျီနိုဆိုက်နိုင်ငံတကာသဘောတူညီချက်နဲ့ပတ်သက်ပြီး မြန်မာရဲ့ အဓိပ္ပါယ်ကောက်ယူမှုဟာ မမှန်ကန်ရုံမက အန္တရာယ်ရှိတဲ့အကြောင်း  ဒါကိုလက်ခံလိုက်မယ်ဆိုရင် ကွန်ဗန်းရှင်းမှာ ပါဝင်တဲ့နိုင်ငံတွေအနေနဲ့ သူ့နိုင်ငံသားတွေအပေါ် လူမျိုးတုံးသတ်ဖြတ်မှုတွေအတွက် သဘောတူစာချုပ်ကို လိုက်နာစရာမလိုတော့သလိုဖြစ်သွားမှာဖြစ်ပြီး  ဒီစာချုပ်ဟာလည်း ဘာမှ အသက်မရှိတဲ့ စာသက်သက်ဖြစ်သွားလိမ့်မယ်လို့လည်း ဂမ်ဘီယာရှေ့နေက ပြောပါတယ်။  

ဒီအမှုနဲ့ပတ်သက်ပြီး အခု ဒုတိယအကြိမ် ကြားနာပွဲကို   ဖေဖော်ဝါရီ ၂၁ ရက်မှ  ၂၈ ရက်အထိ ပြုလုပ်ခဲ့တာဖြစ်ပြီး မြန်မာဘက်က  ဖေဖော်ဝါရီလ ၂၁ ရက်နဲ့ ၂၅ ရက်တွေမှာ  စစ်ကောင်စီ အပြည်ပြည်ဆိုင်ရာပူးပေါင်းဆောင်ရွက်ရေးဝန်ကြီး  ဦးကိုကိုလှိုင် ဦးဆောင်တဲ့ အဖွဲ့က တက်ရောက် လျှောက်လဲခဲ့ကြပါတယ်။

ဂမ်ဘီယာနိုင်ငံက တင်သွင်းခဲ့တဲ့အမှုအပေါ် တရားရုံးကစီရင်ပိုင်ခွင့် မရှိကြောင်း ဒါမှမဟုတ်    ဂမ်ဘီယာနိုင်ငံအနေနဲ့ တရားစွဲဆိုပိုင်ခွင့်မရှိကြောင်း ကြေညာပေးဖို့ အပြည်ပြည်ဆိုင်ရာ တရားရုံးကို မြန်မာဘက်က ပြီးခဲ့တဲ့ ဖေဖော်ဝါရီ ၂၅ ရက် ရုံးချိန်းမှာ  တောင်းဆိုထားပါတယ်။

မြန်မာနဲ့ ဂမ်ဘီယာ နှစ်နိုင်ငံဘက်က တရားရုံးမှာ နှစ်ကျော့ဆီလျှောက်လဲအပြီးမှာတော့ လိုအပ်တဲ့ အချက်အလက်တွေကို တရားရုံးကတောင်းခံလာပါက ပို့ပေးဖို့နဲ့ အခုကြားနာပွဲနဲ့ ပတ်သက်တဲ့ အဆုံးအဖြတ်ကို နှစ်နိုင်ငံကိုယ်စားလှယ်တွေကို သတ်မှတ်ရက်မှာ အသိပေးမှာဖြစ်တယ်လို့ လည်း အိုင်စီဂျေ တရားသူကြီးက ကြားနာပွဲအဆုံးသတ်မှာ ပြောကြားသွားပါတယ်။ 

၁၉၄၈ ခုနှစ် လူမျိုးသုဉ်းစေမှုကို တားဆီးရန်နဲ့ ပြစ်ဒဏ်ပေးရန် နိုင်ငံတကာသဘောတူစာချုပ်ကို ကျူးလွန်ဖောက်ဖျက်တယ်ဆိုတဲ့ စွပ်စွဲချက်နဲ့  မြန်မာနိုင်ငံကို ဂမ်ဘီယာနိုင်ငံက အပြည်ပြည်ဆိုင်ရာတရားရုံး (ICJ)မှာ  လွန်ခဲ့တဲ့၂ နှစ်ကျော်က စတင် တရားစွဲဆိုထားတာဖြစ်ပြီး ပထမအကြိမ် ကြားနာမှုကို ပြီးခဲ့တဲ့ ၂၀၁၉ ခုနှစ်တုန်းက ပြုလုပ်ခဲ့ရာမှာ နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည် တက်ရောက်ခဲ့တာဖြစ်ပါတယ်။ 

11 months Ago

February 19, 2022

ICJ ကြားနာစစ်ဆေးမှု စစ်ကောင်စီကိုယ်စားလှယ်များ တက်ရောက်ရန်ရှိနေ

နယ်သာလန်နိုင်ငံ၊ သည်ဟိတ်မြို့ရှိ အပြည်ပြည်ဆိုင်ရာတရားရုံး (ICJ)မှာ ဖေဖော်ဝါရီ ၂၁ ရက်  တနင်္လာနေ့ ကြားနာစစ်ဆေးမှုတွေမှာ အာဏာသိမ်းစစ်ကောင်စီရဲ့ ကိုယ်စားလှယ်တွေလည်း တက်ရောက်ဖို့ ရှိတယ်လို့ ရိုက်တာသတင်းမှာ ဖော်ပြပါတယ်။

ပထမအကြိမ် ကြားနာပွဲမှာ လက်ရှိ ဖမ်းဆီးခံနေရတဲ့ နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်က မြန်မာနိုင်ငံကို ကိုယ်စားပြုပြီး တက်ရောက်ခဲ့တာဖြစ်ပြီး အခုအကြိမ်မှာတော့ မြန်မာနိုင်ငံ ကိုယ်စားပြုပြီး တက်ရောက်မယ့် အဖွဲ့ကို အသိအမှတ်ပြုရေးက တရားစီရင်ရေးဆိုင်ရာ အငြင်းပွားမှုကို ရှုပ်ထွေးစေနေတာပါ။

ရွေးကောက်ခံ အစိုးရဖြစ်တဲ့ အမျိုးသားညီညွတ်ရေးအစိုးရ (အန်ယူဂျီ)  က သံအမတ်ကြီးဦး ကျော်မိုးထွန်းကို မြန်မာကိုယ်စားလှယ်အဖြစ်ခန့်အပ်ကာ နိုင်ငံတကာ ရှေ့နေ ၂ ဦးပါဝင်တဲ့ ဥပဒေပညာရှင်အဖွဲ့ကို မကြာသေးမီက ဖွဲ့စည်းထားသလို အာဏာသိမ်း စစ်ကောင်စီဘက်ကလည်း ဝန်ကြီး ဦးဝဏ္ဏမောင်လွင် ခေါင်းဆောင်တဲ့အဖွဲ့ကို ဖွဲ့စည်းထားပါတယ်။

လတ်တလော အမှုရင်ဆိုင်ဖို့ စစ်ကောင်စီကိုယ်စားလှယ်အဖွဲ့ နယ်သာလန်နိုင်ငံ၊ သည်ဟိတ်မြို့ကို စေလွှတ်ထားပြီး ဦးဝဏ္ဏမောင်လွင်ကနေ နေပြည်တော်ကနေ အွန်လိုင်းက အမှုကြားနာမယ်လို့ သတင်းတွေလည်း ထွက်ပေါ်နေပါတယ်။

၂၀၁၉ ခုနှစ် ဒီဇင်ဘာလတုန်းကတော့ ဒေါ်အောင်ဆန်းစုကြည်ဟာ လူမျိုးတုံးသတ်ဖြတ်မှု ဆိုတာကို ငြင်းဆိုပြီးတော့ ဂမ်ဘီယာရဲ့ပြောဆိုချက်ကို ပယ်ချဖို့ တောင်းဆိုခဲ့ပါတယ်။ 

ဒါပေမဲ့ NUG က ICJ ရဲ့ စီရင်ပိုင်ခွင့် အာဏာကို လက်ခံကြောင်း ဒေါ်အောင်ဆန်စုကြည်ရဲ့ ကနဦးထွက်ဆိုချက်တွေကို ရုပ်သိမ်းကြောင်း  အခုလအစောပိုင်းမှာ ပြောကြားခဲ့ပါတယ်။ 

ICJ မှာ မြန်မာနိုင်ငံရင်ဆိုင်နေရတဲ့အမှုနဲ့ ပတ်သက်ပြီး မြန်မာနိုင်ငံအစိုးရ ကိုယ်စားပြုအနေနဲ့ ကုလသမဂ္ဂ အမြဲတမ်းကိုယ်စားလှယ် သံအမတ်ကြီး ဦးကျော်မိုးထွန်း ဦးဆောင်ကာ ရင်ဆိုင်ဖြေရှင်းဖို့ တရားရုံးကို စာပေးပို့ထားပေမယ့် အကြောင်းပြန်စာမရသေးဘူးလို့ NUG နိုင်ငံခြားရေးဝန်ကြီး ဒေါ်ဇင်မာအောင်က ဒီဗွီဘီကို ပြောထားပါတယ်။

ရိုဟင်ဂျာတွေကို လူမျိုးတုံးသတ်ဖြတ်မှု စွပ်စွဲချက်နဲ့ ဂမ်ဘီယာနိုင်ငံက မြန်မာနိုင်ငံကို နယ် သာလန်နိုင်ငံ သည်ဟိတ်မြို့က ICJ တရားရုံးမှာ တရားစွဲဆိုထားတဲ့အမှုနဲ့ပတ်သတ်ပြီး  ဖေဖေါ်ဝါရီ ၂၁ ရက်မှ  ၂၈ ရက်အထိ ဒုတိယအကြိမ် ကြားနာစစ်ဆေးမှာဖြစ်ပါတယ်။

12 months Ago
More News
Up