အပြင်မထွက်

December 25, 2020

ရန်ကုန်တိုင်းအတွင်း မလိုအပ်ဘဲအပြင်မထွက်ရန် ညွှန်ကြားချက် လိုက်နာမှုအားနည်း

ရန်ကုန်တိုင်းအတွင်းရှိ မြို့နယ်တွေကပြည်သူတွေ မလိုအပ်ဘဲအပြင်မထွက်ကြဖို့ ညွှန်ကြားချက်ကို လိုက်နာမှုအားနည်းနေသေးတယ်လို့ မြို့နယ်ကိုဗစ်ကော်မတီ တာဝန်ရှိသူတွေက ပြောပါတယ်။  ရန်ကုန်တိုင်းအတွင်းက မြို့နယ်တွေကို ကိုဗစ် ၁၉ စည်းကမ်းချက်တွေ ဖြေလျှော့ပေးဖို့ သင့်မသင့်ဆိုတာကို တိုင်းအစိုးရအဖွဲ့က မြို့နယ်ကိုဗစ်ကော်မတီတွေဆီ သဘောထားမှတ်ချက်တောင်းခံထားတာရှိပါတယ်။  လတ်တလော အခြေအနေအရ ကိုဗစ်ကူးစက်မှု အနည်းငယ်လျော့ကျလာတယ်လို့ ထင်ရပေမယ့် မြို့နယ်တစ်ခုချင်းစီကို ဖြေလျော့ဖို့ဆိုတာ ရန်ကုန်တိုင်း တစ်တိုင်းလုံးကို ခြုံငုံသုံးသပ်ပြီးမှ ဆောင်ရွက်လို့ရမှာဖြစ်တဲ့အတွက် အခက်အခဲတွေ ရှိတယ်လို့ ဆိုပါတယ်။  ပြင်ပသွားလာမှုများပြားတဲ့ မြို့နယ်တွေမှာဆိုရင် ကိုဗစ်စည်းကမ်းလိုက်နာဖို့ ထိန်းသိမ်းရတာမလွယ်ကူဘူးလို့ ကမာရွတ်မြို့နယ် ကိုဗစ်ကော်မတီဥက္ကဋ္ဌ ဦးးသိန်းဇော်ဦးက ပြောပါတယ်။ ကိုဗစ်စည်းကမ်းချက်တွေကို မြို့နယ်တွေအလိုက် ဖြေလျှော့မှုအပိုင်းကတော့ တိုင်းအစိုးရရဲ့ ညွှန်ကြားမှုအပေါ်မှာ မူတည်ပြီး လုပ်ဆောင်သွားရမယ်လို့ မြို့နယ်ကိုဗစ်ကော်မတီတာဝန်ရှိသူတွေကပြောပါတယ်။  ကိုဗစ်ကော်မတီအစည်းအဝေးမှာ မြို့နယ်တွေရဲ့ ပိုးတွေ့ရှိမှုနည်းတဲ့ ရပ်ကွက်တွေအလိုက် ဖြေလျှော့မှုပေးဖို့ ဆွေးနွေးခဲ့ကြပေမယ့် အဲဒီလိုပေးရင်ညီမျှမှုမရှိတဲ့အတွက် ဖြေလျှော့မှုပေးရင် အားလုံးပေးဖို့ ဆွေးနွေးတင်ပြခဲ့တယ်လို့ တောင်ဥက္ကလာပမြို့နယ် ကိုဗစ်ကော်မတီတာဝန်ရှိသူ ဦးးကျော်ဇေယျာဝင်းက ပြောပါတယ်။ ကျန်းမာရေးဌာနနဲ့  မြို့နယ်ကိုဗစ်ကော်မတီတာဝန်ရှိသူတွေ အုပ်ချုပ်ရေးအဖွဲ့အစည်းတွေကတော့ သက်ဆိုင်ရာမြို့နယ် ရပ်ကွက်တွေအလိုက်  မက်ကမ်ပိန်းပြုလုပ်တာတွေ Mask နဲ့ faceshield အခမဲ့ဖြန့်ဝေတာတွေ လုပ်ဆောင်နေပေမယ့် လူစည်ကားတဲ့ဈေးတွေမှာ မက်တပ်ဆင် ဈေးရောင်းချတာ အားနည်းနေသေးတယ်လို့ လှိုင်သာယာပြည်သူ့ဆေးရုံကြီး ဆေးရုံအုပ် ဒေါက်တာခင်ရူပါစိုးက ပြောပါတယ်။ လတ်တလောမှာ ရန်ကုန်က လက်လီလက်ကားဈေးကြီးဖြစ်တဲ့ ယုဇနပလာဇာအပါအဝင် ဈေးကြီးတချို့ ပြန်ဖွင့်ဖို့ ရန်ကုန်မြို့တော် စည်ပင်သာယာရေးကော်မတီဆီ တင်ပြထားတာနဲ့ပတ်သက်လို့ ဈေးတွေပြန်ဖွင့်ရေးကိစ္စကို ကိုဗစ်ကော်မတီရဲ့ ညွှန်ကြားချက် အတိုင်း လုပ်ဆောင်သွားမယ်လို့ ရန်ကုန်မြို့တော်စည်ပင် တာဝန်ရှိသူက ပြောဆိုထားပါတယ်။  လက်ရှိမှာ ခရစ္စမတ်ကာလနဲ့ နှစ်သစ်ကူးရက်တွေဖြစ်တဲ့ ဒီဇင်ဘာ ၂၁ ရက်ကစပြီး ၃၁ ရက်နေ့အထိ ရန်ကုန်ရှိ တိရစ္ဆာန်ဥယျာဉ်၊ ပြည်သူ့ဥယျာဉ်၊ အင်းယားကန်ဘောင်၊ ပန်းခြံနဲ့ ကစားကွင်းအားလုံးကို ခေတ္တပိတ်ထားမယ်လို့ တိုင်းအစိုးရအဖွဲ့က ထုတ်ပြန်ထားပါတယ်။  ချမ်းမြေ့မောင် 
5 months Ago

May 7, 2020

အပြင်မထွက်ဘဲ နေအိမ်၌ နေပေးကြရန် လူနာအမှတ် ၂၇ တိုက်တွန်း 

COVID-19 ရောဂါ မဖြစ်ရအောင် အားလုံး အပြင်မထွက်ဘဲ နေအိမ်မှာပဲ နေပေးကြဖို့ လူနာအမှတ် ၂၇ က တိုက်တွန်းပြောဆိုလိုက်ပါတယ်။  မွန်ပြည်နယ် ကျိုက်မရောမြို့နယ် ကျွန်းရွာကျေးရွာက COVID-19 ရောဂါ လူနာအမှတ် ၂၇ ကို မေလ ၇ ရက်နေ့မှာ ဆေးရုံကနေ ဆင်းခွင့်ပြုခဲ့တာပါ။ လူနာအမှတ် ၂၇ ဟာ ပြီးခဲ့တဲ့ ဧပြီ ၁၀ ရက်နေ့က ရောဂါပိုး စတင် တွေ့ရှိခဲ့ပြီးနောက် ဆေးရုံမှာ စောင့်ကြည့်ကုသတာတွေ လုပ်ဆောင်ခဲ့တာပါ။ ဆေးရုံမှာ စောင့်ကြည့်ကုသနေစဉ် လူနာအမှတ် ၂၇ ရဲ့ ရောဂါပိုးကို ပြန်လည် စစ်ဆေးရာမှာ  နှစ်ကြိမ်တိုင်တိုင် ရောဂါပိုး မပြန်တွေ့တော့လို့ ဆေးရုံမှာ နှစ်ပတ် စောင့်ကြည့်ပြီး ဆေးရုံက ဆင်းခွင့်ပြုခဲ့တာလို့ လူနာအမှတ် ၂၇ က ပြောပါတယ်။ ဒါ့အပြင် ဆေးရုံမှာ နေထိုင်စဉ်ကာလအတွင်း စားရေးသောက်ရေးကအစ အာလုံး အဆင်ပြေတယ်လို့ ဆိုပါတယ်။ လူနာအမှတ် ၂၇ ကို ဆေးရုံက ဆင်းခွင့်ပြုလိုက်ပေမယ့် နေအိမ်မှာပဲ နေပေးဖို့နဲ့ ရောဂါ အခြေအနေကို  နှစ်ပတ်ကြာရင် ပြန်လည် စစ်ဆေးတာတွေ လုပ်ဆောင်သွားမယ်လို့ မော်လမြိုင်ဆေးရုံအုပ်ကြီး ဒေါက်တာ ကျော်မြင့်က ပြောပါတယ်။ လူနာအမှတ် ၂၇ ကို ဆေးကုသရာမှာ အသက်ငယ်တာအပြင် ပင်ကိုယ်ရောဂါ အခံမရှိတဲ့အတွက် ကုသမှုအပိုင်းမှာ ပိုပြီး ထိရောက်ခဲ့တယ်လို့ ဆိုပါတယ်။ လူနာအမှတ် ၂၇ ဟာ ရောဂါပိုး စတင်တွေ့ရှိပြီး ရက်ပေါင်း ၂၈ ရက်အကြာ ဆေးရုံမှာ နေထိုင်ခဲ့ရတာပါ။ သူဟာ မွန်ပြည်နယ်မှာ လက်ရှိအချိန်ထိ ပထဦးဆုံးနဲ့ တဦးတည်းသော COVID-19 ရောဂါ လူနာလည်း ဖြစ်ပါတယ်။ ဇော်လွင်ထွဋ် 
1 year Ago
Up