အပေါင်ဆိုင်

January 26, 2022

မြစ်ကြီးနားပစ်ခတ်မှု ရဲတပ်ဖွဲ့ဝင်အပါအဝင် ၂ ဦး ဒဏ်ရာရ

ကချင်ပြည်နယ်၊ မြစ်ကြီးနားမြို့၊ တပ်ကုန်းရပ်ကွက်မှာ ဇန်နဝါရီလ ၂၄ ရက် မွန်းလွဲပိုင်းက  ဖြစ်ပွားခဲ့တဲ့ ပစ်ခတ်မှုမှာ  ရဲတပ်ဖွဲ့ဝင်အပါအဝင် ၂ ယောက်ကျည်ဆန်ထိမှန် ဒဏ်ရာရသွားတယ်လို့  ရပ်ကွက်နေပြည်သူတွေက ပြောပါတယ်။ 

အဆိုပါရပ်ကွက်မှာရှိတဲ့ အပေါင်ဆိုင်မှာ အမျိုးသားတစ်ယောက်က ရွှေလာပေါင်ရာမှာ ပေါင်တဲ့ရွှေက အတုဖြစ်နေတဲ့အတွက် ဆိုင်ပိုင်ရှင်က ကေအိုင်အိုကို တိုင်ကြားခဲ့သလို လာရောက်ပေါင်နှံသူကလည်း ရဲကို တိုင်ကြားခဲ့ပြီးတဲ့နောက်မှာတော့ ဆိုင်ကယ် ၃ စီးနဲ့ လူငယ် ၆ ယောက်ရောက်လာပြီး ဆိုင်ရှေ့မှာရှိတဲ့ ရဲအစောင့်တွေကို လာရောက်ပစ်ခတ်သွားတယ်လို့ ရပ်ကွက်နေပြည်သူတွေက ပြောပါတယ်။

အဆိုပါ ပစ်ခတ်မှုမှာ ဆိုင်ရှင်ကိုလည်း ကျည်ဆန်ထိမှန်ခဲ့သလို ရဲတယောက်ရဲ့ ဝမ်းဗိုက်မှာလည်း ကျည်ဆန်ထိမှန်သွားပြီး လာရောက်ပစ်ခတ်ခဲ့တဲ့ လူငယ် ၆ ယောက်ကတော့ လွတ်မြောက်သွားခဲ့ပါတယ်။ 

အဲဒီလိုပစ်ခတ်ပြီးတဲ့နောက် စစ်ကောင်စီတပ်ဖွဲ့ဝင်တချို့ ရောက်ရှိလာပြီး သေနတ်နဲ့ ရမ်းသန်းပစ်ဖောက်မှုတွေပြုလုပ်ခဲ့ကာ အဆိုပါလမ်းပေါ်မှာ ဖြတ်သန်းသွားလာသူတွေကို စစ်ဆေးခဲ့တယ်လို့ သိရပါတယ်။ 

အဲဒီနောက်မှာတော့ စစ်သား ၆၀ လောက်က အဆိုပါ အပေါင်ဆိုင်ထဲကို ဝင်ရောက်ရှာဖွေခဲ့ရာ ဆိုင်ရှေ့တံခါးအနီးမှာ ပစ္စတိုသေနတ်တစ်လက်တွေ့ရှိခဲ့ပြီး ဆိုင်ရှင်ရဲ့သမီးဖြစ်သူကလည်း CDM ဝန်ထမ်းဖြစ်တဲ့အတွက် သမီးဖြစ်သူအပါအဝင်မိသားစုတွေကို ဖမ်းဆီးသွားတယ်လို့ ရပ်ကွက်နေပြည်သူတွေက ပြောပါတယ်။ 

အဆိုပါပစ်ခတ်မှုမှာ ဒဏ်ရာရသွားတဲ့ ရဲတပ်ဖွဲ့ဝင်ရဲ့ အခြေအနေကိုတော့ မသိရသေးပါဘူး။ မြစ်ကြီးနားမြို့ တပ်ကုန်းရပ်ကွက်မှာ ဇန်နဝါရီ ၂၄ ရက်မှာပဲ  ဗုံးပေါက်ကွဲမှုတခု ဖြစ်ပွားခဲ့ပါတယ်။

5 months Ago

November 25, 2020

ငါးသိုင်းချောင်းမြို့ရှိ အပေါင်ဆိုင်က အ​ပေါင်​ခံထားသည့် စက်ဘီးနှင့် ဆိုက်​ကားများ အခမဲ့ပြန်ပေး

ဧရာဝတီတိုင်းဒေသကြီး၊ ငါးသိုင်းချောင်းမြို့မှာ လိုင်စင်ရအပေါင်ဆိုင် တစ်ဆိုင်က အပေါင်လာအပ်နှံထားတဲ့ ဆိုက်ကားနဲ့ စက်ဘီးတွေကို နိုဝင်ဘာလ ၂၃ ရက်နေ့ ညနေပိုင်းက စတင်ကာ အခမဲ့ပြန်လည်းပေးအပ်နေပါတယ်။ အောင်ဆန်းရပ်ကွက်၊ ဘုရင့်နောင်လမ်းမှာ ဖွင့်ထားတဲ့ အပေါင်ဆိုင်မှာ ကိုဗစ်ကာလ အခြေခံလူတန်းစာတွေကို ထောက်ပံ့တဲ့အနေနဲ့ သူတို့ လာရောက်ပေါင်နှံထားတဲ့ ဆိုက်ကား စက်ဘီးတွေကို အပေါင်လက်မှတ်ပြတာနဲ့ ပြန်လည်ထုတ်ပေးနေတာလို့ အပေါင်ဆိုင်ပိုင်ရှင် မခင်မာကြူက ပြောပါတယ်။ "မနေ့ကစပြီးတော့ လုပ်ဖြစ်တာပါ။ အဓိက ကိုဗစ်ကာလမှာ အခြေခံလူတန်းစားတွေကို ထောက်ပံ့ချင်တာပါ။ အဲ့တာကြောင့် ဆိုင်မှာ လာပေါင်ထားတဲ့ ဆိုက်ကားနဲ့ စက်ဘီးတွေကို အပေါင်လက်မှတ်ပြတာနဲ့ ပြန်ပြီး အခမဲ့ပေးနေ တာပါ" လို့ ပြောပါတယ်။ အပေါင်ခံထားတဲ့ ဆိုက်ကားနဲ့ စက်ဘီးတွေများတဲ့အတွက် ၁ ဦးစီ လိုက်မပြောနိုင်တော့လို့ မနေ့က နေ့လည်ပိုင်းမှာ အပေါင်အပ်နှံထားသူတွေအနေနဲ့ ဆိုင်မှာ အပေါင်လက်မှတ်ပြလာထုတ်နိုင်ကြောင်းကို လူမှုကွန်ယက်စာမျက်နှာကနေ ဖော်ပြခဲ့ရတယ်လို့ ဆိုပါတယ်။ အပေါင်ဆိုင်မှာ လာရောက်ပေါင်နှံထားတဲ့ ဆိုက်ကားနဲ့ စက်ဘီးအစီးရေ ၁၀၀ ဝန်းကျင် ရှိပြီး လာရောက်ထုတ်ယူဖို့အတွက် တော်တော်များများ ကျန်ရှိနေသေးတယ်လို့ သိရပါတယ်။ ကိုဗစ်ရောဂါဖြစ်ပွားနေတဲ့ကာလမှာ ခုလို ပေါင်နှံထားတဲ့ ဆိုက်ကားနဲ့ စက်ဘီးတွေကို အခမဲ့ပြန် ထုတ်ပေးတဲ့အတွက် လာရောက်ထုတ်ယူသူတွေက ဆိုင်ရှင်အပေါ် ဆုတောင်း မေတ္တာပို့တာတွေလည်း ပြုလုပ်ပေးနေတယ်လို့ ဒေသခံတွေထံက သိရပါတယ်။ သတင်း - မင်းထက်မုန်း (ပုသိမ်)
2 years Ago
Up