အန်အယ်လ်ဒီအမတ်

A d v e r t i s e m e n t With Us

November 10, 2020

အေအေ ဖမ်းထားသည့် အန်အယ်လ်ဒီအမတ်များအား အမြန်ပြန်လွှတ်ပေးရန် ဗြိတိန်တောင်းဆို

ရက္ခိုင့်တပ်မတော်(အေအေ) လက်နက်ကိုင်အဖွဲ့က ဖမ်းဆီးခေါ်ဆောင်သွားတဲ့ အန်အယ်လ်ဒီ လွှတ်တော်ကိုယ်စားလှယ်လောင်းတွေကို အမြန်ဆုံးပြန်လွှတ်ပေးဖို့ ဗြိတိန် နိုင်ငံခြားရေးဌာန အာရှဒေသဆိုင်ရာသံအမတ်ကြီး Nigel Adams ရဲ့ ထုတ်ပြန်ချက်မှာ ဖော်ပြထားပါတယ်။ နိုဝင်ဘာ ၉ ရက် ရက်စွဲနဲ့ ထုတ်ပြန်တဲ့ မြန်မာ့ရွေးကောက်ပွဲနဲ့ဆိုင်တဲ့ အဲဒီထုတ်ပြန်ချက်ထဲမှာတော့ စစ်အာဏာရှင်စနစ်ကနေ ဒီမိုကရေစီစနစ်ကို အသွင်ကူးပြောင်းနေဆဲ ဖြစ်တဲ့ မြန်မာနိုင်ငံမှာ ၂၀၂၀ ပြည့်နှစ် ပါတီစုံဒီမိုကရေစီ အထွေထွေရွေးကောက်ပွဲဟာ ထူးခြားတဲ့မှတ်တိုင်တခု ဖြစ်တယ်လို့ ကနဦး ဖော်ပြထားပါတယ်။ မြန်မာပြည်သူတွေဟာ ခက်ခက်ခဲခဲရရှိထားတဲ့ မဲပေးနိုင်ခွင့်နဲ့အတူ အများအပြား မဲပေးခဲ့ကြတာ မြင်ရတဲ့အတွက်လည်း ဝမ်းမြောက်ဝမ်းသာဖြစ်ရကြောင်း ထုတ်ပြန်ချက်မှာ ဖော်ပြထားပါတယ်။ မြန်မာပြည်သူတွေ ထောက်ခံအားပေးတဲ့ ငြိမ်းချမ်းရေးနဲ့ ပြည့်ဝတဲ့ ဒီမိုကရေစီစနစ်အတွက် ဗြိတိန်နိုင်ငံအနေနဲ့လည်း ဆက်ပြီး ထောက်ခံအားပေးသွားမှာဖြစ်ကာ အစိုးရသစ်နဲ့ အရပ်ဘက် လူမှုဆိုင်ရာ အဖွဲ့အစည်းတွေနဲ့အတူ ဆက်လက်ပြီးတော့ လက်တွဲလုပ် ဆောင်သွားမယ်လို့ ဆိုပါတယ်။ ဒါပေမဲ့ ရွေးကောက်ပွဲမှာ ရိုဟင်ဂျာတွေ အပါအဝင် တိုင်းရင်းသား လူနည်းစုတွေ ဆန္ဒမဲပေးနိုင်ခွင့်မရတာ၊ တချို့သော တိုင်းဒေသကြီးနဲ့ ပြည်နယ်တွေမှာ ပွင့်လင်းမြင်သာမှုမရှိဘဲ ရွေးကောက်ပွဲ ကျင်းနိုင်ခြင်းမရှိတာတွေကိုတော့ စိတ်ပျက်မိကြောင်း ဖော်ပြထားခဲ့တာပါ။ အခုအချိန်ဟာ မြန်မာနိုင်ငံအနေနဲ့ အားလုံးတန်းတူပါဝင်နိုင်မယ့် နိုင်ငံသားအခွင့်အရေးဆိုင်ရာ ဥပဒေတွေ ပြင်ဆင်နိုင်ဖို့ အရေးကြီးနေပြီး သက်ဆိုင်ရာ အာဏာပိုင်တွေကို ရွေးကောက်ပွဲ မကျင်းပနိုင်ခဲ့တဲ့ ဒေသတွေမှာ လွတ်လပ်တရားမျှတတဲ့ ရွေးကောက်ပွဲတွေ ကျင်းပနိုင်ဖို့ တိုက်တွန်းထားပါတယ်။ နောက်ပြီး ရက္ခိုင့်တပ်မတော်(အေအေ)လက်နက်ကိုင်အဖွဲ့က လွှတ်တော် ကိုယ်စားလှယ်လောင်းတွေကို ဖမ်းဆီးခေါ်ဆောင်သွားတာကိုလည်း ဗြိတိန်အနေနဲ့ ရှုတ်ချကြောင်းနဲ့ အမြန်ဆုံး ပြန်လွှတ်ပေးဖို့ တောင်းဆိုထားပါတယ်။ အန်အယ်လ်ဒီပါတီက ရွေးကောက်ပွဲ  အောင်နိုင်ရေး စည်းရုံးလှုပ်ရှားနေတဲ့  ရခိုင်ပြည်နယ် ပြည်သူ့လွှတ်တော်ကိုယ်စားလှယ် ဒေါ်နီနီမေမြင့်၊ ရခိုင်ပြည်နယ်မဲဆန္ဒနယ် အမှတ် (၂) လွှတ်တော်ကိုယ်စားလှယ် ဦးမင်းအောင်နဲ့ အမျိုးသားလွှတ်တော် မဲဆန္ဒနယ် အမှတ် (၁၂) လွှတ်တော်ကိုယ်စားလှယ်လောင်း ဒေါ်ချစ်ချစ်ချောတို့ကို အောက်တိုဘာ ၁၄ ရက်မနက်က  တောင်ကုတ်မြို့နယ်‌ ဖောင်းခါးကျေးရွာမှာ အေအေက သေနတ်နဲ့ချိန်ရွယ် ရိုက်နှက်ကာ ကြိုးတုပ် ခေါ်ဆောင်သွားခဲ့တာ ဖြစ်ပါတယ်။ အမျိုးသားဒီမိုကရေစီအဖွဲ့ချုပ်ကလည်း လွှတ်တော်ကိုယ်စားလှယ်လောင်း ၃ ဦးကို အမြန်ဆုံးလွှတ်ပေးဖို့ ကြေညာချက်ထုတ်ပြန် တောင်းဆိုထားပါတယ်။ လက်နက်ပြ ခြိမ်းခြောက် ဖမ်းဆီးမှုဟာ တရားမျှတမှုမရှိတဲ့ အကြမ်းဖက်ဖမ်းဆီးမှု ဖြစ်တာကြောင့် ပြင်းထန်စွာရှုတ်ချပြီး လက်နက်အားကိုး အနိုင်အထက်ပြု ဖမ်းဆီးမှုကို လက်မခံဘဲ ဖမ်းဆီးခံ လွှတ်တော်ကိုယ်စားလှယ်လောင်းတွေဘက်က ရပ်တည်ပြီး ဆန့်ကျင်ကြဖို့လည်း ပြည်သူတွေကို အန်အယ်လ်ဒီက တိုက်တွန်းထားပါတယ်။
3 months Ago

July 31, 2020

မွန်ပြည်နယ်လွှတ်တော်၌ အဆိုအများဆုံးတင်ခဲ့သည့်  အန်အယ်လ်ဒီအမတ်ကို ပြန်ရွေးပေးရန် တောင်းဆို

မွန်ပြည်နယ်လွှတ်တော်မှာ အဆို အများဆုံး တင်သွင်းခဲ့တဲ့ သထုံမြို့နယ် မဲဆန္ဒနယ် အမှတ် (၂) ပြည်နယ်က လွှတ်တော်ကိုယ်စားလှယ် ဦးအောင်ကျော်သူကို ၂၀၂၀ ရွေးကောက်ပွဲမှာ ကိုယ်စားလှယ်လောင်းအဖြစ် ပြန်ရွေးပေးဖို့ သထုံမြို့နယ် အန်အယ်လ်ဒီ ပါတီဝင်တွေနဲ့ ဒေသခံတွေက တောင်းဆိုလိုက်ပါတယ်။ အမျိုးသားဒီမိုကရေစီအဖွဲ့ချုပ်က  သထုံမြို့နယ် မဲဆန္ဒနယ်အမှတ် (၂) ပြည်နယ်လွှတ်တော်နေရာအတွက်  ကိုယ်စားလှယ်လောင်းရွေးချယ်မှာ ဦးအောင်ကျော်သူကို ချန်လှပ်ခဲ့ပြီး သူနေရာမှာ ပြည်သူ့လွှတ်တော်ကိုယ်စားလှယ် ဒေါ်မာမာခိုင်ကို အစားထိုးခဲ့တာပါ။ ဒါကြောင့် ဦးအောင်ကျော်သူကို ပြန်ရွေးပေးဖို့  အန်အယ်လ်ဒီပါတီထောက်ခံသူနဲ့ ဒေသခံ ၂၇၀၀ ကျော်က ပါတီဗဟိုကို ဇူလိုင် ၃၀ ရက်နေ့က လက်မှတ်ရေးထိုး တောင်းဆိုလိုက်တာပါ။  လွှတ်တော်အမတ် ဦးအောင်ကျော်သူဟာ ကျေးရွာဖွံ့ဖြိုးရေးနဲ့ လမ်းပန်းဆက်သွယ်ရေး ကောင်းမွန်ရေး အပါအဝင် ဒေသဖွံ့ဖြိုးရေးလုပ်ငန်းတွေကို ပိုလုပ်နိုင်သူဖြစ်လို့ ပြန်ရွေးပေးဖို့ တောင်းဆိုရတာလို့ သထုံမြို့နယ် အင်းနီးကျေးရွာနေ  အန်အယ်လ်ဒီ ထောက်ခံသူ ဦးစောမြင့်အေးက  ပြောပါတယ်။  လက်ရှိ လွှတ်တော်အမတ် ဦးအောင်ကျော်သူဟာ မွန်ပြည်နယ်လွှတ်တော်ရဲ့ ရေးရာ ကော်မတီ ၂ ခုရဲ့ ဥက္ကဋ္ဌ နေရာမှာ ပူးတွဲ တာဝန်ထမ်းဆောင်နေပြီး အစိုးရကို အမြဲမပျက်ထောက်ပြဆွေးနွေးနေသူလည်း ဖြစ်ပါတယ်။ ၂၀၂၀ ရွေးကောက်ပွဲအတွက် အမျိုးသားဒီမိုကရေစီအဖွဲ့ချုပ်က ကိုယ်စားလှယ်လောင်း ၁၁၃၁ ဦးရွေးချယ်ထားရာမှာ ကိုယ်စားလှယ်တချို့နဲ့  ပတ်သက်ပြီး မကျေနပ်လို့  တိုင်ကြားမှုတွေ ရှိနေတဲ့အတွက် နေပြည်တော်ရှိ ယာယီ ပါတီဌာနချုပ်မှာ  ပြန်လည်စိစစ်မှုတွေ ပြုလုပ်နေပါတယ်။ ဇော်လွင်ထွဋ်
6 months Ago
Up