အန်အယ်လ်ဒီပါတီဝင်

December 16, 2022

ကလေးမြို့က အန်အယ်လ်ဒီပါတီဝင် ဒီဇိုင်နာ ညီအစ်မကို စစ်ကောင်စီတပ် ဖမ်းဆီး

စစ်ကိုင်းတိုင်း၊ ကလေးမြို့၊ အောင်သစ္စာရပ်ကွက် နယ်မြေ ၆ မှာ နေထိုင်တဲ့ ဒီဇိုင်နာ (စက်ချုပ်ဆရာမ) ဒေါ်ခင်ခင်နှင်းတို့ ညီအစ်မနှစ်ယောက်ကို စစ်ကောင်စီတပ်က ဖမ်းဆီးသွားတယ်လို့ ဒေသခံတွေဆီက သိရပါတယ်။

စစ်ကောင်စီတပ်က ဒီဇင်ဘာ ၁၅ ရက် နေ့ခင်းပိုင်းက သူတို့ရဲ့နေအိမ်ကို ဝိုင်းပြီး ဖမ်းဆီးသွားတာလို့ ဆိုပါတယ်။

ဖမ်းဆီးခံရသူ ညီအစ်မနှစ်ယောက်ဖြစ်တဲ့ ဒေါ်ခင်ခင်နှင်းနဲ့ ဒေါ်အေးအေးသင်းတို့ကို ‌ဒေသခံကာကွယ်ရေးတပ်တွေကို ထောက်ပံ့တယ်ဆိုတဲ့ စွပ်စွဲချက်နဲ့ စစ်ကောင်စီတပ်က  ဖမ်းဆီးသွားတာလို့ အိမ်နီးချင်းတဦးကပြောပါတယ်။

“ခင်နှင်းက အိမ်မှာစက်ချုပ်တာ။ သူ့အမ အေးသင်းက အိမ်မှုအချက်အပြုတ်ပေါ့။ ခင်နှင်းက ကလေးမြို့ စက်ချုပ်တဲ့အပိုင်းမှာ မသိတဲ့သူမရှိသလောက်ပဲ။ နာမည်ကြီး ဒီဇိုင်နာတယောက်ပါ။ သူတို့က အန်အယ်လ်ဒီပါတီဝင်‌တွေပါ။ သူများသတင်းပေးလို့ ဖမ်းတာဖြစ်နိုင်တယ်။ စစ်သားတွေက အိမ်ကို အရင်ဝိုင်းပြီးမှ ဖမ်းသွားတာ။ ဖမ်းသွားတုန်းက PDF ထောက်ပို့ဆိုပြီး ဖမ်းဆီးသွားတာ။”

ဒီဇိုင်နာ ခင်ခင်နှင်းတို့ ညီအစ်မနှစ်ယောက်ကို စစ်ကောင်စီက ဒေသကွပ်ကဲမှုစစ်ဌာနချုပ် အတွင်းကို ဖမ်းဆီးခေါ်ဆောင်သွားတယ်လို့ သိရပြီး နောက်ဆက်တွဲအခြေအနေကိုတော့ မသိရသေးပါဘူး။

ကလေးမြို့မှာ မနေ့က အောင်သစ္စာရပ်ကွက်က ဒေါ်မိမိဝင်းနဲ့ အောင်မြေမာန်ရပ်ကွက်က ဒေါ်နှင်းဖြူစင်လှိုင်တို့ကိုလည်း စစ်ကောင်စီက PDF ထောက်ပို့ဆိုပြီး ဖမ်းဆီးသွားခဲ့ပါသေးတယ်။

ဒီဇင်ဘာ ၁၄ ရက်ကလည်း မြို့သာရပ်ကွက်မှာ မစုလတ်တင် ဖမ်းဆီးခံရပြီးနောက် အောင်မြေမာန်ရပ်ကွက်က မဇူး‌ဇင်မောင်တို့ မိသားစုဝင် ၄ ဦးကိုလည်း စစ်ကောင်စီက PDF ထောက်ပို့ဆိုပြီး ဖမ်းဆီးခဲ့ပါသေးတယ်။

2 months Ago

November 9, 2022

ထီးလင်း အန်အယ်လ်ဒီ အလုပ်အမှုဆောင်နှင့် ညီဖြစ်သူတို့ ဖမ်းဆီးခံရ

မကွေးတိုင်း၊ ထီးလင်းမြို့မှာ နိုဝင်ဘာ ၈ ရက် ညပိုင်းက အန်အယ်လ်ဒီပါတီ အလုပ်အမှုဆောင်တယောက် အပါအဝင် ညီအစ်ကို နှစ်ယောက်ကို ထီးလင်းရဲစခန်းက ရဲတွေက  ဖမ်းဆီးသွားတယ်လို့ ဒေသခံတွေက ပြောပါတယ်။

ထီးလင်းမြို့ အမှတ် ၁ ရပ်ကွက်က အန်အယ်လ်ဒီပါတီရဲ့ မြို့နယ်အလုပ်အမှုဆောင် ဦးကြည်စိုးနဲ့ ညီဖြစ်သူ ဦးမင်းကိုတို့ကို ရဲတွေက မနေ့ ညပိုင်းက နေအိမ်မှာ လာရောက်ဖမ်းဆီးသွားတာလို့ ထီးလင်းမြို့ခံတယောက်က ပြောပါတယ်။

“အဲဒီ ရဲ(...)တွေက သူတို့ညီအစ်ကို နှစ်ယောက်ကို PDF နဲ့ ဆက်စပ်တယ်လို့ စွပ်စွဲ ဖမ်းဆီးတာ ဖြစ်ပြီး ထီးလင်းမြို့မရဲစခန်း စစ်ကြောရေးကို ခေါ်ဆောင်သွားကြတယ်။”

ထီးလင်းမြို့နယ်ထဲမှာ အခုရက်ပိုင်းအတွင်း အန်အယ်လ်ဒီပါတီဝင်တွေနဲ့ ထောက်ခံဝန်းရံသူတွေကို PDF၊ PDF ထောက်ပံ့သူ၊ မမှန်သတင်း ရေးသားဖြန့်ဝေသူတွေလို့ စွပ်စွဲပြီး ရဲနဲ့ စစ်တပ်က ဖမ်းဆီးတာတွေ ဆက်တိုက်ပြုလုပ်သလို စစ်ကြောင်းထွက်တဲ့အခါမှာလည်း ဒေသခံတွေကို ဖမ်းဆီးကာ လူသားဒိုင်းအဖြစ် အသုံးပြုတာတွေ ဆက်တိုက်ပြုလုပ်နေတယ်လို့ ဒေသခံက ပြောပါတယ်။

ထီးလင်းမြို့က ဒေသခံအမျိုးသား ၄ ယောက်ကိုလည်း နိုဝင်ဘာ ၅ ရက်နေ့မှာ စစ်ကောင်စီစစ်ကြောင်းက လူသားဒိုင်းအဖြစ် ဖမ်းဆီးသွားကြပြီး ဒီနေ့ နိုဝင်ဘာ ၉ ရက်နေ့အထိ ပြန်မလွတ်သေးဘူးလို့ ဆိုပါတယ်။

စစ်တပ်အာဏာစသိမ်းတဲ့ ဖေဖော်ဝါရီ ၁ ရက်မှ နိုဝင်ဘာ ၈ ရက်အထိ နိုင်ငံတဝန်း မတရားဖမ်းဆီးချုပ်နှောင်ခံထားရသူ ၁၂,၉၀၅ ယောက်ရှိပြီး အဲဒီထဲက ၁,၆၃၃ ယောက် ထောင်ဒဏ်ချမှတ်ခံထားရတယ်လို့ နိုင်ငံရေးအကျဥ်းသားများ ကူညီစောင့်ရှောက်ရေးအသင်း (အေအေပီပီ) က နိုဝင်ဘာ ၈ ရက်နေ့မှာ ထုတ်ပြန်ထားပါတယ်။

3 months Ago
More News
Up