အန်အယ်လ်ဒီပါတီ

January 2, 2022

ကျွန်းလှမြို့တွင် အန်အယ်လ်ဒီပါတီနှင့် သက်ဆိုင်သူများ၏ နေအိမ်၊ ဈေးဆိုင်များကို စစ်တပ်က မီးရှို့ဖျက်ဆီး

စစ်ကိုင်းတိုင်းဒေသကြီး၊ ကျွန်းလှမြိုပေါ်မှာ အန်အယ်လ်ဒီပါတီနဲ့ သက်ဆိုင်သူတွေရဲ့နေအိမ်တွေနဲ့ ဈေးဆိုင်တွေကို  ဒီဇင်ဘာ ၃၁ ရက် ညပိုင်း ၉ နာရီလောက်မှာ  စစ်ကောင်စီတပ်က ရှာဖွေ ဖျက်ဆီး မီးရှို့ခဲ့တယ်လို့  ဒေသခံတွေဆီကနေ သိရပါတယ်။

အဲဒီလိုရှာဖွေရာမှာ ဒေသခံတွေကို  ရိုက်နှက်စစ်ဆေးတာ၊ သေနတ်ပစ်ဖောက်တာတွေ လုပ်ခဲ့သလို ကျောင်းဆရာလင်မယားကိုလည်းဖမ်းသွားပြီး ကျောင်းဆရာကို သေနတ်ဒင်နဲ့ထုခဲ့တယ်လို့ မျက်မြင်တွေ့သူတွေက ပြောပါတယ်။

ကျွန်းလှဒေသခံတစ်ဦးက “ ကျနော်တို့ ကျွန်းလှ အန်အယ်လ်ဒီအမတ်အိမ်ရယ်၊ သူ့အစ်ကိုအိမ် နှစ်လုံးရယ် စုစုပေါင်း သုံးလုံးကို ရှာဖွေတယ်။ အမတ်အိမ်က ပရိဘောဂတွေနဲ့ စာရွတ်စာတမ်းတွေအကုန်လမ်းအပြင်ထုတ်မီးရှို့တယ်။ အမတ်အစ်ကိုအိမ်က အိမ်ဆေးဆိုင်ဆိုတော့ အကုန်အတွင်းပစ္စည်းအကုန် လမ်းဘက်ထုတ် မီးရှို့တယ်။ ကျန်တဲ့ အန်အယ်လ်ဒီ ထောက်ခံတဲ့ တခြားနေအိမ်နှစ်လုံးရယ်၊ လက်ဖက်ရည်ဆိုင်နဲ့ ဆိုင်ခန်း ၃ ခန်းကိုတော့ အကုန်လုံး မီးတင်ရှို့တယ်။ အကုန်လုံး ပြာကျသွားတယ်”လို့  ဒီဗွီဘီကို အတည်ပြုပြောဆိုပါတယ်။

အခုလို မီးရှို့ဖျက်ဆီးတဲ့ဖြစ်စဉ် အသေးစိတ်ကို သိရှိနိုင်ဖို့ ကျွန်းလှမြို့နယ်မီးသတ်ကို ဖုန်းနဲ့ဆက်သွယ်ပေမယ့် စစ်ကောင်စီက လုပ်ဆောင်တဲ့အရာတွေကို ဖြေဆိုဖို့ရာ သူတို့မှာတာဝန်မရှိဘူးလို ဖြေကြားသွားပါတယ်။

စစ်ကောင်စီတပ်တွေဟာ စစ်ကိုင်းတိုင်းကို ထိန်းချုပ်နိုင်ဖို့ အခုလို ကျေးရွာတွေကို ဝင်ရောက်စီးနင်း ပြည်သူတွေရဲ့နေအိမ်တွေကို မီးရှို့တာတွေပြုလုပ်နေတာကြောင့် တိုင်းအတွင်းမှာ ဒေသခံမီးဘေးသင့်ပြည်သူတွေ ထောင်နဲ့ချီရှိနေပြီလို့ ဒေသခံတွေရဲ့ပြောပြချက်အရ သိရပါတယ်။

3 weeks Ago

November 6, 2021

အန်အယ်လ်ဒီပါတီ ဗဟိုအလုပ်ကော်မတီဖွဲ့စည်း၊ ပြည်သူ့အာဏာ ပြည်သူ့ထံ ပြန်အပ်နှံရေး ကြိုးပမ်းမည်

အမျိုးသားဒီမိုကရေစီအဖွဲ့ချုပ် (အန်အယ်လ်ဒီ)က   ဗဟိုအလုပ်ကော်မတီ (Central Working Committee)ကို အဖွဲ့ဝင် ၇ ဦးနဲ့ ဖွဲ့စည်းလိုက်ပြီး  ပြည်သူတို့ရဲ့ အခွင့်အာဏာကို ပြည်သူ့ထံသို့ ပြန်လည်အပ်နှံနိုင်ရေး ကြိုးပမ်းသွားမယ်လို့ နိုဝင်ဘာ ၅ ရက် နေ့စွဲနဲ့ ထုတ်ပြန်ကြေညာလိုက်ပါတယ်။

ဗဟိုအလုပ်အမှုဆောင် အဖွဲ့ဝင် ဦးအောင်ကြည်ညွန့်၊ ဦးတင်ထွဋ်ဦး၊ အရန်ဗဟိုအလုပ်အမှုဆောင်အဖွဲ့ဝင် ဒေါက်တာခင်ဆောင်နဲ့  ဇန်နဝါရီ ၃၀ ရက်က ဖွဲ့စည်း တာဝန်ပေးအပ်ခဲ့တဲ့ (Steering Committee) မှ ဦးထွန်းမြင့်၊ ဦးကျော်ထွေး၊ ဦးမျိုးနိုင်၊ ဦးဝင်းအောင်တို့နဲ့  ၇ ဦးက အခု အသစ်ဖွဲ့စည်းလိုက်တဲ့ ဗဟိုအလုပ်ကော်မတီမှာ တာဝန်ယူ ဆောင်ရွက်သွားမှာ ဖြစ်တယ်လို့ဆိုပါတယ်။ 

ပြီးခဲ့တဲ့ အောက်တိုဘာ ၃၀ ရက်က ကျင်းပတဲ့  အန်အယ်လ်ဒီပါတီရဲ့ ဗဟိုရေးရာကော်မတီတွေ၊ ပြည်နယ်နှင့်တိုင်း တာဝန်ခံတွေ တက်ရောက်တဲ့ အစည်းအဝေးမှာ တက်ရောက်လာသူ အားလုံးရဲ့ သဘောတူညီချက်အရ ခုလိုဖွဲ့စည်းလိုက်တာလို့လည်း ဆိုပါတယ်။

မြန်မာနိုင်ငံမှာ စစ်တပ်က တရားမဝင် အာဏာသိမ်းတဲ့ ဖေဖော်ဝါရီ ၁ ရက်နေ့ကတည်းက အန်အယ်လ်ဒီပါတီ ခေါင်းဆောင် နိုင်ငံတော်အတိုင်ပင်ခံပုဂ္ဂိုလ်  ဒေါ်အောင်ဆန်းစုကြည်နဲ့   သမ္မတ ဦးဝင်းမြင့် အပါအဝင် ပါတီထိပ်တန်း တာဝန်ရှိသူတွေ၊ လွှတ်တော်ကိုယ်စားလှယ်တွေကို  စစ်တပ်က ဖမ်းဆီးပြီး ပုဒ်မအမျိုးမျိုးနဲ့ တရားစွဲနေတာ ဖြစ်ပါတယ်။

နိုင်ငံတဝန်း ပြည်နယ်နဲ့ တိုင်း၊ မြို့နယ်နဲ့ ရပ်ကျေး အန်အယ်လ်ဒီ ပါတီဝင်တွေနဲ့ ထောက်ခံသူတွေကိုလည်း ဖမ်းဆီးတာ၊ နှိပ်စက်တာ၊ ဖမ်းဝရမ်းထုတ်တာတွေလည်း ပြုလုပ်ခဲ့တဲ့ အပြင်  ပါတီရုံးတွေကို ချိတ်ပိတ်တာ၊ ဗုံးခွဲတာ၊ ပါတီဆိုင်းဘုတ်တွေနဲ့ အလံတွေကိုလည်း  ဖြုတ်ချ ဖျက်ဆီးတာတွေကိုလည်း စစ်အုပ်စုက ပြုလုပ်နေတာဖြစ်ပါတယ်။

အမျိုးသားဒီမိုကရေစီအဖွဲ့ချုပ်အနေနဲ့ အခက်အခဲအမျိုးမျိုးကြားက ပြည်သူတို့ရဲ့ အခွင့်အာဏာကို ပြည်သူ့ထံသို့ ပြန်လည်အပ်နှံနိုင်ရေးနဲ့ ဖမ်းဆီးထိန်းသိမ်းခံထားရတဲ့ အဖွဲ့ချုပ်ခေါင်းဆောင်တွေ အပါအဝင် နိုင်ငံရေးအကျဉ်းသားတွေအားလုံး ခြွင်းချက်မရှိ လွတ်မြောက်ရေး စဉ်ဆက်မပြတ် ကြိုးပမ်းဆောင်ရွက်သွားနေတယ်လို့ ပါတီဗဟိုအလုပ်အမှုဆောင်အဖွဲ့ရဲ့ ထုတ်ပြန်ချက်မှာ ဖော်ပြပါတယ်။ 

3 months Ago
More News
Up