အန်တိုနီယို ဂူတာရပ်စ်

September 21, 2022

ကလေးငယ်များအား စစ်ကောင်စီတပ်က ရဟတ်ယာဉ်ဖြင့် ပစ်ခတ်တိုက်ခိုက်ခဲ့သည့်အပေါ် ကုလအတွင်းရေးမှူးချုပ် အပြင်းအထန်ရှုတ်ချ

ကလေးငယ် ၁၁ ဦးအပါအဝင် ၁၃ ဦးသေဆုံးခဲ့ရတဲ့ လက်ယက်ကုန်းကျေးရွာက စာသင်ကျောင်းကို မြန်မာစစ်တပ်ရဲ့အကြမ်းဖက် တိုက်ခိုက်မှုအပေါ် ကုလသမဂ္ဂအတွင်းရေးမှူးချုပ် အန်တိုနီယိုဂူတာရက်စ်က  စက်တင်ဘာလ ၂၀ ရက်မှ အပြင်းအထန်ရှုတ်ချလိုက်ပါတယ်။

စစ်ကိုင်းတိုင်း၊ ဒီပဲယင်းမြို့နယ်၊ လက်ယက်ကုန်းကျေးရွာရှိ စာသင်ကျောင်းကို စစ်ကောင်စီတပ်က စက်တင်ဘာလ ၁၆ ရက်နေ့မှာ ရဟတ်ယာဉ်ပေါ်ကနေ ပစ်ခတ်ခဲ့သလို မြေပြင်ကနေလည်း စစ်သားတွေက သေနတ်နဲ့ပစ်ခတ်ဝင်ရောက်တိုက်ခိုက် အကြမ်းဖက်မှု ကျူးလွန်ခဲ့တာနဲ့ပတ်သက်ပြီး ကုလသမဂ္ဂအကြီးအကဲရဲ့ ပြောရေးဆိုခွင့်ရှိသူက ထုတ်ပြန်လိုက်တာပါ။

လက်ယက်ကုန်းမှာ မြန်မာစစ်တပ်ရဲ့တိုက်ခိုက်မှုကြောင့် သေဆုံးခဲ့ရတဲ့ကလေးငယ်တွေအတွက် အလေးအနက်ဝမ်းနည်းရပါကြောင်း ကုလသမဂ္ဂအတွင်းရေးမှူးချုပ်က ထုတ်ပြန်ချက်မှာ ပြောထားပါတယ်။

“လက်နက်ကိုင်တိုက်ပွဲတွေ ဖြစ်ပွားနေချိန်မှာတောင် စာသင်ကျောင်းတွေဟာ ကလေးငယ်တွေအတွက် အန္တရာယ်ကင်းတဲ့ ပညာသင်ကြားရာနေရာဖြစ်ရပါမယ်။ စာသင်ကျောင်းနဲ့ ဆေးရုံတွေကို တိုက်ခိုက်တာဟာ နိုင်ငံတကာလူသားချင်းစာနာထောက်ထားမှုဆိုင်ရာဥပဒေမှာ ဖော်ပြထားတဲ့ဆိုးရွားပြင်းထန်တဲ့ ဥပဒေချိုးဖောက်မှု ၆ ချက်ထဲက တစ်ခုဖြစ်ပြီး ကုလသမဂ္ဂလုံခြုံရေးကောင်စီက  အပြင်းအထန်ဆန့်ကျင်ရှုတ်ချတယ်” လို့ ဂူတာရက်စ်က ပြောပါတယ်။

မြန်မာနိုင်ငံအတွင်းမှာ နိုင်ငံတကာ ဥပဒေတွေကို ချိုးဖောက်ကျူးလွန်းနေသူတွေဟာ သူတို့ရဲ့ ပြစ်မှုတွေအတွက် မလွဲမသွေတာဝန်ခံရမယ်လို့လည်း မစ္စတာဂူတာရက်စ်က ပြောပါတယ်။

နိုင်ငံတကာလူသားချင်းစာနာထောက်ထားမှုဆိုင်ရာဥပဒေအရ တိုက်ပွဲဝင်သူတွေဟာ ကလေးငယ်တွေအပါအဝင် အရပ်သားတွေနဲ့ အရပ်သားပိုင်ပစ္စည်းတွေကို ပစ်မှတ်ထားတိုက်ခိုက်ဖျက်ဆီးခြင်းမပြုရဘူးဆိုတာကိုလည်း ကုလသမဂ္ဂ ထုတ်ပြန်ချက်မှာ ထပ်မံသတိပေးဖော်ပြထားပါတယ်။

ကုလသမဂ္ဂကလေးများရန်ပုံငွေအဖွဲ့ UNICEF ကလည်း လက်ယက်ကုန်းမှာ တိုက်ခိုက်ခံခဲ့ရတဲ့ကျောင်းက အနည်းနောက်ထပ် ၁၅ ဦး ပျောက်ဆုံးနေကြောင်း သတင်းထုတ်ပြန်ထားပါတယ်။

ပျောက်ဆုံးနေသူတွေကို ဖမ်းဆီးထားပါက အန္တရာယ်ကင်းစွာ ချက်ချင်းပြန်လွှတ်ပေးဖို့၊ ကျောင်းတွေဟာ အန္တရာယ်ကင်းတဲ့နေရာဖြစ်ဖို့၊ ကလေးသူငယ်တွေကို တိုက်ခိုက်ခြင်းမပြုဖို့တို့ကိုလည်း UNICEF က တောင်းဆိုထားပါတယ်။

ကျောင်းထဲမှာ PDF တွေ ပုန်းအောင်းနေတာကြောင့် ဝင်ရောက်တိုက်ခိုက်ခဲ့တာလို့ ဒီဖြစ်စဉ်နဲ့ ပတ်သက်ပြီး စစ်တပ်ပိုင် မြဝတီသတင်းဌာနက သတင်းထုတ်ပြန်ထားပါတယ်။ 

2 months Ago

April 25, 2022

ကုလအတွင်းရေးမှူးချုပ်ခရီးစဉ်၌ ခိုင်မာသည့်အထောက်အပံ့ရရန် ယူကရိန်း မျှော်လင့်

ကုလသမဂ္ဂ အတွင်းရေးမှူးချုပ် အန်တိုနီယို ဂူတာရပ်စ် ဒီရက်ပိုင်း ခရီးစဉ်အတွင်း ယူကရိန်းအတွက် ခိုင်မာတဲ့ အထောက်အပံ့တွေ ရရှိဖို့ မျှော်လင့်ထားတယ်လို့ သမ္မတ ဇလန်းစကီးက ပြောပါတယ်။

စနေနေ့က ကီယက်ဗ်မြို့ မြေအောက်ရထားဘူတာမှာ ပြုလုပ်ခဲ့တဲ့ သတင်းစာရှင်းလင်းပွဲမှာ သတင်းထောက်တွေက မေးမြန်းစဉ်မှာ သမ္မတ ဇလန်းစကီးက အခုလို ပြောလိုက်တာပါ။

ကုလသမဂ္ဂအကြီးအကဲဟာ ဧပြီလ ၂၆ နဲ့ ၂၈ ရက်နေ့တွေမှာ ရုရှားသမ္မတ ဗလာဒီမာပူတင်၊ ယူကရိန်း သမ္မတဇလန်းစကီးတို့နဲ့ သက်ဆိုင်ရာ နိုင်ငံတွေမှာ သွားရောက်တွေ့ဆုံဖို့ ရှိပါတယ်။ 

သမ္မတဇလန်းစကီးက “ယူကရိန်းကို လာတဲ့အခါကျရင် သူနဲ့ တွေ့ဆုံဆွေးနွေးပါမယ်။ သူ့ရဲ့ လက်ရှိ ရပ်တည်ချက်လည်း အများကြီး ပြောင်းလဲသွားနိုင်တယ်လို့ ထင်ပါတယ်။ အထူးသဖြင့် ယူကရိန်းဘက်က အပြည့်အ၀ ထောက်ခံမယ်လို့ မျှော်လင့်ပါတယ်”လို့ ပြောပါတယ်။ 

ရုရှားကို မသွားခင်မှာ ယူကရိန်းကို အရင်လာပြီး စစ်ဘေးသင့်နေတဲ့ ပြည်သူတွေ၊ အသတ်ခံနေရတဲ့ ပြည်သူတွေ၊ ညှဉ်းပန်းနှိပ်စက်ခံနေရတဲ့ ပြည်သူတွေကို လာကြည့်သင့်တယ်လို့လည်း သမ္မတ ဇလန်းစကီးက ပြောပါတယ်။ 

ဒါပေမဲ့ ဂူတာရပ်စ်ဟာ ဧပြီ ၂၆ ရက်နေ့ကျရင် ရုရှားနိုင်ငံ မော်စကိုဆီ သွားရောက်ပြီး ရုရှားနိုင်ငံခြားရေးဝန်ကြီးနဲ့ တွေ့ဆုံဖို့ ရှိတဲ့အကြောင်း ကုလအတွင်းရေးမှူးချုပ်ရုံးက သောကြာနေ့မှာ အတည်ပြုထားပါတယ်။ 

ယူကရိန်း ခရီးစဉ်မှာတော့ ယူကရိန်းနိုင်ငံခြားရေးဝန်ကြီး၊ ကုလသမဂ္ဂအဖွဲ့အစည်းတွေနဲ့ တွေ့ဆုံပြီး ယူကရိန်း ပြည်သူတွေအတွက် လူသားချင်းစာနာမှုအကူအညီပေးရေး ကိစ္စတွေကို ဆွေးနွေးမယ်လို့ ဂူတာရပ််စ်ရဲ့ ပြောရေးဆိုခွင့် ရှိသူက ပြောပါတယ်။

7 months Ago
More News
Up