အန်တိုနီယိုမာရှယ်

August 18, 2020

မန်ယူနိုက်တက် တိုက်စစ်မှူး ၃ ဦးကို လူကာကူ ချီးကျူး

အင်တာမီလန်အသင်းကို ယူရိုပါလိဂ်ပြိုင်ပွဲရဲ့ ဗိုလ်လုပွဲအဆင့်ကို ရောက်ရှိအောင် ကူညီပေးခဲ့ပြီးနောက် တိုက်စစ်မှူး လူကာကူဟာ မန်ချက်စတာယူနိုက်တက်အသင်းရဲ့ တိုက်စစ်သုံးဖော်ဖြစ်တဲ့ မဆင်ဂရင်းဝုဒ်၊ မားကပ်ရက်ရှ်ဖို့ဒ်နဲ့ အန်တိုနီယိုမာရှယ်တို့ကို ထုတ်ဖော်ချီးကျူးလိုက်ပါတယ်။ မန်ယူနိုက်တက်အသင်းဟာ ယူရိုပါလိဂ်ဗိုလ်လုပွဲမှာ လူကာကူရဲ့ အင်တာမီလန်အသင်းနဲ့ တွေ့ဆုံဖို့ သတင်းကြီးခဲ့ပေမယ့် ဆီဗီလာအသင်းကို ရှုံးနိမ့်ခဲ့တာကြောင့် ဆီမီးဖိုင်နယ်အဆင့်နဲ့သာ ကျေနပ်ခဲ့ရပါတယ်။ လူကာကူရဲ့ အင်တာမီလန်အသင်းကတော့ ရှက်တာအသင်းကို ၅ ဂိုးပြတ်နဲ့ အနိုင်ရရှိခဲ့တာကြောင့် ဖိုင်နယ်ကို ရောက်ရှိသွားခဲ့ပြီဖြစ်ပြီး ဒီပွဲမှာ လူကာကူက ၂ ဂိုး သွင်းယူပေးနိုင်ခဲ့ပါတယ်။ ဆီမီးဖိုင်နယ်အဆင့်ကနေ မန်ယူနိုက်တက်အသင်း ထွက်ခွာခဲ့ရခြင်းနဲ့ပတ်သက်လို့ မေးမြန်းခဲ့ရာမှာ ဘယ်လ်ဂျီယံ တိုက်စစ်မှူးက “ယူနိုက်တက်အသင်းက အကောင်းဆုံး ကြိုးစားခဲ့ပါတယ်။ သူတို့အတွက် တကယ်ကောင်းတဲ့ ဘောလုံးရာသီတစ်ခုကို ပိုင်ဆိုင်နိုင်ခဲ့ပါတယ်။ နည်းပြနဲ့ ကစားသမားတွေအားလုံး အကောင်းဆုံး ကြိုးစားခဲ့တာပါ။ သူတို့မှာ ကြောက်စရာကောင်းတဲ့ တိုက်စစ်ကစားသမား ၃ ဦးကို ပိုင်ဆိုင်ထားပါတယ်။ သူတို့ နောက်ရာသီ ပိုကောင်းတဲ့အသင်း ဖြစ်လာမယ်ဆိုတာ ကျနော် လုံးဝသံသယမရှိပါဘူး” လို့ ပြောပါတယ်။ ရှက်တာအသင်းကို ၂ ဂိုးသွင်းယူနိုင်ခဲ့တာကြောင့် ဒီရာသီမှာ လူကာကူရဲ့ သွင်းဂိုးဟာ ၃၃ ဂိုးအထိ ရှိလာပြီ ဖြစ်ပါတယ်။ ယူနိုက်တက်တိုက်စစ်မှူးဟောင်းဟာ အသင်းသစ်နဲ့ ပထမရာသီမှာတင် စံချိန်သစ်တွေ ဖန်တီးနိုင်နေတာဖြစ်ပေမယ့် လက်ရှိအချိန်မှာတော့ ဗိုလ်လုပွဲမှာ ဆီဗီလာအသင်းကို အနိုင်ကစားဖို့ကိုပဲ စဉ်းစားနေတယ်လို့ လူကာကူက ပြောပါတယ်။ “ဒီအချိန်မှာ အရာအားလုံးက အဆင်ပြေနေပေမယ့် ကျနော်တို့ ဆက်လက်တိုက်ပွဲဝင်သွားဖို့ လိုအပ်ပါတယ်။ စံချိန်တွေဆိုတာ တစ်ချိန်ချိန်မှာ ချိုးဖြတ်ခံရမှာဖြစ်ပြီးတော့ ကျနော်တို့ အနိုင်ရလဒ်ကိုပဲ လိုချင်ပါတယ်။ ကျနော်တို့ ကိုယ့်ကိုယ်ကိုယ် အကောင်းဆုံးဖြစ်အောင် ပြင်ဆင်ပြီး၊ အနားယူကာ ထပ်မံယှဉ်ပြိုင်သွားမှာပါ။ အင်တာမီလန်ဟာ အသင်းလိုက် ကစားပုံကောင်းမွန်သလို ကစားသမားတိုင်းကလည်း အကောင်းဆုံးကြိုးစားနေပါတယ်။” ဒီပွဲ အနိုင်ရလဒ်ကြောင့် အင်တာမီလန်အသင်းဟာ လာမယ့် ၂၂ ရက်မှာ ဆီဗီလာအသင်းနဲ့ ဗိုလ်လုပွဲ ယှဉ်ပြိုင်ကစားရမှာ ဖြစ်ပါတယ်။

6 months Ago

March 12, 2020

691

ယူရို ၂၀၂၀ ပြင်သစ်အသင်းလူစာရင်းတွင် ပါဝင်လိုဟု မာရှယ်ပြော

ယူရို ၂၀၂၀ ပြိုင်ပွဲဝင် ပြင်သစ်အသင်းရဲ့ လူစာရင်းမှာ ပါဝင်လိုတယ်လို့ ယူနိုက်တက် ကွင်းလယ်ကစားသမား အန်တိုနီယိုမာရှယ်က ထုတ်ဖော်ပြောပါတယ်။ မာရှယ်ဟာ မတ် ၈ ရက်က ယှဉ်ပြိုင်ခဲ့တဲ့ မန်ချက်စတာဒါဘီပွဲစဉ်မှာ အသင်းအတွက် အဖွင့်ဂိုး သွင်းယူပေးနိုင်ခဲ့သူ ဖြစ်ပါတယ်။ ဒါကြောင့် သူ့ရဲ့ ဒီရာသီသွင်းဂိုးအရေအတွက်ဟာ ၁၇ ဂိုးအထိ မြင့်တက်လာပြီ ဖြစ်ပါတယ်။ မန်ယူနိုက်တက်နည်းပြ ဆိုးလ်ရှားဟာ ပြီးခဲ့တဲ့ နွေရာသီမှာ အသင်းရဲ့ အဓိကတိုက်စစ်မှူး လူကာကူကို ရောင်းထုတ်ခဲ့ပြီး မာရှယ်ကို အသင်းတိုက်စစ်မှာ ဦးဆောင်ခွင့်ပေးအပ်ခဲ့ပါတယ်။ ပြင်သစ်ကစားသမားကလည်း နည်းပြရဲ့ ယုံကြည်မှုကို သွင်းဂိုးတွေနဲ့အတူ သက်သေပြနေပြီပဲ ဖြစ်ပါတယ်။ မာရှယ်ဟာ ယူနိုက်တက်အတွက် နောက်ဆုံးကစားခဲ့တဲ့ ၅ ပွဲမှာ ၃ ဂိုးအထိ သွင်းယူပေးနိုင်ခဲ့ပြီး ကစားသမားသစ် ဘရူနိုဖာနန်ဒက်စ်နဲ့လည်း တော်တော်လေးအတွဲမိနေတာ တွေ့ရပါတယ်။ ဖာနန်ဒက်စ် ရောက်ရှိလာမှုနဲ့အတူ ပုံမှန်ခြေစွမ်း ပြန်လည်ရရှိလာတဲ့ မန်ယူနိုက်တက်အသင်းဟာ နောက်ဆုံး ၁၀ ပွဲဆက်တိုက် ရှုံးပွဲမရှိခဲ့ဘဲ ချန်ပီယံလိဂ် ဝင်ခွင့်အတွက်လည်း ချဲလ်ဆီးအသင်းနဲ့ ၃ မှတ်အကွာကို ရောက်ရှိလာခဲ့ပြီ ဖြစ်ပါတယ်။ မာရှယ်ဟာ မန်ယူနိုက်တက်အသင်းရဲ့ ချန်ပီယံလိဂ်ဝင်ခွင့်အိပ်မက်ကို အကောင်အထည်ဖော်နိုင်ရေး အကူအညီပေးသွားဖို့ ဆုံးဖြတ်ထားပြီး ယူရိုပြိုင်ပွဲဝင် ပြင်သစ်အသင်းအတွက် ပွဲထွက်ခွင့်တနေရာ ရရှိဖို့ကိုလည်း ပစ်မှတ်ထားနေပါတယ်။ ယူရိုဖလားပြိုင်ပွဲဝင် ပြင်သစ်အသင်းမှာ ပါဝင်ခွင့်ရရှိရေးနဲ့ ပတ်သက်ပြီး မေးမြန်းခဲ့ရာမှာ “ဟုတ်ကဲ့၊ ကျနော် ဒီပြိုင်ပွဲအကြောင်းကို တွေးနေမိပါတယ်။ ကျနော် ယူရိုပြိုင်ပွဲကို ဝင်ရောက်ယှဉ်ပြိုင်ချင်ပါတယ်။ ဒါပေမဲ့ ကျနော်တို့ စောင့်ကြည့်ရပါမယ်။ ကျနော်ကတော့ ကိုယ်လုပ်စရာရှိတာတွေ လုပ်ဆောင်နေပါတယ်။ ဒါပါပဲ” လို့ မာရှယ်က ပြန်ဖြေခဲ့ပါတယ်။ “ကျနော် ယူနိုက်တက်အသင်း ချန်ပီယံလိဂ် ဝင်ခွင့်ရရှိရေးအတွက် အစွမ်းကုန် ကြိုးစားပေးနေပါတယ်။ ကျနော် ဒီရာသီအတွင်း ဂိုးတွေ သွင်းနိုင်သလောက် သွင်းယူပေးသွားဖို့ကိုလည်း ပစ်မှတ်ထားနေပါတယ်” လို့ သူက ဆက်လက်ပြောပါတယ်။ မာရှယ်ဟာ ၂၀၁၆ ခုနှစ် ယူရိုဗိုလ်လုပွဲရောက် ပြင်သစ်အသင်း လူစာရင်းမှာ ပါဝင်ခဲ့ပြီး ပေါ်တူဂီအသင်းကို တဂိုး ဂိုးမရှိနဲ့ ရှုံးနိမ့်ခဲ့တဲ့ ဗိုလ်လုပွဲမှာ လူစားဝင်ကစားခွင့် ရရှိခဲ့ပါတယ်။ ဒါပေမဲ့ သူဟာ ၂၀၁၈ ခုနှစ် မတ်ကတည်းက ဒက်ချမ့်ရဲ့လက်ရွေးစင်အသင်း လူစာရင်းမှာ ပါဝင်ခွင့် ဆုံရှုံးခဲ့ပါတယ်။ မာရှယ်ဟာ နိုင်ငံအသင်းအတွက် ၁၈ ပွဲ ကစားခွင့်ရရှိထားပေမယ့် ၁ ဂိုးသာ သွင်းယူနိုင်ခဲ့သူ ဖြစ်ပါတယ်။ သူဟာ ပြင်သစ်အသင်း ဗိုလ်စွဲခဲ့တဲ့ ၂၀၁၈ ခုနှစ် ကမ္ဘာ့ဖလားပြိုင်ပွဲမှာလည်း နိုင်ငံ့အသင်းအတွက် ကစားခွင့် ဆုံးရှုံးခဲ့ပါတယ်။

12 months Ago