မြန်မာပြည်သူတွေရဲ့ လူ့အခွင့်အရေးကို ကာကွယ်ပေးဖို့၊ လူသားချင်းစာနာမှု အကူအညီပေးဖို့၊  အားလုံးပါဝင် ကိုယ်စားပြုခွင့်ရှိတဲ့ ဒီမိုကရေစီအရေးလှုပ်ရှားမှုကို အားပေးထောက်ခံဖို့ မြန်မာပြည်သူတွေနဲ့အတူ ဆက်လက်လုပ်ဆောင်သွားမယ်လို့ အမေရိကန်နိုင်ငံခြားရေးဝန်ကြီး အန်တိုနီဘလင်ကင်က ထပ်လောင်း ပြောကြားလိုက်ပါတယ်။

နိုင်ငံခြားရေးဝန်ကြီး ဘလင်ကန်က  မြန်မာ့ဒီမိုကရေစီအရေးလှုပ်ရှားသူတွေနဲ့ အွန်လိုင်းကနေ တွေ့ဆုံဆွေးနွေးရာမှာ ပြောဆိုခဲ့တာလို့   အမေရိကန်နိုင်ငံခြားရေးဝန်ကြီးဌာန  ပြောခွင့်ရပုဂ္ဂိုလ် နက်ဒ်ပရိုက်စ်က   ဖေဖော်ဝါရီ ၃ ရက်မှာ ကြေညာချက် ထုတ်ပြန်ပြောပါတယ်။ 

ဝန်ကြီးအန်တိုနီဘလင်ကန်ဟာ မြန်မာနိုင်ငံမှ တက်ကြွလှုပ်ရှားသူတွေနဲ့ဆွေးနွေးခဲ့ရာမှာ လွန်ခဲ့တဲ့ တစ်နှစ်က စစ်အာဏာသိမ်းယူခဲ့ချိန်ကစလို့ မြန်မာစစ်တပ်ရဲ့ ရက်စက်ကြမ်းကြုတ်တဲ့ အကြမ်းဖက်မှုတွေကို ရင်ဆိုင်ရင်း မိမိတို့ရဲ့ တိုင်းပြည်ကို ဒီမိုကရေစီလမ်းကြောင်းပေါ်သို့ ပြန်လည်ရောက်ဖို့ ကြိုးပမ်းနေကြသူတွေရဲ့  ကြိုးပမ်းအားထုတ်မှုတွေအကြောင်းကို ကြားသိခဲ့ရတယ်လို့ ဆိုပါတယ်။

မြန်မာအကျပ်အတည်းကို ဖြေရှင်းရာမှာ လူ့အခွင့်အရေးချိုးဖောက်မှုတွေနဲ့ နှိပ်စက်ကလူပြုမှုတွေ အဆုံးသတ်ရေး၊ မတရားဖမ်းဆီးထိန်းသိမ်းခံထားရသူအားလုံးကို ပြန်လွှတ်ပေးရေးနဲ့ မြန်မာနိုင်ငံကို ဒီမိုကရေစီလမ်းကြောင်းပေါ်သို့ ပြန်လည်ရောက်ရှိစေရေးတို့အတွက် စစ်အာဏာရှင်ကိုဖိအားပေးဖို့၊ ပစ်မှတ်ထားအရေးယူပိတ်ဆို့မှုတွေအပါအဝင်  အမေရိကန်အစိုးရရဲ့ သံတမန်ရေးနဲ့ စီးပွားရေးဆိုင်ရာ လုပ်ဆောင်ချက်တွေ အကြောင်း  နိုင်ငံခြားရေးဝန်ကြီးက ရှင်းလင်းပြောကြားခဲ့တယ်လို့ ဆိုပါတယ်။ 

မြန်မာစစ်တပ်ရဲ့ ကြမ်းကြုတ်ရက်စက်တဲ့ လုပ်ရပ်တွေ အကြောင်းကိုလည်း သိရှိမှတ်သားခဲ့ပြီး တာဝန်ရှိသူတွေ တာဝန်ခံ၊ တာဝန်ယူမှုရှိစေဖို့ အရေးတကြီးလိုအပ်နေတယ်လို့ ဝန်ကြီး ဘလင်ကန်က အလေးပေး ပြောကြားခဲ့ကြောင်း အမေရိကန် နိုင်ငံခြားရေးဌာနရဲ့ ထုတ်ပြန်ချက်မှာ ဖော်ပြပါတယ်။ 

မြန်မာနိုင်ငံမှာ စစ်တပ်အာဏာသိမ်းတဲ့ ၁ နှစ်ပြည့်ချိန် ဇန်နဝါရီ ၃၁ ရက်က  မြန်မာစစ်အုပ်စုနဲ့ ဆက်နွှယ်နေတဲ့ လူပုဂ္ဂိုလ် ၇ ယောက်နဲ့ အဖွဲ့အစည်း ၂ ခုကို အမေရိကန်အစိုးရက ဒဏ်ခတ်ပိတ်ဆို့အရေးယူမှုတွေ ချမှတ်ခဲ့ပါတယ်။

တပ်မတော်အနေနဲ့  အာဏာကိုစွန့်လွှတ်ပြီး  ပြည်သူလူထု ရွေးကောက်တင်မြှောက်ထားတဲ့ အစိုးရကို အာဏာပြန်ပေးဖို့  အမေရိကန်  နိုင်ငံခြားရေးဝန်ကြီး အန်တိုနီဘလင်ကင်က တိုက်တွန်း တောင်းဆိုလိုက်ပါတယ်။ 

မတရားဖမ်းဆီးထိန်းသိမ်းထားသူအားလုံးကို ပြန်လွှတ်ပေးဖို့၊ ဆက်သွယ်ရေးနဲ့ လူမှုကွန်ရက်မီဒီယာအပေါ် ကန့်သတ်ထားမှုတွေကို ဖယ်ရှားပေးဖို့၊ ပြည်သူတွေအပေါ် အကြမ်းဖက်ခြင်းမှ ရှောင်ရှားဖို့လည်း  ဖေဖော်ဝါရီ ၁၁ ရက်နေ့မှာ ကြေညာချက်ထုတ်ပြန်  တိုက်တွန်းလိုက်ပါတယ်။

ဖေဖော်ဝါရီ ၁ ရက်နေ့ အာဏာသိမ်းမှုကိုဦးဆောင်ခဲ့တဲ့ ဗိုလ်ချုပ်မှူးကြီးမင်းအောင်လှိုင်ပါအဝင် တပ်မတော်ထိပ်တန်းခေါင်းဆောင် ၁၀ ယောက်နဲ့ တပ်မတော်နဲ့ ဆက်နွှယ်တဲ့ ကုမ္ပဏီလုပ်ငန်းသုံးခုကိုလည်း  အမေရိကန်အစိုးရက ဒဏ်ခတ်ပိတ်ဆို့ အရေးယူထားပါတယ်။ 

ဒါဟာ လက်ရှိနဲ့ အရင်တပ်မတော်အရာရှိတွေကို ပစ်မှတ်ထားအရေးယူတာဖြစ်ပြီး  မြန်မာပြည်သူလူထု သို့မဟုတ် ပြည်သူလူထုရဲ့ စီပွားရေးကို ပစ်မှတ်ထားတာ မဟုတ်ကြောင်း မြန်မာပြည်သူလူထုရဲ့ လူသားချင်းစာနာမှုဆိုင်ရာ အခက်အခဲမဖြစ်ပေါ်စေဖို့ အသေအချာပြည်လည်သုံးသပ်ဆောင်ရွက်ခဲ့ကြောင်းလည်း နို်ငငံခြားရေးဝန်ကြီးက ပြောပါတယ်။

ဖေဖော်ဝါရီလ ၁ ရက်နေ့ ဖြစ်စဉ်ဟာ အာဏာသိမ်းမှုတစ်ရပ်ဖြစ်ကြောင်း ရှင်းရှင်းလင်းလင်းသိပြီးဖြစ်လို့ အမေရိကန်အနေနဲ့  ဒီအတိုင်းထိုင်ကြည့်နေမှာ မဟုတ်ကြောင်းနဲ့ အာဏာသိမ်းမှုဟာ နိုဝင်ဘာ ၂၀၂၀ ရွေးကောက်ပွဲအတွင်း ပြသခဲ့ကြတဲ့ မြန်မာနိုင်ငံသားတို့ရဲ့ ဆန္ဒကိုငြင်းပယ်ဖို့ ကြိုးပမ်းမှုဖြစ်တယ်လို့ ဆိုပါတယ်။ 

တပ်မတော်ရဲ့လုပ်ရပ်တွေကို  ကမ္ဘာအနှံ့ရှိ မိတ်ဖက်နိုင်ငံတွေ၊ မဟာမိတ်တွေနဲ့အတူ ကန့်ကွက်ရှုတ်ချပြီး ငြိမ်းချမ်းစွာဆန္ဒပြနေတဲ့ပြည်သူတွေ၊ လုပ်ငန်းခွင်မသွားဘဲသပိတ်မှောက်နေတဲ့ ဝန်ထမ်းတွေနဲ့အတူ  အမေရိကန်ပြည်ထောင်စုက ရပ်တည်တယ်လို့လည်း နိုင်ငံခြားရေး ဝန်ကြီးက ပြောပါတယ်။

မြန်မာနိုင်ငံ တဝန်းမှာ စစ်အစိုးရကို ဆန့်ကျင်ကန့်ကွက်တဲ့ လူထူဆနန္ဒပြပွဲတွေ အရှိန်အဟုန်မြင့် ဆက်လက်ဖြစ်ပွားနေပြီး အာဏာသိမ်း စစ်အစိုးရက  ဆန္ဒပြပြည်သူတွေကို ဖမ်းဆီးမှုတွေလည်း ပိုမိုပြုလုပ်လာနေပါတယ်။

Photo-State Department