အန်စီအေစာချုပ်

April 20, 2021

အာဏာသိမ်းစစ်တပ်က အန်စီအေစာချုပ်တစ်ခုလုံးကို ချိုးဖောက်နေဟု KNLA တပ်မဟာ (၅) ကြေညာ

ဗိုလ်ချုပ်မှူးကြီး မင်းအောင်လှိုင် ခေါင်းဆောင်တဲ့ စစ်တပ်ဟာ အန်စီအေ တစ်နိုင်ငံလုံးပစ်ခတ်တိုက်ခိုက်မှု ရပ်စဲရေးသဘောတူ စာချုပ်တစ်ခုလုံးကို ဖောက်ဖျက်နေတယ်လို့  ကေအန်ယူ -မူ‌တြော်ခရိုင် KNLA တပ်မဟာ (၅)က ထုတ်ပြန်ကြေညာပါတယ်။

စစ်တပ်ရဲ့ လုပ်ရပ်တွေဖြစ်တဲ့ တိုင်းပြည်အာဏာကို မတရားသိမ်းပိုက်ထားတာ၊ နိုင်ငံ့ ခေါင်းဆောင်တွေ၊ နိုင်ငံရေးသမားတွေ၊ တက်ကြွလှုပ်ရှားသူတွေ၊ ကျောင်းသားပြည်သူတွေကို အကြမ်းဖက်ဖမ်းဆီး ပစ်ခတ်သတ်ဖြစ်နေတာတွေကသာ အန်စီအေစာချုပ်ပါ အချက်တွေတင်မက စာချုပ်တစ်ခုလုံးကို ချိုးဖောက်နေတာဖြစ်တယ်လို့ ထုတ်ပြန်ချက်မှာဖော်ပြပါတယ်။

အာဏာသိမ်းစစ်အုပ်စုဟာ ပြီးခဲ့တဲ့ မတ်လ ၂၇ ရက် ဖက်ဆစ်တော်လှန်ရေးနေ့ကပြီး  KNLAတပ်မဟာ (၅) ထိန်းချုပ်နယ်မြေကို လေယာဉ်နဲ့ ဗုံးကြဲတိုက်ခိုက်မှုတွေပြုလုပ်ခဲ့တဲ့ အတွက် ကရင်ကျေးရွာတွေက ပြည်သူ တချို့ ထိခိုက်ဒဏ်ရာရ သေဆုံးမှုရှိခဲ့သလို သောင်းနဲ့ချီတဲ့ရွာသား တွေလည်း ဘေးလွတ်ရာ ထွက်ပေးတိမ်းရှောင်နေကြရတာပါ။

အဲဒီကိစ္စနဲ့ပတ်သက်လို့ စစ်ကောင်စီပြောရေးဆိုခွင့်ရှိသူ ဗိုလ်ချုပ်ဇော်မင်းထွန်းက KNLAတပ်မဟာ(၅)အနေနဲ့ ငြိမ်းချမ်းရေးမလိုလားဘဲ  ခေါင်းမာနေပြီး အန်စီအေ စာချုပ်ကို ချိုးဖောက်နေတာကြောင့်  လေယာဉ်နဲ့ဗုံးကြဲသတိပေးခဲ့တာလို့ ပြောဆိုထားပါတယ်။ 

ဒါ့အပြင် လူအသေအပျောက်နည်းစေဖို့ လေကြောင်းကနေ ဗုံးကြဲတိုက်ခိုက်တာလို့လည်း ပြီးခဲ့တဲ့ နေပြည်တော်သတင်းစာရှင်းလင်းပွဲမှာ ဗိုလ်မှူးချုပ်ဇော်မင်းထွန်းက ပြောပါတယ်။  

9 months Ago

February 28, 2020

အန်စီအေစာချုပ်လက်မှတ်ထိုးထားသည့်  RCSS/SSA နှင့် မြန်မာတပ်မတော် တိုက်ပွဲဖြစ် 

အစိုးရနဲ့ တနိုင်ငံလုံးပစ်ခတ်တိုက်ခိုက်မှုရပ်စဲရေးသဘောတူ စာချုပ် (အန်စီအေ) ချုပ်ဆို ထားတဲ့ ရှမ်းပြည်တပ်မတော် တောင်ပိုင်း RCSS/SSA တပ်ဖွဲ့ဝင်တွေနဲ့ မြန်မာ တပ်မတော် လက်အောက်ခံတပ်ဖွဲ့တွေအကြား ရှမ်းပြည်တောင်ပိုင်း မိုင်းကိုင်မြို့နယ် ဟမ်းဟိုင်းကျေးရွာမှာ  တိုက်ပွဲတွေ ဖြစ်နေပါတယ်။ RCSS/SSA တပ်ဖွဲ့ဝင်တွေဟာ လွိုင်တွမ်းတောင်ပေါ်မှာ အခြေချလှုပ်ရှားသွားလာနေစဉ်  မြန်မာ့တပ်မတော်ဘက်က ဖေဖော်ဝါရီ ၂၇ ရက် မနက် ၇ နာရီ ၅၀ မိနစ်လောက်မှာ ဝင်ရောက်ပစ်ခတ်ခဲ့တယ်လို့  ပြောရေးဆိုခွင့်ရှိသူ ဒုဗိုလ်မှူးကြီး အုမ်ခေးက ဒီဗွီဘီကို ပြောပါတယ်။  “ကျနော်တို့ တပ်ဖွဲ့ဝင်တွေက အဲဒီတောင်ကုန်းနားမှာ ဟိုးအရင် အန်စီအေ လက်မှတ် မထိုးခင်ကတည်းက လှုပ်ရှားသွားလာ အခြေချနေတာပါ။  မနေ့မနက်ကတော့ မြန်မာ့တပ်မတော် ဘက်က မပြောမဆိုနဲ့ လာပြီးပစ်ခတ်တယ်။ အဲဒီတော့ နှစ်ဘက်အပြန်အလှန်ပစ်ခတ်မှု ရှိတယ်။ မနေ့က တနေကုန်၊ လေယာဉ်ပျံ တစီးလည်း လာဝဲပျံသွားတယ်။ ဒီကနေ့ မနက်မှာတော့ တိုက်ပွဲ ရှိတယ်လို့ အစီရင်ခံလာတာ မရှိပေမယ့် တပ်မတော်ဘက်က လူအင်အားထပ်ဖြည့်ပြီး တောင်ကုန်း တဝိုက်မှာ နေရာလာယူထားကြတယ်။ မော်တာနဲ့ ပစ်လာတယ်။ အချိန်မရွေး ပစ်ခတ်မှုပြန်ဖြစ်နိုင်တဲ့သဘောရှိတယ်။” လာရောက်ပစ်ခတ်တဲ့ထဲမှာ ခမရ ၅၂၅၊  ၅၂၀၊ ၅၇၅၊ ၅၇၄ အစရှိတဲ့ တပ်ရင်းလက်အောက်ခံတပ်ဖွဲ့ဝင်တွေပါဝင်ပြီး အင်အား ၄၀၀ ကျော်က အလှည့်အပြောင်းနဲ့ တိုက်နေတယ်လို့ ဆိုပါတယ်။  ပစ်ခတ်မှုကြောင့် ထိခိုက်ဒဏ်ရာရတာ ရှိမရှိတော့ မစိစစ်ရသေးဘူးလို့ ဆိုပါတယ်။  ဒီကိစ္စနဲ့ပတ်သက်ပြီး ခိုလမ်မြို့မှာရှိတဲ့ RCSS ဆက်ဆံရေးရုံးကတော့ အရှေ့အလယ်ပိုင်း တိုင်းစစ်ဌာနချုပ် တာဝန်ရှိသူဆီအကြောင်းကြားထားတယ်လို့ သိရပါတယ်။   ဒီပစ်ခတ်မှုဟာ ယုံကြည်မှုပျက်ပြားစေပြီး ငြိမ်းချမ်းရေးလုပ်ငန်းစဉ်ပါ ထိခိုက်နိုင်တဲ့ အတွက်  နှစ်ဦးနှစ်ဘက် အမြန်ဆုံးတွေ့ဆုံဆွေးနွေး သင့်တယ်လို့ ဆိုပါတယ် ။  သူတို့အနေနဲ့ ငြိမ်းချမ်းရေးကို လိုလားပြီး UPDJC  ပြည်ထောင်စုငြိမ်းချမ်းမှု ဆွေးနွေးရေး ပူးတွဲကော်မတီ အစည်းအဝေးနဲ့ JMC ပစ်ခတ်တိုက်ခိုက်မှုရပ်စဲရေးဆိုင်ရာ ပူးတွဲ စောင့်ကြည့်ရေးကော်မတီ အစည်းအဝေးတွေ ဆက်သွားဖို့  ဒီလ ၂၄ ရက်နေ့ ဗဟို ကော်မတီအစည်းအဝေးမှာ ဆုံးဖြတ်ထားပေမယ့်လည်း တပ်မတော်ကလာရောက် ပစ်ခတ်တဲ့ကိစ္စ မဖြေရှင်းနိုင်ရင်တော့ အဆိုပါဆုံးဖြတ်ချက်ကို ပြန်သုံးသပ်ရမယ်လို့ ဗိုလ်မှူးကြီး အုမ်ခေးက ပြောပါတယ်။ ပြည်ထောင်စုငြိမ်းချမ်းရေးညီလာခံ ၂၁ ရာစု ပင်လုံ စတုထ္ထအစည်းအဝေးကို  သတ်မှတ်ထားတဲ့အချိန်ကာလထဲမှာ ကျင်းပနိုင်ဖို့နဲ့ ရှမ်းလူမျိုးအလိုက် အမျိုးသားအဆင့် နိုင်ငံရေးဆွေးနွေးပွဲတွေ ဆက်ပြီးကျင်းပဖို့ ကြိုးစားနေကြချိန်မှာ ခုလိုပစ်ခတ်မှုတွေ ပေါ်ပေါက် လာတာဖြစ်ပါတယ်။  ရှမ်းပြည်တပ်မတော် RCSS/SSA ဟာ အစိုးရနဲ့ အန်စီအေ စာချုပ်လက်မှတ်ထိုးထားတာ ၄ နှစ်ကျော်ခဲ့ပြီ ဖြစ်ပေမယ့်လည်း ငြိမ်းချမ်းရေးလုပ်ငန်းစဉ်ဆွေးနွေးပွဲမှာ တစ်ဆို့မှုတွေရှိနေဆဲဖြစ်ပြီး အောက်ခြေပိုင်းမှာလည်းထိတွေ့ ပစ်ခတ်မှုတွေ ရှိနေပါတယ်။ ဓာတ်ပုံ- TaiFreedomShan    
2 years Ago
Up