အန်တိုနီယာ

March 14, 2019

နိုင်ငံ့ဂုဏ်ဆောင် ကယန်းအမျိုးသမီးဖိုက်တာ အန်တိုနီယာ

[caption id="attachment_317888" align="alignleft" width="372"] ဓာတ်ပုံ - Bozhena Antoniyar[/caption] ကိုယ်ခံပညာပေါင်းစုံလို့ခေါ်တဲ့ Mixed Martial Arts (MMA) ဖိုက်တာ မြန်မာအမျိုးသမီး ကယန်းတိုင်းရင်းသူ ဘိုဇီနာအန်တိုနီယာဟာ ပြီးခဲ့တဲ့ One Championship ပြိုင်ပွဲမှာ မလေးရှားက အော်ဒရေလော်ရာ ဘိုနီဖေစ့်ကို ဒုတိယအချီမှာ ဒိုင်ပွဲရပ်နဲ့ အနိုင်ယူခဲ့ပါတယ်။ အခုလို အနိုင်ရလိုက်တဲ့အတွက် သူဟာ မြန်မာနိုင်ငံရဲ့ ပထမဆုံး အမျိုးသမီး အမ်အမ်အေ ဖိုက်တာ ဖြစ်လာပြီး မြန်မာနိုင်ငံတဝန်းလုံးက သူ့ကို အားပေးတဲ့သူတွေ များပြားလာသလို ကယန်းလူမျိုးတွေကလည်း ချီးကျူးဂုဏ်ပြုခဲ့ကြပါတယ်။ အမ်အမ်အေ ကစားသမားမဖြစ်ခင် လက်ဝှေ့လောကထဲ စတင်ဝင်ရောက်စဉ်က သူ့မိဘတွေ ဒါကို သဘောမတွေ့ဘဲ တားဆီးပိတ်ပင်ခဲ့ပါတယ်။ သူဟာ အသက် ၁၆ နှစ်ကတည်းက လက်ဝှေ့လောကထဲကို ဝင်ရောက်ခဲ့သူပါ။ ၃ နှစ်လောက် လက်ဝှေ့ကစားခဲ့ပြီး ခေတ္တအနားယူခဲ့ပါတယ်။ ၂၀၁၈ ခုနှစ်မှာတော့ အမ်အမ်အေ လောကထဲကို ပါဝင်ကစားလာတာဖြစ်တယ်လို့ အန်တိုနီယာက ပြောပါတယ်။ လက်ဝှေ့စတင်ကစားစဉ်က အမျိုးသမီးလည်းဖြစ်သလို လက်ဝှေ့ကစားတာက ဘာကောင်းကျိုးမှ မရှိဘူးဆိုပြီး သူ့မိဘတွေက တားဆီးခဲ့ပါတယ်။ ဒီလိုတားဆီးခဲ့ရတာနဲ့ ပတ်သက်လို့ အန်တိုနီယာရဲ့ဖခင် သန်းလောလီ (ခေါ်) ဦးလောရင်းက အခုလိုပြောပါတယ်။ “အရင်ကတော့ သူ့ကို အားမပေးချင်တာက အဖေကလည်း Boxing မှာ ကစားခဲ့ဖူးတယ်လေ။ ကစားလာဖူးတော့ ရတဲ့အကျိုးရလဒ်တွေက နိုင်သည့်တိုင်အောင်တောင် အရင်ခေတ်က ပြောရမယ်ဆိုရင် ကော်ခွက်တလုံးပဲ ရတယ်ပေါ့။ အဲတော့ သမီးရေ မလုပ်ပါနဲ့ပေါ့။ ဘောလုံးလောက်တော့ ဆက်ကြိုးစားပါ။ သူ့ကို တိုက်တွန်းတယ်ပေါ့နော်။" မိဘတွေက လက်ဝှေ့ထိုးတာကို သဘောမတူဘဲ ဘောလုံးကစားဖို့သာ တိုက်တွန်းခဲ့လို့ ဘောလုံးအားကစားအင်္ကျီဝတ်ပြပြီး မိဘတွေရဲ့မျက်ကွယ်မှာ လက်ဝှေ့သွားလေ့ကျင့်နေခဲ့တယ်လို့ ဖခင်က ပြောပါတယ်။ နောက်ပိုင်း နေပြည်တော်သွားပြီး လက်ဝှေ့ထိုးဖို့ စာချုပ်စာတမ်း ထိုးရတော့မယ့် အချိန်ကျမှ သမီးဟာ သူမသိဘဲ လက်ဝှေ့ကစားနေမှန်း သိခဲ့ရတယ်လို့ ပြောပါတယ်။ “ကန့်ကွက်တဲ့ကြားထဲမှာ သူ့ရဲ့ဝါသနာက ကြီးသွားတာပေါ့။ အဖေကတော့ အတွေ့အကြုံ ယူလာပေးပေါ့နော့်။ နောက်ဆုံး နေပြည်တော်ရောက် ကယားကိုယ်စားပြု သွားတဲ့အချိန်မှာ တခါတည်းကို ထွန်းပေါက်သွားတာ။ နိုင်ငံတော် အားကာဝန်ကြီးက သူ့ကို တခါတည်း ကောက်မွေးစားလိုက်တာ။” လက်ဝှေ့လောကထဲ စဝင်ချိန်မှာ မိဘတွေ သဘောမတူခဲ့ပေမယ့် အခုနောက်ပိုင်းမှာတော့ နားလည်ပေးလာတဲ့အတွက် ကျေးဇူးတင်တယ်လို့ အန်တိုနီယာက ပြောပါတယ်။ “အရင်က သူတို့အမြင်မကျယ်ကြသေးဘူးပေါ့နော်။ ကန့်ကွက်ကြတာပေါ့။ ဒါပေမယ့် ဒီနောက်ပိုင်းမှာ အခုလိုဖြစ်လာတယ်။ အောင်မြင်တဲ့ နေရာတနေရာ ရောက်လာတဲ့အခါကျတော့ သူတို့ အများကြီး ကျမကို နားလည်ပေးလာတာပေါ့နော်။ ဒီအတွက်လည်း ကျေးဇူးအများကြီးတင်ပါတယ်။” အန်တိုနီယာဟာ သူအပါအဝင် မောင်နှမငါးယောက်ရှိပြီး သူက အငယ်ဆုံးသမီး ဖြစ်ပါတယ်။ လွိုင်ကော်မြို့ နာနတ်တောရပ်ကွက်မှာ နေထိုင်ပြီး သူ့ရဲ့ လက်ဝှေ့အားကစား ထူးချွန်ထွန်းပေါက်မှုကြောင့် အားကစားဝန်ကြီးက နေပြည်တော်မှာ ခေါ်ပြီး လေ့ကျင့်ပေးခဲ့ပါတယ်။ [caption id="attachment_317890" align="alignleft" width="430"] ဓာတ်ပုံ - Bozhena Antoniyar[/caption] မြန်မာအမျိုးသမီး အမ်အမ်အေဖိုက်တာ အန်တိုနီယာကို မြန်မာ့စပါးကြီးမြွေ အောင်လအန်ဆန်က လေ့ကျင့်ပေးခဲ့တာဖြစ်ပြီး ရန်ကုန်မှာ ပြီးခဲ့တဲ့ မတ်လ ၈ ရက်က ကျင်းပခဲ့တဲ့  Reign of Valor ပြိုင်ပွဲမှာ မလေးရှားက အော်ဒရေလော်ရာ ဘိုနီဖေ့စ်နဲ့ ထိုးသတ် အနိုင်ရခဲ့တာပါ။ အန်တိုနီယာဟာ ဒုတိယအချီမှာပဲ ပြိုင်ဘက်ကို အနိုင်ယူပြီး One Championship သမိုင်းတလျှောက် အမြန်ဆုံး အလဲထိုးအနိုင်ရရှိသူတဦးအဖြစ် စံချိန်တင်ထားပါတယ်။ ဒါကြောင့် သူ့အနေနဲ့ အမျိုးသမီးလူငယ်တွေကိုလည်း မိမိလုပ်ချင်တဲ့အလုပ်ကို ရည်ရွယ်ချက်ရှိရှိနဲ့ အတားအဆီးတွေရှိလည်း ကြိုးစားကြဖို့ တိုက်တွန်းပြောပါတယ်။ “ကျမအားပေးချင်တာက မိန်းကလေးတွေဆိုပြီးတော့ အမြဲတမ်း ချိုးနှိမ်ခံရတာပေါ့နော်။ အင်အားမရှိဘူး၊ အားနွဲ့တယ်ဆိုတဲ့ဟာကို ယောက်ျားတွေက အခွင့်ကောင်းယူကြတာပေါ့နော်။ ဒီအတွက် ကိုယ့်ကိုယ်ကိုယ် ခုခံဖို့အတွက် ဒီပညာရပ်ကို ပရော်ဖက်ရှင်နယ် မလုပ်နိုင်တောင်မှ ဒီပညာရပ်ကို လေ့လာထားသင့်တာပေါ့နော်။ ပြီးတော့ ဘယ်သူ့ကိုမှ ဂရုစိုက်စရာ မလိုဘူးပေါ့နော်။ ကိုယ်လုပ်ချင်တာရှိတယ်၊ ကိုယ့်ရည်မှန်းချက်တွေ ရှိမယ်ဆိုရင် လုပ်ပစ်လိုက်။ အခုကျတော့ ဘယ်လိုလဲဆိုရင် လမ်းသွားရင်လည်း ကြောက်ရတယ်။ ဘယ်နေရာပဲသွားသွား ကြောက်နေရတယ်ဆိုတော့ ဒါတွေက မဖြစ်သင့်ဘူးပေါ့နော်။ အဲဒီအတွက် ကျမ အားပေးချင်တယ်။  ကိုယ်လုပ်ချင်တာ ရှိမယ်ဆိုရင် ကိုယ့်ရည်မှန်းချက်ရှိမယ်ဆိုရင် ဘယ်သူ့ကိုမှ ဂရုမစိုက်ပါနဲ့လို့၊ ရဲရဲဝံ့ဝံ့နဲ့ ရှေ့ဆက်ပြီးတော့ လျှောက်လှမ်းကြပါ။” လက်ဝှေ့လောက မြန်မာ့ဂုဏ်ဆောင်တဲ့ ကယန်းတိုင်းရင်းသူတွေထဲမှာဆိုရင် တယောက်က ကယန်းမလေး ဘရော်နီကာဖြစ်ပြီး ဘရော်နီကာကတော့ မြန်မာ့ရိုးရာလက်ဝှေ့မှာ ကစားနေပါတယ်။ အန်တိုနီယာကတော့ အမ်အမ်အေဖိုက်တာအဖြစ် One Championship ကြိုးဝိုင်းထဲမှာ နိုင်ငံတကာက ပြိုင်ဘက်ကို ယှဉ်ပြိုင်ထိုးသတ် အောင်ပွဲခံပြီး နိုင်ငံ့ဂုဏ်ဆောင်နိုင်ဖို့ စိတ်အားထက်သန်နေပါတယ်။
3 years Ago
Up