အဓမ္မပြုကျင့်

November 23, 2022

ပြင်သစ်တွင် ၁၄ နှစ်အရွယ် မိန်းကလေး ၁ ဦး အဓမ္မပြုကျင့် သတ်ဖြတ်ခံရ

ပြင်သစ်နိုင်ငံတောင်ပိုင်း တွန်းနက်စ်မြို့မှာ အသက် ၁၄ နှစ်အရွယ် မိန်းကလေးတဦးကို အဓမ္မပြုကျင့် သတ်ဖြတ်ခဲ့တယ်လို့ သံသယရှိသူ အသက် ၃၁ နှစ်အရွယ် အမျိုးသားကို ရဲတပ်ဖွဲ့က နိုဝင်ဘာလ ၁၈ ရက်က ဖမ်းဆီးလိုက်ပါတယ်။

သံသယရှိသူဟာ ကျောင်းကနေထွက်လာတဲ့ ဗက်နီဆာကို ကားထဲ အတင်းထိုးထည့်ပြီး မုဒိမ်းကျင့် သတ်ဖြတ်ခဲ့တာဖြစ်ပြီး ဗက်နီဆာရဲ့အလောင်းကို လူမနေတော့တဲ့ အိမ်ထဲမှာ ထားခဲ့ကြောင်းနဲ့ သူ့ကို လုံခြုံရေးကင်မရာ မှတ်တမ်းကနေ အမြန်ဖော်ထုတ်နိုင်ခဲ့တယ်လို့ အာဏာပိုင်တွေက ပြောပါတယ်။

ပြင်သစ်နိုင်ငံတောင်ပိုင်း မားမွန်းဒ်မြို့က သူ့တိုက်ခန်းမှာ ရဲတွေက အဲဒီလူကို သွားဖမ်းတဲ့အခါ သူ့အပြစ်ကို ဝန်ခံခဲ့တယ်လို့ နိုင်ငံတောင်ပိုင်း၊ အားဂျန်းဒ်မြို့ရှိ အစိုးရရှေ့နေက သတင်းထောက်တွေကို စနေနေ့မှာ ပြောပါတယ်။

ဒီအမျိုးသားဟာ သူ့အသက် ၁၅ နှစ်လောက်ပဲရှိချိန် ၂၀၀၆ ခုနှစ်က တခြားကလေးငယ်တဦးကို လိင်ပိုင်းဆိုင်ရာ စော်ကားမှုနဲ့ ဆိုင်းငံ့ထောင်ဒဏ် ၁၅ ရက် ကျခံဖူးကြောင်း အာဏာပိုင်တွေက ပြောပါတယ်။ ဒီသတင်းကြောင့် အခုသီတင်းပတ်အတွင်း မြို့ခံတွေ ထိတ်လန့်တုန်လှုပ်ခဲ့ရပါတယ်။

လိင်ပိုင်းဆိုင်ရာ စော်ကားမှုတွေအတွက် ပြစ်မှုမှတ်တမ်းရှိပြီးသား ဒီလိုလူတွေကို လွတ်လွတ်လပ်လပ် မနေစေဘဲ တင်းကျပ်တဲ့ တရားစီရင်မှု ရှိသင့်ကြောင်းလည်း ပြောကြပါတယ်။

ဒီအမှုဟာ မြို့တော်ပါရီမှာ အသက် ၁၂ နှစ်အရွယ် မိန်းကလေး အသတ်ခံရမှုအပြီး သီတင်းပတ်တွေအကြာမှာ ထပ်ပြီး ပေါ်ပေါက်လာတဲ့အမှုလည်း ဖြစ်ပါတယ်။

2 months Ago

October 21, 2022

အမျိုးသမီးတဦးအား အဓမ္မပြုကျင့်သတ်ခဲ့သည့် အေအေတပ်ဖွဲ့ဝင် ၂ ဦးကို အလုပ်ကြမ်းနှင့် ထောင်ဒဏ် နှစ် ၂၀ ချမှတ်

ရခိုင်ပြည်နယ်၊ ဘူးသီးတောင်မြို့နယ်၊ ကျောင်းတောင်ကျေးရွာမှာ အမျိုးသမီးတဦးအား အဓမ္မပြုကျင့်ခဲ့တဲ့ တပ်ဖွဲ့ဝင် ၂ ဦးကို အလုပ်ကြမ်းနဲ့ ထောင်ဒဏ် အနှစ် ၂၀၊ ကြိမ်ဒဏ် အချက် ၃၀ ချမှတ်လိုက်တယ်လို့ ရက္ခိုင့်တပ်တော် (အေအေ) က အောက်တိုဘာ ၂၀ ရက်နေ့မှာ ထုတ်ပြန်ပါတယ်။

ပြီးခဲ့တဲ့ အောက်တိုဘာ ၁ ရက်နေ့က ကျောင်းတောင်ကျေးရွာနေ အသက် ၃၀ အရွယ် အိမ်ထောင်သည်အမျိုးသမီးတဦးကို အေအေတပ်ဖွဲ့ဝင် ၂ ဦးက လက်နက်အားကိုးနဲ့  အဓမ္မပြုကျင့်ခဲ့တာလို့ ဆိုပါတယ်။

ကျူးလွန်ခံရသူကိုယ်တိုင်က တိုင်တန်းခဲ့တာကြောင့် ရက္ခိုင့်တပ်တော်က စစ်ခုံရုံးဖွဲ့ကာ စနစ်တကျ စုံစမ်းစစ်ဆေးခဲ့ပြီး ပြစ်မှုကျူးလွန်သူ ၂ ဦးမှာ ပြစ်မှုမြောက်ကြောင်းနဲ့ တပ်ဘက်ဆိုင်ရာ စည်းကမ်းထိန်းသိမ်းရေး အထူးတားမြစ်ချက်ကိုပါ ချိုးဖောက်ထားကြောင်း တွေ့ရှိခဲ့တယ်လို့ ထုတ်ပြန်ချက်မှာ ဖော်ပြထားပါတယ်။

ကျူးလွန်သူ အေအေတပ်ဖွဲ့ဝင် ၂ ဦးဟာလည်း အခင်းဖြစ်တဲ့နေ့က ခွင့်ပြုချက်မယူဘဲ အရက်သေစာ သောက်စားမူးယစ်ပြီး အဓမ္မပြုကျင့်ခဲ့ကြောင်း ဝန်ခံထွက်ဆိုခဲ့တာကြောင့် နစ်နာသူ မိသားစုဝင်တွေ၊ ကျေးရွာခေါင်းဆောင်တချို့နဲ့ ဘာသာရေးခေါင်းဆောင်တွေရှေ့မှာ အလုပ်ကြမ်းနဲ့ ထောင်ဒဏ် အနှစ် ၂၀ နဲ့ ကြိမ်ဒဏ်ကြီး အချက် ၃၀ ကို စီရင်ချက်ချ အပြစ်ပေးခဲ့တယ်လို့ ဆိုပါတယ်။

ပြီးခဲ့တဲ့ ဩဂုတ် ၁၅ ရက်နေ့ကလည်း ဘောလုံးကွင်းရပ်ကွက်မှာ အသက် ၁၈ နှစ်အရွယ် အမျိုးသမီးတဦး မုဒိမ်းကျင့် အသတ်ခံခဲ့ရပါတယ်။

မုဒိမ်းကျင့် အသတ်ခံရမှုနဲ့ပတ်သက်ပြီး တရားခံကို ဖမ်းမိထားကြောင်း အေအေက ထုတ်ပြန်ထားပေမဲ့ အခုချိန်ထိ အရေးယူမှု မရှိသေးတဲ့အပေါ် ဒေသခံတွေက ဝေဖန်နေကြပါတယ်။

ဒေသခံတဦးက “ကျနော်တို့လိုလားတာက အခု ရိုဟင်ဂျာအမျိုးသမီးကို မုဒိမ်းကျင့်ခဲ့တဲ့ အေအေ တပ်ဖွဲ့ဝင်တွေကို ဖော်ထုတ်အရေးယူတယ်လို့ သိရတယ်။ လေးစားတယ်၊ ဂုဏ်ယူတယ်။ ဒါပေမဲ့ အသက် ၁၈ နှစ်အရွယ် (--) က ဩဂုတ် ၁၅ ရက်နေ့က အသတ်ခံခဲ့ရတယ်။ တရားခံအစစ်အမှန်ကို ဖမ်းမိထားတယ်လို့ အေအေက ထုတ်ပြန်ထားတယ်။ ဒါပေမဲ့ ဒီနေ့အထိ ပြစ်ဒဏ်ပေးမှုကို မဖော်ပြသေးဘူး” လို့ ပြောပါတယ်။

အဆိုပါအမျိုးသမီးကို ဆိုင်မန်နေဂျာ မျိုးမြင့်ဇော်က မုဒိမ်းကျင့် သတ်ဖြတ်ခဲ့တာဖြစ်ပြီး ထိထိရောက်ရောက် အရေးယူသွားမယ်လို့ အေအေ​ပြောခွင့်ရ ခိုင်သုခက သြဂုတ်နောက်ဆုံးပတ်မှာ ထုတ်ဖော်ပြောဆိုထားတာပါ။

စစ်တွေဒေသခံတဦးက “ပြောရမယ်ဆိုရင် မကောင်းဘူးဗျ။ သူတို့က ဒီကလေးမလေးကို မုဒိမ်းကျင့်သတ်ဖြတ်ခဲ့တဲ့ တရားခံအစစ်အမှန်ကို ဖမ်းမိထားတယ်လို့သာ သတင်းထုတ်ပြန်တာ၊ ဘယ်လိုအရေးယူထားလဲဆိုတာ ဒီနေ့အထိ မထုတ်ပြန်သေးဘူး” လို့ ပြောပါတယ်။

ရက္ခိုင်တပ်တော် (အေအေ) ကတော့ ရခိုင်ပြည်သူ့အစိုးရအနေနဲ့ ရခိုင်ပြည်နယ်အတွင်း ‘တရားမျှတ၊ ပြည်အာရက္ခ’ ဆောင်ပုဒ်နဲ့အညီ ရခိုင်ပြည်သူလူထုတွေရဲ့ တရားမျှတမှု ရရှိရေးအတွက် ကြိုးပမ်းနေပြီး ပြစ်မှုကျူးလွန်တဲ့ ဘယ်သူ့ကိုမဆို ဥပဒေနဲ့အညီ စီရင်နေတယ်လို့လည်း ထုတ်ပြန်ချက်မှာ ဖော်ပြထားခဲ့ပါတယ်။

3 months Ago
More News
Up