အထောက်အထားမဲ့ ဝင်လာသူ

A d v e r t i s e m e n t With Us

January 20, 2021

မော်လမြိုင်ကျွန်းမြို့နယ်တွင် အထောက်အထားမဲ့ ဝင်လာသူ ၃၄ ဦး ဖမ်းမိ

ဧရာဝတီတိုင်း၊ မော်လမြိုင်ကျွန်းမြို့နယ်မှာ ဇန်နဝါရီ ၁၉ ရက်နေ့က ရခိုင်ပြည်နယ်ကနေ ဝင်ရောက်လာတဲ့ နိုင်ငံသားအထောက်အထားမဲ့ လူ ၃၄ ယောက် ဖမ်းမိခဲ့တယ်လို့ တိုင်းရဲတပ်ဖွဲ့ကနေ သိရပါတယ်။ ကျွဲခြံကျေးရွာအဝဘက် သစ်ပုတ်ကျေးရွာအနီး ရာဇူဒိုင်မြစ်ထဲမှာ ရပ်ထားတဲ့ စက်လှေကို မသင်္ကာစရာဖြစ်နေလို့ စစ်ဆေးရာကနေ ဖမ်းမိခဲ့တာဖြစ်တယ်လို့ ဒေသခံတွေက ပြောပါတယ်။ တိုင်းရဲတပ်ဖွဲ့ရဲ့ ပြောရေးဆိုခွင့်ရှိသူ ဒုရဲမှူးကြီး ထွန်းရွှေက "မနေ့က ဖမ်းမိတာပေါ့နော် အမျိုးသား ၇ ယောက် အမျိုးသမီး ၂၇ ယောက်ပေါ့၊ လောလောဆယ် အဲ့ရွာမှာပဲ စစ်ဆေးတာတွေ ပြုလုပ်ဖို့အတွက် လုံခြုံရေးနဲ့ ထိန်းသိမ်းထားပါတယ်'' လို့ ပြောပါတယ်။ ဖမ်းဆီးမိတဲ့ အထောက်အထားမဲ့ ၃၄ ယောက်ကို  ကျေးရွာဘုန်းကြီးကျောင်း ဓမ္မာရုံမှာ ကွာရန်တင်း ပုံစံထားရှိပြီး လိုက်ပို့တဲ့ စက်လှေမောင်း ၃ ယောက်ကို ဖမ်းဆီးရမိရေး ဆက်လက်ဆောင်ရွက်နေ တယ်လို့ ဆိုပါတယ်။ ရခိုင်ပြည်နယ်က ဝင်ရောက်လာတဲ့ အထောက်အထားမဲ့ ၃၄ ယောက်ကို လိုအပ်တဲ့ အစားအသောက်နဲ့ အဝတ်အစားတွေ ထောက်ပံပေးထားပြီး ကိုဗစ်-၁၉ ရောဂါပိုးရှိ မရှိ စစ်ဆေးပြီး လုပ်ထုံးလုပ်နည်း အတိုင်းဆက်လက်ဆောင်ရွက်သွားမယ်လို့  မော်လမြိုင်ကျွန်းမြို့နယ် အမှတ် ၁ တိုင်းဒေသကြီးလွှတ်တော်ကိုယ်စားလှယ် ဦးဝေယံထွန်းက ပြောပါတယ်။ ၂၀၂၁ ခုနှစ် ဇန်နဝါရီလဆန်းပိုင်းမှာ ပုသိမ်မြို့နယ်၊ ချောင်းသာကမ်းခြေမှာ ဖမ်းမိခဲ့တဲ့ နိုင်ငံသားအထောက်အထားမဲ့ ၇ ယောက်ကိုတော့  သူတို့နေထိုင်ရာဇာတိတွေကို ပြန်လည်ပို့ဆောင်ပေးခဲ့တယ်လို့ သိရပါတယ်။ ဧရာ၀တီတိုင်းမှာ ၂၀၁၉ ခုနှစ်ကတော့ ရခိုင်ပြည်နယ်မြောက်ပိုင်းက၀င်ရောက်လာတဲ့ အထောက်အထားမဲ့သူတွေကို ဖမ်းမိမှု ၃ ကြိမ်ရှိခဲ့ပြီး အထောက်အထားမဲ့၀င်ရောက်လာသူ စုစုပေါင်း  ၁၄၈ ဦးထိရှိခဲ့တယ်လို့ တိုင်းရဲတပ်ဖွဲ့ရဲ့ မှတ်တမ်းတွေအရ သိရပါတယ်။ သတင်း - မင်းထက်မုန်း (ပုသိမ်)၊ ဓာတ်ပုံ - ထွန်းထွန်းနိုင် (မော်ကျွန်း)
1 month Ago

January 4, 2021

ချောင်းသာကမ်းခြေတွင် အထောက်အထားမဲ့ ဝင်လာသူ ၇ ဦးနှင့် လိုက်ပို့သူ ၅ ဦးဖမ်းမိ

ဧရာဝတီတိုင်း၊ ပုသိမ်မြို့နယ်၊ ချောင်းသာမြို့မှာ ဇန်နဝါရီ ၄ ရက်နေ့ မနက်အစောပိုင်းက ရခိုင်ပြည်နယ်ကနေ အထောက်အထားမဲ့ ဝင်ရောက်လာသူ ၇ ဦး ဖမ်းမိခဲ့တယ်လို့ ဒေသခံတွေဆီက သိရပါတယ်။ ရခိုင်ပြည်နယ်က ဝင်ရောက်လာတဲ့ အထောက်အထားမဲ့ အမျိုးသား ၅ ဦး၊ အမျိုးသမီး ၂ ဦးနဲ့ သူတို့ကို စက်လှေနဲ့လိုက်ပို့ပေးတဲ့ လူ ၅ ဦး စုစုပေါင်း ၁၂ ဦးကို ကျောက်မောင်နှမကမ်းခြေနဲ့ ရေမိုင် ၁ မိုင်အကွာ ပင်လယ်ပြင်မှာ ဖမ်းမိခဲ့တာလို့ ချောင်းသာမြို့အုပ်ချုပ်ရေးမှူး ဦးကျော်သူက DVB ကို ပြောပါတယ်။ “နယ်မြေခံတပ်တွေ ရဲတွေနဲ့ ကျနော်တို့အဖွဲ့တွေ ပူးပေါင်းပြီး ပင်လယ်ပြင်မှာ  မနက် ၁ နာရီလောက်မှာ ထိန်းသိမ်းနိုင်ခဲ့တာပါ၊ ခုတော့ စခန်းမှာ ခေါ်ထားပါတယ်။ လိုက်ပို့တဲ့ လူ ၅ ဦးကိုတော့ တရားဥပဒေအတိုင်း အရေးယူသွားဖို့ပြင်ဆင်နေပါတယ်”လို့ ပြောပါတယ်။ ဖမ်းဆီးရမိတဲ့ လူတွေကို နယ်မြေရဲစခန်းမှာ ထားပြီး ဆက်လက်တင်ပြထားသလို အစားအစာတွေနဲ့ အဝတ်အစားတွေကိုလည်း ထောက်ပံ့ပေးထားကာ လိုက်ပို့တဲ့ စစ်တွေက အမျိုးသား ၅ ဦးကို တည်ဆဲဥပဒေတွေအရ အရေးယူဖို့ ဆောင်ရွက်နေတယ်လို့ ဆိုပါတယ်။ လက်ရှိအချိန်မှာတော့ ရခိုင်ပြည်နယ်က အထောက်အထားမဲ့ ဝင်လာသူတွေနဲ့ လိုက်ပို့သူ ၁၂ ဦးကို ကိုဗစ်-၁၉ ရောဂါပိုးရှိ မရှိ စစ်ဆေးသွားမှာဖြစ်ပြီး ရလဒ်အပေါ်မှာ လိုအပ်သလို ဆက်လက်ဆောင်ရွက်ပေးသွားမယ်လို့ သိရပါတယ်။ ဧရာဝတီတိုင်းမှာ ရခိုင်ပြည်နယ်က အထောက်အထားမဲ့ ဝင်လာသူတွေကို ဖမ်းဆီးရမိတာဟာ ၂၀၂၀ ခုနှစ်အတွင်း ပထမဆုံးအကြိမ် ဖြစ်တယ်လို့ ရဲတပ်ဖွဲ့ရဲ့မှတ်တမ်းတွေအရ သိရပါတယ်။ သတင်း - မင်းထက်မုန်း (ပုသိမ်)
2 months Ago
Up