အထူးဒေသ ၄

May 10, 2020

အထူးဒေသ ၄ တွင် ၂၁ ရက် Quarantine ဝင်ပြီးသူ ၂၄၁ ဦး မိုင်းယန်းမြို့သို့ ရောက်ရှိ

ရှမ်းပြည်နယ် အထူးဒေသ (၄) နယ်မြေ ဆီလူးဒေသမှာ Facility Quarantine ၂၁ ရက်စောင့်ကြည့်ခံထားပြီးတဲ့ စိုက်ပျိုးရေးခြံအလုပ်သမား ၂၄၁ ဦးကို အထူးဒေသ ၄ တာဝန်ရှိသူတွေကို မိုင်းယန်းမြို့ဒေသအာဏာပိုင်ဆီကို ဒီနေ့မနက် လွှဲပြောင်းပေးအပ်ခဲ့ပါတယ်။ မိုင်းယန်းမြို့မရဲစခန်းမှူး ဒုရဲမှူး ကိုကိုဇော်က "တရုတ်နိုင်ငံထဲက စိုက်ပျိုးရေးခြံအသီးသီးမှာ လုပ်နေတဲ့သူတွေပါပဲ။ အချို့ကလည်း အထူးဒေသ(၄) နယ်မြေထဲ လုပ်နေတဲ့ အလုပ်သမားတွေလည်း ပါပါတယ်။ သူတို့က မိုင်းလားဘက်မှာ Facility Quarantine( ၂၁ ရက်ပြည့်အောင် စောင့်ကြည့်စစ်ဆေးပြီးမှ ဒီဘက်ကို ဆက်လက်စေလွှတ်ကြတာပါ။ နှစ်ဖက်ညှိနှိုင်းမှုတွေတော့ လုပ်ရတာပေါ့။” ရှမ်းပြည်နယ်အရှေ့ပိုင်းနဲ့ နယ်နိမိတ်ထိစပ်နေတဲ့ တရုတ်နိုင်ငံ ယူနန်ပြည်နယ်အတွင်းရှိ တရုတ်ပိုင် ဖရဲခြံ၊ သခွားခြံတွေမှာ သွားရောက်လုပ်ကိုင်နေတဲ့ ရှမ်းပြည်နယ် ၃၂ ဦး၊ ရခိုင်ပြည်နယ်မှ ၁၉၅ ဦး၊ မန္တလေးတိုင်းမှ ၁ ဦး၊ မကွေးတိုင်းမှ ၆ ဦး၊ ပဲခူးတိုင်းမှ ၄ ဦး၊ ရန်ကုန်တိုင်းမှ ၂ ဦး၊ ဧရာဝတီတိုင်း ၁ ဦး အပါအဝင် စုစုပေါင်း ၂၄၁ ဦးကို မိုင်းယန်းကနေ ကျိုင်းတုံကို ဆက်လက်ပို့ဆောင်သွားမယ်လို့ သိရပါတယ်။

အောင်ဇေယျ

11 months Ago