အထည်ချုပ်စက်ရုံ

April 4, 2018

Runningtex အထည်ချုပ်စက်ရုံအလုပ်သမား ၆၀၀ ကျော် ဆန္ဒပြ

  ရန်ကုန်တိုင်းဒေသကြီး လှိုင်သာယာမြို့နယ်မှာရှိတဲ့ ငွေပင်လယ်စက်မှုဇုန်အတွင်းက Runningtex အထည်ချုပ်စက်ရုံရှေ့မှာ  အလုပ်သမား ၆၀၀ ကျော်က ဒီကနေ့ ၆ရက်မြောက်အဖြစ် ဆန္ဒပြနေကြပါတယ်။ လုပ်ခလစာအပါအဝင် အလုပ်သမားအခွင့်အရေးတခုဖြစ်တဲ့ နှစ်စဉ်ကြေးကို တစ်နှစ်တစ်ခါ ပေးတာမျိုးမဟုတ်ဘဲ လစဉ်လုပ်ခလစာထုတ်ယူတိုင်း ပုံမှန်ထည့်သွင်းပေးဖို့ အလုပ်သမားတွေက ဆန္ဒပြတောင်းဆိုနေကြတာပါ။ ဧပြီ ၁ ရက်က စတင်ပြီး ဆန္ဒထုတ်ဖော်ခဲ့တာ ဒီနေ့ဆိုရင် ၆ ရက်မြောက်ရှိပြီဖြစ်ပြီး လုပ်သမားတွေနဲ့ အလုပ်ရှင်ကိုယ်စားလှယ်တွေနဲ့ ညှိနှိုင်းမှုနှစ်ကြိမ်ရှိခဲ့ပေမယ့် ပြေလည်မှုမရသေးပါဘူး။ အလုပ်သမားခေါင်းဆောင် မသီသီဝေက “သမီးတို့ ဒီစက်ရုံမှာ အလုပ်ဝင်တာ ၂ နှစ်ပြည့် ပါပြီ။ အလုပ်ရုံကလည်း ၂ နှစ်ရှိပြီ လုပ်ငန်းလည်ပတ်တာ။ ဒီနေ့ ဒီအချိန်အထိ နှစ်စဉ်ကြေး မရသေးဘူး။ ညီမတို့က နှစ်စဉ်ကြေးကို ၆ လတစ်ကြိမ် ၅၀၀၀ ထောင်ပေးဖို့တောင်းတယ်။ သူတို့ကတော့ တစ်နှစ်နေမှပဲ ပေါင်းပေးမယ်ပြောတယ်။ အဲ့တာတောင် လစာထဲ ထည့်ပေးမှာ မဟုတ်ဘူးတဲ့။ ညီမတို့က လစာထဲကို ပုံမှန်ထည့်ပေးမယ့် နှစ်စဉ်ကြေးကိုပဲ လိုချင်တယ်။”လို့ ပြောပါတယ်။ စက်ရုံရှေ့မှာတော့ စက်ရုံဘက်ကပေးနိုင်တဲ့ လုပ်ခနှုန်းထားတွေကိုရေးသားပေးထားပြီး၊ လုပ်ငန်းခွင်ထဲမဝင်ဘဲ ဆက်လက်ဆန္ဒထုတ်ဖော်သူတွေကို နစ်နာကြေးပေးမှာမဟုတ်ကြောင်းနဲ့ အလုပ်ကနေ မိမိဆန္ဒအလျောက် နုတ်ထွက်တယ်လို့ ယူဆမှာဖြစ်တယ်ဆိုတဲ့သတိပေးစာကို ဧပြီ ၄ ရက်မှာ အလုပ်ရှင်က စတင်ကြေညာလိုက်ပါတယ်။ ဒီကိစ္စနဲ့ ပတ်သက်လို့  စက်ရုံတာဝန်ရှိသူတွေကို မေးမြန်းဖို့ကြိုးစားခဲ့ပေမယ့် မဖြေဆိုနိုင်ကြောင်း ပြန်လည်ငြင်းဆိုခဲ့ပါတယ်။ Runningtex စက်ရုံမှာ အလုပ်သမား စုစုပေါင်း ၁၀၀၀ ကျော်ရှိပြီး၊ အခု စက်ရုံပြင်ပမှာတော့ အလုပ်သမား ၆၀၀ ကျော်က ဆန္ဒထုတ်ဖော်နေကြတာဖြစ်ပါတယ်။
4 years Ago

January 4, 2018

အထည်ချုပ်စက်ရုံ အလုပ်ရှင် ကတိပျက်ကွက်မှုကို မကျေနပ်၍ အလုပ်သမားများ တိုင်ကြား

ပဲခူးတိုင်းဒေသကြီး၊ ဇီးကုန်းမြို့က အထည်ချုပ်စက်ရုံတခုမှာ ပန်းထိုးကြေး ဖြတ်တောက်နှုန်းထားကို မကျေနပ်လို့ အလုပ်သမားတွေက အလုပ်ရှင်ကို မြို့နယ်အထွေထွေအုပ်ချုပ်ရေးမှူးဆီမှာ တိုင်ကြားလိုက်ပါတယ်။ ပြည်ကားလမ်းဘေး ကျွဲခြံရွာအနီးက တရုတ်လူမျိုးပိုင် တင်ဟော့ ရဲ့ ဇာထိုးပန်းထိုးစက်ရုံမှာ ၂၀၁၇ ခုနှစ်တွင်း ပန်းထိုးကြေး ၁ သောင်းခွဲ ဖြတ်တောက်မှုကြောင့် အလုပ်ရှင်အလုပ်သမား ပြဿနာတက်ခဲ့ကြလို့ ဌာနဆိုင်ရာက ညှိနှိုင်းဖြေရှင်းခဲ့ပြီးနောက် ပြေလည်မှုရပေမယ့် အလုပ်ရှင်က စာချုပ်အတိုင်း မလိုက်နာလို့ ထပ်မံညှိနှိုင်းဖြေရှင်းပေးဖို့ တိုင်ကြားတာဖြစ်ပါတယ်။ တိုင်ကြားရာမှာ ပါဝင်တဲ့ မနွယ်နွယ်အေးက “မြို့နယ်ကညှိနှိုင်းပေးတယ်။ နှစ်ဖက်ကတိစာချူပ် ချုပ်ဆိုခဲ့ရတယ်။ တရားဝင်ဇာထိုးပန်းထိုးကြေး ၇၅၀၀ ကျပ်သာ ဖြတ်တောက်မယ်လို့ ကြေညာထားပြီး လစာထုတ်ချိန်ကျတော့ တစ်သောင်းဖြတ်တယ်။ ဒါဟာ အလုပ်ရှင်ဘက်က စာချူပ်ဖောက်ဖျက်တာပါ” လို့ ပြောပါတယ်။ ဒီတိုင်ကြားမှုနဲ့ပတ်သက်လို့ စနေနေ့ကျရင် သာယာဝတီခရိုင် အလုပ်သမားရုံးမှာ ညှိနှိုင်းကြမယ်လို့ အလုပ်သမားတွေဆီကသိရပါတယ်။ ဒီကိစ္စ တင်ဟော့ဇာထိုးပန်းထိုး စက်ရုံတာဝန်ခံကို ဆက်သွယ်မေးမြန်းခဲ့ပေမယ့် ဆက်သွယ်လို့ မရခဲ့ပါဘူး။ မေသွယ်
4 years Ago
Up