အတုအယောင်

May 7, 2022

စစ်ခေါင်းဆောင်ဖိတ်ခေါ်သည့် ငြိမ်းချမ်းရေးဆွေးနွေးပွဲ အတုအယောင်သာဖြစ်ပြီး တရားမဝင်ဟု NUCC ကြေညာ

အာဏာသိမ်း အကြမ်းဖက် စစ်ခေါင်းဆောင်ရဲ့ ငြိမ်းချမ်းရေးဖိတ်ခေါ်တာဟာ အတုအယောင် ဖြစ်ပြီး တရားမဝင်ဘူးလို့ အမျိုးသားညီညွတ်ရေး အတိုင်ပင်ခံကောင်စီ (NUCC) က  မေလ ၇ ရက်  ဒီနေ့ ထုတ်ပြန်ကြေညာလိုက်တယ်။

စစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင်က ငြိမ်းချမ်းရေးအတွက် သူကိုယ်တိုင် တွေ့ဆုံဆွေးနွေးမယ်လို့ တိုင်းရင်းသားလက်နက်ကိုင် တော်လှန်ရေးအဖွဲ့တွေကို ဧပြီ ၂၂ မှာ ဖိတ်ခေါ်ခဲ့ပြီး ဒါဟာ နိုင်ငံရေး၊ စစ်ရေးအပါအဝင် အဘက်ဘက်က အကျပ်အတည်းဆိုက်ပြီး ဆက်လက်ရပ်တည်ဖို့ ခက်ခဲလာနေတဲ့ စစ်အုပ်စုရဲ့ ငြိမ်းချမ်းရေးအကြောင်းပြ ဆွေးနွေးပွဲ ဖိတ်ခေါ်ချက်ဖြစ်တယ်လို့ ဆိုပါတယ်။

အတုအယောင် ငြိမ်းချမ်းရေး ဆွေးနွေးပွဲတွေနဲ့ သူတို့ ကြုံတွေ့နေရတဲ့ နိုင်ငံရေး၊ စစ်ရေး၊ သံတမန်ရေးနဲ့ စီးပွားရေး အခက်အခဲတွေကို ယာယီ ဖြေရှင်းဖို့ ကြိုးစားတာဖြစ်ပြီး ၂၀၀၈ ဖွဲ့စည်းပုံ အခြေခံဥပဒေကို ပြန်လည်အသက်သွင်းမယ့် စစ်အုပ်စုရဲ့ အတုအယောင် ငြိမ်းချမ်းရေးဖိတ်ခေါ်ချက်ဟာ တရားမဝင်ဘူးလို့ NUCC က ထုတ်ပြန်ပြောဆိုပါတယ်။

အမျိုးသားညီညွတ်ရေး အတိုင်ပင်ခံကောင်စီအနေနဲ့ ဒါကို ရှုတ်ချပြီး နိုင်ငံရေးအင်အားစုတွေ၊ တိုင်းရင်းသားတော်လှန်ရေး အဖွဲ့အစည်းတွေ၊ ပြည်သူ့ခုခံတော်လှန်ရေးအင်အားစုအားလုံး အနေနဲ့လည်း ပြည်သူနဲ့ တသားတည်း ဆက်လက်ရပ်တည်ပြီး စစ်အာဏာရှင်စနစ်အပါအဝင် အာဏာရှင်စနစ်ဟူသမျှ ချုပ်ငြိမ်းရေးအတွက် ကျရာကဏ္ဍကနေ ပါဝင်လုပ်ဆောင်ကြဖို့လည်း တိုက်တွန်းထားပါတယ်။

စစ်အာဏာရှင် မင်းအောင်လှိုင်ရဲ့ ငြိမ်းချမ်းရေးကမ်းလှမ်းတာကို အခု သဘောထားထုတ်ပြန်တဲ့အချိန်အထိ ပြတ်ပြတ်သားသား ငြင်းပယ်ခဲ့ကြတဲ့ တိုင်းရင်းသား တော်လှန်ရေးအဖွဲ့အစည်းတွေကိုလည်း အမျိုးသားညီညွတ်ရေး အတိုင်ပင်ခံကောင်စီက လေးစား အသိ အမှတ်ပြု မှတ်တမ်းတင်တယ်လို့ ဆိုပါတယ်။

အဲဒီ ဆွေးနွေးပွဲကို မတက်ဘူးလို့ ကချင်လွတ်လပ်ရေးအဖွဲ့(KIO) ၊ ကရင်နီအမျိုးသားတိုးတက်ရေးပါတီ (KNPP) နဲ့ ချင်းအမျိုးသားတပ်ဦး(CNF) တို့က သဘောထား ထုတ်ပြန်ထားကြတာဖြစ်ပါတယ်။

အန်စီအေ အပစ်ရပ်လက်မှတ်ထားထားတဲ့အဖွဲ့တွေထဲကလည်း  ၅ ဖွဲ့သာ တက်ရောက်တော့မယ်လို့ ငြိမ်းချမ်းရေးလုပ်ငန်းစဉ် ဦးဆောင်အဖွဲ့ PPST ပြောရေးဆိုခွင့်ရှိသူ ဗိုလ်မှူးကြီး စောကျော်ညွန့်က ပြောပါတယ်။

UWSA ‘ဝ’ တပ်ဖွဲ့ဦးဆောင်တဲ့ အန်စီအေ အပစ်ရပ်လက်မှတ်မထိုးရတဲ့ မြောက်ပိုင်းက တိုင်းရင်းသား လက်နက်ကိုင်တပ်ဖွဲ့တွေကတော့    စစ်ခေါင်းဆောင်ဖိတ်ခေါ်တဲ့ ငြိမ်းချမ်းရေး ဆွေးနွေးပွဲကို တက်မယ် မတက်ဘူး  မဆုံးဖြတ်ရသေးဘူးလို့ ဆိုပါတယ်။ 

အမျိုးသားညီညွတ်ရေး အတိုင်ပင်ခံကောင်စီကတော့  တိုင်းရင်းသားတော်လှန်ရေးအဖွဲ့အစည်းတွေ နှစ်ပေါင်း ၇၀ ကျော်ကြာ အစဉ်တစိုက် ကြိုးပမ်းအကောင်အထည်ဖော်ခဲ့တဲ့ အမျိုးသားတန်းတူရေးနဲ့ ဖက်ဒရယ်ဒီမိုကရေစီ ပြည်ထောင်စုတည်ဆောက်ရေးကို ရည်မှန်း လက်တွေ့ အကောင်အထည်ဖော် နေပြီး စစ်အုပ်စုက အာဏာသိမ်းလို့ ပျက်စီးသွားပြီဖြစ်တဲ့ ၂၀၀၈ ဖွဲ့စည်းပုံအခြေခံဥပဒေကို တရားဝင်သယောင် ပြန်အသက်သွင်းတဲ့ ဘယ်လို လှုပ်ရှားမှုကိုမဆို ဆန့်ကျင်တယ်လို့လည်း ဆိုပါတယ်။

7 months Ago

January 21, 2021

ပူတင်၏ကြွယ်ဝမှုကို ချပြထားသည့်ရုပ်သံ အတုအယောင်ဖြစ်ဟု  ရုရှားသမ္မတအိမ်တော်တုံ့ပြန် 

ရုရှားအတိုက်အခံ ခေါင်းဆောင် အလက်ဇီနာဗင်ညီ ဖြန့်ချိထားတဲ့ ရုရှားသမ္မတ  ပူတင်ရဲ့ကြွယ်ဝမှုအချက်အလက်တွေဟာ အတုအယောင်နဲ့ ရိုက်စားလုပ်ပေါက်သာဖြစ်တယ်လို့ ရုရှ သမ္မတအိမ်တော် ပြောခွင့်ရ ဒမစ်ထရီ ပဲ့စ်ကို့ဗ်က ဇန်နဝါရီ ၂၀ ရက်မှာ ပြောလိုက်ပါတယ်။  နာဗယ်ညီရဲ့ အဖွဲ့အစည်းကို ဘဏ္ဍာငွေ ထောက်ပံ့တာ ထိန်းချုပ်ဖို့ကိုလည်း ပြည်သူကို သူက တိုက်တွန်းလိုက်ပါတယ်။ သမ္မတ ပူတင်ကို ဝေဖန်တဲ့ အထင်ရှားဆုံးသူဖြစ်ပြီး သီတင်းပတ်ကုန်ရက်က ထောင်ချခံထားရတဲ့ နာဗင်ညီက ရုပ်သံမှတ်တမ်း တခုကို ဖြန့်ချိခဲ့ပြီး အဲဒီ ရုပ်သံထဲမှာခမ်းနားထည်ဝါတဲ့ နန်းတော်တဆောင်ကို ပူတင်ပိုင်တယ်လို့ နာဗင်ညီနဲ့ သူ့ရဲ့ တရားစွဲခံ မဟာမိတ်တွေက စွပ်စွဲ ထားပါတယ်။  ရုရှားသမ္မတ အိမ်တော်ကတော့ ဒီ စွဲချက်ကို ငြင်းပါတယ်။ ၂၀၁၀တုန်းက သမ္မတ ဖြစ်သူ ဒမစ်ထရီ မက်ဒီဒေ့ဗ်ဟာ တရားဝင် လာဘ်စားနေတယ်လို့ စီးပွားရေးသမား တယောက်က စာရေးတိုင်ကြားချိန်က စွပ်စွဲချက်တွေ ထွက်လာခဲ့ဖူးပါတယ်။ အဲဒီအချိန်ကလည်း နာဗင်ညီကို ထောက်ခံသူတွေက လူထုကို စနေ ပြည်လုံးကျွတ် ဆန္ဒပြပွဲတွေမှာ ပူးပေါင်းဖို့ တိုက်တွန်းခဲ့ပါတယ်။  ၂၀၁၄ တုန်းကလည်း အမေရိကန် ဒေါ်လာ သန်း ၁၀၀၀ တန် ဆေးရုံ စီမံကိန်းက ငွေ တွေ တစိတ်တပိုင်းပါတဲ့ ရုရှား တောင်ပိုင်းက အိမ်ခြံဝင်း တခုအကြောင်း ရိုက်တာသတင်းဌာနက ဖော်ပြပါတယ်။  အဲဒီအချိန်က ပူတင်ရဲ့ ပြောခွင့်ရက သတင်းဌာန တွေ့ရှိချက်နဲ့ ပတ်သက်တဲ့ မေးခွန်းတွေကို မတုန့်ပြန်ခဲ့ပါဘူး။  နာဗင်ညီနဲ့ သူ့ရဲ့ အဂတိ လိုက်စားမှု တိုက်ဖျက်ရေး ဖောင်ဒေးရှင်းဟာ ပူတင်ပိုင်တယ်ဆိုတဲ့ အမေရိကန် ဒေါ်လာ ၁ ဒသမ ၃၆ ဘီလီယံတန် ပင်လယ်နက် နန်းတော်လို့ ပြောတဲ့ အဆောက်အအုံ ရဲ့ သရီးဒီနဲ့ ပုံဖော်ထားတဲ့ အပြင်အဆင်တွေရဲ့ အသေးစိတ်နဲ့ ဓာတ်ပုံတွေ ကို ဖြန့်ချိ ခဲ့ကြပါတယ်။ ဒီဖြန့်ချိထားတဲ့ အကြောင်းအရာက စစ်မှန်လားဆိုတာ လွတ်လွတ်လပ်လပ် သီးခြား စစ်ဆေး အတည်ပြုနိုင်မှုတော့ မရှိသေးပါဘူး။
2 years Ago
Up